28 C
Phnom Penh

កិច្ច​ប្រជុំ​រវាង​អ្នក​ភូមិ​ជន​ជាតិ​​ដើម​ភាគតិច​និង​តំណាង​ក្រុមហ៊ុនចម្ការ​កៅស៊ូ​មិន​ទទួល​បាន​ផ្លែផ្កា

ដោយ ឌឹ ខេមបូឌា ដេលី

បទវិភាគ

អ្នក​ភូមិ​ជន​ជាតិ​ដើម​ភាគតិច​ជាច្រើន​គ្រួសារ​ដែលកំពុង​ព្យាយាម​​​សុំ​ប័ណ្ណ​កម្ម​សិទ្ធិដី​​សមូហភាព​សម្រាប់​ដី​ដូន​តា​របស់ខ្លួន​​ក្នុង​ស្រុក កែវ សីមា ខេត្ត​មណ្ឌល​គិរី​​​នោះបាន ​ជួប​ប្រជុំ​​ ជាលើ​ក​ដំបូង​កាល​ពីថ្ងៃ​ច័ន្ទ ជាមួយ​តំណាង​​​របស់​ក្រុម​ហ៊ុន​ចម្ការ​កៅស៊ូដែល​រងការ​​ចោទ​ប្រកាន់​ថា បាន​ចាប់​យក​ដី​ជាច្រើន​កន្លែង ហើយ​ សង្ឃឹម​ថា នឹង​មាន​ជំនួយ​​ពី​អាជ្ញាធរ​ខេត្ត​។

លោក​ យិន មិន អ្នកភូមិ​ម្នាក់​ក្នុង​ចំណោម​អ្នក​ភូមិទាំង​នោះ​បាន​និយាយ​អំពី​ជន​​ជាតិ​ភាគ​តិច​ស្ទៀង​ប្រហែល​២០០​នាក់​បាន​​ព្យាយាម​អស់​រយៈពេលប្រហែល​មួយ​ឆ្នាំមក​ហើយដើម្បី​​សុំ​ប័ណ្ណ​កម្ម​សិទ្ធិ​​ដី​​សមូហភាព​​សម្រាប់​​ដី​ដូនតា​ទំហំ​ប្រហែល​៣.៥០០​ហិកតា​​ ហើយ​ថា ក្រុម​ហ៊ុន​ចម្ការ​កៅ​ស៊ូ សុវណ្ណ​រាជសីហ៍​ បាន​កាន់​កាប់​ដី​ទាំង​អស់​លើក​លែង​តែ​ដី​ទំហំ​៦០០​ហិកតា​។

លោក​បាន​មាន​ប្រសាសន៍ថា អ្នក​ភូមិ​ជា​ច្រើន​គ្រួសារ​បាន​ដាក់ពាក្យ​បណ្តឹង​ទៅ​អាជ្ញា​ធរ​​​​ខេត្ត​​ និង​អង្គការ​ក្រៅ​រដ្ឋាភិ​បាល​ចាប់​តាំង​ពី​ក្រុមហ៊ុន​ចម្ការ​កៅស៊ូ​នេះ​ទទួលបាន​ដី​សម្បទានកាល​ពីឆ្នាំ​២០១០​ ហើយ​ថា​ កាល ​ពី​ច័ន្ទ គឺ​ជា​លើក​ដំបូង​​​ហើយ​ដែល​ពួក​គាត់​​បាន​​​ជួប​ប្រជុំ​ជាមួយ​ក្រុម​ហ៊ុន​នេះ​។

លោក យិន មិន បាន​និយាយ​ថា ទោះ​​​យ៉ាង​​​​​​ណាអ្នក​ភូមិ​ និង​ក្រុមហ៊ុន​មិន​យល់​ស្របអំពី​ព្រំ​ប្រទល់​​ដី​ក្រុម​ហ៊ុ​ន​នេះទេ ហើយថា លោក​ ស៊ិន​ វណ្ណវុធ​ អភិ​បាល​ស្រុក​ដែល​បាន​ចូល​រួម​​ក្នុង​កិច្ច​ប្រជុំ​នោះ​ដែរ​នឹង​បង្វែរ​បញ្ហា​នេះ​ទៅ​អាជ្ញា​ធរ​ខេត្ត​។ លោក​បាន​មាន​ប្រសាសន៍ថា “មិន​មាន​លទ្ធផល​ស្តីពីកិច្ច​ប្រជុំ​កាល​ពីថ្ងៃ​ម្សិល​មិញ​ទេ​ ដូច្នេះ​យើង​រង់​ចាំ​សេចក្តី​សម្រេច​ពី​អាជ្ញាធរ​ខេត្ត​។ យើ​ងសង្ឃឹម​ថា អាជ្ញា​ធរ​ខេត្ត​នឹង​សម្រេច​គាំទ្រ​ជន​ជាតិ​ភាគ​តិច​របស់​យើង​ដើម្បីឲ្យយើង​អាច​ការ​ពារ​ប្រពៃ​ណី​ទំនៀម​​​ទម្លាប់របស់​យើងបាន​”។

លោក យិន​ មិន បាន​និយាយថា តំណាង​ក្រុម​ហ៊ុន​មិន​បាន​និយាយអ្វីច្រើន​ទេ​ ហើយ​លោក​មិន​ទាន់​ដឹង​ថា តើ​​​នរណា​ជាម្ចាស់ចម្ការ​កៅស៊ូ​នេះ​នៅឡើយ​ទេ​ ប៉ុន្តែ បាន​អះ​អាង​ថា តំណាង​ក្រុម​ហ៊ុន​ គឺ​ជា​ជន​​ជាតិ​​វៀត​ណាម ហើយ​មាន​តែ​ម្នាក់​ ឬ​ពីរ​​​នាក់​ប៉ុណ្ណោះ​ចេះ​និយាយ​ភាសាខ្មែរ​។ ចម្ការ​កៅស៊ូភាគច្រើន​នៅក្នុង​ប្រទេ​ស​​​​កម្ពុជា​ភាគ​ឦសាន​កាន់​កាប់​ដោយ​ក្រុម​ហ៊ុន​​វៀត​ណាម​ និង​​​ក្រុម​ហ៊ុន​បុត្រ​សម្ព័ន្ធ​របស់​ខ្លួន ​ ហើយ​តែង​តែរងការ​ចោទ​ប្រកាន់​ថា បាន​ចាប់យក​ដី និង​កាប់​ឈើ​ខុស​ច្បាប់​ដោយ​មាន​ការ​យល់ព្រមពី​រដ្ឋា​ភិបាល​។

លោកអភិបាល​ស្រុក វណ្ណវុធ បាន​អះ​អាង​​​​ថា លោក​បាន​ចូល​រួម​ក្នុង​កិច្ច​ប្រជុំ​នោះ ហើយ​បាន​ហៅ​កិច្ច​ប្រជុំ​នោះថា “គ្មាន​បាន​ផ្លែផ្កា​អ្វីសោះ”។ លោក​បាន​មាន​ប្រសាសន៍​មុន​ពេល​ដាក់​ទូរស័ព្ទចុះថា “មិនមាន​ការ​ព្រម​ព្រៀង​នៅ​ ក្នុង​កិច្ច​ប្រជុំ​នោះទេ ពីព្រោះ​ភា​គី​ទាំង​ពីរ​ខ្វែង​គំនិត​គ្នា​អំពី​ព្រំប្រទល់ ដីរបស់​សហគ​មន៍ និង​ខ្វែង​គំនិ​ត​គ្នា​អំពីទំហំ​ដី​សម្ប​​​ទាន។

លោក ឯម សុភក្ត្រ អ្នក​សម្រប​សម្រួល​មក​ពី​មជ្ឈមណ្ឌល​អប់​រំ​ច្បាប់​សម្រាប់​សហ​​​គមន៍​ជា​អង្គការ​ក្រៅ​រដ្ឋាភិ​បាល​ផ្តល់​ជំនួយ​ផ្នែក​ច្បាប់​ប្រចាំខេត្ត​នេះ​បាន​មាន​ប្រសាសន៍ ថា លោក​បាន​ស៊ើប​អង្កេត​ពីករណី​នេះ​ហើយ ហើយ​ថា គ្រួសារ​អ្នក​ភូមិ​មាន​សិទ្ធិ​ស្នើ​សុំ​​ប័ណ្ណ​កម្ម​សិទ្ធិ​ដី​​សមូហភាព​​ដែលពួកគា​ត់​កំពុង​ស្វែងរក។

ប័ណ្ណកម្មសិទ្ធិ​ដីបែប​នេះគឺ​​ដើម្បី​ការពារ​សហ​គមន៍​ជន​ជាតិ​ភាគតិច​កុំ​ឲ្យ​ក្រុម ហ៊ុន​​ឯក​ជន​ព្យាយាម​រំលោភ​យក​ដី​ដូន​តារ​បស់​ពួក​គាត់​។ លោក សុភក្ត្រ ​មាន​ប្រសាសន៍ថា ការ​ដាក់​ពាក្យសុំ​នេះ​ប្រឈ​ម​នឹង​ឧបសគ្គ​បន្ថែម​ទៀត​ពាក់​ព័ន្ធ​ដី​ក្នុងខេត្ត​មណ្ឌ​លគិរី និង​ខេត្ត​ក្រចេះ​​នៅ​ជាប់​គ្នានោះ ដែល​ធ្វើ​ឲ្យ​អាជ្ញា​ធរ​មូល​ដ្ឋាន ​​ស្ទាក់​ស្ទើ​រ​មិន​ហ៊ាន​ចុះ​ហត្ថ​លេខា​​​លើ​លិខិត​ស្នាម​ចាំបាច់​មួយ​ចំនួន​ឡើយ៕​សារុន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស