លោក ហ៊ុន សែន ថា មុខ​​​របស់​​​​​​មេបក្ស​​​ប្រឆាំ​​​ងនៅ​​​ដដែល​​​ ដូច្នេះមុខ​​​របស់​​​លោក​​​ក៏នៅ​​​តែ​​​ដដែល​​​ដូច​​​គ្នា​​​

​​​លោកនាយក​​​រដ្ឋមន្ត្រី​​​ ហ៊ុន សែន បាន​​​មាន​​​ប្រសាសន៍​​​កាលពីម្សិលមិញ​​​ថា ការ​​​អំពាវ​​​នាវ​​​ឲ្យលោក​​​ចុះ​​​ចេញពីតំណែង​​​ និង​​​ឲ្យ​​​មាន​​​ “មុខ​​​មនុស្ស​​​” ថ្មី​​​ដឹកនាំប្រទេ​ស​​​​គឺ​​​ជា​​​ទង្វើ​​​លាក់​​​ពុត​​​ ពីព្រោះ​​​មុខ​​​របស់​​​អ្នករិះគន់​​​លោក​​​ក៏នៅតែ​​​មិន​​​ផ្លាស់​​​ប្ដូរ​​​ដែរ​​​។

លោក ហ៊ុន សែន ​​​មាន​​​ប្រសាសន៍​​​ទៀត​​​ថា ស្ថាន​​​ភាព​​​នយោបាយ​​​នៅ​​​ក្នុង​​​ប្រទេស​​​មាន​​​​​​​​​​​​សភាព​​​ធម្មតា​​​នៅពេល​​​នេះ​​​។ ​​​លោក​​​បាន​​​សួរ​​​ទៅ​​​ក្រុមនិស្សិត​​​នៅ​​​ក្នុង​​​ពិធី​​​ប្រគល់​​​សញ្ញាបត្រ​​​មួយ​​​នៅ​​​កោះពេជ្រ​​​​​​ក្នុង​​​រាជ​​​ធានីភ្នំពេញថា “ពួកគេ​​​និយាយ​​​ពី​​​មុខ​​​ដដែល​​​ៗ​​​​​​។ ប្រសិន​​​បើ​​​ខ្ញុំ​​​មាន​​​មុខ​​​ដដែល​​​ៗ​​​ តើ​​​វា​​​យ៉ាង​​​ម៉េច​​​?”។

សំដៅ​​​ដល់​​​អ្នករិះគន់​​​បន្តុះ​​​បង្អាប់​​​លោក ដែល​​​លោក​​​មិន​​​បញ្ចេញឈ្មោះ ប៉ុន្តែ​​​ទំនង​​​ជា​​​សំដៅ​​​ដល់​​​​​​លោក សម រង្ស៊ី មេដឹកនាំ​​​គណ​​​បក្ស​​​​​​​​​ប្រឆាំង​​​ លោក​​​នាយក​​​រដ្ឋមន្ត្រី​​​បាន​​​មាន​​​ប្រសា​​​សន៍​​​ថា “ខ្ញុំនិយាយ​​​ឲ្យ​​​ឡូហ្ស៊ិកទៅ​​​ចុះ មុខ​​​របស់​​​​​​​​​គាត់​​​ក៏ដដែល​​​ៗដែរ​​​​​​ ដូច្នេះ​​​មុខ​​​របស់​​​ខ្ញុំ​​​ក៏នៅ​​​តែ​​​ដដែល​​​ៗដែរ​​​”។

អំឡុង​​​បាតុកម្ម​​​រយៈពេល​​​១៥​​​ថ្ងៃ​​​​​​ កាលពី​​​ខែ​​​ធ្នូ និង​​​ខែ​​​មករា អ្នកគាំទ្រ​​​គណបក្ស​​​ប្រឆាំង​​​រាប់​​​​​​ម៉ឺន​​​នាក់​​​បាន​​​ហែក្បួន​​​តាម​​​ផ្លូវ​​​នានា​​​ក្នុង​​​រាជ​​​ធានីភ្នំពេញ ដើម្បី​​​អំពាវ​​​នាវ​​​ឲ្យ​​​លោក ​​​នាយក​​​រដ្ឋមន្ត្រី ហ៊ុន សែន ​​​ដែល​​​បាន​​​កាន់​​​អំណាច​​​ចាប់​​​តាំង​​​ពី​​​ឆ្នាំ​​​១៩៨៥​​​មក ចុះ​​​ចេញ​​​ពីតំណែង​​​។ លោក សម រង្ស៊ី ​​​ដែលជា​​​​​​ប្រធាន​​​​​​​​​​​​គណបក្ស​​​សង្គ្រោះ​​​​​​ជាតិក៏​​​បាន​​​ដឹកនាំ​​​គណ​​​បក្ស​​​ប្រឆាំង​​​ដ៏ធំមួយ​នេះ​​​អស់​​​រយៈ​​​ពេល​​​ជិត​​​ពីរ​​​ទសវត្សរ៍​​​មក​​​ហើយ​​​ដែរ​​​។

លោក ហ៊ុន សែន ក៏បាន​​​ប្រាប់​​​និស្សិត​​​បញ្ចប់​​​​​​​​​ការ​​​សិក្សា​​​ទាំងនេះ​​​ដែរ​​​ថា ស្ថាន​​​ភាព​​​នយោ​​​បាយ​​​​​​​​​​​​បច្ចុប្បន្នដែល​​​រួម​​​មាន​​​បម្រាម​​​​​​មិន​​​ឲ្យ​​​ប្រមូល​​​ផ្ដុំគ្នា​​​ជាសាធារណៈ និង​​​​​​ការ​​​មាន​​​តែ​​​គណបក្ស​​​ប្រជា​​​ជន​​​កម្ពុជា​​​នៅ​​​ក្នុង​​​សភា​​​អំឡុង​​​ពេល​​​គណ​​​​​​​​​បក្ស​​​​​​ប្រឆាំង​​​​​​កំពុង​​​ធ្វើ​​​ពហិការ​​​នោះថាធម្មតា​​​។

លោក​​​នាយក​​​រដ្ឋមន្ត្រី​​​​​​បាន​​​មាន​​​ប្រសាសន៍​​​​​​បន្ថែម​​​ទៀត​​​ថា “វា​​​ធម្មតា​​​។ ព្រះមហា​​​ក្សត្រ​​​​​​​​​យាង​​​ទៅ​​​សួរ​​​សុខ​​​ទុក្ខ​​​ប្រជា​​​រាស្ត្រ​​​​​​ នាយក​​​​​​​​​រដ្ឋ​​​មន្ត្រី​​​ធ្វើការ​​​ធម្មតា​​​​​​។ រដ្ឋម​ន្ត្រី​ធ្វើការ​​​ធម្មតា​​​ ហើយសាលា​​​រៀន​​​ក៏​​​បើក​​​បង្រៀនធម្មតា​​​ អ្វី​​​ៗ​​​​​​​​​គឺធម្មតា​​​ទាំង​​​អស់​​​”។ លោក ហ៊ុន សែន ក៏​​​មានប្រសាសន៍​​​លេង​​​សើច​​​ដែរក្នុង​​​ការ​​​ការ​​​ពារ​​​ការ​​​សម្រេ​ច​​​របស់​​​លោកកាលពីខែ​​​ធ្នូ ដើម្បីដំឡើង​​​ប្រាក់​​​ខែ​​​គោល​​​ក្នុង​​​ឧស្សាហកម្ម​​​កាត់​​​ដេរ​​​ដល់​​​១០០​​​ដុល្លារ​​​ ថ្វីបើ​​​កម្មករ​​​ដែលធ្វើ​​​កូដកម្ម​​​ទាមទារ​​​ដំឡើង​​​ប្រាក់​​​ខែ​​​ដល់​​​១៦០​​​ដុល្លារ​​​ក៏ដោយ។

លោក​​​ប្រាប់​​​និស្សិត​​​ទាំង​​​នេះថា មាន​​​ស្ត្រី​​​​​​​​​​​​ចំណាស់​​​ម្នាក់​​​លក់​​​កាហ្វេ​​​ និង​​​ចំណីអាហារ​​​​​​។ គាត់គាំទ្រ​​​បាតុកម្ម​​​ ហើយគាត់​​​តែង​​​តែ​​​យក​​​អាហារ​​​ទៅ​​​ឲ្យ​​​បាតុករ​​​។ ប៉ុន្តែ​​​នៅ​​​ពេល​​​គាត់​​​​​​ត្រឡប់​​​ [ទៅហាង​​​របស់​​​គាត់] វិញ បុគ្គលិក​​​​របស់​​​គាត់​​​បានទាម​​​ទារ​​​ដំឡើង​​​ប្រាក់​​​ខែ​​​ដល់​​​១៦០​​​ដុល្លារ​​​។ ពេល​​​នោះ​​​គាត់​​​និយាយ​​​ថា ‘ ខ្ញុំ​​​នឹង​​​ឈប់​​​ [បាតុកម្ម​​​]  ទៀត​​​ហើយ​​​”។

លោក យឹម សុវណ្ណ អ្នកនាំពាក្យ​​​គណ​​​បក្ស​​​សង្គ្រោះជាតិ​​​បានមានប្រសាសន៍​​​ថា សុន្ទរ​​​កថា​​​របស់​​​លោក​​​នាយក​​​រដ្ឋមន្ត្រី​​​ស្ដីពីការ​​​ដំឡើង​​​ប្រាក់​​​ខែ​​​គោល​​​គឺ​​​ខុស​​​ចំណុច​​​ទាំង​​​ស្រុង​​​។ លោក​​​បាន​​​មាន​​​ប្រសាសន៍​​​ថា “ពួកគាត់​​​​​​ធ្វើ​​​បាតុកម្ម​​​ទាម​​​ទារ​​​ដំឡើង​​​ប្រាក់​​​ខែ​​​១៦០​​​ដុល្លារ​​​ ពីព្រោះ​​​ពួកគាត់​​​មិនអាច​​​រស់​​​​​​បានទេ​​​ប្រសិន​​​បើ​​​ប្រាក់​​​ខែ​​​តិច​​​ជាង​​​នេះ​​​។ ពួកគាត់​​​​ត្រូវ​​​តែ​​​ទាម​​​ទារ​​​ការ​​​ដំឡើង​​​ប្រាក់​​​ខែ​​​របស់​​​ពួក​​​គាត់​​​ដែល​​​អាច​​​រស់​​​បាន​​​”៕ សុខុម