28 C
Phnom Penh

​ប្រជា​ពល​រដ្ឋ​​នៅ​បុរីកីឡាដាក់​បណ្តាសា​ក្រុម​ហ៊ុន​​​និង​អាជ្ញាធរ

ដោយ ឌឹ ខេមបូឌា ដេលី

បទវិភាគ

កាល​ពីម្សិលមិញ​ អ្នក​ភូមិសហ​គមន៍​បុរី​កីឡា​បាន​ដាក់​បណ្ដាសា​​មនុស្ស​​ដែល​ពួកគាត់​និយាយ​ថា ទទួល​ខុស​ត្រូវ​ចំពោះ​​ការ​ធ្វើ​ឲ្យ ជីវិត​​របស់​ពួកគាត់​លំបាក​​វេទនា​ចាប់​តាំងពី​បាន​បណ្ដេ​ញ​ពួក​គាត់​ដោយ​ហិង្សា​ចេញពី​ផ្ទះសំបែង​​របស់​ខ្លួន​​កាល​ពី​​ពីរ​ឆ្នាំ​​មុន​។

កាលពី​​​ម្សិលមិញ អ្នកភូមិ​​​សហគមន៍​​​បុរីកីឡា​​​យក​​​ដី​​​មួយ​​​ថាសមាន​​​អុជ​​​ធូប​​​​ពី​​​បុរីកីឡា​​​ហែ​​​ទៅ​​​ព្រះ​​​អង្គដងកើ​ ដើម្បី​ដាក់​បណ្តាសា​ ក្រុមហ៊ុន​ ផាន​ អីុមិុច និង​អាជ្ញាធរ​ចំពោះការមិន​គោរពពាក្យ​សន្យា​សាង​សង់​ផ្ទះល្វែង​គ្រប់​គ្រាន់​សម្រាប់​ពួក​គាត់​​​​។សីុវ  ចាន់​ណា​
កាលពី​​​ម្សិលមិញ អ្នកភូមិ​​​សហគមន៍​​​បុរីកីឡា​​​យក​​​ដី​​​មួយ​​​ថាសមាន​​​អុជ​​​ធូប​​​​ពី​​​បុរីកីឡា​​​ហែ​​​ទៅ​​​ព្រះ​​​អង្គដងកើ​ ដើម្បី​ដាក់​បណ្តាសា​ ក្រុមហ៊ុន​ ផាន​ អីុមិុច និង​អាជ្ញាធរ​ចំពោះការមិន​គោរពពាក្យ​សន្យា​សាង​សង់​ផ្ទះល្វែង​គ្រប់​គ្រាន់​សម្រាប់​ពួក​គាត់​​​​។សីុវ  ចាន់​ណា​

នៅ​ក្នុង​ការ​វិវឌ្ឍចុង​​ក្រោយ​បំផុត​ពាក់​ព័ន្ធ​វិវាទ​ដីធ្លី​ដ៏អូស​បន្លាយ​នេះ​ កម្លាំង​សន្តិ​សុខ​ និង​នគរ​បាល​បង្ក្រាប​បាតុកម្ម​​ កាល​ពី​សប្ដាហ៍​មុន​បាន​បង្ខំ​អ្នក​ភូមិ​ឲ្យ​ចាក​ចេញ​ពី​អគារ​​នៅ​ទំនេរ​​ដែល​ពួកគាត់​បាន​ចូល​ទៅកាន់​កាប់​នៅ  ក្បែរ​កន្លែង​ដែល​ពួក​គាត់​ប្រក់កៅស៊ូតង់​ស្នាក់​​​​​​នៅនោះ ដោយ​បណ្ដាល​​​ឲ្យ​មនុស្ស​ប្រាំ មួយ​នាក់​រង​របួស​។

កាលពីម្សិលមិញ អ្នក​ភូមិ​បុរីកីឡា​ប្រហែល​២០​នាក់​បានបួងសួង​​​ឲ្យ​ព្រលឹង​ដូន​តា​របស់​ខ្លួន​ជួយ​រក​ដំណោះ​ស្រាយ​ឲ្យ​ពួក​គាត់​នៅ​ឯ​ព្រះ​អង្គ​ដង​កើទល់​មុខ​ព្រះ​​បរម​រាជវាំង ដែល​​នៅទីនោះ​ពួក​គាត់​បាន​ដាក់​​ដី​មួយ​ថាស​​​​​យក​ពី​ កន្លែង​ដែល​​ពួកគា​ត់​រស់​នៅ​ និង​​បាន​អុជ​ធូប។

លោក ពេជ្រ លឹម​ឃួន អ្នក​នាំពាក្យ​សហ​គមន៍​​បុរីកីឡាបានមាន​​ប្រសាសន៍​ថា “ យើង​សូម​ដាក់​បណ្ដាសាអ្នក​ដែល​​បាន​យក​ដី​របស់​យើង​។ សូម​ឲ្យ​ការ​រក​ស៊ី​របស​់​ពួក​គេ​វិនាស​អន្តរាយ​ និង​រស់​នៅ​មិន​បាន​សេចក្ដី​សុខ​លុះណា​តែ​ពួកគេ​ប្រគល់​ដី​ឲ្យ​យើង​​វិញ​”។

លោក​បានមាន​ប្រសាសន៍​ថា “ ចៅៗ​របស់​យើង​​រស់​នៅ​លំបាក​វេទនា​ ពី​ព្រោះ​យើង​មិន​មាន​ផ្ទះ​សំបែង​សម្រាប់​ស្នាក់​នៅ​ឡើយ​”។ លោក​​បន្ថែម​ថា “ហេតុ​នេះ​ហើយ ជំនួស​មុខ​ឲ្យ​ចៅ​ៗ​របស់​យើង​ យើង​​សូម​​ប្ដឹងយម​រាជ​ ហើយសូម​ឲ្យ​​បារមី​ព្រះ​អង្គ​ដង​កើជួយ​រក​យុត្តិ​ធម៌​ឲ្យ​ពួក​យើង​ទាំង​អស់​គ្នា​ផង​”។

លោក​បាន​មាន​ប្រសាសន៍​ថា “អ្នក​ស្រី​ សុ៊យ សុផាន​ ដែល​ក្រុម​ហ៊ុន​ផាន​អុីមិុច​របស់​គាត​់ទទួល​​បាន​ដីទំហំ​២,៦​ហិក​តា កាលពី​ឆ្នាំ​២០០៧ ប៉ុន្តែ​មិន​បាន​គោរព​តាម​​កិច្ច​ព្រម​ព្រៀង​សង​់​ផ្ទះ​ល្វែង​​ឲ្យ​​ពួក​គាត់​ទាំង​អស់​គ្នា​នោះនឹង​ទទួលរង​បណ្តា​សា​នេះ”។

ក្នុង​ចំណោម​អ្នក​ភូមិ​ជាង​១.០០០​គ្រួសារ​ដែល​រង​ផល​ប៉ះពាល់​ដោយ​កិច្ច​ព្រម​​ព្រៀង​ដីធ្លីនោះ ឥឡូវ​នេះមាន​​អ្នក​ភូមិ​​ប្រហែល​១៥០​​គ្រួសារ​កំពុង​​រស់​​ក្នុង​ភាព​​មិន​ច្បាស់​លាស់​។ លោក​​បាន​មាន​ប្រសាសន៍​ថា ក្រុម​អ្នក​ភូមិ​ចង់បាន​ដីទំហំ​៤.៣០០​ម៉ែត្រ​ក្រឡា ដើម្បី​ពួកគាត់​អាច​សង់​ផ្ទះ​សំបែង​បា​ន​សម​រម្យ​។ លោក​បាន​បន្ថែមទៀត​​ថា “ យើង​បាន​​សុំឲ្យ​អាជ្ញាធរ​ជួយ​ពួក​យើង ប៉ុន្តែ​ពួកគេ​មិន​ដែល​អើ​ពើ​ឡើយ​”។

លោក​ ឡុង ឌីម៉ង់ អ្នក​នាំពាក្យ​សាលា​រាជ​ធានីភ្នំពេញបាន​មាន​ប្រសាសន៍​ថា សាលា​រាជ​ធានី​មាន​បំណង​សាង​សង់​ជម្រក​​បណ្ដោះ​អាសន្ន​សម្រាប់​អ្នក​​ភូមិ​ទាំង​នោះ។ លោក​បានមាន​ប្រសាសន៍​ថា “យើង​បាន​ទុក​ពេលឲ្យ​ពួកគាត​់ ពិភាក្សា​គ្នា ហើយ​ប្រាប់​​​ពួក​​យើង​វិញថា តើ​អ្នក​ភូមិ​ប៉ុន្មាន​គ្រួសារ​ត្រូ​វ​ការ​​ផ្ទះ​សំបែង​ ហើយ​ប៉ុន្មាន​គ្រួសារ​ចង់​បាន​ដី​”។  “ការ​ដាក់​បណ្ដាសា”ដល់​មន្ត្រី​សាធា​រណៈ​ឬម្ចាស់​ក្រុម​ហ៊ុន​នានា​មិនមែន​ជា​រឿង​ចម្លែក​ទេក្នុង​ចំណោម​អ្នកដែល​បាត់​បង់​កម្មសិទ្ធិ​ក្នុង​ប្រទេស​កម្ពុជាដែល​ជា​រឿយៗ​បា​ន​ងាក​ទៅ​រក​អបិយ​ជំនឿ​ បន្ទាប់​ពី​បានស្វែង​រក​ជម្រើស​​ផ្លូវ​ច្បាប់​រួច​មក​”៕ សារុន​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស