30 C
Phnom Penh

មនុស្ស​យ៉ាង​តិច​៦​នាក់​រង​របួស​ខណៈ​កង​សន្តិសុខ​​និង​អ្នក​ភូមិ​នៅ​តំបន់បុរី​កីឡា​ប៉ះទង្គិចគ្នា​

ដោយ ឌឹ ខេមបូឌា ដេលី

បទវិភាគ

មនុស្ស​យ៉ាង​តិច​៦នាក់​បាន​រង​របួស​កាល​ពី​ថ្ងៃ​សុក្រ​ នៅ​ពេល​អ្នក​ភូមិ​បុរី​កីឡា​មួយ​ក្រុម​តូច​​​ត្រូវ​បាន​បណ្តេញ​ចេញ​ពី​អគារ​ដែល​មិន​ទាន់​សាង​សង់​រួច​រាល់​នៅ​ក្នុង​រាជ​ធានី​ភ្នំពេញ​​ដែល​​​ពួក​គេ​បានចាប់​ផ្តើម​កាន់​កាប់​នៅក្នុង​សប្តាហ៍​នេះ​ ក្នុងគោលបំណងធ្វើឲ្យ​គេ​​ចាប់​អារម្មណ៍​ចំពោះ​ការ​តស៊ូ​រយៈពេលជា​ច្រើន​​ឆ្នាំ​ដើម្បី​ទាម​​ទារ​ឲ្យ​មាន​ការ​ដោះ​ស្រាយឲ្យ​បាន​សម​ស្រប​​​​ចំពោះ​ការផ្លាស់​ប្តូរ​ទី​លំនៅ​។

អ្នក​ស្រី​ សូ អុឹម​ អ្នក​ភូមិ​បុរី​កីឡា​បម្រុងហុច​ផ្កា​ឲ្យ​កង​សន្តិ​សុខ​ខណ្ឌ​៧​មករា​ កាលពី​ថ្ងៃ​សុក្រ ​បន្ទាប់​ពី​នគរបាល​បាន​បណ្តេញ​អ្នក​ភូមិ​ចេញ​ពី​អគារដែល​ពួក​គាត់​បាន​ចូល​ទៅ​កាន់​កាប់​។ ការ​បណ្តេញ​ចេញ​នេះ​ធ្វើ​ឲ្យមនុស្ស​៦​នាក់​រង​របួស។ Lauren Crothers/The Cambodia Daily​
អ្នក​ស្រី​ សូ អុឹម​ អ្នក​ភូមិ​បុរី​កីឡា​បម្រុងហុច​ផ្កា​ឲ្យ​កង​សន្តិ​សុខ​ខណ្ឌ​៧​មករា​ កាលពី​ថ្ងៃ​សុក្រ ​បន្ទាប់​ពី​នគរបាល​បាន​បណ្តេញ​អ្នក​ភូមិ​ចេញ​ពី​អគារដែល​ពួក​គាត់​បាន​ចូល​ទៅ​កាន់​កាប់​។ ការ​បណ្តេញ​ចេញ​នេះ​ធ្វើ​ឲ្យមនុស្ស​៦​នាក់​រង​របួស។ Lauren Crothers/The Cambodia Daily​

នៅ​ពេល​ពន្លឺ​ថ្ងៃ​ចាំង​ទៅ​លើ​តំបន់​ដែល​គេ​បោះ​សម្រាម​ពាស​វាល​ពាសកាល​ ផ្លូវ​ត្រូវ​​​បាន​​​បិទ​ហើយ​នគរ​បាល​បង្ក្រាប​កុបកម្ម​និង​សន្តិសុខ​ខណ្ឌ​៧​មករា​​ បាន​ចុះ​ទៅ​បង្ក្រាប​អ្នក​ភូមិ​ប្រមាណ​៣០នាក់​ដែលកំពុង​តែ​ដេក​នៅ​លើ​កន្ទេល​ដ៏​ស្តើងក្រោម​អគារ​។

អ្នក​ភូមិ​ដែល​រួម​ទាំង​ស្ត្រី​មាន​ផ្ទៃ​ពោះ​៨​ខែ​​ម្នាក់​ផង ​ត្រូវ​បាន​វាយ​ដំ​នៅ​ពេល​អាជ្ញា​ធរបង្ខំ​ឲ្យ​ពួកគាត់​​ចេញ​ពី​អគារ ត្រឡប់​ទៅ​រស់​នៅ​កន្លែង​បោះ​តង់​មាន​ក្លិន​មិន​ល្អ​ដែល​អ្នក​ភូមិទាំង​នេះ​​បាន​យក​ធ្វើ​ជា​ទី​ជម្រក​ចាប់​តាំង​ពី​ពួក​គាត់​ត្រូវ​បាន​បង្ខំ​ឲ្យ​ចេញ​ពី​តំបន់​មួយ​ទៀត​នៅ​ក្បែរ​នោះ​កាល​ពី​ខែ​មករា​ឆ្នាំ​២០១២​មក​។

អ្នក​ភូមិម្នាក់​ឈ្មោះ​ ហាស​ សុខចិន្តា​ បាន​និយាយ​ថា “ ខ្ញុំ​គិត​ថា ពួក​គេ​មិន​មែន​ជា​មនុស្ស​​ទេ​ដែល​មក​វាយ​ដំ​ពួក​យើង​យ៉ាង​ដូច្នេះ​”។ អ្នក​ស្រី​ សុខចិន្តា​ បាន​និយាយ​បន្ត​ថា “ទោះ​​​​​​​​​បី​ជា​ខ្ញុំ​មាន​ផ្ទៃ​ពោះ​ជិត​គ្រប់​ខែ​ក៏ដោយ​ ក៏​ពួក​គេ​នៅ​តែ​ប្រើ​ដំបង​មក​វាយ​ដំ​លើ​ខ្នង​របស់​ខ្ញុំ​ហើយ​ពួក​គេ​ក៏​បាន​ជាន់​លើ​ភ្លៅ​​ស្តាំ​របស់​​​ខ្ញុំ​ផងដែរ​។​ យើង​គ្រាន់​តែ​ទាម​ទារ​សិទ្ធិ​ដើម្បី​រស់​​នៅ​ក្នុង​ផ្ទះ​មួយ​ប៉ុណ្ណោះ​ ព្រោះ​មក​ទល់​ពេល​​​ឥឡូវ​វា​មាន​រយៈពេល​២​ឆ្នាំ​ហើយ​ ប៉ុន្តែ​​​នៅ​តែ​គ្មាន​ដំណោះ​ស្រាយ​។ នៅ​ក្នុង​ប្រទេស​កម្ពុជា​គ្មាន​យុត្តិធម៌សម្រាប់​ជន​រង​គ្រោះ​នោះ​ទេ​”។

នៅពេល​ប្រើ​ដំបង​ពណ៌​ខ្មៅ​វាយ​ដំ​លើ​អ្នក​ភូមិ​ កង​សន្តិ​សុខ​ស្លៀក​ឯកសណ្ឋាន​ពណ៌​ខៀវ​នោះ​ ក៏មាន​ពាក់មួក​សុវត្ថិភាព​ម៉ាក​ Lucky ​ផង​ដែរ​ ខណៈ​ពួក​គេ​កំពុង​ចុះ​បង្ក្រាប​ហើយ​ប៉ះ​ទង្គិច​ជា​មួយ​​អ្នក​ភូមិ​ដែល​ពោរ​ពេញ​ទៅ​ដោយ​កំហឹង​នោះ​។ ​ក្រណាត់ខោ​អាវ​ត្រូវ​បាន​គេ​គ្រវែង​ទៅ​លើ​កង​សន្តិសុខ​ ហើយ​បន្ទាប់​មក​កង​សន្តិសុខ​បាន​វាយ​ច្រឡំ​លើ​អ្នក​ឈរ​ក្បែរ​នោះ​ម្នាក់​ឈ្មោះ​ មុំ វណ្ណា​ អាយុ​១៨​​​ឆ្នាំ​ដែល​កំពុង​តែ​លក់​ដូង​​​​។ សន្តិ​សុខ​ម្នាក់​បាន​វាយ​ក្បាលរបស់​​ មុំ​ វណ្ណា​ រហូត​ដល់​ហូរ​ឈាម​។

