បន្ទាប់ពីសាលាឧទ្ធរណ៍បដិសេធមិនដោះលែងអ្នកតវ៉ាដែលជាប់ឃុំទាំង២១នាក់ឲ្យនៅក្រៅឃុំកាលពីថ្ងៃអង្គារនោះ សហជីពកម្មករ និងសមាគមចំនួន១៦បានប្រកាសកាលពីម្សិលមិញថា ពួកគេនឹងសងសឹកវិញ ដោយការអំពាវនាវឲ្យកម្មករធ្វើកូដកម្មទូទាំងប្រទេសនៅពាក់កណ្តាលខែមីនា។
សហជីពដែលភាគច្រើនតំណាងឲ្យកម្មករនៅក្នុងឧស្សាហកម្មកាត់ដេរបាននិយាយថា ពួកគេនឹងអំពាវនាវឲ្យសមាជិករបស់ខ្លួនឈប់ធ្វើការថែមម៉ោងផងដែរចន្លោះពីថ្ងៃទី២៤ដល់ថ្ងៃទី២៨ខែកុម្ភៈ ដើម្បីបង្ហាញម្ចាស់រោងចក្រ និងរដ្ឋាភិបាលអំពីសារៈសំខាន់នៃការឆ្លើយតបតាមការទាមទាររបស់ពួកគេ។
អ្នកស្រី យ៉ាង សុភណ្ឌ ប្រធានសម្ព័ន្ធសហជីពកម្ពុជាបានមានប្រសាសន៍ថា “ពីថ្ងៃទី១៨ដល់ថ្ងៃទី២៣កុម្ភៈ សហជីពរបស់យើងនឹងជួបជុំគ្នានៅមុខរោងចក្រ ដើម្បីផ្សព្វផ្សាយព័ត៌មានអំពីការទាមទារចំនួនប្រាំពីរចំណុចរបស់ខ្លួន”។
ការទាមទារទាំងនោះរួមមាន ការដោះលែងអ្នកជាប់ឃុំទាំង២១នាក់ ប្រាក់ខែគោល១៦០ដុល្លារសម្រាប់កម្មកររោងចក្រកាត់ដេរ ការកាត់ទោសកងកម្លាំងរបស់រដ្ឋាភិបាល ដែលបានសម្លាប់កូដករតវ៉ាប្រាំនាក់កាលពីថ្ងៃទី៣ខែមករា ការបញ្ចប់បម្រាមរបស់រដ្ឋាភិបាលមិនឲ្យធ្វើបាតុកម្ម ការបញ្ចប់ការប្តឹងផ្តល់មេដឹកនាំសហជីពដែលបានរៀបចំធ្វើកូដកម្មទូទាំងប្រទេសជាលើកដំបូងកាលពីខែធ្នូ និងការបើកប្រាក់ខែឲ្យកម្មករអំឡុងពេលធ្វើកូដកម្ម។
អ្នកស្រី សុភណ្ឌ បានមានប្រសាសន៍ថា សហជីពបានទុកពេលគ្រប់គ្រាន់ឲ្យរដ្ឋាភិបាលពិចារណាពីការទាមទាររបស់ខ្លួនដែលមិនបានផ្លាស់ប្តូរឡើយចាប់តាំងពីមានការធ្វើមហាកូដកម្មកាលពីខែធ្នូ។ អ្នកស្រី សុភណ្ឌ បានមានប្រសាសន៍ថា “យើងខកចិត្តចំពោះរដ្ឋាភិបាល និងតុលាការពីព្រោះយើងបានទុកពេលឲ្យពួកគេច្រើនដើម្បីដោះស្រាយបញ្ហាទាំងនេះ ប៉ុន្តែ ពួកគេមិនដោះស្រាយទេ។ ដូច្នេះដល់ពេលយើងចាត់វិធានការដើម្បីបង្ខំឲ្យរដ្ឋាភិបាលដោះលែងអ្នកជាប់ឃុំទាំង២១នាក់ និងដំឡើងប្រាក់ខែកម្មករឲ្យដល់១៦០ដុល្លារហើយ”។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករបានមានប្រសាសន៍ថា សហជីពដែលចូលរួមធ្វើកូដកម្មនឹងអញ្ជើញសមាជិកគណៈកម្មាធិការរបស់រដ្ឋាភិបាលមួយដែលទទួលបន្ទុកសិក្សាអំពីប្រាក់ខែគោលឲ្យចូលរួមវេទិកាសាធារណៈមួយនៅថ្ងៃទី៨ខែមីនា ដែលនៅក្នុងវេទិកានោះពួកគេនឹងមានឱកាសចុងក្រោយដើម្បីដោះស្រាយការទាមទាររបស់សហជីព។
លោក ស៊ីណា មានប្រសាសន៍ថា “យើងនឹងអញ្ជើញមន្ត្រីរដ្ឋាភិបាលឲ្យចូលរួមវេទិកានោះ ហើយប្រសិនបើពួកគេគ្មានដំណោះស្រាយសម្រាប់យើងទាំងអស់គ្នាទេ យើងនឹងធ្វើកូដកម្មទូទាំងប្រទេស”។
លោក ហេង សួរ អ្នកនាំពាក្យក្រសួងការងារបានមានប្រសាសន៍ថា ការទាមទារទាំងប្រាំពីរចំណុចនេះ គឺជាបញ្ហាហួសសម័យកាលដែលមិនត្រូវលើកយកមកពិភាក្សាទៀតឡើយ។ លោកបានមានប្រសាសន៍ថា “បញ្ហាទាំងនេះកន្លងផុតហើយ។ ប្រសិនបើពួកគេចង់រៀបចំវេទិកាសាធារណៈពួកគេគួរតែជ្រើសរើសប្រធានបទថ្មី”។
បន្ទាប់ពីកិច្ចប្រជុំលើកដំបូងកាលពីសប្តាហ៍មុនរបស់គណៈកម្មាធិការពិសេសរបស់រដ្ឋាភិបាលអំពីប្រាក់ខែគោល ដែលដឹកនាំដោយឧបនាយករដ្ឋមន្ត្រី គាត ឈន់ នោះលោក ហេង សួរ បានមានប្រសាសន៍ ថា គណៈកម្មាធិការនេះមិនពិភាក្សាអំពីការដំឡើងប្រាក់ខែគោលទៀតទេ ពីព្រោះកាលពីខែធ្នូ មានការសម្រេចដំឡើងប្រាក់ខែគោលដល់១០០ដុល្លាររួចរាល់ហើយ។
ជាផ្នែកមួយនៃផែនការដំឡើងប្រាក់ខែប្រាំឆ្នាំដែលត្រូវបានអនុម័តកាលពីខែធ្នូនោះរដ្ឋាភិបាលលើកឡើងថា ខ្លួននឹងដំឡើងប្រាក់ខែគោលក្នុងវិស័យកាត់ដេរឲ្យដល់១៦០ដុល្លារក្នុងរយៈពេលប្រាំឆ្នាំក្រោយ ថ្វីបើការសិក្សារបស់រដ្ឋាភិបាលបង្ហាញថា ប្រាក់ខែអាចរស់បាននាពេលបច្ចុប្បន្នសម្រាប់កម្មករគឺចន្លោះពី១៥៧ដល់១៧៧ដុល្លារក៏ដោយ។
លោក កែន លូ អគ្គលេខាធិការសមាគមរោចក្រកាត់ដេរនៅកម្ពុជា បានឆ្លើយតបចំពោះការគំរាមបន្តការធ្វើកូដកម្មនេះដោយលើកឡើងថា លោកសង្ឃឹមថា “រដ្ឋាភិបាលមានការប្រុងប្រយ័ត្នក្នុងការអនុវត្តច្បាប់”។ លោក កែន លូ បានមានប្រសាសន៍បន្ថែមទៀតថា “យើងចាត់ទុកនេះជាការគំរាមកំហែងដោយផ្ទាល់ ប៉ុន្តែ យើងធ្វើតាមតែរដ្ឋាភិបាលប៉ុណ្ណោះ”។
លោកបានមានប្រសាសន៍ទៀតថា “ខ្ញុំគិតថា កម្មករត្រូវថ្លឹងថ្លែងខ្លួនឯងអំពីអ្វីដែលពួកគេអាចបាត់បង់ និងត្រូវគិតថា តើការទាមទារទាំងនេះសមហេតុផលឬអត់ ហើយក្រោយមកចាំសម្រេចថា តើពួកគេចង់គាំទ្រសហជីពដែរ ឬអត់”។ លោក កែន លូ ក៏បានមានប្រសាសន៍ដែរថា កម្មករនឹងមិនទទួលបានប្រាក់ឈ្នួលសម្រាប់ថ្ងៃដែលពួកគេធ្វើកូដកម្មកាលពីខែធ្នូ និងខែមករាទេ។
សហជីពដែលមិនជាប់ពាក់ព័ន្ធនឹងរដ្ឋាភិបាលចំនួនប្រាំបីបានសរសេរលិខិតទៅសមាគមរោងចក្រកាត់ដេរនៅកម្ពុជាកាលពីថ្ងៃទី៦ខែកុម្ភៈទាមទារឲ្យរោងចក្របើកប្រាក់ខែឲ្យកម្មករសម្រាប់ថ្ងៃធ្វើកូដកម្មលើកមុន។
សមាគមរោងចក្រកាត់ដេរនៅកម្ពុជាបានលើកឡើងនៅក្នុងលិខិតមួយចេញកាលពីថ្ងៃអង្គារថា “យើងសូមលើកឡើងជាថ្មីថា កិច្ចសន្យាការងារត្រូវបានព្យួរ ហើយប្រាក់ឈ្នួល និងប្រាក់ការងារទៀងទាត់នឹងមិនបើកឲ្យកម្មករអំឡុងពេលធ្វើកូដកម្មទេ”។
លោក កែន លូ បានមានប្រសាសន៍ថា រោងចក្រដែលបានប្រាប់កម្មករឲ្យស្នាក់នៅផ្ទះអំឡុងពេលធ្វើកូដកម្មនោះនឹងត្រូវដោះស្រាយបញ្ហានេះជាមួយកម្មកររបស់ខ្លួន។ លោក កែន លូ បានលើកឡើងថា “ ប្រសិន បើរោងចក្របិទ និងប្រាប់កម្មករឲ្យស្នាក់នៅផ្ទះនោះ រោងចក្រមួយចំនួនបានសម្រេចបើកប្រាក់ខែពាក់កណ្តាលឲ្យកម្មករ ហើយរោងចក្រខ្លះទៀតបានចរចារកវិធីសម្របសម្រួលផ្សេង”។ “ប៉ុន្តែ ជាធម្មតា យើងប្រាប់និយោជកថា ប្រសិនបើកម្មកររបស់គេបានចូលរួមនៅក្នុងកូដកម្មនោះ ពួកគេមិនអាចទទួលបានប្រាក់ខែទេ”៕ គឹមហឿន
(រាយការណ៍បន្ថែមដោយ Colin Meyn)