បន្ទាប់ពីតំណាងក្រុមហ៊ុនចិនដែលមានគម្រោងសាងសង់ទំនប់វារីអគ្គិសនីកម្លាំង១០៨មេហ្គាវ៉ាតនៅស្ទឹងអារ៉ែង ក្នុងខេត្តកោះកុង បានចុះទៅមើលតំបន់នោះ ក្រុមមន្ត្រី និងប្រជាជនមូលដ្ឋាននិយាយថា ពួកគេបារម្ភថា ការសាងសង់គម្រោងដែលតម្រូវឲ្យមានការផ្លាស់ទីលំនៅអ្នកភូមិប្រមាណ១.៥០០នាក់នេះ នឹងចាប់ផ្ដើមនៅពេលឆាប់ៗនេះ។
លោក ទូ សាវុធ អភិបាលស្រុកថ្មបាំងបានមានប្រសាសន៍ថា “កាលពីថ្ងៃទី២៨ ខែកុម្ភៈ ក្រុមហ៊ុននេះបានចុះទៅមើលទំនប់នោះ ដើម្បីធ្វើការសិក្សានិងបានព្យាយាមជួលដីពីអ្នកភូមិដើម្បីដាក់ឧបករណ៍សាងសង់”។
លោក សាវុធ បាននិយាយថា ប្រជាជន៦០០គ្រួសារមកពីឃុំចំនួនបីនឹងរងផលប៉ះពាល់ដោយសារការសាងសង់ទំនប់របស់ក្រុមហ៊ុនចិនឈ្មោះ Guodian Corporation ដែលអាចធ្វើឲ្យជន់លិចផ្ទៃដីជិត២.០០០ហិកតា ដែលដីខ្លះជាដីព្រៃពិសិដ្ឋនៅក្នុងតំបន់ការពារភ្នំក្រវាញ។
អ្នកជំនាញបរិស្ថានបាននិយាយថា ប្រភេទសត្វព្រៃនិងរុក្ខជាតិកម្រនៅក្នុងព្រៃនេះរួមទាំងសត្វក្រពើសៀមដែលជិតផុតពូជផងនោះក៏រងផលប៉ះពាល់អវិជ្ជមានផងដែរដោយសារគម្រោងនេះ។ លោក សាវុធ បានបន្ថែមថា ប្រជាជនទាំងនោះនឹងត្រូវផ្លាស់ទីលំនៅទៅកន្លែងថ្មីនៅចម្ងាយប្រហែល១០ទៅ២០គីឡូម៉ែត្រពីផ្ទះបច្ចុប្បន្នរបស់ពួកគេ។
លោកបាននិយាយថា “ប្រជាជនទាំងនោះកំពុងស្នើសុំឲ្យគេសាងសង់ផ្ទះថ្មីឲ្យ ដើម្បីធ្វើឲ្យស្ថានភាពរស់នៅល្អប្រសើរជាងផ្ទះដែលពួកគេត្រូវចាកចេញនោះ”។
លោក ពេជ្រ ស៊ីយុ៉ន ប្រធានមន្ទីររ៉ែនិងថាមពលខេត្តកោះកុងបានបញ្ជាក់ថា តំណាងក្រុមហ៊ុន Guodian Corporation បានចុះទៅមើលការដ្ឋានសាងសង់ទំនប់នេះកាលពីសប្ដាហ៍មុន ប៉ុន្តែលោកបានមានប្រសាសន៍ថា លោកនៅមិនទាន់ច្បាស់ថា គម្រោងសាងសង់នេះនឹងចាប់ផ្ដើមពេលណាទេ។
លោកបានមានប្រសាសន៍ថា “យើងមិនដឹងថា ការសាងសង់ទំនប់វារីអគ្គិសនីនៅស្ទឹងអារ៉ែងនេះនឹងចាប់ផ្ដើមពេលណាទេ ប៉ុន្តែអ្វីៗគ្រប់យ៉ាងបានសិក្សារួចហើយ ហើយអ្នកភូមិទាំងអស់ដែលរស់នៅជុំវិញតំបន់នេះនឹងត្រូវផ្លាស់ទៅរស់នៅកន្លែងថ្មី”។ លោកបានបន្ថែមថា ប្រជាជនទាំងនោះបានជួបពិភាក្សាជាមួយមន្ត្រីមូលដ្ឋានរួចហើយ ហើយបានព្រមព្រៀងផ្លាស់ទីលំនៅ។
ទោះជាយ៉ាងណា លោក ហីុង ពៅ ជនជាតិភាគតិចជុង ដែលរស់នៅក្នុងឃុំចំណាប់បាននិយាយថា អ្នកភូមិភ័យខ្លាចបាត់បង់ផ្ទះនិងដីកសិកម្មរបស់ពួកគាត់ដោយសារក្រុមហ៊ុន Guodian Corporation បានចូលកាន់កាប់បន្តគម្រោងដែលជាប់គាំងនេះកាលពីឆ្នាំមុន។
លោក ពៅ បាននិយាយថា “ខ្ញុំចង់ឲ្យក្រុមហ៊ុននេះប្តូរចិត្តវិញ។ ប្រសិនបើពួកគេមិនអាចឈប់បានទេ យើងសូមស្នើឲ្យក្រុមហ៊ុននេះផ្ដល់ស្រែថី្មឲ្យយើងសម្រាប់ដាំដំណាំនិងធ្វើផ្ទះថ្មីឲ្យម្នាក់មួយខ្នងដែលមានស្ថានភាពល្អប្រសើរជាងមុន”៕ គឹមហឿន
រាយការណ៍ដោយ: សានី សីុនណារី