ខណៈ​នោះ​ អ្នកភូមិ​បុរី​កីឡា​ម្នាក់​ទៀត​ឈ្មោះ​ គឹម​ សារ៉ាន​ អាយុ​ ៤៧​ឆ្នាំ​ បានប្រាប់​កង​​សន្តិសុខ​ឲ្យឈប់​វាយ​ដំ​​ ពី​ព្រោះ​ថា យុវជន​ មុំ​ វណ្ណា​ មិន​មែន​ជា​អ្នក​តវ៉ា​នោះ​ទេ​។ អ្នក​ស្រី​ សារ៉ាន​ បាន​និយាយថា​ “[​លោក​នាយក​រដ្ឋ​មន្ត្រី​ ហ៊ុន​ សែន​] ​បាន​ប្រាប់​ប្រជា​ពលរដ្ឋ​កុំ​ឲ្យ​ប្រើ​អំពើ​ហិង្សា​ ប៉ុន្តែ​កង​សន្តិសុខ​នគរបាល​ និង​កង​រាជ​អាវុធ​ហត្ថ​របស់​រដ្ឋា​ភិបាល​បែរ​ជា​បង្ក្រាប​លើ​ប្រជា​ពល​រដ្ឋ​យ៉ាង​ហិង្សា​ទៅ​វិញ។ ខ្ញុំ​ក៏ជា​ពល​រដ្ឋ​ខ្មែរ​ម្នាក់​ដែរ​។​ ហេតុ​អ្វី​បាន​ជា​ខ្មែរ​វាយ​ខ្មែរ​គ្នា​ឯង​?”។​

អ្នក​ភូមិ​បាន​ដក​ថយ​ទៅ​វិញ​អស់​រយៈ​ពេល​​ជា​ច្រើន​ម៉ោង ​ខណៈកង​សន្តិសុខ​កំពុងដាក់​របាំង​បិទ​​អគារ។​ អំឡុង​ពេល​នេះ​ អ្នក​ភូមិ​បាន​អុច​ធូប​ រួច​ “ជេរដាក់​បណ្តាសារ​” កង​សន្តិសុខ​ទាំង​នេះ​ ហើយ​បន្ទាប់​មក​ទៀត​ពួក​គាត់​​​បាន​ឲ្យ​ផ្កា​កូឡាប​ដល់​កង​សន្តិសុខ​ទាំង​នោះ​សម្រាប់​ទិវា​នៃ​ក្តី​ស្រឡាញ់​។

អ្នក​ស្រី​ សុខ​ចិន្តា​ រួម​ទាំង​យុវជន ​វណ្ណា​ និង​អ្នក​ភូមិ​ម្នាក់​ទៀត​ឈ្មោះ​ ចៅ​ សុភា​ អាយុ​២៩​ឆ្នាំ​ ត្រូវ​បាន​ដឹក​ទៅ​ព្យាបាល​នៅ​គ្លីនិក​ឯកជនមួយ​ក្នុង​ខណ្ឌ​ទួល​គោក​។ រីឯ​អ្នក​ភូមិ​ផ្សេង​ទៀត​ៗ​មាន​ឈ្មោះ​ដូ​ច​ជា​ ប្រាក់​​សុផា អាយុ​៤៥​ឆ្នាំ​ ព្រំ​ ពេជ្រ​ អាយុ​៦៧​ឆ្នាំ​និង​​​ ​ញឹក សុខហៀង​ អាយុ​៤៥​ឆ្នាំ​ក៏​ត្រូវ​បាន​វាយ​ដំ​ផង​ដែរ​ ហើយ​ពួក​គាត់​សុទ្ធ​តែ​ត្រូវ​បាន​ដឹក​ទៅ​ព្យាបាល​នៅ​ទី​ស្នាក់​ការ​របស់​អង្គការ​សិទ្ធិ​មនុស្ស​លីកាដូ​។

ការ​ប៉ះ​ទង្គិច​គ្នា​កាល​ពីថ្ងៃ​សុក្រ​គឺ​ជា​ការ​ប៉ះ​ទង្គិច​ថ្មី​បំផុត​នៅក្នុង​ចំណោម​ការ​ប៉ះទង្គិច​ជា​បន្តបន្ទាប់​ដែល​ចាប់​ផ្តើម​កាល​ពី​ឆ្នាំ​២០០៧​ ​​នៅ​ពេល​ក្រុម​ហ៊ុន​ ផានអុីមិច ដែល​គ្រប់​គ្រង​​​​​ដោយ​ស្ត្រី​អ្នក​ជំនួញ​ដ៏​ល្បី​ឈ្មោះ​ម្នាក់​ឈ្មោះ​ លោក​ស្រី​ ស៊ុយ​ សុផាន​ ត្រូវ​បាន​ផ្តល់​ដី​ទំហំ​២,៦​ហិកតា​ដើម្បី​អភិវឌ្ឍនៅ​តំបន់​នេះ​។​

អ្នក​ភូមិ​ដែល​ដី​របស់​គាត់​ស្ថិត​ក្នុង​គម្រោង​របស់​ក្រុម​ហ៊ុន​ ផាន​អ៊ីមិច​ ត្រូវ​បាន​គេ​ប្រាប់​ឲ្យ​​ដឹង​ថា គេ​នឹង​សាង​សង​់អគារ​ចំនួន​ដប់​សម្រាប់​ពួកគាត់​នៅ​ក្នុង​ទី​តាំង​​មួយ​ទៀត​ជាប់​គ្នា​នោះ​ ជា​ការ​ដោះ​ដូរ​និង​ការ​ចាក​ចេញ​ពី​ដី​ដែល​ខ្លួន​កំពុង​រស់នៅ​។ ប៉ុន្តែ​ផ្ទុយ​ទៅ​វិញ​ក្រុមហ៊ុន​របស់​លោក​ស្រី​ សុផាន​​ បាន​សាង​សង់​អគារ​ត្រឹម​តែប្រាំ​បី​ ប៉ុណ្ណោះ​ដោយ​ធ្វើ​ឲ្យ​អ្នក​ភូមិ​ជា​ច្រើន​គ្រួសារ​គ្មាន​ផ្ទះ​សំបែង​រស់​នៅ​ នឹង​បាន​ធ្វើ​ឲ្យ​ពួក​គាត់​បង្ខំ​ចិត្ត​សាង​សង​ខ្ទម​នៅ​លើ​ដីនោះ​។

កាល​ពី​ខែ​មករា​ឆ្នាំ​២០១២​ នគរបាល​ប្រដាប់​អាវុធ​និង​កង​រាជ​អាវុធ​ហត្ថ​រាប់​រយ​នាក់​បាន​ប៉ះទង្គិច​គ្នា​ជា​មួយ​អ្នក​ភូមិ​ជាង​២០០​នាក់ ហើយ​ពួក​គេ​បាន​យក​គ្រឿង​ចក្រ​ឈូស​កម្ទេច​លំនៅ​ដ្ឋានរបស់​អ្នក​ភូមិ​ចំនួន​៣០០​គ្រួសារ​ មុន​ពេល​បញ្ជូន​ពួក​គាត់​ទៅ​កាន់​តំបន់​ផ្សេង​ ដែល​មាន​ចម្ងាយ​ពី​ទី​នោះប្រហែល​​៤៥​គីឡូម៉ែត្រ។

តែ​ទោះ​ជា​យ៉ាង​ណា​ អ្នក​ភូមិ​ខ្លះ​បាន​វិល​ត្រឡប់​មក​កាន់​តំបន់​បុរី​កីឡា​វិញ​ ហើយ​ឥឡូវ​នេះ​កំពុង​តែ​រស់​នៅ​ក្នុង​​តង់ក្នុងតំបន់​ដ៏កខ្វក់​​ដែល​ស្ថិត​នៅ​ពី​ក្រោយ​អគារ​នោះ។

