32 C
Phnom Penh

អង្គការ​ក្រៅ​រដ្ឋាភិបាល​បារម្ភពីការ​សម្លាប់ និង​ការ​ធ្វើអត្តឃាត​ដោយ​សារ​អំពើហិង្សា​ក្នុង​​គ្រួសារ

ដោយ ឌឹ ខេមបូឌា ដេលី

បទវិភាគ

អង្គ​ការ​សិទ្ធិមនុស្សក្នុង​ស្រុក​អាដ​ហុក​បាន​លើក​ឡើង​ក្នុង សេចក្តីថ្លែង​ការណ៍ មួយ​​កាល​ពីម្សិលមិញ ថា មនុស្ស​យ៉ាង​តិច​១១​នាក់​បាន​ស្លាប់​អំឡុង​ជម្លោះក្នុង​គ្រួសារ​ ឬ​ដោយ​​​សារ​​​ការ​ធ្វើ​អត្តឃាត​​បន្ទាប់​​ពី​ទទួល​រង​អំពើ​ហិង្សា​ក្នុង​គ្រួសារ​ក្នុង​​រយៈពេល​ពីរ​ខែ​​មក​​នេះ​។

អង្គការ​អាដហុក​ឲ្យ​ដឹង​ថា មាន​ជន​ល្មើស​​​តែ​ពីរនាក់​ប៉ុណ្ណោះ​ត្រូវ​បាន​ចោទ​ប្រកាន់​ក្នុង​បទ​ល្មើស​ទាំង​នេះ​ដោយ​បង្ហាញ​ពី​កង្វះ​ការ​អនុវត្ត​ច្បាប់​។ ​អង្គការ​អាដ​ហុក​បាន​ឲ្យដឹង​ទៀត​ថា “​​​អង្គ​​​​​​ការ​អាដហុក​បារម្ភ​យ៉ាង​ខ្លាំង​អំពី​អត្រា​កើន​ឡើង​នៃការសម្លាប់​ ការធ្វើ​អត្ត​ឃាត​ដោយ​សារ​អំពើ​ហិង្សា​ក្នុង​គ្រួសារ​ ជា​ពិសេស​ទាក់​​​ទង​នឹង​ករណី​អំពើ​ហិង្សា​ធ្ងន់​ធ្ងរ​ដែល​បាន​កើត​ឡើង​​ក្នុង​​រយៈពេល​ពីរ​ខែ​មក​​នេះ​”។

សេចក្តីថ្លែង​ការណ៍​នេះ​​ឲ្យដឹង​ទៀត​ថា “​​​ស្ថាន​ភាព​នេះ​បង្ហាញ​ពី​បរាជ័យ​របស់​​រដ្ឋា​​​ភិបាល​ទាក់​ទង​នឹង​ការ​​ការ​ពារ​សុខុ​មាល​​ភាព​សង្គម​ សិទ្ធិ​មនុស្ស​ សិទ្ធិ​ស្ត្រី និង​កុមារ​”។ ក្នុង​ឆ្នាំ​២០១៣​​ ជន​ល្មើស​ម្នាក់​​ត្រូវ​បាន​ចាប់​​​ខ្លួន​​​​​​​នៅ​ក្នុង​​ករណី​​ប្រើ​អំពើ​ហិង្សា​ក្នុង​គ្រួសារ​​ប្រហែល​​មួយ​ភាគ​បួន​​​ករណី។​អង្គការ​អាដ​ហុក​​លើ​ក​ឡើង​ថា “ នៅក្នុង​ករណី​ភា​គ​ច្រើន​មាន​ការ​សម្រប​សម្រួល​ពី​អាជ្ញាធរ​មូល​ដ្ឋាន”។

អង្គការ​សិទ្ធិមនុស្ស​នេះ​លើកឡើង​​អនុ​សាសន៍​​ប្រាំមួយចំណុច​សម្រាប់​ឲ្យ​រដ្ឋាភិបាល​ដោះស្រាយ​អំពើ​ហិង្សា​ក្នុង​គ្រួសារ​ឲ្យ​បាន​​ប្រសើរ​ឡើង​រួម​​​​​​មាន​ការ​ធ្វើ​អន្តរាគមន៍​ឲ្យ​បាន​ឆាប់​ពី​អាជ្ញា​​​ធរ​ ការ​បង្កើត​ខ្សែ​ទូរស័ព្ទ​ពិសេស​ និង​​​សេវា​​​កម្ម​​​​​​​ពិគ្រោះ​យោបល់​ដល់​ជន​រង​គ្រោះ​ និង​ការ​ដាក់​​​​​​​​​​ទោស​ជន​ល្មើស​ជំនួស​ការ​ព្យា​យាម​សម្រប​​​​​​​​​​សម្រួល​រវាង​ពួក​គេ​និង​ជន​រង​គ្រោះ​។

អង្គការ​អាដ​ហុក​ លើក​ឡើង​ថា “រាជ​រដ្ឋា​​​ភិបាល​​គួរ​ដាក់​ទោស​ និង​ដាក់​វិន័យ​ឲ្យ​បាន​​​​​​​​​​តឹង​​​រ៉ឹង​ដល់​មន្ត្រី​ណា​ដែល​មិន​បាន​បំពេញ​​​​​​​កាតព្វ​​​កិច្ច​របស់​ខ្លួន​ចំពោះ​សង្គម​​ដោយ​បណ្តោយ​​​​​​​​​​​​​​​​​​​​​​ឲ្យមាន​អំពើ​ហិង្សា​ក្នុង​គ្រួសារ​កាន់​តែ​ធ្ងន់​ធ្ងរ​ទៅ​ៗ​ដែល​ជា​រឿយ​ៗ​បណ្តាល​ឲ្យមាន​ការ​ស្លាប់​ ឬការ​ធ្វើ​អត្ត​ឃាត​ដោយសារ​មិន​បាន​ដោះ​ស្រាយ​ ឬ​ស៊ើប​អង្កេតហេតុការណ៍ទាំង​នេះ​”។

នៅក្នុង​ករណី​មួយ​​ក្នុង​ចំណោម​ករណី​ជា​ច្រើន​ដែល​អង្គការ​អាដ​ហុក​បាន​រាយ​ការណ៍​នោះ ស្ត្រី​អាយុ​៣៤​ឆ្នាំ​ម្នាក់​មក​ពី​ខេត្ត​ព្រះ​វិហារ​បាន​ជ្រមុជ​ទឹក​កូន​ចុង​របស់​ខ្លួន​ក្នុង​ស្រះ​​​ដើម្បី​សងសឹក​នឹង​ប្តី​របស់​ខ្លួន​ដែល​បាន​វាយ​​​ដំគាត់​រៀង​រាល់​ថ្ងៃ​។ ក្នុង​ករណី​មួយទៀត​ ស្ត្រីបុគ្គលិក​កាស៊ីណូ​ ណា​ហ្គាវើល​ម្នាក់​ត្រូវ​ប្តី​ច្របាច់​ក​សម្លាប់ បន្ទាប់​​​ពីមាន​ជម្លោះ​ក្នុង​គ្រួសារ​ ហើយ​​​​​​​​​​បុរស​ជាប្តី​បាន​ចង​ក​សម្លាប់​ខ្លួន​ ដោយ​ប​ន្សល់​ទុក​កូន​ស្រី​ម្នាក់​ និង​កូន​ប្រុស​ពីរ​នាក់​ឲ្យក្លាយ​ជាក្មេង​កំព្រា​។

នៅក្នុង​ខេត្ត​ក្រចេះ​កាល​ពីខែ​មករា​ ស្ត្រី​ម្នាក់​បាន​ព្យាយាម​ធ្វើ​អត្ត​ឃាត​ដោយ​ដុត​ខ្លួន​ខណៈនាង​អស់​សង្ឃឹម​ដោយ​សារការ​ប្រចណ្ឌ ​​​​​​និងការ​រំលោភ​បំពាន​ ហើយ​ក្នុង​ខេត្ត​កំពង់​ស្ពឺ​ឯណោះវិញ​ស្ត្រី​ម្នាក់​បាន​សម្លាប់​ប្តី​​របស់​ខ្លួន​ដោយ​យក​សាំង​ចាក់​​​ដុត​សម្លាប់​​ប្តី​​​​បន្ទាប់​ពី​មាន​ជម្លោះ​រឿង​លុយកាក់​៕សារុន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស