សកម្មជននយោបាយពីរនាក់បានរងរបួសដោយសារកម្លាំងសន្តិសុខខណ្ឌនៅខាងក្រៅសាលាខណ្ឌដូនពេញកាលពីព្រឹកម្សិលមិញ បន្ទាប់ពីការតវ៉ាសុំឲ្យដោះលែងអ្នកជាប់ឃុំទាំង២១នាក់ដែលត្រូវបានវាយដំ និងឃុំខ្លួនក្នុងពន្ធនាគារនៅពេលធ្វើកូដកម្មកាលពីខែមករានោះ បានទៅទាមទារយកស្គរដែលត្រូវបានរឹបអូសអំឡុងការតវ៉ានោះមកវិញ។
ក្រុមអ្នកតវ៉ាដែលស្លៀកពាក់ស និងកាន់បដាតូចៗមានសរសេរឈ្មោះអ្នកជាប់ឃុំទាំង២១នាក់ដែលកំពុងត្រូវឃុំខ្លួននៅពន្ធនាគារដែលមានសន្តិសុខតឹងរឹុងក្នុងខេត្តកំពង់ចាមនោះ បានធ្វើការតវ៉ានៅខាងមុខតុលាកំពូលទាមទារឲ្យដោះលែងអ្នកជាប់ឃុំទាំងនេះ។
ដោយលោកនាយករដ្ឋមន្ត្រី ហ៊ុន សែន អញ្ជើញមកចូលរួមកិច្ចប្រជុំនៅសាលសន្និសីទចតុមុខក្បែរនោះ វត្តមានកម្លាំងសន្តិសុខជាច្រើនបានប៉ះទង្គិចជាមួយក្រុមអ្នកតវ៉ាដែលមានគ្នាចំនួនប្រហែល១៥០នាក់។ កម្លាំងសន្តិសុខខណ្ឌដូនពេញមួយក្រុមពាក់មួកការពារសុវត្ថិភាពពណ៌ខ្មៅបានចាប់យកស្គរដែលក្រុមអ្នកតវ៉ាបានវាយខ្លាំងៗ។
ពេលហែក្បួនទៅកាន់វត្តឧណ្ណាលោមតាមតីរវិថីព្រះសីុសុវត្ថិ ដោយមាននគរបាលមួយក្រុមតូចតាមឃ្លាំមើលផងនោះ ក្រុមអ្នកតវ៉ាបានទៅឈប់នៅផ្លូវបំបែកជាបីមួយកន្លែង។ បន្ទាប់មកពួកគាត់បានលែងសត្វចាប២១ក្បាល ហើយបានដើរទៅកាន់សាលាខណ្ឌដូនពេញដើម្បីទាមទារយកស្គររបស់ ខ្លួនមកវិញ។
នៅសាលាខណ្ឌ កម្លាំងសន្តិសុខខណ្ឌដែល នៅពាក់មួកការពារសុវត្ថិភាពនោះបានព្យាយាមរារាំងអ្នកតវ៉ាមិនឲ្យចូលទៅជិតអគារឡើយ។ កម្លាំងសន្តិសុខបានស្រែកតាមឧបករណ៍បំពងសំឡេងថា “អាជ្ញាធរគឺមិនមែនជាចំណាប់ខ្មាំងរបស់បងប្អូនទេ។ ផ្លូវនេះគ្មាននរណាម្នាក់អាចបិទបានឡើយ!”។
នៅពេលមានការប៉ះទង្គិចគ្នានៅម៉ោងប្រហែល១១ព្រឹកនោះ សន្តិសុខម្នាក់ក្នុងចំណោមសន្តិសុខទាំងនោះបានយកវិទ្យុទាក់ទងរបស់ខ្លួនវាយអ្នកស្រី ភួង សុភាព អាយុ៤០ឆ្នាំ ជាសកម្មជនសិទ្ធិលំនៅដ្ឋានចំច្រមុះ។ សន្តិសុខម្នាក់ទៀតបានទាត់អ្នកស្រី ថ្លាង យ៉ាន អាយុ៥០ឆ្នាំចំភ្លៅខាងស្តាំ។
អ្នកស្រី សុភាព បាននិយាយថា “វាឃោរឃៅណាស់ដែលកម្លាំងសន្តិសុខបានប្រើអំពើហិង្សាមកលើអ្នកតវ៉ា ពីព្រោះយើងគ្រាន់តែមកយកស្គររបស់យើងវិញតែប៉ុណ្ណោះ។ យើងមិនបានមកតវ៉ានៅទីនេះទេ”។ លោក គឹម វុត្ថា ប្រធានសន្តិសុខខណ្ឌដូនពេញបានមានប្រសាសន៍ថា មានការប៉ះទង្គិចគ្នាបន្តិចបន្តួចតែប៉ុណ្ណោះដើម្បីធានាសន្តិសុខ។
ដោយមិននិយាយពីស្គរនោះ លោកបានមានប្រសាសន៍ថា “គ្មាននរណាម្នាក់បានបញ្ជាឲ្យពួកគេមកតវ៉ាទេ ហើយពួកគេគ្រាន់តែប៉ះទង្គិចគ្នាបន្តិចបន្តួចប៉ុណ្ណោះ”។ ក្រុមមន្ត្រីខណ្ឌបានប្រគល់ស្គរឲ្យវិញនៅម៉ោងប្រហែល៣ល្ងាច៕សារុន