ស្រុកទ្រាំង, ខេត្តតាកែវ- ដើម្បីលួចព្រះសារីរិកធាតុព្រះពុទ្ធបានសម្រេចដែលជាអំពើចោរកម្ម ដ៏ធំមួយក្នុងចំណោមអំពើចោរកម្មធំៗនៅក្នុងប្រវត្តិសាស្ត្រកម្ពុជានាពេលថ្មីៗនេះ ជនល្មើសត្រូវលបចូលឆ្លងកាត់សន្តិសុខប្រាំនាក់ តាមកាំជណ្តើរជាង៥០០កាំទៅកំពូលភ្នំឧដុង្គ ទំលុះទ្វារព្រះសក្យមុនីចេតិយដែលសាងសង់អស់៤,៥លានដុល្លារ លួចយកព្រះសារីរិកធាតុទាំង ហើយកាន់ត្រឡប់ចុះមកវិញ និងបានគេចខ្លួនបាត់នៅពេលយប់។
បន្ទាប់ពីការលួចព្រះសារីរិកធាតុកាលពីខែធ្នូ ក្រុមអ្នកជំនាញប៉ាន់ប្រមាណថា ព្រះសារីរិកធាតុទាំងនេះបានចេញពីប្រទេសកម្ពុជាហើយ ហើយប្រហែលជាត្រូវនាំយកទៅលក់នៅទីផ្សារងងឹតក្នុងប្រទេសថៃ ។
នគរបាលបានសន្និដ្ឋានថា ចោរម្នាក់ ឬច្រើននាក់មិនបានបន្សល់ដានទេ ហើយច្បាស់ជាស្ទាត់ជំនាញទៀតផង។ សន្តិសុខប្រាំនាក់ដែលត្រូវបានចាប់ខ្លួនភ្លាមៗបន្ទាប់ពីការលួចនេះបាននិយា យថា ពួកគេមិនបានឃើញអ្វីទេហើយនៅតែអះអាងពីភាពគ្មានទោសរបស់ខ្លួន។
ប៉ុន្តែមិនមែនចោរទាំងអស់សុទ្ធតែពូកែនោះទេ ហើយនៅពេលដឹងថា លួចបានសម្រេច និងមានសុវត្ថិភាពហើយ ចោរភាគច្រើនធ្វើខុសដែលធ្វើឲ្យគេចាប់ខ្លួនបាននៅពេលក្រោយមក។
លោក ចន មូល័រ នាយកផ្នែកគ្រប់គ្រងក្រុមហ៊ុនផ្តល់សេវាសន្តិសុខ Global Security Solutions បានមានប្រសាសន៍ថា “គេប្រថុយនឹងគ្រោះថ្នាក់ធំនៅពេលដែលគេប្រព្រឹត្តិបទល្មើសបែបនេះ ប៉ុន្តែ ជាធម្មតាចោរភាគច្រើននៅទីនេះមិនឆ្លាតទេ។ លោកបានមានប្រសាសន៍ថា “ពួកគេអួតអ្នកជិតខាងអំពីរឿងនេះ ឬពួកគេមានទ្រព្យសម្បត្តិច្រើនភ្លាមៗ ដែលពួកគេមិនធ្លាប់មាន។ឧទាហរណ៍ ចំពោះចោរប្លន់ធនាគារវិញ ពួកគេត្រូវចាយលុយប្លន់បានតែម្តង”។
ចំពោះលោក កែវ រស្មី ជាកសិករតូចតាចមកពីស្រុកទ្រាំង ខេត្តតាកែវដែលត្រូវបានចាប់ខ្លួន និងចោទប្រកាន់ពីបទលួចកាលពីជាងមួយសប្តាហ៍មុននេះ កំហុសគឺការទិញម៉ូតូហុងដាឌ្រីមក្នុងតម្លៃ១.០០០ដុល្លារប្រាំថ្ងៃក្រោយការលួចនោះ។
ការទិញម៉ូតូនេះធ្វើឲ្យអ្នកជិតខាងឆ្ងល់ ហើយធ្វើឲ្យមានពាក្យចចាមអារ៉ាមភ្លាមៗនៅក្នុងភូមិកគោ ឃុំខ្វាវ ហើយឈ្មោះ រស្មី មិនអាចប្រាប់មូលហេតុច្បាស់លាស់ដល់អ្នកភូមិដែលចង់ដឹងនោះទេ។ មិនត្រឹមតែអ្នកស្រី មាស ញ៉ែ អាយុ៧៨ឆ្នាំជាជីដូនរបស់ រស្មី ដែលមានខ្នងកោង និងមានស្លាម្លូជាប់ធ្មេញនោះជឿថា ចៅរបស់គាត់បានទទួលលុយនោះដោយស្របច្បាប់។
អ្នកស្រីបាននិយាយថា ខ្ញុំបានសួរវាអំពីម៉ូតូនោះ ប៉ុន្តែ វាមិនប្រាប់ខ្ញុំថាបានលុយទិញមកពីណាទេ”។ ការសង្ស័យ និងការច្រណែនបានរាលដាលយ៉ាងលឿនពេញភូមិ ដែលធ្វើឲ្យលោក អ៊ុំ ថុន ជា មេប៉ុស្តិ៍នគរបាលឃុំបានទទួលការផ្តល់ព័ត៌មានពីអ្នកភូមិដែលមានការសង្ស័យនៅថ្ងៃលោក រស្មី ទិញម៉ូតូ។
លោក ថុន មានប្រសាសន៍ថា “ ប្រាំថ្ងៃបន្ទាប់ពីបាត់ព្រះសារីរិកធាតុនោះ ជនសង្ស័យបានទិញម៉ូតូមួយគ្រឿង ហើយប្រជាជនបានទូរស័ព្ទប្រាប់ខ្ញុំអំពីការសង្ស័យរបស់ពួកគេ។ ពួកគេបានប្រាប់ខ្ញុំថា លោករស្មីមានណាស់ ប៉ុន្តែមិនបានប្រាប់ថា មានដោយរបៀបណាទេ”។ លោក ថុន បានរាយការណ៍ទៅនគរបាលស្រុកដែលក្រោយមកបានរាយការណ៍ទៅនគរបាលខេត្ត ហើយខេត្តបានប្រាប់ទៅក្រសួងមហាផ្ទៃ។
នៅពេលទន្ទឹមគ្នានោះដែរ លោក រស្មី បានបង្ហាញទ្រព្យសម្បត្តិជាច្រើនគឺ ម៉ូតូពីរគ្រឿងទៀត មួយគ្រឿងក្នុងចំណោមទាំងពីរគ្រឿងនោះមានតម្លៃ ១៥.០០០ដុល្លារ និងរថយន្តសេ៊រី២០១៤មួយគ្រឿង។
កាលពីសប្តាហ៍មុន នគរបាលបានសម្រេចហៅលោក រស្មី មកសាកសួរ ប៉ុន្តែ ផ្ទុយទៅវិញ ពួកគេបានចូលរួមនៅក្នុងការបើករថយន្តដេញតាមនៅតាមផ្លូវដីក្រហេងក្រហូងក្នុងភូមិកគោ ដែលមិនសមនឹងបើករថយន្តកាត់ឡើយ។ នគរបាលស្រុកបានប្រទះឃើញជនសង្ស័យបើករថយន្តថ្មីមួយគ្រឿងនៅចម្ងាយប្រហែល៥គីឡូម៉ែត្រពីផ្ទះរបស់គាត់នៅពេលថ្ងៃត្រង់កាលពីថ្ងៃព្រហស្បតិ៍សប្តាហ៍មុន ហើយគាត់មិនព្រមឈប់ទេ។
លោក ស៊ាង ម៉ាលី អធិការនគរបាលស្រុកបានមានប្រសាសន៍ថា “ខ្ញុំបានប្រាប់ឲ្យគាត់ឈប់ ប៉ុន្តែ គាត់មិនព្រមឈប់ទេ។ យើងបានបើកដេញតាមគាត់រហូតដល់ផ្ទះគាត់”។
បន្ទាប់ពីការឆែកឆេរភ្លាមៗ ទាំងលោក រស្មី និងអ្នកស្រី ញ៉ែ ត្រូវបានចាប់ខ្លួន ហើយនគរបាលចាប់ផ្តើមឆែកឆេរផ្ទះនោះនិងតំបន់នៅជុំវិញផ្ទះ។ ព្រះពុទ្ធរូប១០អង្គ ដែលតាមការចោទថា លោក រស្មី បានលួចពីភ្នំឧដុង្គជាមួយព្រះសារីរិកធាតុ ព្រមទាំងព្រះពុទ្ធរូបបីអង្គទៀតដែលគេចោទថា គាត់បានលួចពីវត្តមួយនៅមូលដ្ឋាននោះកាលពីឆ្នាំមុន ត្រូវបានរកឃើញនៅក្នុងទទឹកនិងគម្ពោតព្រៃនៅជុំវិញផ្ទះរបស់គាត់ ព្រមទាំងនៅកៅអីក្រោយរថយន្តរបស់គាត់។
លោក ថុន បានមានប្រសាសន៍កាលពីសប្តាហ៍មុន ដោយចង្អុលទៅទទឹកច្រែះចាប់នៅរោងចិញ្ចឹមសត្វតូចមួយថា “ខ្លួនខ្ញុំផ្ទាល់បានរកឃើញព្រះពុទ្ធរូបមួយអង្គនៅទីនេះ”។ លោកបានមានប្រសាសន៍ថា “ព្រះពុទ្ធរូបនោះតូចណាស់មានទំហំប៉ុនមេដៃខ្ញុំ”។ លោកបានបន្ថែមថា លោកបានរកឃើញព្រះពុទ្ធរូបមួយអង្គទៀតនៅជិតទូដាក់ចានឆ្នាំងនៅក្នុងផ្ទះបាយ ដែលជាកន្លែងដេករបស់លោក រស្មី។ វត្ថុមានតម្លៃបំផុត ដែលបានរកឃើញគឺព្រះសារីរិកធាតុព្រះពុទ្ធ ដែលលាក់នៅក្រោមគ្រែដេករបស់លោក រស្មី ។
អ្នកស្រី ញ៉ែ ជាជីដូនដែលត្រូវបានដោះលែងដោយគ្មានការចោទប្រកាន់នោះ បាននិយាយថា អ្នកស្រីមិនបានដឹងទាល់តែសោះថា ផ្ទះរបស់អ្នកស្រីជាកន្លែងដាក់ព្រះសារីរិកធាតុព្រះពុទ្ធដ៏មានតម្លៃនេះ។ អ្នកស្រី ញ៉ែ បាននិយាយថា “ខ្ញុំដឹងថា មានភ័ស្តុតាង ប៉ុន្តែ ខ្ញុំមិនដឹងថា វាជាអ្នកលួច ឬអត់ទេ។ ព្រះបរមរាជវាំង និងព្រះសង្ឃរាជកំពុងពិភាក្សាថា តើត្រូវធ្វើឲ្យព្រះសក្យមុនីចេតិយមានសុវត្ថិភាពដោយវិធីណា មុនពេលដង្ហែព្រះសារីរិកធាតុពីព្រះបរមរាជវាំងទៅភ្នំឧដុង្គវិញ។
លោក អ៊ាវ ចំរើន ស្នងការនគរបាលខេត្តកណ្តាលបានមានប្រសាសន៍កាលពីថ្ងៃសុក្រថា ព្រះ សារីរិកធាតុ ប្រហែលជានឹងត្រូវដង្ហែទៅភ្នំឧដុង្គនៅថ្ងៃបុណ្យវិសាខបូជា ដែលរំឭកពីថ្ងៃប្រសូត ត្រាស់ដឹង និងបរិនិព្វានរបស់ ព្រះពុទ្ធនៅថ្ងៃទី១៣ ខែឧសភា៕គឹមហឿន
(រាយការណ៍បន្ថែមដោយ ឃី សុវុឌ្ឍី)