27 C
Phnom Penh

ប្រជាពលរដ្ឋ​​នៅ​តំបន់បុរី​កីឡា​​នាំគ្នា​​ចូលទៅរស់នៅ​​ក្នុង​ប្លុក​​ផ្ទះ​ល្វែង​ដែលមិន​ទាន់​សាង​សង់​រួច​រាល់​​

ដោយ ឌឹ ខេមបូឌា ដេលី

បទវិភាគ

ប្រជាពលរដ្ឋ​ដែល​ជាប់ពាក់​ព័ន្ធ​នឹង​វិវាទ​ដី​ធ្លី​ជាយូរ​មក​ហើយ​នៅ​តំបន់​បុរី​កីឡា​ក្នុង​ខណ្ឌ​៧​មករា​ រាជធានីភ្នំពេញ​កាល​ពី​ម្សិល​មិញ បាន​វាយកម្ទេច​​របងដែកចំនួ​ន​បី​ ហើយ​បាន​ចូល​ទៅ​រស់​នៅ​ប្លុក​ផ្ទះល្វែង​ដែល​មិន​ទាន់​​​សាង​សង់​​​​រួច​រាល់​នៅ​កន្លែង​នោះតែម្តង​។

ប្រជាពល​រដ្ឋ​នៅបុរីកីឡា​ ក្នុង​ក្រុងភ្នំពេញ​អង្គុយ​លើ​កាំជណ្តើរ​នៃ​ប្លុក​អគារ​ផ្ទះ​ល្វែង​ដែល​មិនទាន់​សាង​សង់​រួចរាល់​នៅ   ពេល​ដែល​ពួក​គេ​ចូល​ទៅកាន់​កាប់​អគារ​នេះ​កាល​ពីម្សិលមិញ​ បន្ទាប់​ពី​មានការ​តវ៉ា​មួយ​ទៀតអំពី​បញ្ហា​ដីធ្លី។ Lauren Crothers/The Cambodia Daily​
ប្រជាពល​រដ្ឋ​នៅបុរីកីឡា​ ក្នុង​ក្រុងភ្នំពេញ​អង្គុយ​លើ​កាំជណ្តើរ​នៃ​ប្លុក​អគារ​ផ្ទះ​ល្វែង​ដែល​មិនទាន់​សាង​សង់​រួចរាល់​នៅ   ពេល​ដែល​ពួក​គេ​ចូល​ទៅកាន់​កាប់​អគារ​នេះ​កាល​ពីម្សិលមិញ​ បន្ទាប់​ពី​មានការ​តវ៉ា​មួយ​ទៀតអំពី​បញ្ហា​ដីធ្លី។ Lauren Crothers/The Cambodia Daily​

របង​ដែកនោះ​បាន​ដួល​ដោយ​សារ​​ប្រជា​​​ពលរដ្ឋ​ដែល​មាន​កំហឹង​យក​ពូថៅ​វាយ​ បន្ទាប់​​​​ពី​អាជ្ញាធរ​ខណ្ឌ​ឲ្យពួក​គាត់​ផ្លាស់ទៅ​រស់​នៅ​​លើ​ដី​ថ្មី​ ប៉ុន្តែ​ មាន​ទំហំតូច​ជាង​មុន​​នៅ​ឆ្ងាយ​ពី​កន្លែង​ចាក់​សំរាម​ដែល​​​មាន​​​​ក្លិន​​​ស្អុយនៅ​តំបន់បុរី​កីឡា។

ប្រជា​ពលរដ្ឋ​​ម្នាក់ឈ្មោះ​ ពេជ្រ លឹម​ឃួន បាន​និយាយ​ថា “យើង​បាន​សម្រេច​វា​យ​កម្ទេច​របង​នោះ​​ ដោយសារ​យើង​ខឹង​នឹង​អាជ្ញា​ធរ​នៅ​​​ព្រឹក​នេះ​នៅពេល​ដែល​ពួក​គេបាន​មក​វាស់​វែង​ដី​ទំហំ​បីម៉ែត្រគុណនឹង​​បួន​ម៉ែត្រ​សម្រាប់​​​​​​​សាង​សង់​ជម្រក​បណ្តោះ​អាសន្ន​ដោយ​មិន​​​មាន​ការ​ព្រ​ម​ព្រៀង​ពី​​ប្រជា​​ពលរដ្ឋ​​ឡើយ”​​​។

កាល​ពីសប្តាហ៍​មុន សាលា​រាជធានី​បាន​សន្យា​ផ្តល់​ដី​ទំហំបួន​ម៉ែត្រគុណ​នឹង​ប្រាំ​មួយ​ម៉ែត្រ​ដល់​គ្រួសារទាំង​នោះ គឺ​ប្រសើរ​ជាង​​​​ការ​រស់​នៅ​ក្នុង​ខ្ទម​​ទ្រុឌ​ទ្រោម ​និង​​កៅស៊ូតង់​​ដែល​សម្បូរដោយ​សត្វ​រុយ ​និង​​នៅ​ជាប់​គំនរ​សំរាម​​មាន​ក្លិន​ស្អុយ​ដែល​គេ​បោះ​​​ពី​​​រាន​ហាល​ផ្ទះ​ល្វែង​ជាន់​ខាង​លើ​។

បន្ទាប់ពី​​បាន​រុះ​រើ​របង​ខណ្ឌចែក​កៅស៊ូ​តង់​របស់ពួកគាត់ពី​​ប្លុ​ក​ផ្ទះល្វែង​ដែល​មិន​ទាន់​សាង​សង់​រួ​ចរាល់​នោះ​ហើយ​​ អ្នក​ភូមិ​បាន​យក​កន្ទេល​ កាបូប​ ចង្ក្រាន​ និង​របស់​របរ​ផ្សេងៗ​ទៀត​ ​ចូល​ទៅនៅ​ក្នុង​អគារ​ដែល​មិន​ទាន់​សាង​សង់​រួ​ចនោះ​។

នៅខាង​ក្នុង​អគារ​មាន​តែ​មួយ​ជាន់​ ដែល​​ជណ្តើរ​សាងសង់​មិន​ទាន់​រួច​ ហើយ​មាន​ដែក​លៀន​ចេញ​តាម​ជញ្ជាំង​នោះ​​ អ្នក​ភូមិ​បាន​ចាប់​​​​​​​ផ្តើម​បោស​សម្អាត​កម្រាល​ដែល​សុទ្ធតែ​ធូលី​ ហើយ​បាន​ដាក់​របស់​របរ​របស់ខ្លួន​ដើម្បី​កាន់​កាប់​បន្ទប់​ដែល​នៅ​ទំនេរ​នោះ។

អ្នក​ស្រី​ អាន់ សំណាង​ អាយុ​២៩​ឆ្នាំ​ដែល​​រស់​នៅ​ក្រោម​សំពត់​តង់​នៅ​ក្បែរ​គំនរ​​សំរាម​បាន​និយាយ​ថា អ្នក​ស្រី​​​​ច្បាស់​ជា​មិន​ចូល​​​ទៅ​​​រស់​​​នៅ​​ក្នុង​​អគារ​ទី​៩​ទេ​ ​ប្រសិន​បើ​អាជ្ញាធរ​គោរព​ពាក្យ​សន្យា​​របស់​ខ្លួន​ និង​​​​​​​​​​ផ្តល់​ដី​ដូច​ការ​សន្យា​​មែន​នោះ​​។

អ្នកស្រី​ សំណាង បាន​និយាយ​ទៀត​ថា “ខ្ញុំ​​​មិន​ពេញ​ចិត្ត​នឹង​សេចក្តី​សម្រេច​នៅព្រឹក​​​នេះ​​​​​​​ទេ ពីព្រោះ​យើង​ចង់ទៅ​រស់​នៅ​ក្នុ​ងអគារ​ទី​៩​ ហើយ​រយៈពេល​ពីរ​ឆ្នាំ​មក​ហើយ​ដែល​អាជ្ញាធរ​មិន​អើពើ​នឹង​ពួក​យើង​”។

លោក​ លឹម សុភា អភិបាល​ខណ្ឌ​៧​មករា​ បាន​ចុះ​ទៅ​ពិនិត្យមើល​កន្លែង​នោះ​កាល​ពី​ម្សិល​​​​​​មិញ ហើយ​បាន​អំពាវ​នាវ​ឲ្យ​អ្នក​ភូ​មិ​ចាក​ចេញ​ពីប្លុក​​ផ្ទះ​ល្វែង​ដែល​មិ​ន​ទាន់​សាង​សង់​រួចរាល់​នេះសិន​ ដោយសុំ​ឲ្យ​ពួក​គាត់​បញ្ជូន​តំណាង​មក​ជួប​ប្រជុំ​ជាមួយ​​មន្ត្រី​សាលា​​​​រាជធានី​ភ្នំពេញ​ដើម្បី​ដោះ​​ស្រាយ​បញ្ហា​នេះ​។ លោក សុភា បាន​មាន​ប្រសាសន៍​ថា “សូម​កុំ​ធ្វើ​អ៊ីចឹង​អី…។

ដើម្បី​ស្វែង​រក​ដំណោះ​ស្រាយ​ ​​​​​​សូម​ចាត់​តំណាង​ប្រាំនាក់​មក​ជួប​ប្រជុំ​ជាមួយ​លោក ប៉ា សុជាតិ​វង្ស អភិ​បាល​រាជធានី​ភ្នំពេញ​ ដើម្បី​ចរចា​នៅ​ថ្ងៃ​ស្អែក​”។ លោក​បាន​បន្ថែម​ថា “ប្រសិន​បើ​បង​ប្អូន​រស់​នៅក្នុង​អគារ​នោះ អាជ្ញាធរ​នឹង​មិន​ទទួល​ខុស​ត្រូវ​ទេ​ ប្រសិន​បើ​មាន​បញ្ហា​កើត​ឡើង​”។

វិវាទ​កាល​ពី​ម្សិលមិញ គឺជាវិវាទ​ថ្មី​បំផុត​​ដោយសារ​ការមិន​គោរព​ពាក្យ​សន្យា​ជាមួ​យ​អ្នក​ភូមិ​ប្រហែល​៣០​គ្រួសារ​ ដែល​កាល​ពី​​​ខែ​​​​មករា​ឆ្នាំ​២០១២​​ត្រូវ​បាន​បណ្តេញ​​ដោយ​ហិង្សា​ចេញ​​​ពី​កន្លែង​នៅ​​ជាប់​គ្នា​នោះនៅក្នុង​តំបន់​​​​​​​បុរី​កីឡា​។

កាល​ពីឆ្នាំ​២០០៧​ ក្រុមហ៊ុន​​ ផា​នអ៊ី​ម៉ិច របស់​អ្នកស្រី ស៊ុយ​ សុផាន ​ទទួល​បាន​ដី​ទំហំ​២,៦​ហិកតា​ដើម្បី​អភិវឌ្ឍជាថ្នូរ​នឹង​ការ​ព្រម​ព្រៀង​សាង​សង់​ផ្ទះល្វែង​សម្រាប់អ្នកភូមិ​​បុរី​កីឡាចំនួន​១.៧៧៦​នាក់​។

អ្នកស្រី​បាន​សន្យា​សាងសង់​ប្លុក​ផ្ទះ​ល្វែង​ចំនួន១០​ល្វែង​ ប៉ុន្តែ មិន​បាន​ធ្វើ​តាម​ការ​ព្រម​ព្រៀង​នោះ​ទេ​។ ផ្ទះ​ល្វែង​ចំនួន​ប្រាំបី​​ប្លុក​​​ត្រូវបា​ន​សាង​សង់​រួច​រាល់​ហើយ ប៉ុន្តែ អ្នក​ភូមិ​ជាច្រើន​គ្រួសារ​ទៀត​មិន​មាន​ផ្ទះសំបែង​ស្នាក់នៅ​ទេ​នៅ​​​ពេល​​​​​​​ក្រុមហ៊ុន​ផាន​អ៊ីម៉ិច​មិន​បាន​សាង​​​សង់​​​ប្លុក​​​ផ្ទះ​​​ល្វែងទី​៩ និង​ទី​១០នោះ៕សារុន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស