36 C
Phnom Penh

រដ្ឋាភិបាល​អនុម័ត​ច្បាប់​ប្រឆាំង​សកម្មភាព​លាង​លុយ​​កខ្វក់​ ខណៈ​ពេល​មាន​ក្តី​បារម្ភ​កាន់​តែ​ខ្លាំង​

ដោយ ឌឹ ខេមបូឌា ដេលី

បទវិភាគ

ស្រប​ពេល​ដែល​សហគមន៍​អន្តរជាតិ​មាន​ ក្តី​បារម្ភ​កាន់តែ​ខ្លាំង​ឡើង​ៗ​ថា ប្រទេស​កម្ពុជា​ងាយ​រង​គ្រោះ​ដោយ​សារ​សកម្មភាព​របស់​ក្រុម​អ្នក​លាង​លុយ​​កខ្វក់ និង​អ្នក​ផ្តល់​ហិរញ្ញ​វត្ថុ​ដល់​ចលនា​ភេរវកម្ម​ កាលពី​ថ្ងៃ​សុក្រ​ ទីស្តី​ការ​គណៈរដ្ឋមន្ត្រី​ បាន​អនុម័ត​អនុក្រឹត​ស្តី​ពី​ការ​បង្កក​ទ្រព្យ​សកម្ម​របស់​អង្គការ​ភេរវករ​ និង​ស្ថាប័ន​ដែល​គាំទ្រ​អង្គការ​ទំាង​នោះ​។

សេចក្តី​ប្រកាស​របស់​ទីស្តីការ​គណៈរដ្ឋ​មន្ត្រី​មាន​ខ្លឹម​សារ​ថា “ អនុក្រឹត​នេះ​ចែង​អំពី​នីតិ​វិធី​​ និង​វិធាន​នានា​ក្នុងការ​បង្កក​ទ្រព្យ​​សកម្ម​​របស​់​ភេរ​​​វករ​ ​ក៏​ដូចជា​​ស្ថាប័ន​ពាក់​ព័ន្ធ​ផ្សេង​ៗទៀត​ ដើម្បី​​អនុវត្ត​តាម​សេចក្តី​សម្រេច​រួម​​​អង្គការ​សហ​​ប្រជាជាតិ​ និង​សេចក្តី​សម្រេច​ផ្សេង​ៗទៀត​”។

សេចក្តី​ប្រកាស​ដដែល​បាន​បង្ហាញ​ទៀត​ថា ច្បាប់​ថ្មី​នេះ​នឹង​តម្រូវឲ្យ​មានការ​អនុវត្ត​តឹង​រឹុងជាង​មុន​លើ​សេចក្តី​សម្រេច​របស់​ក្រុម​ប្រឹក្សា​​សន្តិសុខ​អង្គការ​សហប្រជា​ជាតិ​ ដើម្បី​ដាក់​ទណ្ឌកម្ម​ទៅ​លើ​បុគ្គល​ ឬក៏​អង្គភាព​ទាំង​ឡាយ​ណា​ដែល​មាន​ទំនាក់​ទំនង​ជាមួយ​ក្រុម​ អាល់កៃដា ឬក៏​តាលីបង់ ព្រម​ទាំង​អនុវត្ត​សេចក្តី​សម្រេច​មួយ​ដែល​ជំរុញ​ឲ្យ​ប្រទេស​នានា​ចែក​រំលែក​ព័ត៌មាន​តាម​ដាន​ទាក់​ទង​នឹង​ភេរវកម្ម​ ហើយ​ជំរុញ​ឲ្យ​ប្រទេស​ទាំង​នោះ​អនុវត្ត​យ៉ាង​តឹង​រឹុង​​នូវ​ច្បាប់​ប្រឆាំង​អំពើ​ភេរ​វ​កម្ម​របស់​ខ្លួន​ផ្ទាល់​។

លោក ផៃ ស៊ីផាន អ្នក​នាំ​ពាក្យទីស្តីការ​គណៈរដ្ឋមន្ត្រី​ បាន​ឲ្យ​ដឹង​ថា អនុក្រឹត​នេះ​ស​បញ្ជាក់​ឲ្យ​ឃើញ​កាន់​តែ​ច្បាស់​ថា រដ្ឋាភិបាល​ពិត​ជា​មាន​ស្មារតី​ប្តេជ្ញា​ទប់​ស្កាត​់​ចលនា​លាង​លុយ​កខ្វក់​​។ លោក ស៊ីផាន ​បាន​មាន​ប្រសា​សន៍​ថា “ ​យើង​កំពុង​តែ​យក​ចិត្ត​ទុក​ដាក់​ទៅ​លើ​… ភាព​មិន​ប្រក្រតី​នៃការ​ផ្ទេរ​ប្រាក់​ ឬក៏​មធ្យោ​បាយ​ផ្សេង​ៗទៀត​នៃការ​លាង​លុយ​កខ្វក់​ ក៏​ប៉ុន្តែ ច្បាប់​នេះ​ផ្តល់​ឲ្យ​យើង​នូវ​វិធី​ស្មុគស្មាញ​ជាង​មុន​ ក្នុង​ការ​អនុវត្ត​ការងារ​របស់​យើង​ និង​បង្ក្រាប​ចលនា​លាង​លុយ​កខ្វក់​”។

លោកបាន​​ថ្លែង​បន្ត​ថា “ច្បាប់​នេះ​បាន​រំឭក​​យើង​ថា យើង​ជា​ដៃ​គូ​ជាមួយ​ពិភព​លោក​​ក្នុង​ប្រតិបត្តិការ​ប្រឆាំង​អំពើ​ភេរវកម្ម​”។

សេចក្តី​ព្រាង​អនុក្រឹត​មួយ​​ត្រូវ​បាន​ពិនិត្យ​ឡើង​វិញ​ក្នុង​កិច្ច​ប្រជុំ​រយៈពេល​បី​ម៉ោង​កាល​ពី​សប្តាហ៍​មុន​ នៅទីស្តី​ការ​ក្រសួង​សេដ្ឋកិច្ច​ និង​ហិរញ្ញវត្ថុ​ ​ដោយ​​មាន​វត្តមានចូល​រួម​ពី​​​តំណាង​ធនាគារ​ជាតិ​នៃ​កម្ពុជា​ ក្រុម​ប្រឹក្សា​​អភិ​វឌ្ឍន៍​កម្ពុជា​ និង​អង្គភាព​ប្រឆាំង​អំពើ​ពុក​រលួយ​។

ក្នុង​ឆ្នាំ​២០០៤​ ​កម្ពុជា​បាន​ចូល​រួម​ជា​សមា​ជិក​ក្រុម​ប្រទេស​អាស៊ី​/ប៉ាស៊ីហ្វិក​ ដើម្បី​ប្រឆាំង​​ចលនា​លាង​លុយ​កខ្វក់​។ ក្រុម​នេះ​តម្រូវ​ឲ្យ​សមាជិក​ទាំង​ឡាយ​ឆ្លើយ​តប​ទៅ​នឹង​ស្តង់​ដារ​អន្តរជាតិ​ក្នុង​ការ​បង្ក្រាប​បទ​ល្មើស​ហិរញ្ញ​វត្ថុ​។

កាលពី​ឆ្នាំ​២០០៧ រដ្ឋាភិបាល​បាន​អនុម័ត​ច្បាប់​មួយ​ស្តី​ពី​ការ​ប្រឆាំង​ចលនា​លាង​លុយ​កខ្វក់​ និង​ការ​ផ្តល់​ហិរញ្ញវត្ថុ​ដល់​ភេរវករ​ និង​ក្នុង​ឆ្នាំ​២០០៨រដ្ឋាភិបាល​បាន​បង្កើត​អង្គភាព​​តាម​ដាន​ហិរញ្ញវត្ថុ​ ដែល​មាន​មូល ដ្ឋាន​នៅ​ធនាគារជាតិ​នៃកម្ពុជា​ ក៏​ប៉ុន្តែ មានការ​ផ្តន្ទា​ទោស​មួយ​ចំនួន​តូច​ប៉ុណ្ណោះ​។

​នៅ​ខែ​មីនា អង្គភាព​តាម​ដាន​ហិរញ្ញវត្ថុ​របស់​ធនាគារ​ជាតិ​នៃ​កម្ពុជា​ មន្ត្រី​អនុវត្ត​ច្បាប់​ និង​ធនាគា​រ​ឯកជន​ បា​ន​ចូល​រួម​កម្មវិធី​បណ្តុះ​បណ្តាល​រយៈពេល​ពេញ​មួយ​សប្តាហ៍​ ដើម្បី​ឆ្លើយ​តប​ទៅ​នឹង​សកម្មភាព​លាង​លុយ​កខ្វក់​។

​ជំនាញ​ការ​ផ្នែក​បទ​ល្មើល​ហិរញ្ញវត្ថុ​សា​កល​លោក​​ ដែល​បាន​ចូល​រួម​វគ្គ​បណ្តុះ​បណ្តាល​នោះបា​នលើក​ឡើង​ថា សន្ទុះ​កំណើន​នៃ​សេដ្ឋ​​​​កិច្ច​របស់​ប្រទេស​កម្ពុជា​ ក៏​ដូចជា​សន្ទុះ​កំណើន​នៃ​ពាណិជ្ជកម្ម​អន្តរជាតិ​ជាមួយ​ប្រទេស​ចិន​ ធ្វើ​ឲ្យ​ប្រទេស​នេះ​កាន់​តែ​ទំនង​ជា​គោល​ដៅ​របស់​ក្រុម​អ្នក​លាង​លុយ​កខ្វក់​ ក្នុង​រយៈពេល​ប៉ុន្មាន​ឆ្នាំ​ខាង​មុខ​។

របាយការណ៍ប្រចាំ​ឆ្នាំ​​ស្តី​ពី​យុទ្ធសាស្រ្ត​គ្រប​់​គ្រង​សារធាតុ​ណាកូទិកអន្តរជាតិ​ របស់​ក្រសួង​ការបរទេស​សហរដ្ឋអាមេរិក​ ដែល​ត្រូវ​បាន​ចេញ​ផ្សាយ​កាលពី​ខែមីនាឆ្នាំ​មុន និង​បាន​បង្ហាញ​បទ​ល្មើស​ហិរញ្ញវត្ថុ​នៅ​ក្នុង​ប្រទេស​កម្ពុជា​ បាន​លើក​ឡើង​ថា ប្រទេស​នេះ​មាន​ “ភាពងាយ​រង​គ្រោះ​ដោយ​សារ​ចលនា​លាង​លុយ​កខ្វក់” ដោយ​បញ្ជាក់​អំពី​សេដ្ឋកិច្ច​គ្រប​ដណ្តប់​​ដោយ​រូបិយប័ណ្ណ​ដុល្លារ​ ដែល​ត្រូវ​បាន​ចុះ​បញ្ជី​តាម​របៀប​យក​សាច់​ប្រាក​់​ជា​គោល​ ប្រព័ន្ធ​ហិរញ្ញវត្ថុ​ក្រៅ​ផ្លូវការ ព្រំ​ដែន​មាន​ច្រក​សម្ងាត់​ និង​បទ​បញ្ញត្តិ​មាន​កម្រិត​។

អំឡុង​កិច្ច​ប្រជុំ​កាលពី​ថ្ងៃ​សុក្រ​ ក្រោម​អធិប​​តី​ភាព​​​លោកនាយករដ្ឋមន្ត្រី ហ៊ុន សែន ទីស្តីការ​គណៈរដ្ឋមន្ត្រី​ក៏​បាន​អនុម័ត​ច្បាប់​បង្កើត​ផែនការ​សកម្មភាព​ដើម្បី​កាត់​បន្ថយ​ចំនួន​អ្នក​ស្លាប់ដោយសារ​គ្រោះ​ថ្នាក់​ចរាចរ​ណ៍​ផង​ដែរ៕ សុធា

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស