សហជីពកម្មករមួយក្រុមនឹងចាប់ផ្ដើមចែកចាយខិត្តប័ណ្ណនៅថ្ងៃនេះដើម្បីអំពាវនាវឲ្យអ្នកគាំទ្រចូលរួមការធ្វើកូដកម្មទូទាំងប្រទេសនៅក្នុងខែមីនា ពោលគឺយឺតជាងការគ្រោងទុកចែកចាយពីរថ្ងៃ ដោយសារតែរោងពុម្ពភាគច្រើននៅក្នុងរាជធានីភ្នំពេញបដិសេធមិនព្រមបោះពុម្ពខិត្តប័ណ្ណទាំងនោះ។
ក្រុមតំណាងសហជីពបានលើកឡើងកាលពីម្សិលមិញថា ចាប់តាំងពីថ្ងៃច័ន្ទមក រោងពុម្ពមួយចំនួនបានបដិសេធមិនព្រមបោះពុម្ព ខិត្តប័ណ្ណទាំងនេះទេ ដោយសារពួកគេជឿថា រោងពុម្ពទាំងនោះខ្លាចរដ្ឋាភិបាលចោទប្រកាន់ពីបទញុះញង់ប្រជាពលរដ្ឋឲ្យល្មើសនឹងបម្រាមមិនឲ្យជួបជុំគ្នានៅទីសាធារណៈនៅពេលបច្ចុប្បន្ន។
លោក អាត់ ធន់ ប្រធានសហភាពការងារកម្ពុជាបានមានប្រសាសន៍ថា “ប្រហែលជារដ្ឋាភិបាលបានអំពាវនាវអ្វីម្យ៉ាងហើយមើលទៅ ខ្ញុំមិនដឹងទេ ប៉ុន្តែរោងពុម្ពទាំងនោះមានការភ័យខ្លាច [មិនហ៊ានបោះពុម្ពខិត្តប័ណ្ណនោះទេ]”។ ពេលនេះពួកគេរកបានរោងពុម្ពមួយដែលយល់ព្រមបោះពុម្ពខិត្តប័ណ្ណរបស់ពួកគេហើយ។
ខិត្តប័ណ្ណនេះមានរៀបរាប់ការទាមទារប្រាំពីរចំណុចរបស់សហជីពទាំងនេះ និងអំពាវនាវឲ្យកម្មករធ្វើកូដកម្មពីថ្ងៃទី១២ ខែមីនា ដល់ថ្ងៃទី១៥ ខែដដែល ប្រសិនបើមិនធ្វើតាមការទាមទារទាំងនោះទេ។
ការទាមទារទាំងនោះរួមមានការស្នើសុំឲ្យដោះលែងបាតុករទាំង២១នាក់ ដែលកំពុងជាប់ឃុំនៅឡើយក្រោយពីមហាកូដកម្មរបស់កម្មករកាត់ដេរលើផ្លូវវេងស្រេង កាលពីថ្ងៃទី២ និងទី៣ ខែមករា ស្នើសុំឲ្យដំឡើងប្រាក់ខែគោល១៦០ដុល្លារសម្រាប់កម្មករកាត់ដេរ ត្រូវដាក់ទោសកងកម្លាំងរដ្ឋាភិបាលដែលបានសម្លាប់កម្មករប្រាំនាក់កាលពីថ្ងៃទី៣ ខែមករា ហើយរដ្ឋាភិបាលត្រូវដកបម្រាមលើការប្រមូលផ្ដុំគ្នាជាសាធារណៈរបស់ប្រជាពលរដ្ឋនិងចំណុចមួយចំនួនទៀត។
ខិត្តប័ណ្ណនេះក៏អំពាវនាវឲ្យកម្មករទាំងអស់បដិសេធមិនធ្វើការបន្ថែមម៉ោងពីថ្ងៃទី២៤ ខែកុម្ភៈដល់ថ្ងៃទី២៨ ខែដដែល និងឲ្យពួកគេចូលរួមវេទិកាសាធារណៈមួយនៅទីលានប្រជាធិបតេយ្យនៅថ្ងៃទី៨ ខែមីនា ដែលក្នុងនោះពួកគេអញ្ជើញលោក ស ខេង រដ្ឋមន្ត្រីក្រសួងមហាផ្ទៃ លោក អិុត សំហេង រដ្ឋមន្ត្រីក្រសួងការងារ និងឧបនាយករដ្ឋមន្ត្រី គាត ឈន់ ឲ្យមកឆ្លើយបំភ្លឺនៅចំពោះមុខមហាជនពាក់ព័ន្ធនឹងវិស័យការងារ។
លោកស្រី ឆេង ឡា អនុប្រធានសហព័ន្ធសហជីពយុវជនឯករាជ្យ ដែលជាហត្ថលេខីមួយក្នុងចំណោមហត្ថលេខីចំនួន១៨នៅលើខិត្តប័ណ្ណនេះ បានមានប្រសាសន៍ថា ខិត្តប័ណ្ណចំនួន៥០.០០០ច្បាប់ត្រូវបានបោះពុម្ពរួចហើយ ហើយថា នៅថ្ងៃនេះនឹងបោះពុម្ព៥០.០០០ច្បាប់បន្ថែមទៀត។
លោកស្រី ឆេង ឡា បានមានប្រសាសន៍បន្ថែមទៀតថា “ពួកយើងយឺតយ៉ាវដោយសារតែរោងពុម្ពទាំងនោះភ័យខ្លាច ប៉ុន្តែយ៉ាងហោចណាស់យើងរកបានម្នាក់ហើយ ដែលនឹងបោះពុម្ពឲ្យពួកយើង”។ ក្នុងចំណោមរោងពុម្ពចំនួនប្រាំ ដែលអ្នកកាសែតបានចុះទៅកាលពីម្សិលមិញ រោងពុម្ពចំនួនបួនបានបដិសេធមិនព្រមបោះពុម្ពខិត្តប័ណ្ណនេះទេ។
នៅឯរោងពុម្ព TST Printing តាមបណ្ដោយកំណាត់ផ្លូវលេខ២៧១ អ្នកគ្រប់គ្រងម្នាក់ដែលសុំមិនបញ្ចេញឈ្មោះបាននិយាយថា “ខ្ញុំមិនចង់ពាក់ព័ន្ធរឿងនេះទេ។ ខ្ញុំបារម្ភខ្លាចវាបង្កបញ្ហា”។
នៅឯរោងពុម្ព T.Y. តាមបណ្ដោយកំណាត់មហាវិថីសុធារស លោក សីហា សុភាព ដែលជាអនុប្រធានអ្នកគ្រប់គ្រងបានទូរស័ព្ទទៅអ្នកគ្រប់គ្រងធំរបស់ខ្លួន ដើម្បីសួរថា តើគាត់យល់ព្រមបោះពុម្ពខិត្តប័ណ្ណនេះចំនួន២០.០០០ច្បាប់ដែរឬទេ។ លោក សុភាព និយាយថា “ថៅកែរបស់ខ្ញុំលី ហួត ធ្វើការនៅក្រសួងមហាផ្ទៃ ហើយគាត់មិនអនុញ្ញាតទេ”។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញបានគូសបញ្ជាក់ជាថ្មីម្ដងទៀតកាលពីម្សិលមិញថា ការចែកចាយខិត្តប័ណ្ណគឺខុសច្បាប់ ពីព្រោះវាបំពានបម្រាមរបស់រដ្ឋាភិបាលដែលហាមមិនឲ្យប្រជាពលរដ្ឋប្រមូលផ្ដុំគ្នានៅតាមទីសាធារណៈ។ លោក ឡុង ឌីម៉ង់ បានបដិសេធមិនលើកឡើងថា តើមានការចេញសារាចរណែនាំរោងពុម្ពនោះទេ ប៉ុន្តែលោកបានកោតសរសើរចំពោះទង្វើរបស់ពួកគេ។ លោកបានមានប្រសាសន៍ថា “យើងមានមោទនភាពចំពោះរោងពុម្ពទាំងនោះដែលមិនបោះពុម្ពខិត្តប័ណ្ណ [ឲ្យសហជីពទាំងនោះ]។ ពួកគេដឹងថា អ្វីស្របច្បាប់ និងអ្វីដែលខុសច្បាប់”៕ សុខុម