អ្នកសម្របសម្រួលអង្គការក្រៅរដ្ឋាភិបាលប្រចាំខេត្តប៉ៃលិនម្នាក់បាននិយាយថា អ្នកភូមិ១៩គ្រួសារនៅក្នុងខេត្តប៉ៃលិនដែលត្រូវបាននគរបាលនិងកងរាជអាវុធហត្ថប្រាប់ឲ្យចាកចេញពីដីរបស់ខ្លួនកាលពីថ្ងៃសៅរ៍នោះ បានដាក់ពាក្យបណ្តឹងទៅអង្គការអាដហុកកាលពីម្សិលមិញ។
ក្រុមអាជ្ញាធរបានប្រាប់គ្រួសារទាំងនោះឲ្យចាកចេញកាលពីថ្ងៃសៅរ៍ពីដីទំហំ៩៥ហិកតាដែលពួកគាត់បានធ្វើស្រែចម្ការចាប់តាំងពីឆ្នាំ១៩៩៩មក ដោយអះអាងថា ដីដែលអ្នកភូមិកំពុងធ្វើស្រែចម្ការនេះ តាមពិតជាដីរបស់រដ្ឋ។
កាលពីថ្ងៃអាទិត្យ លោក អីុ ឈាន អភិបាលខេត្តប៉ៃលិន បានលើកឡើងពីដីនោះថា “ជាដីរបស់ខ្ញុំ” មុនពេលនិយាយកែតម្រូវថា ដីនេះមួយផ្នែកជាដីរបស់រដ្ឋ និងមួយផ្នែកទៀតជារបស់ក្រុមហ៊ុន។
លោកស្រី ប្រាក់ សុភិម៉ា អ្នកសម្របសម្រួលអង្គការអាដហុកប្រចាំខេត្តប៉ៃលិនបានមានប្រសាស ន៍ថា អ្នកភូមិចំនួន១៩ គ្រួសារបានដាក់ពាក្យបណ្តឹងនៅការិយាល័យរបស់គាត់ ដើម្បីសុំជួយកំុឲ្យ មានការបណ្តេញចេញ។
លោកស្រីបានមានប្រសាសន៍ថា “ឥឡូវនេះយើងកំពុងតែជួយដើមបណ្តឹងរៀបចំពាក្យបណ្តឹងសម្រាប់គ្រួសារដែលរងផលប៉ះពាល់ ហើយយើងបានណែនាំឲ្យពួកគាត់បញ្ជូនឯកសារនេះទៅមន្ទីររៀបចំដែនដីខេត្ត និងសាលាខេត្ត”។
លោក ឱម សំអាត អាយុ៤៤ឆ្នាំដែលកាន់កាប់ដីទំហំ៥ហិកតា និងជាអ្នកដាក់ពាក្យបណ្តឹងម្នាក់ក្នុងចំណោមអ្នកដាក់ពាក្យបណ្តឹងបីនាក់បាននិយាយថា គាត់មានសង្ឃឹមតិចតួចថា បានជោគជ័យ។
លោក ឱម សំអាត បាននិយាយបន្ថែមថា “ខ្ញុំបានដាក់ពាក្យបណ្តឹងទៅអង្គការអាដហុកដើម្បីសុំឲ្យអង្គការជួយ ពីព្រោះយើងគ្មានសង្ឃឹមទេ ហើយមិនជឿលើអាជ្ញាធរឡើយ ពីព្រោះពួកគេមិនដែលរកដំណោះស្រាយឲ្យពួកយើងទេ បើទោះជាយើងបានដាក់ពាក្យបណ្តឹងជាច្រើនលើកច្រើនសាហើយក៏ដោយ”។
លោក វ រួម ជំទប់ទី១ឃុំសាលាក្រៅបានមានប្រសាសន៍ថា លោកទទួលបានបទបញ្ជាឲ្យបណ្តេញអ្នកភូមិចេញពីដីនេះដោយបង្ខំក្នុងរយៈពេលពីរសប្តាហ៍។
លោក វ រួម បានមានប្រសាសន៍បន្ថែមទៀតថា “ ឯកឧត្តមអភិបាលខេត្តបានបញ្ជាខ្ញុំនៅរសៀលនេះឲ្យបណ្តេញប្រជាពលរដ្ឋចេញពីដីនេះឲ្យបានមុនថ្ងៃទី១៥ខែមីនា។ ប្រសិនបើអ្នកភូមិមិនព្រមចាកចេញទេនោះ អាជ្ញាធរខេត្តនឹងចាត់វិធានការតែម្តង។ប្រសិនបើពួកគាត់បដិសេធមិនព្រមចាកចេញ អាជ្ញាធរនឹងចាប់ខ្លួនអ្នកដែលជាមេខ្លោងដឹកនាំការតវ៉ា”។ លោកបានពន្យល់ថា “ខ្ញុំឃើញថា លោក អីុ ឈាន បានរានដីនេះ ប៉ុន្តែ ខ្ញុំមិនដឹងច្បាស់ថា នរណាកាន់កាប់ដីនេះទេ” ។
លោក កើត សុធា ដែលជាអភិបាលរងខេត្តប៉ៃលិនបានបញ្ជាក់ថា ដីដែលមានជម្លោះ នេះជាដីរបស់លោក អីុ ឈាន ។ លោក សុធា បានមានប្រសាសន៍ថា “ពិត ណាស់ថា ដីនេះគឺជាដីរបស់ឯកឧត្តមអភិបាលខេត្ត ពីព្រោះលោកបានដាំដំឡូងមីនៅទីនោះច្រើនឆ្នាំមកហើយ”។
លោក កើត សុធា បានបដិសេធមិនធ្វើអត្ថាធិប្បាយទេ នៅពេលសួរអំពីការអះអាងរបស់អង្គការអាដហុកកាលពីថ្ងៃអាទិត្យដែលថា តាមពិតដីនេះកាន់កាប់ដោយលោកស្រី បាន ស្រីមុំ ជាភរិយារបស់លោក អីុ ឈាន ហើយលោកស្រីក៏ជាសមាជិកសភាគណបក្សប្រជាជនកម្ពុជាមួយរូបដែរ៕សារុន