30 C
Phnom Penh

លោក​ ហ៊ុន​ សែន​៖​ ​មន្ត្រី​រាជ​ការ​អាច​ចុះ​ផ្សាយ​តាម​កាសែត​បាន ​ប្រសិន​បើ​ជួ​ប​បញ្ហា​បើក​ប្រាក់ខែ​

ដោយ ឌឹ ខេមបូឌា ដេលី

បទវិភាគ

មួយ​ខែ​បន្ទាប់​ពី​​មាន​ការ​អំពាវ​នាវ​ឲ្យ​មន្ត្រី​​រាជ​ការ​ធ្វើ​កូដកម្ម​ ដើម្បី​ទាម​ទារ​ដំឡើង​ប្រាក់​ខែ​​ លោក​នាយក​រដ្ឋ​មន្ត្រី ហ៊ុន​ សែន​ បាន​ចេញ​​​បទ​បញ្ជា​កាល​ពី​ម្សិល​មិញ​ឲ្យ​មន្ត្រី​រដ្ឋា​ភិបាល​ធានា​ឲ្យ​បាន​ថា ប្រាក់​ខែ​របស់​មន្ត្រី​រាជ​ការ​ត្រូវ​តែ​បើក​ឲ្យ​បាន​ទាន់​ពេល​វេលា​ ហើយ​លោក​បាន​ថ្លែង​​ថា បើ​ពុំ​ដូច្នោះ​ទេ​មន្ត្រី​រាជ​ការ​អាច​​សម្តែង​ការ​​មិន​ពេញ​ចិត្ត​​របស់​ខ្លួន​តាម​ប្រព័ន្ធ​ផ្សព្វ​ផ្សាយ​នានាបាន​។

ការ​លើក​ឡើង​របស់​លោក​នាយក​រដ្ឋ​មន្ត្រី​ ហ៊ុន​ សែន ដែល​ត្រូវ​បាន​ធ្វើ​ឡើង​នៅ​ក្នុង​ពិធី​ប្រគល់​សញ្ញា​បត្រ​ឲ្យ​និស្សិ​ត​រដ្ឋ​បាល​សាធារ​ណៈនៅ​វិទ្យាស្ថានជាតិ​អប់រំ​ក្នុង​រាជ​ធានី​ភ្នំពេញ​នេះ​ គឺ​​ត្រូវ​បាន​ធ្វើ​ឡើង​បន្ទាប់​ការ​ចេញ​សារាចរ​ណែ​​នាំ​មួយ​កាល​ពី​ថ្ងៃ​២៩​ខែ​មករា​ ដែល​លើក​​ឡើង​ថា មន្ត្រី​រាជ​ការ​ចាំ​បាច់​ត្រូវ​តែ​បើក​ប្រាក់​ខែឲ្យ​​​នៅ​សប្តាហ៍​ទី៤​ជារៀង​រាល់​ខែ​។

លោកនាយក​រដ្ឋ​មន្ត្រី​ ហ៊ុន​ សែន​ បាន​ថ្លែង​​​ប្រាប់​និស្សិត​ដែល​ភាគច្រើន​នឹង​ក្លាយ​ទៅ​ជា​មន្ត្រី​រាជ​ការ​ថា “យើង​ចង់​ឲ្យ​មន្ត្រី​រាជ​ការ​ត្រូវ​​បាន​បើក​ប្រាក់​ឲ្យ​ទាន់​ពេល​វេលា​។ ទោះ​បី​​វា​ជា​ប្រាក់​ខែ​តិច​ក៏ដោយ ​ប៉ុន្តែ​នៅ​ពេល​​បើក​​ទាន់​ពេល​វេលា​ វា​ជា​រឿង​ល្អ​។ ហើយ​នៅ​ពេល​បើក​មិន​ទាន់​ពេល​វេលា​​វា​គឺ​បញ្ហា​”។

លោកនាយក​រដ្ឋ​មន្ត្រី​​ ហ៊ុន​ សែន​ បាន​បន្ថែម​​​ថា ការ​បើក​ប្រាក់​ខែ​ឲ្យ​បាន​ទាន់​ពេល​វេលា​មិន​គួរ​ជា​រឿង​លំបាក​នោះ​ទេ​ ​ព្រោះ​រដ្ឋ​​មន្ត្រី​​គ្រាន់​តែ​ចុះ​ហត្ថ​លេខា​លើ​ឯកសារ​ដើម្បី​ធានាថា ប្រាក់​ខែ​ត្រូវ​បាន​បើក​តែ​ប៉ុណ្ណោះ​។

លោក​នាយក​រដ្ឋ​មន្ត្រី បាន​មាន​ប្រសា​សន៍បន្ត​ទៀត​ថា​ “នេះ​គឺ​ជា​ផ្នែក​នៃ​កំណែ​ទម្រង់​ដែល​ជាប់​ទាក់​ទិន​នឹង​ជីវភាព​រស់​នៅ​របស់​មន្ត្រី​រាជ​ការ​។ មន្ត្រី​រាជ​ការ​មក​ពី​ក្រសួង​ទាំង​អស់ ប្រសិ​ន​បើ​ឃើញ​ថា​មាន​បញ្ហា​ទាក់​ទិន​​នឹង​​ប្រាក់​ខែ​ យើង​ត្រូវ​ប្រកាស​តាម​កាសែត​ដោយ​​សារតែ​រដ្ឋមន្ត្រី​មាន​ប្រាក់​ខែ​ឆ្អែត​ឆ្អន់​ហើយ​ ហើយ​មិន​បើក​ប្រាក់​ខែ​ឲ្យ”​​។​

ដើម្បី​ជា​ផ្នែក​នៃ​កំណែ​ទម្រង់​ថ្មី​ ក្រសួង​សេដ្ឋកិច្ច​និង​ហិរញ្ញវត្ថុ​បាន​ចុះ​ហត្ថលេខា​លើ​កិច្ច​ព្រម​ព្រៀង​កាលពី​ខែ​វិច្ឆិកា​ជាមួយ​ធនា​គារ​​កាណាឌីយ៉ា​ ធនាគារ​អេស៊ី​លីដា​ និង​ក្រុម​ហ៊ុន វីង​កម្ពុជា​ ដើម្បី​បង្កើត​គណនី​ធនាគារ​ដែល​អាច​ជួយ​ឲ្យ​មន្ត្រី​រាជ​ការ​បើក​ប្រាក់​ខែ​តាម​រយៈ​គណនី​ធនាគារ​នេះ​។

កាល​ពី​ម្សិល​មិញ ​លោក​នាយក​រដ្ឋ​មន្ត្រី​ ហ៊ុ​ន សែន​ បាន​ថ្លែង​ថា វិធីសាស្ត្រ​នេះ​អាច​ជួយ​ទប់​ស្កាត់​អ្នក​ប្រើ​ “ឈ្មោះ​ខ្មោច” ​មក​បើក​​ប្រាក់​ខែ​ដែល​មិន​មែន​ជា​របស់​ខ្លួន​។ ហើយ​បញ្ហានេះ​គឺ​ជា​បញ្ហា​ពុក​រលួយ​មួយ​ក្នុង​ចំណោម​​បញ្ហា​ពុក​រលួយ​ផ្សេង​ៗ​ដែល​កើត​មាន​នៅ​ក្នុង​វិស័យ​សាធារណៈ។

កាល​ពី​ខែ​មុន​ សមាគម​មន្ត្រី​រាជ​ការ​ឯក​រាជ្យ​កម្ពុជា​ បាន​លើក​ឡើង​ថា អតិផរណា​ក្នុង​ពេល​ថ្មី​ៗ​បាន​ធ្វើ​ឲ្យប្រាក់​ខែ​របស់​​មន្ត្រី​រាជ​ការ​អាច​ទិញ​របស់​របរ​ផ្សេង​ៗបាន​​តិច​តួច ហើយ​បាន​លើក​ឡើង​ថា មន្ត្រី​រាជការ​គួរ​តែ​ធ្វើ​កូដ​កម្ម​ដោយ​សន្តិវិធី​ ដើម្បី​ទា​ម​ទារ​ប្រាក់​ខែ​គោល​​២៥០ដុល្លារ​។ លោកនាយក​រដ្ឋ​មន្ត្រី​​ ហ៊ុន​ សែន​​ បាន​មាន​ប្រសាសន៍​កាល​ពី​ម្សិលមិញ​ថា ប្រាក់​ខែ​ខ្ពស់​គឺ​វា​អាច​កើត​មាន​ស្រប​ពេល​នឹង​មាន​កំណើន​សេដ្ឋ​កិច្ច​៕​ ស៊ុយឈាង

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស