លោកស្រី ជូលី ប៊ីសប (Julie Bishop) រដ្ឋមន្ត្រីក្រសួងការបរទេសអូស្ត្រាលីបានវាយបកទៅលោក ហ្គារ៉េត អ៊ីវ៉ាន អតីតរដ្ឋមន្ត្រីក្រសួងការបរទេសអូស្ត្រាលី ដែលបានបញ្ចេញមតិរិះគន់កិច្ចខិតខំប្រឹងប្រែងក្នុងផ្លូវការទូតរបស់លោកស្រីនៅប្រទេសកម្ពុជា។ គួរបញ្ជាក់ថា លោក អុីវ៉ាន បានបំពេញតួនាទីយ៉ាងសំខាន់ក្នុងការបញ្ចប់សង្គ្រាមស៊ីវិលនៅក្នុងប្រទេសកម្ពុជា។
លោក អុីវ៉ាន ជាឥស្សរជនអន្តរជាតិដំបូងដែលស្នើឲ្យមានការត្រួតពិនិត្យប្រទេសកម្ពុជា ក្រោមការគ្រប់គ្រងរបស់អង្គការសហប្រជាជាតិ ដែលអាចជាអង្គការ អ៊ុនតាក់ និងបានអភិវឌ្ឍយ៉ាងលឿននូវទំនាក់នងទំជិតស្និទ្ធមួយជាមួយលោកនាយករដ្ឋមន្ត្រី ហ៊ុន សែន បានរិះគន់លោក ហ៊ុន សែន នៅក្នុងទស្សនមតិមួយកាលពីថ្ងៃពុធ ទាក់ទងទៅនឹងការសម្លាប់កម្មកររោងចក្រកាត់ដេរ ដែលធ្វើកូដកម្មកាលពីក្នុងខែមករា។
នៅក្នុងទស្សនមតិនេះ លោក អុីវ៉ាន លើកឡើងថា លោកស្រី ប៊ីសប ដែលមិនបានរិះគន់ខ្លាំងៗអំពីការសម្លាប់នេះ អំឡុងដំណើរទស្សនកិច្ចនៅក្នុងរាជធានីភ្នំពេញកាលពីចុងខែមុន និងបានអំពាវនាវឲ្យលោកស្រីរិះគន់លោក ហ៊ុន សែន ខ្លំាងៗថែមទៀត។
លើកឡើងនៅក្នុងកិច្ចសម្ភាសមួយជាមួយសាជីវកម្មផ្សព្វផ្សាយព័ត៌មានអូស្ត្រាលី (Australian Broadcasting Corporation) ហៅកាត់ថា ABC (អេប៊ីស៊ី) កាលពីម្សិលមិញ លោកស្រី ប៊ីសប បានសាកសួរអំពីចំណុចលើកទឹកចិត្តឲ្យលោក អុីវ៉ាន ធ្វើសេចក្តីអត្ថាធិប្បាយបែបនោះ។ គួររំឭកផងដែរថា កាលពីពេលថ្មីៗនេះលោក អុីវ៉ាន បានលើកសរសើរលោក ហ៊ុន សែន យ៉ាងច្រើនកាលពីខែកញ្ញា ឆ្នាំ២០១០។
លោកស្រី ប៊ីសប បានមានប្រសាសន៍ថា “នាងខ្ញុំកត់សម្គាល់ឃើញថា លោក អុីវ៉ាន មានមតិរិះគន់ទាំងនេះនៅក្នុងសប្តាហ៍មួយ ក្រោយពីនាងខ្ញុំបានបំពេញទស្សនកិច្ចរបស់ខ្ញុំនៅប្រទេសកម្ពុជា ក៏ប៉ុន្តែគាត់បានរក្សាភាពស្ងប់ស្ងាត់ នៅពេលលោក បប់ ខា (Bob Carr) មេដឹកនាំគណបក្សការងារ បានបំពេញទស្សកិច្ចនៅកម្ពុជា។ ខ្ញុំនឹងមិនលេងល្បែងនយោបាយនិងអ្វីដែលជាបញ្ហាធំទេ”។
លោក បប់ ខា ដែលធ្លាប់ជារដ្ឋមន្ត្រីក្រសួងការបរទេសនៃប្រទេសអូស្ត្រាលី រហូតដល់ពេលគណបក្សសេរីអភិរក្សនិយមរបស់លោកស្រី ប៊ីសប បានឈ្នះគណបក្សការងារក្នុងការបោះឆ្នោតកាលពីក្នុងខែកញ្ញាផងដែរនោះ បានមកបំពេញទស្សកិច្ចក្នុងប្រទេសកម្ពុជាកាលពីខែមីនាឆ្នាំមុន។ ក្នុងដំណើរទស្សនកិច្ចនោះលោក បប់ ខា បានទុកលោក ហ៊ុន សែន ជា “បុរសរដ្ឋគួរឲ្យគោរព” ម្នាក់ ដែលលើកស្ទួយការគោរពសិទ្ធិពលរដ្ឋ។
នៅក្នុងកិច្ចសម្ភាសជាមួយវិទ្យុ អេប៊ីស៊ី កាលពីម្សិលមិញ លោកស្រី ប៊ីសប ក៏បានបដិសេធផងដែរថា លោកស្រីមិនបានគេចពីបញ្ហាសិទ្ធិមនុស្សនៅក្នុងជំនួបរបស់លោកស្រីជាមួយរដ្ឋាភិបាលកាលពីខែមុនទេ។
លោកស្រី ប៊ីសប បានមានប្រសាសន៍ថា “ខ្ញុំបានលើកឡើងពីបញ្ហាសិទ្ធិមនុស្ស ក្នុងជំនួបនីមួយៗរបស់ខ្ញុំជាមួយនាយករដ្ឋមន្ត្រី ឧបនាយករដ្ឋមន្ត្រី និងរដ្ឋមន្ត្រីក្រសួងការបរទេសនៃប្រទេសកម្ពុជា”។
លោក អុីវ៉ាន មិនបានឆ្លើយតបនឹងសំណើសុំធ្វើសេចក្តីអត្ថាធិប្បាយកាលពីម្សិលមិញទេ ប៉ុន្តែកាលពីថ្ងៃពុធ លោកបានលើកឡើងនៅក្នុងសុន្ទរកថាកាលពីថ្ងៃពុធរបស់លោកថា លោកបានរក្សាភាពស្ងាត់ស្ងៀមក្នុង ពេលកន្លងមករបស់លោក ជុំវិញបញ្ហារំលោភសិទ្ធិមនុស្សនៅក្នុងប្រទេសកម្ពុជា ដោយសារតែលោកជឿថា លោក ហ៊ុន សែន ប្តេជា្ញលើកស្ទួយលទ្ធិប្រជាធិបតេយ្យនៅក្នុងប្រទេសនេះ។
លោកបានសរសេរថា “រហូតទល់ពេលនេះ ខ្ញុំបានជំទាស់នឹងការរិះគន់ពីសាធារណជនយ៉ាងខ្លាំង ពីព្រោះខ្ញុំគិតថា មានក្តីសង្ឃឹមសម្រាប់ទាំងលោក និងរដ្ឋាភិបាលរបស់លោក។ប៉ុន្តែបច្ចុប្បន្ន ពួកគេមានឥរិយាបថហួសព្រំដែនហើយ”៕ ប៊ុននី