31 C
Phnom Penh

​ADB កាត់​បន្ថយ​ទំហំ​ផែនការ ដើម្បី​លុប​លាង​កំហុស​នៅកម្ពុជា​

ដោយ ឌឹ ខេមបូឌា ដេលី

បទវិភាគ

ផែនការ​ដែល​ធនាគារ​អភិឌ្ឍន៍​អាស៊ី​ហៅ​ កាត់​ថា ADB បាន​អនុម័ត​កាលពី​ពេល​ថ្មី​ៗនេះ ដើម្បី​លុប​លាង​កំហុស​របស់​ខ្លួន​ដែល​បាន​កើត​ឡើង​នៅ​ក្នុង​គ​ម្រោង​​ផ្លូវ​ដែក​ដែល​ត្រូវ​ចំណាយ​ប្រាក់​១៤៣លាន​ដុល្លារ​នោះ ហាក់​ដូចជាកាត់​បន្ថយ​អនុសាសន៍​របស់​ក្រុម​ការ​ងារពិនិត្យ​ដំណើរការ​អនុវត្ត​គម្រោង​របស់​ធនាគារ​នេះ​ផ្ទាល់​ ហើយ​អាច​នឹង​ជំរុញ​ឲ្យ​ប្រជាជន​ជាច្រើន​គ្រួសារ​ដែល​បាន​បាត់​បង់​ដី​ធ្លី​ដោយ​សារ​គម្រោង​នេះ ប្រឈម​នឹង​ការ​ចំណាយ​តាម​រយៈផែនការ​នេះទៀត​ផង​។​

ក្រុម​ការងារ​ត្រួត​ពិនិត្យ​ដំណើរការនៃការ​​អនុវត្ត​គម្រោង​ឯករាជ្យ​របស់​ធនាគារ​ ADB បាន​បន្ថែម​អនុសាសន៍​នៅ​ក្នុង​របាយការណ៍​មួយ​ដែល​បាន​បង្ហាញ​ពី​លទ្ធផល​នៃការ​ពិនិត្យ​​គម្រោង​ស្តារ​ប្រព័ន្ធ​ផ្លូវ​ដែក​ទ្រុឌទ្រោមរបស់​ប្រទេស​កម្ពុជា​។ របាយការណ៍​ដដែល​នោះ​បាន​បង្ហាញ​​ថា ធនាគារ​ ADB ទទួល​ការ​ស្តី​បន្ទោស​ថា បាន​បរាជ័យ​ក្នុង​ការ​ការពារ​ផល​ប្រយោជន៍​របស់​ប្រជាជនរាប់​រយ​ពាន់​គ្រួសារ​​ជា​ហេតុ​បណ្តា​លឲ្យ​ប្រជាជន​ទាំង​នោះ​រស់​នៅ​ក្នុង​ស្ថានភាព​កាន់​តែ​យ៉ាប់​យុឺន​ បន្ទាប់​ពី​ពួក​គាត់ត្រូវ​បាន​បង្ខំ​ឲ្យ​បោះ​បង់​ដី​ដោយ​ផ្នែក​ ឬ​ក៏​ទាំង​ស្រុង​របស់​ពួកគាត់​។

ក្រុមប្រឹក្សា​របស់​ធនាគារ​ ADB បាន​អនុម័ត​របាយកាណ៍​នោះ​ កាលពី​ចុង​ខែ​មុន​ គ្រាន់​តែ​បន្ទាប់​ពី​បាន​កាត់​បន្ថយ​អនុសាសន៍​ទាំង​នេះ​និង​បាន​ចេញ​សេចក្តី​សម្រេច​កាលពី​ថ្ងៃ​សុក្រ។​​​ អនុសាសន៍​មួយ​ចំនួន​ត្រូវ​បានកាត់​បន្ថយ​មុន​ពេល​របាយការណ៍​នោះត្រូវ​បាន​បញ្ជូន​ទៅ​ដល់​ក្រុម​ប្រឹក្សា​ភិបាល​របស់​​ធនាគារ​ ADB នេះ​បើ​យោងតាម​សេចក្តី​ព្រាង​ឯកសារ​ដំបូង​របស់​ធនាគារ​នេះ។

សេចក្តី​ព្រាង​ឯកសារ​នោះ​បាន​បង្ហាញ​ពី​សេចក្តី​អំពាវ​នាវ​ឲ្យ​ធនាគារ​ ADB ផ្តល់​ប្រាក់​បន្ថែម​សរុប​បី​លាន​ទៅ​បួន​លាន​ដុល្លារ​ ដើម្បី​សង​គ្រួសារ​ប្រជាជន​ដែល​រង​ផល​ប៉ះ​ពាល់​ដោយ​សារ​គម្រោង​ផ្លូវ​ដែក​ ពីព្រោះ​ធនាគារ​នេះបាន​ធ្វើ​ឲ្យមានកំហុស​ និង​ដើម្បី​យក​ប្រាក់​មក​ផ្គត់​ផ្គង់​ក្នុង​ប្រតិបត្តិការ​របស់​ខ្លួន​ផង​ដែរ។

សេចក្តី​ព្រាង​ឯកសារ​នោះ​មាន​ខ្លឹម​សារ​ថា “ដោយ​សារ​​​កង្វះ​សំណង​ដែល​បាន​កើត​ឡើង​ ត្រូវ​បាន​រក​ឃើញ​ថា ភាគ​ច្រើន​បណ្តា​ល​មក​ពី​​សកម្មភាព​មិន​អនុវត្ត​តាម​គោល​ការណ៍​របស់​ខ្លួន​ ធនាគារ​ ADB គួរ​តែ​ធានា​ឲ្យ​មាន​មូល​និធិ​​សម្រាប់​ប្រតិបត្តិការ​របស់​ខ្លួន​”។

របាយការណ៍​ដែល​ត្រូវ​បាន​បញ្ជូន​ទៅ​ដល់​ក្រុ​ម​ប្រឹក្សា​ភិបាល​ដែល​ជា​អ្នក​អនុម័ត​ បាន​លុប​ចោល​ចំណុច​នេះ​។ ​​ក៏ប៉ុន្តែ របាយ​ការណ៍​នោះនៅ​តែ​មាន​ការ​ណែនាំ​ឲ្យមាន​មូលនិធិ​បី​ទៅ​បួន​លាន​ដុល្លារ​បន្ថែម​ទៀត សម្រាប់​គ្រួសារ​ទាំង​នោះ​ ក៏​ប៉ុន្តែ ក៏​មាន​សេចក្តី​​លើក​ឡើង​ផង​ដែរថា ​មូលនិធិ​ទាំង​នេះគួរតែ​ជា​ប្រាក់​កម្ចី​សម្រាប់​រដ្ឋាភិបាល​។

នៅ​ក្នុង​របាយការណ៍​ដដែលនោះ ក៏​មាន​អនុសាសន៍​ដែល​ត្រូវ​បាន​អនុម័ត​ ឲ្យ​អំពាវ​នាវ​ឲ្យ​​ធនាគារ​ ADB ជួយ​ផ្តល់​​គ្រួសារ​ប្រជាជន ដែល​ត្រូវ​បាន​បង្ខំ​ចិត្ត​ទទួល​យក​ប្រាក់​កម្ចី​ថ្មី​ៗ​ផង​ដែរ​​ ដោយ​សារ​តែ​កំហុស​របស់​ធ​នាគារ​នេះ​​។ ក៏​ប៉ុន្តែ ដោយ​មិន​លុប​ចោល​ប្រាក់​កម្ចី​ទាំង​នោះ​ ធនាគារ​នេះ​គ្រាន់​តែ​ផ្តល់​ឲ្យ​ពួក​គាត់​​នូវ​ប្រាក់​កម្ចី​បន្ថែម​ទៀត​ ក្នុង​អត្រា​ការ​ប្រាក់​ទាប​ជាង​មុន​។ គ្រួសារ​ប្រជាជន​ទាំង​នោះ ក៏​នឹង​ត្រូវ​ប្រើប្រាស់​ប្រាក់​សំណង​ដែល​ពួកគាត់​ទទួល​បាន​ទាំង​នោះ​ផង​ដែរ ​ដើម្បី​ទូទាត់​ប្រាក់​កម្ចី​ឯកជន​របស់​ពួកគាត់។ គួរបញ្ជាក់​ថា ប្រាក់​សំណង​បន្ថែមដែល​ពួកគាត់​នឹង​ទទួល​បាន​នោះ ជា​ប្រាក់​សំណង​ចេញ​ពី​ប្រាក់​កម្ចី​ដែល​រដ្ឋាភិបាល​ត្រូវ​បាន​រំពឹង​ថា នឹង​ទទួល​យក​។

លោក ដេវីដ ប្រេដ (David Pred) ដែល​ធ្វើ​ការ​នៅ​អង្គការ​អភិវឌ្ឍន៍​អន្តរជាតិ​សម្រាប់​ទាំង​អស់​គ្នា​ (Inclusive Debwlopment International) ដែល​បាន​សហ​ការ​ដាក់​ពាក្យ​បណ្តឹង​ដែល​ជួយ​ជំរុញ​ឲ្យ​មាន​របាយការណ៍​នោះ​​ បានចាត់​ទុក​ប្រាក់​កម្ចី​ថ្មី​ៗ​សម្រាប់​លុប​លាង​កំហុស​ទាំង​នេះ​ជា​ប្រាក់​កម្ចីមិន​សម​ស្រប​។

លោក​បាន​មាន​ប្រសាសន៍​ថា “ មិន​មាន​ចំណុច​ទាក់​ទង​គ្នា​យ៉ាង​ច្រើន​រវាង​ការ​ទទួល​ស្គាល់​ជាផ្លូវ​ការ​របស់​់​ធនាគារ​ ADB ថា ប្រជា​ជន​បាន​រង​គ្រោះ​ជា​ទម្ងន់​ ដោយ​សារ​​ធនាគារ​នេះ​បរាជ័យ​ក្នុង​ការ​អនុវត្ត​តាម​គោល​ការណ៍​របស់​ខ្លួន​ បន្ទាប់​ពី​ខ្លួន​បាន​បដិសេធ​អស់​រយៈ​ពេល​ជាច្រើន​ឆ្នាំ​មក​ហើយ​ និង​ក្រុ​ម​ប្រឹក្សា​ភិ​បាល​ដែល​បច្ចុប្បន្ន​ទាម​ទារ​ឲ្យ​រដ្ឋាភិបាល​កម្ពុជា​ចំណាយ​ប្រាក់​ដើម្បី​ឲ្យ​គម្រោង​នេះដំណើរ​ការ​ទៅ​ដោយ​មាន​ការ​គោរព​ និង​អនុវត្ត​តាម​គោល​ការណ៍​”។

លោក​បាន​មាន​ប្រសាសន៍​បន្ថែម​ទៀត​ថា “ រឿង​នេះ​កាន់​តែ​មិន​សមស្រប​ទៅ​ទៀត​ ពី​ព្រោះ​គ្រួសារ​ប្រជាជន​ក្រីក្រ​ដែល​បច្ចុប្បន្ន​កំពុង​ជាប់​បំណុល​ ដោយ​សារ​តែ​ពួកគាត់​មិន​ទទួល​បាន​ប្រាក់​សំណង​សមរម្យ​នោះ​មិន​ទទួល​បាន​ការ​កាត់​ចោល​នូវ​បំណុល​នៅ​ក្នុង​គម្រោង​នេះ​ ហើយ​បែរ​ជា​ត្រូវ​បាន​ផ្តល់​ឲ្យ​នូវ​ប្រាក់​កម្ចី​ថ្មី​ដែល​មាន​លក្ខខណ្ឌ​ប្រសើរ​ជាង​មុនទៅ​វិញ។ បញ្ហានេះ​ពិត​ជា​បង្ក​ហានិភ័យ​​សម្រាប់​ពួកគាត់​បន្ថែម​ទៀត​”។

នៅ​ក្នុង​ចំណាត់​ការ​មួយ​ដែល​ផ្តល់​មូលនិធិ​មួយ​ផ្នែក​ម្តងៗ​​ ដើម្បី​ជួយ​គ្រួសារ​ប្រជាជន​ដែល​បាន​ផ្លាស់​ទី​លំនៅ​ និង​បាន​បាត់​បង់​ឱកាស​រក​ប្រាក់​ចំណូល ​ដោ​យ​​សារ​​ពួកគាត់​ត្រូវ​បាន​​បណ្តេញ​ចេញ​ ពួកគាត់​ត្រូវ​បាន​ផ្តល់​ឲ្យរួច​ទៅ​ហើយ​​នូវ​កម្ម​វិធី​មួយ​សម្រាប់​រក​ប្រាក់​ចំណូល​បន្ថែម​។ ពួកគាត់​អាច​ចុះ​ឈ្មោះ​ចូល​រៀន​វគ្គ​ជួស​ជុល​ម៉ូតូ​ ឬ​ក៏​ចិញ្ចឹម​មាន់​យក​លក់​ជាដើម​។

នៅ​ក្នុង​អនុសាសន៍​ដែល​ត្រូវ​បាន​បញ្ជូន​ទៅ​ដល់​ក្រុម​ប្រឹក្សា​ភិបាល​ធនាគារ​ ADB ក៏​មាន​សេចក្តី​ណែនាំ​ឲ្យ​មាន​ការ​បញ្ចូល​មូលនិធិ​ទៅ​ក្នុង​​កម្មវិធី​នោះ​ និង​ការ​​ធានា​ថា កម្មវិធី​នេះ​ដំណើរការ​ទៅ​បាន​រយៈពេល​ប្រាំ​ឆ្នាំ​បន្ថែម​ទៀត​។ អនុសាសន៍​អនុម័ត​ដោយ​ក្រុម​ប្រឹក្សា​ភិបាល​ធនាគារ​នេះ​បាន​លើក​ឡើង​ថា កម្មវិធី​នេះ​គួរតែ​ដំណើរការ​បន្ត​ទៀត​ ​ប៉ុន្តែ​ មិន​បាន​បញ្ជាក់​ពី​មូលនិធិ​បន្ថែម​ ឬក៏​ការ​ធានាថា កម្មវិធី​នេះអាច​ដំណើរការ​រយៈពេល​ប្រាំ​ឆ្នាំ​ទេ​។

មុន​ពេល​អនុម័ត​អនុសាសន៍​ទាំង​នេះក្រុម​ប្រឹក្សា​ភិបាល​ធនាគារ​ ADB ក៏​បាន​បន្ថែម​ខ្លឹម​សារ​មួយ​ថា ដំណោះ​ស្រាយ​សម្រាប់​ប្រជា​ជន​ដែល​រង​ផល​ប៉ះ​ពាល់​ដោយ​សារ​គម្រោង​ផ្លូវ​ដែក​ នឹង​កើត​មាន​ លុះ​ត្រា​តែ​មានការ​យល់​ព្រម​ពី​រដ្ឋាភិបាលកម្ពុជា​។ ចំណុច​នេះ​មាន​ន័យ​ថា រដ្ឋាភិបាល​កម្ពុជា​ប្រហែល​​ជា​ត្រូវ​បាន​ស្នើ​ឲ្យ​យល់​ព្រម​ទទួល​ប្រាក់​កម្ចី​មួយ​កញ្ចប់​ ដើម្បី​លុប​លាង​កំហុស​របស់​ធនាគារ​ ADB ។

កាលពី​ឆ្នាំ​២០១១ ធនាគារ​ពិភព​លោក (World Bank) បាន​សារភាព​ថា កំហុស​របស់​ខ្លួន​ក្នុង​គម្រោង​ធ្វើ​ប័ណ្ណ​កម្មសិទ្ធិ​ដី​ធ្លី​​ក្នុង​ប្រទេស​កម្ពុជា​ បាន​បង្ក​ផល​ប៉ះ​ពាល់​អវិជ្ជមានដល់​ប្រជាជន​ច្រើន​​​ពាន់​គ្រួសារ​ ដែល​ខ្លួន​គ្រោង​នឹង​ជួយ​ ក៏​ប៉ុន្តែ ក្រោយ​មក​ធនាគារ​នេះ​បាន​លើក​ឡើង​ថា ខ្លួន​អាច​ធ្វើ​​កិច្ច​ការ​តិច​តួច​​ដើម្បី​ជួយ​ប្រជាជន​ទាំង​នោះ​ ​ដោយ​សារតែ​រដ្ឋ​ភិ​បាល​មិន​​សហការ​។

ជំនួស​ឲ្យ​កិច្ច​សហ​ប្រតិបត្តិ​ការ​​រដ្ឋាភិបាល​បែរ​ជា​ចាំ​មើល​ធនា​គារ​ពិភព​លោក​បង្កក​ការ​ផ្តល់​ប្រាក់​កម្ចី​ថ្មី​ៗ​ដល់​ប្រទេស​កម្ពុជា។ រដ្ឋាភិបាល​មិន​ទាន់​បាន​ស​ម្រេច​​ថា តើ​ខ្លួន​ចង់​ជួយ​ធនាគារ​ ADB ក្នុង​ការ​លុប​លាង​កំហុស​នោះ​ទេ​។ ផែនការ​សកម្មភាព​លម្អិត​ជាង​នេះ​មួយ​ដែល​បង្ហាញ​យ៉ាង​ច្បាស់​ពី​របៀប​ដែល​ធនាគារ​ ADB និង​រដ្ឋាភិបាល​ នឹង​អនុវត្ត​តាម​អនុសាសន៍​ដែល​ធនាគារ​ ADB បានអនុម័ត​នោះមិន​ទាន់​ត្រូវ​បាន​អនុវត្ត​រហូត​ដល់​ដំណាច់​ខែមីនាឆ្នាំ​នេះ។
ទោះ​​បីជា​​យ៉ាង​​ណា​ កាល​​​ពី​សប្តាហ៍ន ​​លោក​​​ ​លី ​​បូ​រិ​ន ប្រ​ធា​ន​នា​យ​ក​​ដ្ឋាន​​ផ្លូវ​ដែក​​​កម្ពុជា​​ ​​បា​ន​​​ច្រាន​​ចោល​​កម្ចី​​​ផ្សេង​​​ទៀតសម្រាប់​​ ផ្តល់​​សំ​​ណង​​ថែ​ម​ទៀ​តឲ្យ​​​គ្រួសារ​​ប្រជា​​​ជន​​ទាំ​ង​​​នោះ​។

​លោក​ លី បូរិន បា​ន​​មានប្រសាសន៍ថា “​​​នរណា​​ ទៅ​ខ្ចី​​ប្រាក់ដ៏ច្រើន​ទាំង​នោះ ​ទៅ​ទូទាត់​សំណង ទៅ?”។ លោកស្រី កែរ៉េន ប៉ាល់​ម័រ (Karen​ ​Palmer)​អ្នក​នាំ​​ពាក្យ​​​ធនាគារ ADB ​​បា​ន​លើកឡើង​ថា​​កម្ចី​​នេះ​គ្រាន់​តែ​​​ជា​សំ​​ណូម​ពរមួ​យ​​​​ប៉ុណ្ណោះ​។ លោក​​ស្រី​​បានមាន​ប្រសាសន៍​ថា “[ក្រុមការ​ងារ​​ត្រួ​ត​ពិ​និត្យ​] ផ្តល់​​​​អនុ​សាសន៍​ថា ​ADB តម្រូវ​ឲ្យ​​រដ្ឋាភិ​បាល​​កម្ពុជា​​បង្កើត​កម្ម​​វិធី​សកម្ម​ភាព​កែ​តម្រូវ​មួយ​ដើម្បីផ្តល់​សំណង​ដល់​​គ្រួ​សា​រ​ប្រជា​ជន​រង​​ផល​​​ប៉ះ​ពាល់​​ប៉ុ​ណ្ណោះ។

ក្រុម​​ការ ងារ​នេះ​​សំ​ណូម​ពរ​ថា ​​ប្រ​​ភ​ព​​​​​មូ​ល​និធិ​សម្រាប់​កម្មវិ​ធី​​​បែប​នេះ ​គួរ​​​តែជាប្រាក់​​​កម្ចី​​​​​របស់​ ADB ​​ឬ​ប្រភព​​មូ​ល​​និធិ​​ផ្សេង​​​ទៀ​ត​ ​ប៉ុន្តែ​​​មិន​មែន​តម្រូ​វ​​ឲ្យជា​ប្រាក់​កម្ចី​​​​របស់​ធនាគារ​ ​ADB ទេ”។ ​ធនាគា​រ​ ADB ​មិន​​បា​ន​​​តប​នឹង​សំណួរ​​អំ​ពី​​​ថា​​​ ហេតុ​​អ្វី​​​បា​ន​​​ជា​​​អនុ​សាសន៍​នៅ​ក្នុ​ង​​របាយ​​​ការណ៍​នោះ​​ត្រូ​វ​​បា​ន​កាត់បន្ថយទេ​។
​លោក​ ​ថាច ​យ៉េ ​​ដែល​បាត់​បង់​លំនៅ​ដ្ឋាន​​របស់​លោក​ ក្នុ​ង​រា​ជ​ធា​នី​ភ្នំញ​​ដោ​យ​សារ​​គម្រោង​នេះ​ហើយ​ពេល​នេះ​​រស់​​នៅ​​ជាមួ​យ​គ្រួសារ​​​​របស់​​​គាត់​​នៅ​​​​ទី​កន្លែ​ង​ម​ួ​យ​​​​​ក្នុង​​ទី​តាំង​លំ​នៅ​ថ្មី​​​​របស់​គម្រោ​ង​នេះ​ ​បា​ន​លើក​ឡើង​ថា ប្រាក់​កម្ចី​​​បន្ថែម​មិន​​​ជា​​​​សូ​វ​ជា​ល្អអ​​ប៉ុន្មា​ន​​​ទេសម្រាប់​លោក​។

លោក​បាន​ឲ្យដឹង​​​ថា ​​សត្វ​​ទា និ​ង​មា​ន់​​ដែល​លោក​ទិញ​​​​​​ដោ​យ​ប្រើ​​កម្ចី​​៤៥០​​ដុល្លារ​​​ពី​​ធនាគារ ADB ​ដែល​ជា​ផ្នែក​មួយ​នៃ​កម្មវិធី​បង្កើន​​ប្រាក់ចំណូល​ឡើងវិញ​ បាន​ងាប់អស់​​ហើយ ដោយសារ​អាកាស​ធាតុ​មិន​អំណោយ​ផល​។ ​លោក​បាន​ខ្ចី​ប្រាក់​១.៦០០​ដុល្លារ​បន្ថែម​ពី​ធនាគារ​ ដើម្បី​យក​ទៅ​សង​ធនា​គារ ADB ​និង​ខិត​​ខំ​​ធ្វើ​កសិ​ដ្ឋាន​​ចិញ្ចឹម​​ជ្រូ​កជំ​នួស​​​​​វិញ​។

លោក​បាន​និយាយ​ថា “មាន់​ និងទាងាប់​អស់​ ដូច្នេះ​​ខ្ញុំ​មិនដឹង​​ជា​​ធ្វើ​​​​អ្វីទេ។ ​​​​លំបាក​​ណាស់​​នៅ​ទី​នេះ​។ ខ្ញុំ​​មិ​ន​​​អា​ច​​​ធ្វើ​ការ​​ងារ​ ឬ​ក៏​ធ្វើ់​​អ្វី​​​​ ដើម្បី​​រក​ប្រាក់​​បា​ន​​ទេ”។ លោក​​ ឃួន ព្រំ​សារិទ្ធ ​​ដែលបាន​​រើ​​​ទៅ​​នៅ​ទី​តាំ​ង​​លំ​នៅ​ថ្មី​​ដូ​ចគ្នា​​​នោះ និ​ងនៅ​​ជំពាក់ប្រាក់​គេ​ចំ​នួន​​២.៦០០​​ដុល្លារទៀត​ បន្ទាប់​ពី​បាន​ខ្ចី​ប្រាក់​គេ​ចំនួន​៦.០០០​ដុល្លារ​ ដែល​​​លោក​​យក​ទៅ​​សាងសង់​លំនៅ​ដ្ឋាន​ថ្មី​​​មួ​យ​​​ខ្នង ​បា​ន​លើកឡើង​ថា ​ធនា​គារ ADB ​គួរតែ​​​​​ទូទាត់​បំណុលដែលខ្លួន​បញ្ជាក់​ មិ​ន​មែ​ន​គ្រាន់​តែ​ផ្តល់​​​ឲ្យ​​​ប្រជាជន​នូ​វ​អត្រា​​ការ​​ប្រាក់​​ប្រសើរ​​​ជា​ង​មុន​​​នោះ​ទេ​។

​​គាត់​​បា​ននិយាយថា​​ “អ្វី​​ៗ​​​ជា​កំ​​ហុស​​​​​របស់​ធនាគារ​ ADB ។ ​​គេ​​បា​ន​សន្យាជាមួយ​ប្រជា​​​ពល​​រដ្ឋ​​នៅ​​​ទី​​​នេះ​ថា ​​ប្រជាជន​​នឹ​ង​​​មា​ន​​​ជី​វ​ភាព​ល្អ​​​ប្រសើរ ​ប៉ុន្តែ​​​ជី​វ​ភាព​ប្រ​​​ជា​ជន​​​កា​ន់​តែ​​យ៉ាប់​​យ៉ឺន​​ទៅ​ៗ បន្ទាប់​​ពី​រើ​មក​នៅ​ទី​នេះ​​”៕​សុធា

(រាយ​កា​រ​​​ណ៍​​បន្ថែម​ដោ​យ ផន បុប្ផា)

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស