កាលពីម្សិលមិញ លោក ហោ ណាំហុង រដ្ឋមន្ត្រីក្រសួងការបរទេសបានជួបប្រជុំជាមួយលោក ផាម ប៊ិញមិញ ឧបនាយករដ្ឋមន្ត្រីវៀតណាមអំឡុងកិច្ចប្រជុំលើកទី១៣នៃគណៈកម្មការរួមកម្ពុជា-វៀតណាមដើម្បីសេដ្ឋកិច្ច វប្បធម៌ វិទ្យាសាស្ត្រ និងកិច្ចសហ ប្រតិបត្តិការបច្ចេកវិទ្យានៅក្នុងរាជធានីភ្នំពេញ។
យោងតាមលោក កុយ គួង អ្នកនាំពាក្យក្រសួងការបរទេសបានឲ្យដឹងថា លោកទាំងពីរបានពិភាក្សាអំពីបញ្ហាមួយចំនួនរួមមានការលើកកម្ពស់ពាណិជ្ជកម្មទ្វេភាគី ការផលិតអគ្គិសនី និងការបោះបង្គោលព្រំដែនរួម។ លោក កុយ គួង បានមានប្រសាសន៍ថា “ភាគីទាំងពីរនឹងប្រឹងប្រែងបង្កើនពាណិជ្ជកម្មទ្វេភាគីឲ្យដល់៥ពាន់លានដុល្លារក្នុងឆ្នាំ២០១៥ដែលមិនគួរជួបការលំបាក ព្រោះវាកើនដល់ប្រហែល៣ពាន់លានដុល្លាររួចហើយក្នុងឆ្នាំ២០១៣”។
លោកបានមានប្រសាសន៍ថា ប្រទេសវៀតណាមក៏បានយល់ព្រមលក់ថាមពលអគ្គិសនីកម្លាំង២០០មេហ្គាវ៉ាត់ដល់ប្រទេសកម្ពុជាផងដែរ។ លោក ហោ ណាំហុង ក៏បានថ្លែងអំណរគុណលោក ផាម ប៊ិញមិញ ដែលបានផ្ដល់អាហារូបករណ៍រាប់រយកន្លែងដល់និស្សិតខ្មែរដើម្បីទៅសិក្សានៅតាមគ្រឹះស្ថានសិក្សាមួយចំនួនក្នុងវៀតណាមផងដែរ។
លោក កុយ គួង បានបន្ថែមថា ប្រទេសទាំង ពីរកំពុងប្រឹងប្រែងពន្លឿនការបោះបង្គោល ព្រំដែន ដែលបានបោះរួចប្រហែល២១៧បង្គោលហើយ។ លោកបានមានប្រសាសន៍ថា “យើងបានបោះបង្គោលព្រំដែនបានប្រហែល៧៦ភាគរយហើយ។ ប្រទេសទាំងពីរនឹងប្រឹងប្រែងបញ្ចប់ដំណើរការនេះឲ្យបានឆាប់តាមដែលអាចធ្វើទៅបាន”៕ សារុន