កាលពីម្សិលមិញ សាលាឧទ្ធរណ៍បដិសេធមិនដោះលែងកម្មករ និងសកម្មជន២១នាក់ដែលត្រូវបានចាប់ខ្លួនដាក់ពន្ធនាគារកាលពីខែមុន បន្ទាប់ពីមានការបង្ក្រាបដោយហិង្សារបស់រដ្ឋាភិបាលទៅលើការតវ៉ាទាមទារដំឡើងប្រាក់ខែគោលរបស់កម្មកររោងចក្រកាត់ដេរនោះឲ្យនៅក្រៅឃុំឡើយ។
តំណាងមកពីសហជីពកម្មករកាត់ដេរចំនួនប្រាំបួនមានគម្រោងជួបជុំគ្នានៅថ្ងៃនេះដើម្បីរៀបចំធ្វើកូដកម្មជាការឆ្លើយតបទៅនឹងការបដិសេធមិនដោះលែងអ្នកជាប់ឃុំទាំង២១នាក់ឲ្យនៅក្រៅឃុំ រីឯមេធាវីរបស់អ្នកជាប់ឃុំទាំង២១នាក់បាននិយាយថា ពួកគេនឹងប្តឹងសាទុក្ខទៅតុលាការកំពូលនៅសប្តាហ៍នេះ។ គ្មាននរណាម្នាក់ក្នុងចំណោមមនុស្សទាំង២១នាក់បានមកចូលរួមសវនាការសុំនៅក្រៅឃុំនេះទេ។
លោក ញួង ថុល ចៅក្រមប្រធានក្រុមប្រឹក្សាជំនុំជម្រះមានប្រសាសន៍ថា “យើងបានសម្រេចតម្កល់សាលក្រមរបស់សាលាដំបូងរាជធានីភ្នំពេញ”។
កាលពីខែមុន សាលាដំបូងរាជធានីភ្នំពេញបានសម្រេចមិនដោះលែងឲ្យនៅក្រៅឃុំមនុស្សទាំង២១នាក់ដែលមិនទាន់បានបើកសវនាការជំនុំជម្រះនេះទេ ដោយលើកឡើងថា ពួកគេអាចបង្កភាពចលាចលក្នុងសង្គម និងត្រូវការសាកសួរពួកគេបន្ថែមទៀត។
កាលពីថ្ងៃសុក្រ ចៅក្រមសាលាដំបូងរាជធានីភ្នំពេញម្នាក់បានដោះលែងអ្នកជាប់ឃុំពីរនាក់ក្នុងចំណោមអ្នកជាប់ឃុំទាំងនោះរួមទាំងឈ្មោះ យ៉ុន ជា អាយុ១៧ឆ្នាំដែលជាអនីតិជនតែម្នាក់គត់នៅក្នុងចំណោមអ្នកជាប់ឃុំទាំង២៣នាក់នេះ។
អង្គការសិទ្ធិមនុស្សក្នុងស្រុក និងអន្តរជាតិបានស្នើសុំឲ្យរដ្ឋាភិបាលគោរពសិទ្ធិមនុស្សទាំង២៣នាក់ ដែលមិនបានទទួលការគាំពារសុខភាពគ្រប់គ្រាន់ និងមិនបានជួបមេធាវី និងសមាជិកគ្រួសាររបស់ខ្លួន។
អ្នកតវ៉ាមួយក្រុមមានគ្នាប្រហែល១០០នាក់ ដែលមានព្រះសង្ឃ និងសមាជិកគ្រួសាររបស់អ្នកជាប់ឃុំទាំង២១នាក់ផង បានជួបជុំគ្នានៅខាងក្រៅតុលាការកាលពីព្រឹកម្សិលមិញ នៅមុនពេលចៅក្រមចេញសេចក្តីសម្រេចនៅក្នុងសវនាការបិទទ្វារមិនឲ្យសាធារណជនចូល បន្ទាប់ពីម៉ោង១១ព្រឹក។ ពេលឈរនៅខាងក្រៅតុលាការ អ្នកស្រី ប្រាក់ សុវណា្ណរី ភរិយារបស់លោក វ៉ន ពៅ ជាអ្នកជាប់ឃុំ និងជាសកម្មជនការពារសិទ្ធិកម្មករ បានសម្រក់ទឹកភ្នែក។
អ្នកស្រី សុវណ្ណារី បាននិយាយបន្ទាប់ពីត្រូវបានស្ត្រីមួយក្រុមមកពីអតីតសហគមន៍បឹងកក់អមដំណើរចេញពីតុលាការថា “ រដ្ឋាភិបាលឃោរឃៅណាស់ធ្វើឲ្យប្រជាជនរបស់ ខ្លួនឈឺចាប់។ យើងនឹងបន្តស្វែងរកយុត្តិធម៌ ពីព្រោះយើងមិនពេញចិត្តនឹងសេចក្តីសម្រេចនេះទេ”។ អ្នកស្រីបានបន្ថែមថា ប្តីរបស់អ្នកស្រីមិនបានធ្វើអ្វីខុសទេ។
លោក វ៉ន ពៅ បានចូលរួមធ្វើបាតុកម្មទាមទារប្រាក់ខែគោល១៦០ដុល្លារនៅខាងក្រៅរោងចក្រយ៉ាកជីន ក្នុងខណ្ឌពោធិ៍សែនជ័យកាលពីថ្ងៃទី២ ខែមករា ដែលនៅពេលនោះទាហានមកពីអង្គភាពឆត្រយោងលេខ៩១១ប្រដាប់ដោយបំពង់ទីបនិងដំបងឆក់បានបង្ក្រាបយ៉ាងឃោរឃៅទៅលើការតវ៉ាអហិង្សានោះ។ លោក វ៉ន ពៅ និងមនុស្ស១០នាក់ទៀតត្រូវបានទាហានទាំងនោះវាយដំយ៉ាងធ្ងន់ធ្ងរឃាត់ខ្លួន និងនាំយកទៅឃុំខ្លួននៅមណ្ឌលអប់រំកែប្រែទី៣ក្នុងខេត្តកំពង់ចាម។
អ្នកតវ៉ា១៣នាក់ទៀតត្រូវបានចាប់ខ្លួននៅថ្ងៃទី៣ ខែមករា នៅខាងក្រៅសួនឧស្សាហកម្មកាណាឌីយ៉ា បន្ទាប់ពីកងរាជអាវុធហត្ថបាញ់កាំភ្លើងទៅលើកម្មករដែលគប់ដុំថ្មនៅតាមផ្លូវវេងស្រេង ធ្វើឲ្យស្លាប់កម្មករប្រាំនាក់ និងរងរបួសយ៉ាងហោចណាស់៤០នាក់។ នៅពេលមនុស្សដែលរង់ចាំនៅខាងក្រៅតុលាការបានឮពីការបដិសេធរបស់សាលាឧទ្ធរណ៍ អ្នកតវ៉ាជាច្រើននាក់បានរុលចូលទៅពីមុខខ្លោងទ្វារសាលាឧទ្ធរណ៍ ហើយសាច់ញាតិរបស់ជនជាប់ចោទបានយំខ្សឹកខ្សួល។
អ្នកស្រី ធឿន ធី ភរិយារបស់កម្មករជាប់ឃុំឈ្មោះ ហឿន ដា បាននិយាយថា “យើងពិតជាចង់ឲ្យពួកគេត្រឡប់មកវិញ”។ អ្នកស្រីបានសួរថា “ហេតុអ្វីបានជាពួកគេមិនដាក់ទោសជនល្មើសដែលបានបាញ់សម្លាប់ប្រជាជន ប៉ុន្តែ បែរជាដាក់ទោស និងឃុំខ្លួនមនុស្សស្លូតត្រង់ទៅវិញ?”។
លោក នី ចរិយា អ្នកស៊ើបអង្កេតជាន់ខ្ពស់នៅអង្គការសិទ្ធិមនុស្សអាដហុក បានមានប្រសាសន៍ថា ការសម្រេចរបស់សាលាឧទ្ធរណ៍បង្ហាញឲ្យឃើញថា ប្រព័ន្ធតុលាការកម្ពុជាមិនឯករាជ្យ។ លោកបានមានប្រសាសន៍ថា “ តុលាការនេះបន្តឃុំខ្លួនពួកគេធ្វើជាយុទ្ធសាស្ត្រដើម្បីប្រើមនុស្សទាំង២១នាក់ជាចំណាប់ខ្មាំងនៅក្នុងភាពទាល់ច្រកខាងនយោបាយ ពីព្រោះកម្មករ និងសហជីពត្រូវបានភ្ជាប់ទៅនឹងការទាមទាររបស់គណបក្សប្រឆាំង”។
អង្គការសិទ្ធិមនុស្សក្នុងស្រុក និងអន្តរជាតិ ជាច្រើនក៏បានចេញសេចក្តីថ្លែងការណ៍ថ្កោល ទោសការសម្រេចរបស់លាលាឧទ្ធរណ៍នេះដែរ រួមមាន សហព័ន្ធសិទ្ធិមនុស្សអន្តរជាតិ អង្គការអាដហុក អង្គការលីកាដូ មជ្ឈមណ្ឌលសិទ្ធិមនុស្សកម្ពុជា និង អង្គការយុទ្ធនាការសម្លៀក បំពាក់ស្អាតស្អំនៅក្នុងប្រទេសហូឡង់។
