28 C
Phnom Penh

ហត្ថលេខា​របស់​រដ្ឋមន្ត្រី​ក្រសួង​អប់​រំ​នឹងលែង​​មាន​នៅ​លើ​សន្លឹក​សញ្ញាបត្រ​កម្រិត​ឧត្តម​ទៀត​ហើយ​

ដោយ ឌឹ ខេមបូឌា ដេលី

បទវិភាគ

មន្ត្រី​បាន​ឲ្យដឹងកាលពី​ម្សិលមិញ​​​ថា ​រដ្ឋ​មន្ត្រី​ក្រសួង​អប់​រំ​ យុវជន និង​កីឡា នឹង​លែង​​​​ចុះ​​​​ហត្ថលេខា​មាន​សុពល​ភាព​ នៅ​លើ​សន្លឹក​សញ្ញាបត្រ​កម្រិត​សាក​លវិទ្យាល័យនៅក្នុង​ប្រទេស​កម្ពុជា​ទៀត​ហើយ​ ហើយ​គ្រិះ​ស្ថាន​អប់រំ​នានានឹង​ត្រូវ​បាន​ត្រួត​ពិនិត្យ​ និង​ទទួល​ស្គាល់​យ៉ាង​ត្រឹម​ត្រូវ​ ដើម្បី​ឲ្យ​វិស័យ​អប់​រំ​មាន​គុណ​ភាព​។

​មន្ត្រី​​មួយ​រូប​នៅ​ក្រសួង​អប់រំ យុវជន​ និង​កីឡា បាន​ឲ្យ​ដឹង​ថា សាកល​វិទ្យាល័យ​ដែល​មាន​វគ្គ​សិក្សា​ និង​សញ្ញាបត្រ​មិន​សមស្រប​តាម​ស្តង់​ដារ​អប់​រំ នឹងត្រូវ​បាន​បង្ខំ​ឲ្យបិទ​ទ្វា​លែង​ដំណើរការ​ទាំង​ស្រុង​ ឬ​ក៏​ត្រូវ​បាន​បញ្ជា​​ឲ្យ​ចាត់​វិធានការ​ដោះ​ស្រាយ​យ៉ាង​ហ្មត់​ចត់​ ដើម្បី​បង្កើន​កម្រិត​នៃ​ការ​បង្រៀន​នៅ​សាកល​​វិទ្យាល័យ​ទាំង​នោះ​។

លោកនាយករដ្ឋមន្ត្រី ហ៊ុន សែន បាន​លើក​ឡើង​នៅ​ក្នុង​សុន្ទរកថា ថ្លែង​ទៅកាន់​និស្សិត​ជាង​៤.០០០នាក់​មក​ពី​សាកល​វិទ្យាល័យ​ជាតិ​គ្រប់​គ្រង​ អំឡុង​ពិធី​មួយ​ប្រារព្ធ​នៅ​សាល​សន្និសីទ​កោះ​ពេជ្រ​ក្នុង​រាជធានី​ភ្នំពេញថា​ “ចាប់​ពី​ពេល​នេះ​តទៅ​ រដ្ឋមន្ត្រី​ក្រសួង​អប់​រំនឹង​មិន​ចុះ​ហត្ថលេខា​លើ​សញ្ញាបត្រ​កម្រិត​សាកល​វិទ្យាល័យ​ដូចមុន​ទៀត​ទេ”។

លោក ហ៊ុន សែន បាន​មាន​ប្រសាសន៍​បន្ត​​ទៀត​ថា “សាកលវិទ្យាល័យ​ទាំង​អស់​ត្រូវ​តែ​ចុះ​ហត្ថលេខា ​[លើ​សញ្ញាបត្រ​របស់​ខ្លួន​ផ្ទាល់​]​ហើយ​ត្រូវ​ទទួល​ខុស​ត្រូវ​ចំពោះ​គុណភាព​អប់​រំ​​​​ដោយ​ខ្លួន​ឯង​”។ លោក​បាន​ពន្យល់​ថា ចាប់​ពី​ពេល​នេះ​តទៅ​ សាកល​វិទ្យា​ធិការ​នឹង​ចុះ​ហត្ថ​លេខា​លើ​សញ្ញាបត្រ​ដោយ​ខ្លួន​ឯង​។
លោក ហ៊ុន សែន បាន​មាន​ប្រសាសន៍​បន្ត​ទៀត​ថា “ ប្រសិន​បើ​ [និស្សិត​] ដាក់​ពាក្យ​ធ្វើ​ការ​ ប៉ុន្តែ មិន​ត្រូវ​បាន​ទទួល​យក​ គេលែង​អាច​បន្ទោស​បញ្ហា​នេះ​មក​លើ​រដ្ឋមន្ត្រី​ក្រសួង​អប់​រំ​ទៀត​ហើយ​”។ ក៏​ប៉ុន្តែ លោក​មិន​បាន​ធ្វើ​អត្ថា​ធិប្បាយ​លម្អិត​ជាង​នេះ​ទេ។

លោក រស់ សាលីន ប្រធាន​ខុទ្ទកាល័យ​ទើប​តែង​តាំង​ថ្មី​​របស់​លោក ហង់ ជួន​ណារ៉ុន រដ្ឋ​មន្ត្រី​ក្រសួង​ អប់​រំ យុវជន និងកីឡា បាន​លើក​ឡើង​ថា ការ​ប្រគល់​ការ​ទទួល​ខុស​ត្រូវ​ចំពោះ​ការ​ចុះ​ហត្ថលេខា​លើ​សញ្ញាបត្រ​ នឹង​ជំរុញ​ឲ្យ​សាកល​វិទ្យាល័យ​ទាំង​១០៤​នៅ​ក្នុង​ប្រទេស​កម្ពុជា​ខិត​ខំ​បង្កើន​កម្រិត​ស្តង់​ដារ​របស់​ខ្លួន​ ពី​ព្រោះ​ក្រសួង​ អប់​រំ យុវជន​ និងកីឡា​ ចាប់​ផ្តើម​វាយ​តម្លៃ​គុណ​ភាពនៃការ​​អប់​រំ នៅ​តាម​គ្រិះ​ស្ថាន​នានា​ហើយ​។ លោកបាន​មាន​ប្រសាសន៍​ថា “ឥឡូវ​នេះ​យើង​ត្រូវ​តែ​វាយ​តម្លៃ​កម្មវិធី​សិក្សា​ និង​អភិ​បាល​កិច្ច​នៅក្នុង​សាកល​វិទ្យាល័​យ​នីមួយ​ៗ​ ដើម្បី​ធានា​ថា សាកល​វិទ្យាល័យ​ទាំង​នោះ​ពិត​ជា​ឆ្លើយ​តប​ទៅ​នឹង​ស្តង់ដារ​ដែល​អនុញ្ញាត​ឲ្យ​ពួកគេ​ចុះ​ហត្ថលេខា​លើ​សញ្ញាបត្រ​បាន​”។

លោកបាន​​​បន្ត​​​​ថា “បើ​សិន​ជា​ពួកគេ​មិន​អនុវត្ត​តាម​ទេ​ពួកគេ​អាច​នឹង​ត្រូវ​បិទ​ទ្វា​។ នេះ​គឺ​ជា​ចំណុច​ចាប់​ផ្តើម​នៃការ​រៀប​ចំ​ឡើង​វិញ​នៃ​ប្រព័ន្ធ​អប់​រំ​ ហើយ​យើង​នឹង​ជំរុញ​ឲ្យ​គ្រិះ​ស្ថាននានា​ធានា​ថា និស្សិត​របស់​ពួកគេ​បាន​ត្រៀម​ខ្លួន​សម្រាប់​ទីផ្សារ​ការងារ​អន្តរជាតិ​”។ លោក ​បាន​ឲ្យ​ដឹង​ទៀត​ថា គណៈ​​​កម្មាធិការ​ទទួល​ស្គាល់​គុណ​ភាព​អប់​រំ​កំពុងត្រូវ​បាន​បង្កើត​ឡើង​ ក៏​ប៉ុន្តែ លោកមិន​បាន​ប្រាប់​ពីកាល​បរិច្ឆេទ​ចាប់​ផ្តើម​ទេ​។

ស្រប​ពេល​ដែលមាន​ការ​ដឹង​ឮ​អំពី​អំពើ​ពុក​រលួយទូទៅ​​នៅ​ក្នុង​វិស័យ​អប់​រំ​​ បញ្ហា​ខ្វះ​ការ​ត្រួតពិនិត្យ​ឲ្យ​បាន​ត្រឹម​ត្រូវ​លើ​ដំណើរការ​នៃការ​ទទួល​ស្គាល់​គុណ​ភាព​អប់​រំ​ បាន​បណ្តាល​​ឲ្យ​មាន​សំឡេង​រិះ​គន់​ថា សាកល​វិទ្យាល័យ​មួយ​ចំនួន​គ្រាន់​តែ​ជា​កន្លែង​ធ្វើ​សញ្ញាបត្រ​ សម្រាប់​ចេញ​ឲ្យ​អ្នកដែល​ចង់​បង់​ថ្លៃ​សិក្សា​។

លោក អ៊ុំ សំភា អាយុ​២៤ឆ្នាំ​ ដែល​ទើប​តែ​រៀន​ចប់​ពី​សាកល​វិទ្យាល័យ​ធនធាន​មនុស្ស​ក្នុង​រាជធានី​ភ្នំពេញ បាន​លើក​ឡើង​ថា និស្សិត​នឹង​នៅ​តែ​ចង់​ឲ្យ​មាន​​ហត្ថលេខា​របស់​រដ្ឋមន្ត្រី​ក្រសួង​អប់​រំ យុវជន និងកីឡា នៅ​លើ​សញ្ញា​បត្រ​របស់​ពួកគេ​។ លោក​បាន​​និយាយ​ថា “ក្រុម​​​​​​​​​​​​​ហ៊ុន​មួយ​ចំនួន​ប្រហែល​ជា​មិន​ទទួល​យក​និស្សិត​ដែល​មាន​សញ្ញាបត្រ​​មិន​មាន​​ហត្ថ​​​លេ​​​ខា​របស់​ក្រសួង​អប់​រំ​ទេ”​។ លោកបាន​បន្ត​ថា បើ​មិន​មាន​ហត្ថលេខា​របស់​រដ្ឋមន្ត្រី​ក្រសួង​អប់​រំទេ​នោះ​ អនា​​​គត​​​និយោជក​ប្រហែល​​​​​​​ជា​មិន​​​​ ទុក​ចិត្ត​គុណ​ភាព​សញ្ញាបត្រ​សាកល​វិទ្យា​ល័យ​ដែល​មានតែ​ហត្ថលេខា​របស់​សាកល​វិទ្យា​ធិការ​នៅឯ​សាកល​វិទ្យាល័យ​ដែល​ផ្តល់​សញ្ញា​​​បត្រ​នោះ​ទេ។ លោក​ សំភា បាន​បន្ត​ទៀត​ថា  “ក្រុម​ហ៊ុន​ទាំង​នោះ​​នឹង​បារម្ភ​ថា និស្សិតបាន​ស៊ុម​គ្រលុំ​ជា​មួយ​សាកល​វិទ្យាល័យ​ ដើម្បី​ទទួល​បាន​ពិន្ទុ​ខ្ពស់​”៕ សុធា​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស