នគរបាលបានឲ្យដឹងថា កាលពីម្សិលមិញ សាលាដំបូងខេត្្តកណ្តាលបានចោទប្រកាន់ បុរសអ្នករត់ម៉ូតូឌុបអាយុ២៧ឆ្នាំម្នាក់ពីបទចាប់រំលោភកូនចុងអាយុ១២ឆ្នាំរបស់ខ្លួន។
លោក កឹម យ៉ុង អធិការរងនគរបាលស្រុកខ្សាច់កណ្តាលបានមានប្រសាសន៍ថា ទាវសាវឿន ត្រូវបានចាប់ខ្លួនកាលពីថ្ងៃពុធ បន្ទាប់ពីម្តាយក្មេងស្រីរងគ្រោះបានដាក់ពាក្យ បណ្តឹងទៅនគរបាលចោទប្រកាន់ប្តីរបស់គាត់ពីបទចាប់រំលោភកូនស្រីរបស់គាត់។
លោកបានបន្ថែមថា “ជនសង្ស័យសារភាពថា ខ្លួនពិតជាបានចាប់រំលោភកូនចុងរបស់ខ្លួនច្រើនលើកមកហើយមែនក្នុងពេលកន្លងមក”។ លោក កឹម យ៉ុង មានប្រសាសន៍ថា បុរសរូបនេះបានចាប់រំលោភនាងយ៉ាងហោចណាស់ប្រាំមួយលើកដែរចាប់តាំងពីឆ្នាំ២០១២មក។
លើកចុងក្រោយ គាត់បានចាប់រំលោភក្មេងស្រីរូបនេះកាលពីរសៀលថ្ងៃច័ន្ទ ពេលម្តាយរបស់នាងមិននៅផ្ទះ។ក្មេងស្រីរូបនេះបានប្រាប់ម្តាយមីងនាង ដែលបានប្រាប់ម្តាយនាង ហើយស្ត្រីជាម្តាយបានរាយការណ៍ប្រាប់នគរបាល។ លោកបានថ្លែងថា “ក្មេងស្រីរងគ្រោះមិនហ៊ាននិយាយប្រាប់នរណាម្នាក់ទេ អស់រយៈពេលយូរមកហើយ ពីព្រោះឪពុកចុងរបស់នាងបានគំរាមសម្លាប់នាងបើនាងនិយាយរឿងនេះ”។
ឥឡូវនេះ ទាវ សាវឿន កំពុងត្រូវឃុំខ្លួនបណ្តោះអាសន្ន។ លោក កឹម សុគន្ធ អនុប្រធាននគរបាលយុត្តិធម៌ខេត្តបានមានប្រសាសន៍ថា “យើងបាននាំបុរសរូបនេះទៅតុលាការកាលពីថ្ងៃព្រហស្បតិ៍ហើយតុលាការបានចោទប្រកាន់ពីបទរំលោភអនីតិជន”។ អង្គការអាដហុក ឲ្យដឹងថា ខ្លួនទទួលបានករណីរំលោភកុមារ១៧៧ករណីកាលពីឆ្នាំមុន៕សារុន