មន្ត្រីមន្ទីរថាមពលក្នុងស្រុកម្នាក់និយាយកាលពីម្សិលមិញថា ទំនប់វារីអគ្គិសនីស្ទឹងឫស្សីជ្រុំក្រោម កម្លាំង៣៣៨មេហ្គាវ៉ាត់ក្នុងខេត្តកោះកុង បានចាប់ផ្ដើមដំណើរការហើយ។
លោក ពេជ្រ ស៊ីយុន ប្រធានមន្ទីររ៉ែនិងថាមពលខេត្តកោះកុង បានមានប្រសាសន៍ថា ទំនប់វារីអគ្គិសនីនៅក្នុងស្រុកមណ្ឌលសីមានេះ បានដំណើរការសាកល្បងរយៈពេលប្រហែល១ខែមកហើយ ប៉ុន្តែថា ចំនួនថាមពលដែលផលិតបានមិនទាន់ត្រូវបានបញ្ជាក់ដោយក្រុមហ៊ុនចិនឈ្មោះ China Huadian ដែលទទួលខុសត្រូវសាងសង់ និងដំណើរការទំនប់នេះនៅឡើយទេ។
លោក ស៊ីយុន មានប្រសាសន៍ថា “ ទំនប់នេះបានដំណើរការសាកល្បងរយៈពេលជិត១ខែមកហើយ ប៉ុន្តែខ្ញុំមិនដឹងថា តើផលិតថាមពលបានប៉ុន្មាននៅឡើយទេ។ ទោះយ៉ាងណា ទីភ្នាក់ងារព័ត៌មានស៊ីនហួរបស់រដ្ឋាភិបាលចិនបានរាយការណ៍កាលពីម្សិលមិញថា ទំនប់ដែលចំណាយទឹកប្រាក់អស់៥០០លានដុល្លារនេះនឹងផ្គត់ផ្គង់អគ្គិ សនីចំនួន១៩០លានគីឡូវ៉ាត់ម៉ោងទៅឲ្យក្រុមហ៊ុនអគ្គិសនីកម្ពុជារបស់រដ្ឋ។
យោងតាមទីភ្នាក់ងារព័ត៌មានស៊ីនហួ បានឲ្យដឹងថា មន្ត្រីក្រុមហ៊ុនម្នាក់បានលើកឡើងថា ទំនប់វារីអគ្គិសនីដែលមានអាងស្តុកទឹកពីរ និងម៉ាស៊ីនភ្លើងបួនគ្រឿងនោះបានបញ្ចប់រយៈពេលប្រាំបួនខែមុនពេលកំណត់ ហើយ អាចផ្គត់ផ្គង់ថាមពលអគ្គិសនីបាន១ពាន់់លានគីឡូវ៉ាត់ម៉ោងក្នុងមួយឆ្នាំ។
កាលពីខែកុម្ភៈឆ្នាំមុន លោកនាយករដ្ឋមន្ត្រី ហ៊ុន សែន បានមានប្រសាសន៍ថា ការផ្ដោតទៅលើការសាងសង់ទំនប់វារីអគ្គិសនីនឹងជួយកាត់បន្ថយការពឹងផ្អែកលើការប្រើប្រាស់ប្រេង និងធានាឲ្យមានអគ្គិសនីប្រើប្រាស់នៅទូទាំងប្រទេសកម្ពុជាក្នុងតម្លៃថេរ។ នៅពេលនោះលោកបានមានប្រសាសន៍ថា ប្រទេសកម្ពុជាទទួលបានអគ្គិសនីប្រហែល២០០មេហ្គាវ៉ាត់ពីទំនប់វារីអគ្គិសនីរបស់ខ្លួនចំនួនបី។នៅពេលទំបន់វារីអគ្គិសនីស្ទឹងឫស្សីជ្រុំក្រោមដំណើរការពេញលេញ វានឹងធ្វើឲ្យថាមពលអគ្គិសនីពីទំនប់វារីអគ្គិសនីកើនឡើងជាងពីរដង៕សារុន