កាល​ពី​សប្តាហ៍​មុន​ សាលា​រាជ​ធានី​ បាន​លើក​​​​ឡើងថា ខ្លួន​នឹង​សាងសង់​លំនៅ​បណ្តោះ​​​​​អាសន្ន​ដែល​មាន​ទំហំ​៤x៦​ម៉ែត្រ​សម្រាប់ពួក​គាត់​ ប៉ុន្តែ​អ្នក​ភូមិ​បាន​ចាប់​ផ្តើម​តវ៉ា​ម្តង​ទៀត​បន្ទាប់​ពី​មន្ត្រី​រដ្ឋាភិបាល​បាន​លើក​ឡើង​ថា ខ្លួន​នឹង​សាង​សង់​លំនៅ​បណ្តោះ​អាសន្ន​តូច​ជាង​នេះឲ្យ​ពួក​គាត់​។  កាល​ពី​ថ្ងៃ​ព្រហស្បតិ៍​ លោក​ ប៉ា សុជាតិ​វង្ស​ អភិបាល​រាជ​ធានី​ភ្នំពេញ និង​តំណាង​ចំនួន​១៣​នាក់​ បាន​បើក​ការ​ប្រជុំ​ បន្ទាប់​ពី​អ្នក​ភូមិ​បាន​ចាប់​ផ្តើម​ចូល​កាន់​កាប់​អគារ​ទី​៩​ដែល​នៅ​ទំនេរ ​ដែល​គេ​ដឹង​ថា​​ លោក​ស្រី​ សុផានប្រហែល​ជា​លក់ទៅ​ឲ្យ​អ្នក​អភិវឌ្ឍ​មួយ​ផ្សេង​ទៀត​​។ប៉ុន្តែ​ការ​ប្រជុំ​នេះ​មិន​ទទួល​បាន​លទ្ធ​ផល​នោះ​ទេ​។

លោ​ក​ ពេជ្រ​ លឹម​ឃួន តំណាង​សហគ​មន៍​​ បាន​និយាយ​ថា អ្នក​ភូមិ​គ្រាន់​តែ​ចង់​ដឹង​ថា​ តើ​ឥឡូវ​នេះ​នរណា​ជា​អ្នក​កាន់​កាប់​អគារ​ទី​៩​ដែល​មិន​ទាន់​សាង​សង់​រួច​រាល់​ហើយ​ដែល​ដំបូង​ឡើយ​ត្រូវ​បាន​គេ​សាង​សង់​សម្រាប់​អ្នក​ភូមិ​នោះ​។

លោក ឡុង​ ឌី​ម៉ង់​ អ្នក​នាំ​ពាក្យ​សាលា​រាជ​ធានី​បាន​បដិសេធ​មិន​ធ្វើ​អត្ថាធិប្បាយ​ទេ​ នៅ​ពេល​ត្រូវ​បាន​សួរ​ថា តើ​នរណា​ជា​អ្នក​ទទួល​ខុស​ត្រូវ​ចំពោះ​ការ​ធ្វើ​ឲ្យ​របួស​អ្នក​ភូមិ និង​អ្នក​ឈរ​ក្បែរ​នោះ​។ លោក​បាន​បាន​មាន​ប្រសាសន៍​​ថា “ [​ការ​របួស]​​ ​​មិន​អាច​ចៀស​ផុត​បាន​ទេ​ប្រសិន​បើ​កើត​មាន​ការ​ប៉ះ​ទង្គិច​ ព្រោះ​ភាគី​ទាំង​ពីរ​សុទ្ធ​តែ​ខ្លាំង​ដូច​​គ្នា​”។ លោក​បាន​បន្ថែម​ថា “អាជ្ញាធរ​របស់​យើង​បង្ខំ​ចិត្ត​ចាត់​វិធាន​ការ​​​តែ​ទៅ​តាម​ច្បាប់​ប៉ុណ្ណោះ​ ព្រោះ​អ្នក​ភូមិ​បុរីកីឡា​កំពុង​រស់​នៅ​យ៉ាង​អនាធិបតេយ្យលើ​អគារ​ទី​៩​ដែល​ជា​សម្បត្តិ​របស់​ឯកជន​។ ពួកគាត់​កំពុង​តែ​រំលោភ​​បំពាន​ច្បាប់​”។

លោក អំ សំអាត អ្នក​គ្រប់​គ្រង​បច្ចេក​ទេស​នៅ​អង្គការ​សិទ្ធិមនុស្ស​លី​កាដូ​ បាន​លើក​ឡើង​ថា វា​មិន​ចាំបាច់​ត្រូវ​ប្រើ​កម្លាំង​ឡើយ​។ លោក​បាន​មាន​ប្រសាសន៍​ថា “ វា​គឺជា​ការ​រំលោភ​បំពាន​សិទ្ធិ​មនុស្ស​។ រដ្ឋាភិបាល​គួរ​តែ​នាំ​យក​កង​សន្តិ​សុខ​ទាំងនេះ​ទៅ​ដាក់​ទោស​ ប្រសិន​បើ​គ្មាន​ការ​ចាត់​វិធាន​ការ​នោះ​ទេ​ វា​នឹង​ក្លាយ​ទៅ​វប្ប​ធម៌​មួយ​នៃ​ការ​ប្រើ​អំពើ​ហិង្សា​ដែល​កង​សន្តិ​សុខ​តែង​តែ​វាយ​ដំ​លើ​អ្នក​តវ៉ា​”។ លោក​បាន​មាន​ប្រសាសន៍​បន្ត​ថា “ កង​សន្តិ​សុខ​សុទ្ធ​តែ​គ្មាន​វិជ្ជា​ជីវៈ​ ពួក​គេ​មិន​បាន​ទទួល​​ការ​បណ្តុះ​បណ្តាល​នោះ​ឡើយ​ ហេតុ​ដូច្នេះ​ហើយ​ពួក​គេ​ចេះ​តែ​វាយ​ដំ​ប្រជា​ពល​រដ្ឋ​ប៉ុណ្ណោះ​”។

កង​សន្តិ​សុខ​និង​នគរបាល​បង្ក្រាប​កុប​កម្ម​ត្រូវ​បាន​គាំ​ទ្រ​ដោយ​ក្រុម​បុរស​ដែល​មាន​កាន់​ខែលដែ ល​ត្រូវ​បាន​គេ​ស្គាល់​ថា ជា​​កង​រាជ​អាវុធ​ហត្ថ​នោះ​។ ក្រុម​នេះ​បានដក​ថយ​ទៅ​​វិញ​រួម​ជា​មួយ​មន្ត្រី​ផ្សេងៗ​ នៅ​ពេលការ​ងារ​សាង​សង​របំាង​បិទ​អគារ​ត្រូវ​បាន​បញ្ចប់​។

ឧត្តម​សេនីយ៍ត្រី​ ខេង​ ទីតូ​ អ្នក​នាំ​ពាក្យ​កង​​រាជ​អាវុធ​ហត្ថ​បាន​លើក​ឡើង​ថា​ កង​រាជ​អាវុធ​ហត្ថ​មិន​ជាប់​ពាក់ព័ន្ធនៅក្នុង​ការ​ប៉ះ​ទង្គិច​គ្នា​នោះទេ​។លោក​បាន​មាន​ប្រសាសន៍​ថា “កង​រាជ​អាវុធ​ហត្ថ​របស់​យើង​មិន​ជាប់​ពាក់​ព័ន្ធ​នៅ​ក្នុង​ការ​ប៉ះ​ទង្គិច​គ្នា​ជា​មួយ​អ្នក​ភូមិ​បុរីកីឡា​ឡើយ​។​ ពួក​គេ​ទៅ​ទី​នេះ​ដើម្បី​ទប់​ស្កាត់​កំុ​ឲ្យ​មាន​ការ​បំផ្លិច​បំផ្លាញ​បន្ថែម​លើ​ទ្រព្យ​សម្បត្តិ​រដ្ឋ​ និងឯកជន​”៕ ស៊ុយឈាង

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស