កាលពីម្សិលមិញ សាលាដំបូងរាជធានីភ្នំពេញបានបន្តបើកសវនាការជំនុំជម្រះរឿងក្តីស្ត្រីអាយុ៤៤ឆ្នាំម្នាក់ និងបុរសអាយុ២៨ឆ្នាំម្នាក់ដែលជាប់ចោទពីបទជួញដូរក្មេងស្រី គ ថ្លង់ និងមានផ្ទុកមេរោគអេដស៍ទៅឲ្យផ្ទះបនមួយកន្លែងក្នុងខណ្ឌចម្ការមន។
ស្ត្រីសង្ស័យឈ្មោះ ឯម សុភា ដែលកូនស្រីរបស់ខ្លួនគឺជាមិត្តភក្តិជនរងគ្រោះនោះ ត្រូវបានចោទប្រកាន់ពីនាំក្មេងស្រីអាយុ១៣ឆ្នាំរូបនេះទៅធ្វើការក្នុងផ្ទះបន បន្ទាប់ពីក្មេងស្រីរូបនេះបានមកស្នាក់នៅផ្ទះរបស់ខ្លួន។ បុរសសង្ស័យឈ្មោះ ឡុញ ចាន់ ត្រូវបានចោទប្រកាន់ពីបទជួយនាំក្មេងស្រីនេះទៅផ្ទះបននោះ។
នៅថ្ងៃបើកសវនាការដំបូងថ្ងៃទី៣ ខែកុម្ភៈ ឯម សុភា បានបដិសេធការចោទប្រកាន់នោះ ហើយបាននិយាយថា គាត់មិននៅផ្ទះទេនៅថ្ងៃដែលក្មេងស្រីរូបនេះត្រូវគេនាំទៅផ្ទះបននោះ។
លោកស្រី សន សុដាឡែន មេធាវីការពារក្មេងស្រីរងគ្រោះបានមានប្រសាសន៍ថា ទោះជាយ៉ាងណា នៅឯសវនាការបិទទ្វារកាលពីមិ្សលមិញ ក្មេងស្រីរងគ្រោះបានប្រាប់តាមអ្នកបកប្រែដោយប្រើភាសាកាយវិការថា ឈ្មោះ សុភា ជាអ្នកនាំនាងទៅកាន់ផ្ទះបន។
លោកស្រី សុដាឡែន បានមានប្រសាសន៍ថា “ក្មេងស្រីនិយាយទៅកាន់ចៅក្រមបានច្រើនជាងមុនដែលនៅពេលនោះនាងមានការភ័យខ្លាច។ នៅពេលចៅក្រមសួរនាងថា នរណាបាននាំនាងទៅផ្ទះបន នាងបានចង្អុលទៅ ស្ត្រីឈ្មោះ សុភា”។ លោកស្រី សុដាឡែន បានបន្ថែមថា តុលាការនឹងប្រកាសសាលក្រមនៅថ្ងៃទី២៤ ខែកុម្ភៈ៕ សារុន