កាលពីម្សិលមិញ សាលាដំបូងរាជធានីភ្នំពេញ បានសម្រេចបញ្ជូនរឿងក្ដីមនុស្សពីរនាក់ដែលជាប់ចោទពីបទជួញដូរក្មេងស្រីគថ្លង់ និងមានផ្ទុកមេរោគអេដស៍អាយុ១៣ឆ្នាំម្នាក់ទៅផ្ទះបន ទៅឲ្យចៅក្រមស៊ើបសួរវិញ ដើម្បីឲ្យគាត់ពិនិត្យមើលរូបភាពវីដេអូដែលជនសង្ស័យម្នាក់អះអាងថា គាត់មិននៅកន្លែងកើតហេតុទេ ពេលបទឧក្រិដ្ឋនោះកើតឡើង។
ឯម សុភា អាយុ៤៤ឆ្នាំ និង ឡុញ ចាន់ អាយុ២៨ឆ្នាំ ត្រូវបានផ្ដន្ទាទោសកាលពីដើមខែនេះ ហើយដំបូងតុលាការគ្រោងនឹងចេញសាលក្រមនៅថ្ងៃម្សិលមិញនេះ។
ប៉ុន្តែលោក តែ សំអាង ចៅក្រមប្រធានក្រុមប្រឹក្សាជំនុំជម្រះបានពន្យារពេលចេញសាលក្រម ពីព្រោះស្ត្រីឈ្មោះ សុភា បានអះអាងថា គាត់បាននិងកំពុងលេងល្បែងនៅពេលមានការប្រព្រឹត្តបទឧក្រិដ្ឋដូចដែលបានចោទប្រកាន់នោះ។
លោកចៅក្រម តែ សំអាង បានលើកឡើងនៅក្នុងតុលាការថា “ តុលាការបានសម្រេចបញ្ជូនរឿងក្ដីនេះទៅឲ្យចៅក្រមស៊ើបសួរធ្វើការស៊ើបអង្កេតឡើងវិញ និងពិនិត្យមើលកាមេរ៉ាសុវត្ថិភាពនៅកាស៊ីណូ ណាហ្គាវើល”។
ស្ត្រីឈ្មោះ សុភា បានបញ្ជាក់ថា គាត់មិនបាននៅផ្ទះទេកាលពីខែមិថុនានោះ ដែលនៅពេលនោះ មានការអះអាងថា ក្មេងស្រីរងគ្រោះគឺជាកុមារកំព្រាមានផ្ទុកមេរោគអេដស៏ ដែលរស់នៅអង្គការក្ដីសង្ឃឹមថ្មីនៃកុមារកម្ពុជា ជាអង្គការក្រៅរដ្ឋាភិបាលនៅក្នុងខេត្តកំពង់ស្ពឺ បានទៅលេងជាមួយកូនស្រីរបស់ស្ត្រីឈ្មោះ សុភា ជាមិត្តភក្ដិរៀន ជាមួយគ្នានៅផ្ទះរបស់គាត់មុនពេលនាងបាត់ខ្លួនរយៈពេលពីរថ្ងៃ។
ពេលនាងត្រឡប់មកដល់អង្គការក្រៅរដ្ឋាភិបាលវិញ ក្មេងស្រីរូបនេះបានប្រាប់បុគ្គលិកថា នាងត្រូវបានគេនាំទៅផ្ទះបនមួយកន្លែងស្ថិតក្នុងសង្កាត់ទន្លេបាសាក់ រាជធានីភ្នំពេញ ហើយត្រូវបានគេរំលោភ ដែលក្រោយមកមានការបញ្ជាក់តាមរយៈការធ្វើកោសល្យវិច័យ។
ស្ត្រីឈ្មោះ សុភា បានប្រាប់តុលាការថា “ខ្ញុំមិននៅផ្ទះទេ នៅពេលក្មេងស្រីរងគ្រោះត្រូវគេនាំទៅទីនោះ។ ខ្ញុំកំពុងលេងល្បែងនៅកាស៊ីណូណាហ្គាវើល”។ តាមច្បាប់ប្រទេសកម្ពុជា វាជាការខុសច្បាប់ការ ដែលពលរដ្ឋខ្មែរទៅលេងល្បែងនៅកាស៊ីណូ។
លោក សុខ ផល្លា នាយកប្រតិបត្តិអង្គការក្រៅរដ្ឋាភិបាលនេះ ដែលបានដាក់ពាក្យបណ្ដឹងប្ដឹងអ្នកទាំងពីរបានមានប្រសាសន៍ថាសេចក្ដីសម្រេចកាលពីម្សិលមិញបង្ហាញ“ ពីភាពគ្មានសង្ឃឹម” ចំពោះប្រព័ន្ធតុលាការ។
លោកបានមានប្រសាសន៍ថា “ខ្ញុំមិនជឿប្រព័ន្ធតុលាការឡើយ ជនរងគ្រោះផ្ទាល់បាននិយាយថា គឺស្ត្រីឈ្មោះ សុភា បាននាំនាងទៅកាន់ផ្ទះបននោះ”។
លោកបានមានប្រសាសន៍ថា ការស៊ើបអង្កេតឡើងវិញទំនងជាមានបញ្ហា ពីព្រោះចុងចោទអះអាងថា គាត់នៅកាស៊ីណូកាលពីខែមិថុនា ប៉ុន្តែតាមធម្មតារូបភាពនៅក្នុងកាមេរ៉ាសុវត្ថិភាពត្រូវបានលុបចោលបន្ទាប់ ពីរយៈពេលប្រហែលបីខែ៕ សារុន