សហជីព និងសមាគមសរុបចំនួន១៨អង្គភាព បានឲ្យដឹងថា ខ្លួននឹងអនុវត្តតាមផែនការរៀបចំវេទិកាសាធារណៈមួយនៅទីលានប្រជាធិបតេយ្យក្នុងរាជធានីភ្នំពេញនៅថ្ងៃសៅរ៍នេះ ទោះបីជាសាលារាជធានីភ្នំពេញបានបដិសេធសំណើរបស់ខ្លួនដោយឈរលើមូលហេតុមានក្តីបារម្ភអំពីសន្តិសុខសាធារណៈក៏ដោយ។
សហជីពដែលកំពុងរៀបចំធ្វើកូដកម្មទូទាំងប្រទេសក្នុងវិស័យកាត់ដេរនៅថ្ងៃទី១២ខាងមុខនេះ ដើម្បីទាមទារប្រាក់ឈ្នួលអប្បបរមាខ្ពស់ជាងមុន និងចំណុចផ្សេងៗទៀតនោះ បានផ្ញើលិខិតមួយច្បាប់ទៅសាលារាជធានីភ្នំពេញ កាលពីថ្ងៃទី២៦ ខែកុម្ភៈ ដើម្បីជូនដំណឹងដល់ស្ថាប័ននេះអំពីវេទិកាសាធារណៈរបស់ខ្លួន។ គួរបញ្ជាក់ថា វេទិកាសាធារណៈនេះនឹងមានការអញ្ជើញថ្នាក់ដឹកនាំរដ្ឋាភិបាល និងថ្នាក់ដឹកនាំគណបក្សប្រឆាំង ឲ្យចូលរួមថ្លែងទៅកាន់កម្មកររោងចក្រកាត់ដេរដែលត្រូវបានរំពឹងថា នឹងមានប្រហែល៣០.០០០នាក់ចូលរួមក្នុងវេទិកានេះ។
សាលារាជធានីភ្នំពេញបានបដិសេធសិទ្ធិជួបជុំរបស់សហជីពនៅទីលានប្រជាធិបតេយ្យ មួយសប្តាហ៍បន្ទាប់ពីលោកនាយករដ្ឋមន្ត្រី ហ៊ុន សែន បានអះអាងថា លោក បានដាក់ឲ្យប្រើប្រាស់សិទ្ធិជួបជុំក្នុងរដ្ឋធម្មនុញ្ញឡើងវិញ។ គួរបញ្ជាក់ថា លោក ហ៊ុន សែន បានព្យួរសិទ្ធិនេះកាលពីដើមខែមករា។
សេចក្តីប្រកាសរបស់សាលារាជធានីភ្នំពេញ ដែលត្រូវបានផ្សព្វផ្សាយបន្ទាប់ពីមានកិច្ចប្រជុំជាមួយមេដឹកនាំសហជីពកាលពីព្រឹកម្សិលមិញ មានខ្លឹមសារថា “ សហព័ន្ធ និងសហជីពដែលស្នើសុំរៀបចំព្រឹត្តិការណ៍ខាងលើសូមរៀបចំព្រឹត្តិការណ៍នេះនៅទីស្នាក់ការរបស់ខ្លួន ដើម្បីរក្សាស្ថានភាពសន្តិសុខល្អក្នុងរាជធានីភ្នំពេញ”។
សេចក្តីប្រកាសដែលបានចុះហត្ថលេខាដោយលោក កើត ឆែ នាយកខុទ្ទកាល័យសាលារាជធានីភ្នំពេញនេះ បានបង្ហាញទៀតថា វេទិកាសាធារណៈនេះគួរត្រូវបានរៀបចំនៅពេលផ្សេង និងមានសេចក្តីអះអាងផងដែរថា រដ្ឋាភិបាលត្រូវការស៊ើបអង្កេតករណីប៉ះទង្គិចគ្នារវាងអ្នកតវ៉ាក្នុងកូដកម្ម និងកម្លាំងកងរាជអាវុធហត្ថដែលបានបាញ់សម្លាប់កម្មកររោងចក្រកាត់ដេរប្រាំនាក់ និងធ្វើឲ្យជាង៤០នាក់ផ្សេងទៀតរងរបួសកាលពីថ្ងៃទី៣ ខែមករាកន្លងទៅ ។
លោក សម រង្ស៊ី ប្រធានគណបក្សសង្គ្រោះជាតិ បានលើកឡើងថា លោកនឹងចូលរួមក្នុងវេទិកានៅថ្ងៃសៅរ៍នេះ “ដើម្បីបង្ហាញការគាំទ្ររបស់គណបក្សសង្គ្រោះជាតិចំពោះចលនាកម្មករ និងការទាមទាររបស់ពួកគេ”។
លោក ស ខេង រដ្ឋមន្ត្រីក្រសួងមហាផ្ទៃលោក គាត ឈន់ ឧបនាយករដ្ឋមន្ត្រី និងលោក អិុត សំហេង រដ្ឋមន្ត្រីក្រសួងការងារ ក៏ត្រូវបានអ្នករៀបចំកម្មវិធីអញ្ជើញឲ្យចូលរួមក្នុងវេទិកាសាធារណៈនេះផងដែរ។
លោក ហ្វា សាលី ប្រធានសម្ព័ន្ធសហជីពជាតិ បានឲ្យដឹងថា សហជីព និងរៀបចំវេទិកានេះ ទោះជាមានសេចក្តីសម្រេចចុងក្រោយរបស់ក្រសួងមហាផ្ទៃក៏ដោយ។
លោក ហ្វា សាលី បានមានប្រសាសន៍ថា “ពួកគេមិនមានច្បាប់ណាមកហាមប្រជាជនមិនឲ្យជួបជុំគ្នា និងបង្ហាញមតិរបស់ខ្លួនទេ”។ លោកបានមានប្រសាសន៍បន្ថែមទៀតថា “យើងបានប្រឈមនឹងប្រតិបត្តិការបង្ក្រាបជាច្រើនលើកច្រើនសារួចមកហើយក្នុងពេលកន្លងមក”។
លោក ហ្វា សាលី បានបញ្ជាក់បន្ថែមទៀតថា “ដូច្នេះ យើងមិនមានការព្រួយបារម្ភអំពីបញ្ហាបង្ក្រាបនេះទេ។ ប្រតិបត្តិការនេះនឹងបង្ហាញឲ្យមជ្ឈដ្ឋាននៅទូទាំងសាកលលោកឃើញថា រដ្ឋាភិបាលនៃប្រទេសកម្ពុជាគោរពសិទ្ធិមនុស្សបានកម្រិតណា”។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញបានលើកឡើងថា សកម្មភាពជួបជុំក្នុងកម្មវិធីវេទិកាសាធារណៈនៅទីលានប្រជាធិតេយ្យនាពេលខាងមុខនេះអាចនឹងបណ្តោយឲ្យមានអំពើហិង្សាកើតឡើង ក៏ប៉ុន្តែ លោកមិនបានពន្យល់ថា តើមូលហេតុអ្វីបានជាលោកឈានដល់ការសន្និដ្ឋានបែបនេះទេ។
លោក ឡុង ឌីម៉ង់ បានលើកឡើងបន្ថែមទៀតថា សំណើរបស់សហជីពដែលស្នើសុំរៀបចំវេទិកាសាធារណៈនេះ នឹងត្រូវបានផ្ញើទៅក្រសួងមហាផ្ទៃ ក្នុងគោលបំណងសុំសេចក្តីសម្រេចចុងក្រោយ។
អ្នកនាំពាក្យសាលារាជធានីភ្នំពេញរូបនេះ បានមានប្រសាសន៍ដូច្នេះថា “យើងបានស្នើឲ្យសហជីពទាំងនោះរៀបចំវេទិកានេះនៅទីស្នាក់ការរបស់ខ្លួន”។
លោក ឡុង ឌីម៉ង់ បានមានប្រសាសន៍ទាក់ទងទៅនឹងមូលហេតុនៃសេចក្តីស្នើរបស់សាលារាជធានីភ្នំពេញទៅសហជីពវិញនោះថា “ …ដោយសារតែវេទិកានេះអាចនឹងនាំឲ្យមានបរិយាកាសមិនល្អ ឬក៏អំពើហិង្សាកើតឡើង… វាអាចបណ្តោយឲ្យមានបញ្ហាអសណ្តាប់ធ្នាប់ដូចកាលពីពេលមុនដែរ”។
ក្រៅពីសេចក្តីទាមទារទាំងប្រាំពីរចំណុចរបស់ខ្លួនដែលត្រូវបានលើកឡើងនៅក្នុងពេលធ្វើកូដកម្ម សហជីពនានាក៏បាននិងកំពុងទាមទារឲ្យមានការដោះលែងអ្នកតវ៉ា២១នាក់ដែលត្រូវបានចាប់ដាក់ពន្ធនាគារ បន្ទាប់ពីមានការអនុវត្តប្រតិបត្តិការបង្ក្រាបដោយហិង្សាទៅលើសកម្មភាពកូដកម្ម និងបាតុកម្មកាលពីខែមករាឆ្នាំនេះ ក្នុងគោលបំណងទាមទារឲ្យមានការដំឡើងប្រាក់ឈ្នួលអប្បបរមាសម្រាប់កម្មកររោងចក្រកាត់ដេរនៅក្នុងវិស័យកាត់ដេរសម្លៀកបំពាក់។
សហជីពទាំងនោះក៏បានទាមទារឲ្យមានការតាមចាប់ជនល្មើសយកទៅផ្តន្ទាទោស ពីបទសម្លាប់កម្មកររោងចក្រកាត់ដេរប្រាំនាក់ដែលបានចូលរួមក្នុងសកម្មភាពតវ៉ាទាមទារឲ្យមានការដំឡើងប្រាក់ឈ្នួលអប្បបរមា ដែលត្រូវបានធ្វើឡើងនៅផ្លូវវេងស្រេងកាលពីថ្ងៃទី៣ ខែមករា៕ សុធា