ប្រធានភូមិពីររូបបានឲ្យដឹងថា អ្នកភូមិជាច្រើនគ្រួសារនៅក្នុងខេត្តបន្ទាយមានជ័យ ដែលបានជាប់ពាក់ព័ន្ធក្នុងវិវាទដីធ្លីមួយត្រូវបានផ្ដល់ដីថ្មីទំហំ១០០ហិកតាស្ថិតក្នុងស្រុកអូរជ្រៅ កាលពីម្សិលមិញ ប៉ុន្តែពួកគាត់បានបដិសេធមិនទទួលយកទេ ពីព្រោះដីនោះត្រូវបានកាន់កាប់ដោយអ្នកភូមិជាង២៣០គ្រូសារទៀតរួចទៅហើយ។
កាលពីម្សិលមិញ អាជ្ញាធរខេត្តបានលើកឡើងថា ខ្លួននឹងផ្ទេរដីទំហំ១០០ហិកតានៅក្នុងភូមិរ៉ុន ឃុំសឹង្ហ ទៅឲ្យអ្នកភូមិ៧១គ្រួសារមកពីភូមិស្នួលទ្រេត ក្នុងឃុំអូរបីជាន់។ ប៉ុន្តែសេចក្ដីសម្រេចដែលធ្វើឡើងដោយលោក ជុង ភេទ អភិបាលរងខេត្តនោះបានធ្វើឲ្យអ្នកភូមិ៧១គ្រួសារដែលជាប់ពាក់ព័ន្ធក្នុងវិវាទដីធ្លី និងអ្នកភូមិ២៣៧គ្រួសារទៀតដែលរស់នៅលើដីទំហំ១០០ហិកតានេះមានកំហឹង ហើយប្រឈមនឹងការបាត់បង់ដីនោះ។
លោក វិញ ចិត្រ មេភូមិរ៉ុន មានប្រសាសន៍ថា “សេចក្ដីសម្រេចនេះបានធ្វើឲ្យអ្នកភូមិរបស់ខ្ញុំមានកំហឹង ពីព្រោះពួកគាត់បានរានដីនេះ ហើយបានរស់នៅទីនោះចាប់តាំងពីឆ្នាំ១៩៩៩មកម៉្លេះ”។ លោកបានបន្ថែមថា “ខ្ញុំព្រួយបារម្ភយ៉ាងខ្លាំង ពីព្រោះអ្នកភូមិមកពីឃុំផ្សេងគ្នាចំនួនពីរឥឡូវនេះអាចតវ៉ាយកដីសម្រាប់ធ្វើស្រែចម្ការនេះ”។
លោក ជួន ចេន អនុប្រធានភូមិស្នួលទ្រេតបានមានប្រសាសន៍ថា សេចក្ដីសម្រេចដែលធ្វើឡើងនៅកិច្ចប្រជុំមួយកាលពីព្រឹកម្សិលមិញជាមួយលោកអភិបាលរងខេត្ត បានធ្វើឲ្យអ្នកភូមិរបស់ខ្ញុំមានកំហឹងផងដែរ។
លោក កែវ សុង តំណាងអ្នកភូមិ៧១គ្រួសារមានប្រសាសន៍ថា ក្រុមអ្នកភូមិជំទាស់ដាច់ខាតមិនទទួលយកដីថ្មីនោះឡើយ។ លោកបានមានប្រសាសន៍ថា “យើងនឹងមិនទទួលយកដីសម្រាប់ធ្វើស្រែចម្ការរបស់អ្នកភូមិផ្សេងឡើយ។ សេចក្ដីសម្រេចដែលធ្វើឡើងដោយលោក ជុង ភេទ អភិបាលរងខេត្តនេះឥតអៀនខ្មាសទាល់តែសោះ ព្រោះលោកយកដីរបស់យើងទៅឲ្យក្រុមហ៊ុន ហើយជំរុញឲ្យពួកយើងប្រឈមមុខជាមួយអ្នកភូមិផ្សេងទៀតដើម្បីដីរបស់ខ្លួនទៅវិញ”។
កាលពីឆ្នាំ២០០២រដ្ឋបាលព្រៃឈើបានប្រាប់អ្នកភូមិនៅភូមិស្នួលទ្រេតថា ពួកគាត់ត្រូវតែចាកចេញពីដីរបស់ខ្លួន ពីព្រោះពួកគាត់រស់នៅក្នុងតំបន់ការពារ។ អនុប្រធានភូមិរូបនេះបានមានប្រសាសន៍ថា ទោះជាយ៉ាងណា កាលពីឆ្នាំ២០០៨ ក្រុមហ៊ុន សូ ចន្ធូ ទទួលបានដីសម្បទានទំហំ៣.៧៤៤ហិកតា នៅក្នុងឃុំចំនួនបីក្នុងស្រុកអូរជ្រៅ រួមមានភូមិស្នួលទ្រេត និងតំបន់នៅក្បែរៗនោះ ។
លោក ជុង ភេទ បានមានប្រសាសន៍បន្ទាប់ពីកិច្ចប្រជុំនោះថា សេចក្ដីសម្រេចនេះគ្រាន់តែបណ្ដោះអាសន្នប៉ុណ្ណោះ ហើយថា ដីនៅក្នុងភូមិស្នួលទ្រេតនឹងត្រូវដាំដើមឈើឡើងវិញ ដែលជាផ្នែកមួយនៃគម្រោងរបស់រដ្ឋាភិបាល។ លោកបានបន្ថែមថា “យើងនឹងមិនយកដីរបស់អ្នកភូមិទៅឲ្យអ្នកភូមិផ្សេងឡើយ។ ដីដែលយើងមានគម្រោងផ្ដល់ទៅឲ្យអ្នកភូមិគឺជាដីព្រៃរបស់រដ្ឋទាំងអស់”។
លោក ស៊ុម ចាន់គា អ្នកសម្របសម្រួលអង្គការសិទ្ធិមនុស្សអាដហុកប្រចាំខេត្តនេះមានប្រសាសន៍ថា លោកសង្ស័យថា គម្រោងនេះគ្រាន់តែជាការបណ្ដោះអាសន្នប៉ុណ្ណោះ ពីព្រោះអ្នកភូមិ៧១គ្រួសារត្រូវបានស្នើសុំឲ្យផ្ដិតមេដៃលើឯកសារយល់ព្រមផ្ទេរដីនោះរួចហើយ។ លោកបានបញ្ជាក់ថា ពួកគាត់ទាំងអស់គ្នាបានបដិសេធ៕សារុន