ប្រហែល១ម៉ោងក្រោយពីចៅក្រមប្រកាសសេចក្តីសម្រេចនេះ អ្នកតវ៉ាជាច្រើននាក់បានហែក្បួនតាមតីរវិថីព្រះស៊ើសុវត្ថិទៅកាន់ព្រះអង្គដងកើនៅមុខព្រះបរមរាជវាំង ដែលនៅទីនោះពួកគាត់បានចូលរួមសូត្រធម៌ដែលដឹកនាំដោយព្រះសង្ឃមកពីបណ្តាញព្រះសង្ឃឯករាជ្យដើម្បីយុត្តិធម៌សង្គម។
មិនយូរប៉ុន្មាននគរបាលបង្ក្រាបបាតុកម្មប្រហែល១០០នាក់បានចូលទៅសួនច្បារមួយនៅក្បែរនោះ ដោយឈររង់ចាំនៅទីនោះរហូតដល់ព្រះតេជគុណ ប៊ុត ប៊ុនទិញ ប្រធានបណ្តាញព្រះសង្ឃឯករាជ្យ និមន្តឆ្លងផ្លូវទៅកាន់ព្រះបរមរាជវាំង។
ព្រះតេជគុណ ប៊ុត ប៊ុនទិញ បានមានសង្ឃដីកាតាមឧបករណ៍បំពងសំឡេងទៅកាន់នគរបាលបង្ក្រាបបាតុកម្មដែលបានឈរតម្រង់ជួរបិទផ្លូវព្រះអង្គ ហើយព្រះអង្គគំរាមដុតព្រះកាយព្រះអង្គនៅមុខព្រះបរមរាជវាំង ប្រសិនបើមិនដោះលែងអ្នកជាប់ទោសទាំង២១នាក់នោះទេ។
ព្រះតេជគុណ ប៊ុត ប៊ុនទិញ រួមជាមួយព្រះសង្ឃជាច្រើនអង្គ និងអ្នកតវា៉ជាច្រើននាក់ទៀតមកពីសហគមន៍បឹងកក់បានបន្តប្រឈមមុខជាមួយនគរបាលរហូតដល់មានការដាក់នគរបាលបង្ក្រាបបាតុកម្មប្រហែល២០០នាក់ទៀត ហើយបានចាប់ផ្តើមរុញអ្នកតវ៉ាឲ្យឆ្លងផ្លូវនោះទៅព្រះអង្គដងកើវិញ។
សន្តិសុខសាលារាជធានីមួយក្រុមមានគ្នាប្រហែលជាង២០នាក់ដែលពាក់មួកការពារសុវត្ថិភាពពណ៌ខ្មៅត្រូវបានដាក់នៅពេលក្រោយមកឲ្យបណ្តេញអ្នកតវ៉ាដែលនៅសេសសល់ចេញ រួមទាំងព្រះសង្ឃផងដែរ។
នៅម៉ោង១រសៀល មិនមានអ្នកតវ៉ានៅជិតព្រះអង្គដងកើទៀតទេ ហើយនគរបាលបង្ក្រាបបាតុកម្មត្រូវបានដឹកតាមរថយន្តចេញអស់ នៅពេលដែលសន្តិសុខទាំងនោះប្រមូលផ្តុំគ្នាក្នុងអគារនោះដើម្បីបាយថ្ងៃត្រង់។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាបានមានប្រសាសន៍ថា សហជីពដែលមិនជាប់ពាក់ព័ន្ធជាមួយរដ្ឋាភិបាលចំនួនប្រាំបួននឹងជួបជុំគ្នានៅរសៀលនេះដើម្បីរៀបចំសម្រាប់ ការធ្វើកូដកម្មម្តងទៀតតវ៉ានឹងការឃុំខ្លួនកម្មករ និងសកម្មជនទាំង២១នាក់។ លោក អាត់ ធន់ បានមានប្រសាសន៍ថា “នៅពេលយើងសម្រេចរួមគ្នាហើយ យើងនឹងផ្តល់ព័ត៌មានទៅអាជ្ញាធរអំពីទីកន្លែង និងពេលវេលាដែលយើងនឹងធ្វើកូដកម្មទូទាំងប្រទេស៕គឹមហឿន