36 C
Phnom Penh

ក្រុម​ហ៊ុន​ចិន​ផ្តល់សេវារថយន្ត​ក្រុង​បន្ត​ដោយ​មិនបាន​ដេញ​ថ្លៃ​

ដោយ ឌឹ ខេមបូឌា ដេលី

បទវិភាគ

ក្រុម​ហ៊ុន​ចិន​មួយ​ឈ្មោះ​ថា Global (Cam- bodia) Trade Development នឹង​អនុវត្ត​ប្រតិបត្តិ​ការ​របស់​ខ្លួន​ជា​ក្រុម​ហ៊ុន​ផ្តល់​សេវារថយន្ត​ក្រុង​​ដឹក​អ្នក​​ដំណើរ​ក្នុង​រាជធានី​ភ្នំពេញ​ក្នុង​ថ្ងៃ​នេះ​ ក៏​ប៉ុន្តែ សាលា​រាជធានី​ភ្នំពេញ​បាន​ឲ្យ​ដឹង​កាល​ពី​ម្សិលមិញ​ថា ក្រុម​ហ៊ុន​នេះ​មិន​បាន​ឆ្លង​កាត់​ដំណើរការ​ដេញ​ថ្លៃ​ ដើម្បី​ទទួល​បាន​កិច្ច​សន្យា​អនុវត្ត​ប្រតិបត្តិការ​សេវា​នេះ​ទេ​។

ប្រព័ន្ធ​ដឹក​អ្នក​ដំណើរ​តាម​រថយន្តក្រុង​ផ្លូវ​ការ​ត្រូវ​បាន​បង្កើត​ឡើង​បន្ទាប់​ពី​​ទី​ភ្នាក់​ងារ​​​សហប្រតិបត្តិការ​អន្តរជាតិ​ជប៉ុន​ (Japanese International Cooperation Agency) ហៅកាត់ថា អង្គការ JICA បាន​ទទួល​ជោគ​ជ័យ​ក្នុង​ការ​​​​សាក​ល្បង​ផ្តល់​សេវាកម្ម​រថយន្ត​ក្រុង​ដឹក​អ្នក​ដំណើរ​រយៈពេល​មួយ​ខែ​កន្លង​មក​នេះ​។ គួរ​បញ្ជាក់​ថា អង្គការ​ JICA បាន​កត់​សម្គាល់​ឃើញ​ថា មាន​អ្នក​ដំណើរចំនួន​៤២.០០០នាក់​ជិះរថយន្ត​​ក្រុង​​​ជា​រៀង​រាល់​ថ្ងៃ​ តាម​​បណ្តោយ​មហាវិថី​ព្រះ​មុនី​វង្ស​។

ក៏​ប៉ុន្តែ​ សេចក្តី​សម្រេច​ផ្តល់​កិច្ច​សន្យា​ជា​ផ្លូវ​ការ​ដល់​ក្រុម​ហ៊ុន​ Global Trade Development មិន​បាន​​ប្រព្រឹត្ត​​ទៅដោយ​ឆ្លង​កាត់​ដំណើរ​ការ​ដេញ​ថ្លៃ​ពេញ​លេញ​ទេ ទោះ​បី​ជា​ក្រុម​ហ៊ុន​ដទៃៗទៀត​បាន​បង្ហាញ​ចំណាប់​អារម្មណ៍​ក្នុង​ការ​ដេញ​ថ្លៃ​ទទួល​យក​កិច្ច​សន្យា​នេះ​​ក៏​ដោយ​។ គួរបញ្ជាក់​ផង​ដែរ​ថា ក្រុម​ហ៊ុន​ Global ​Trade Development បាន​ផ្តល់​សេវា​កម្ម​រថយន្ត​តាក់​ស៊ី​ដឹក​អ្នក​ដំណើរគិត​តាម​ចម្ងាយ​ម៉ែត្រ​​​ដំបូង​គេ​បង្អស់​តាំង​ពី​ឆ្នាំ​២០០៨​មក​គឺ​រថយន្ត​តាក់​ស៊ី​​​​ Global Taxi។

លោក ឡុង ឌីម៉ង់ អ្នក​នាំ​ពាក្យ​សាលា​រាជ​ធានី​ភ្នំពេញ​បាន​មាន​ប្រសាសន៍​ថា “ នេះ​មិន​មែន​ជា​ដំណើរ​ការ​ដេញ​ថ្លៃ​ទេ​។ សាលា​រាជ​ធានី​ជ្រើស​រើស​ក្រុម​ហ៊ុនមួយ​​ក្នុង​ចំណោម​ក្រុម​ហ៊ុន​ដែល​ចាប់​អារម្មណ៍​នានាដោយ​ផ្នែក​លើលក្ខខ​ណ្ឌរបស់​យើង​ ព្រោះ​យើង​មិន​មាន​ថវិកា​គ្រប់​គ្រាន់​សម្រាប់​បំពេញ​ដំណើរ​ការ​ដេញ​ថ្លៃ​ពេញ​លេញ​ទេ​”។ ក៏​ប៉ុន្តែ លោកបាន​បដិសេធ​មិន​ធ្វើ​សេចក្តី​អត្ថាធិប្បាយ​​បន្ថែម​ទៀត​ទាក់​ទង​នឹង​បញ្ហា​ថវិកា​មាន​កម្រិត​នេះ​។

លោក​បាន​មាន​ប្រសាសន៍​បន្ថែម​ទៀត​ថា “ យើង​បាន​ជ្រើស​រើស​ក្រុម​ហ៊ុន​នេះ​ ដោយ​សារ​តែ​ក្រុម​ហ៊ុន​នេះ​[Global Trade Development] មាន​បទ​ពិសោធ​​ផ្តល់​សេវា​កម្ម​រថយន្ត​តាក់​ស៊ី​ដឹក​អ្នក​ដំណើរគិត​តាម​ចម្ងាយ​ម៉ែត្រ​​​នៅ​ក្នុង​រាជធានី​ភ្នំពេញ ហើយ​បាន​ទទួល​ជោគ​ជ័យ​មក​ទល់​ពេល​បច្ចុប្បន្ន​នេះ។ អ៊ីចឹង​ហើយ​បាន​ជា​យើង​ព្រម​ទទួល​យក​ក្រុម​ហ៊ុន​នេះ​ឲ្យ​ប្រតិបត្តិការ​បន្ត​លើ​គម្រោង​នេះ”។ លោក​បាន​លើក​ឡើង​បន្ត​ទៀត​ថា លោក​ជឿ​ជាក់​ថា ក្រុម​ហ៊ុន​នេះ នឹង​ចាប់​ផ្តើម​ផ្តល់​​ សេវាកម្ម​នេះ​ពី​ប្រតិបត្តិការ​សាក​​ល្បង​ក្នុង​​ពេល​​កន្លង​មក​ ហើយ​ធានា​ថា ប្រព័ន្ធ​ដឹក​អ្នក​ដំណើរ​ដោយ​រថយន្ត​ក្រុង​នឹង​ទទួល​ជោគ​ជ័យ​។

គំនិត​បង្កើត​សេវាកម្ម​រថយន្ត​ក្រុង​ដឹក​អ្នក​ដំណើរ​ជា​សាធារណៈ​នេះ ត្រូវ​បាន​ផ្តួច​ផ្តើម​ឡើង​ជា​យូរ​មក​ហើយ​ ពោល​គឺ​តាំង​ពី​មុន​មាន​ការ​សាក​ល្បង​ក្នុង​ឆ្នាំ​នេះម្លេ៉ះ​។ កាលពី​ឆ្នាំ​២០១១​ សាលារាជ​ធានី​ភ្នំពេញ​បាន​អញ្ជើញ​ក្រុម​ហ៊ុននានា​ឲ្យ​លើ​ក​សំណើ​សុំ​អនុវត្ត​​ប្រតិ​បត្តិការ​សេវាកម្ម​រថយន្ត​ក្រុង​ដឹក​អ្នក​ដំណើរ​ជា​សាធារណៈ​នេះ​ ហើយ​កាលពី​ខែ​មករា ឆ្នាំ​២០១២​​ សាលា​រាជធានី​ភ្នំពេញបាន​ប្រកាស​ថា មាន​ក្រុម​ហ៊ុន​តែ​បួន​ប៉ុណ្ណោះ​ក្នុង​ចំណោម​ក្រុម​ហ៊ុនទាំង​ប្រាំ​ពីរ​ដែល​បាន​ដាក់​ពាក្យ​ស្នើ​សុំ​​មាន​លក្ខណៈ​សម្បត្តិ​គ្រប់​គ្រាន់​សម្រាប់​​បន្ត​ទៅ​ដំណាក់​កាល​ដំណើរការ​ដេញ​ថ្លៃ​។

ក្រុម​ហ៊ុន​ទាំង​នោះរួម​មាន ក្រុម​ហ៊ុន​ អា ហុក ឡេលែន (Ashok Leyland) ដែល​មាន​មូល​ដ្ឋាន​នៅ​ប្រទេស​ឥណ្ឌា ក្រុម​ហ៊ុន​អេស្ប៉ាញ​ អេបេហ្វីស (ABEFIS) ក្រុម​ហ៊ុន ​ស៊ីធីត្រេន ខេមបូឌា (City Trans Cambodia) មក​ពី​ប្រទេស​កូរ៉េ​ខាង​ត្បូង​ និង​ក្រុម​ហ៊ុន  Global Trade Develo​p​​-​ment ​ដែល​ជា​អ្នក​ទទួល​បាន​កិច្ច​សន្យា​នេះ។

កាលពី​ខែ​កុម្ភៈ​ ឆ្នាំ​២០១៣ សាលា​រាជ​ធានី​ភ្នំពេញ​បាន​ប្រកាស​ថា ក្រុម​ហ៊ុនពីរ​ត្រូវ​បាន​ជ្រើស​រើស​ឲ្យសហ​ការ​​ជាមួយ​គ្នា​លើ​គម្រោង​នេះ​គឺ​ក្រុម​ហ៊ុន​ ស៊ីធី​ត្រេនខេមបូឌា  និង​ក្រុម​ហ៊ុន​ Global Trade Development។

ក្រោយ​មក​ទៀត​ក្រុម​ហ៊ុន​ចិន​ដែល​ទទួល​ ​​បាន​កិច្ច​សន្យា​នេះ​បាន​បដិសេធ​មិន​សហ​ការ​បែប​នេះ​ទេ​ ហើយ​បាន​គំរាម​ដក​ឯកសារ​ និង​ពាក្យ​សុំ​ដេញ​ថ្លៃ​របស់​ខ្លួន​មក​វិញ។

លោក កែប ជុតិមា អតីត​អភិបាល​រាជ​ធានី​ភ្នំពេញ​ បាន​លើក​ឡើង​ថា បើ​ដូចនោះ​ក្រុម​ហ៊ុន​កូរ៉េ​ខាង​ត្បូង​នឹង​ទទួល​បាន​កិច្ច​សន្យា​នេះ​។

ទោះ​ជាយ៉ាង​ណា​ កាលពី​ម្សិលមិញ​ លោក​ ឌីម៉ង់ បាន​ឲ្យ​ដឹង​ថា ចុង​ក្រោយ​ កិច្ច​សន្យា​នេះ​ត្រូវ​បាន​ប្រគល់​ឲ្យ​ក្រុម​ហ៊ុន​ Global Trade Develo​p​-ment។​ ប៉ុន្តែ លោក​បាន​បដិសេធ​មិន​ប្រាប់​ថា តើ​មាន​រឿង​អ្វី​កើត​ឡើង​ចំពោះ​ពាក្យ​ដេញ​ថ្លៃ​របស់​ក្រុម​ហ៊ុន​កូរ៉េ​ខាង​ត្បូង​នោះ​។​​ លោក​បាន​មាន​ប្រសាសន៍​បន្ត​ថា “ យើង​កំពុង​ពិភាក្សា​ជាមួយ​ក្រុម​ហ៊ុន​អំពី​រយៈពេល​នៃ​កិច្ច​សន្យា​នេះនៅ​ឡើយ​”។

នៅ​ពេល​សួរ​ថា តើ​មូលហេតុ​អ្វី​បាន​ជា​មិន​មាន​ប្រកាស​ជា​សាធារណៈ​ថា ដំណើរ​ការ​​ដេញ​ថ្លៃ​នេះ​ត្រូវ​បាន​បញ្ឈប់​ លោក ឌីម៉ង់​ បាន​បដិសេធ​មិន​ធ្វើ​សេចក្តី​អត្ថាធិប្បាយ​ទេ។

លោក លឹម អង់ត្រេ ប្រធាន​នាយក​ប្រតិ​បត្តិ​ក្រុម​ហ៊ុន​ Global Trade Development និង​លោក​ ចយ ដេយ៉ុង (Choi Dae Yong)​ មិ​ន​អាច​ទំនាក់​ទំនង​សុំ​សេចក្តី​អត្ថាធិប្បា​យ​បាន​ទេ។

លោក​ អេហ្គាមី ម៉ាសា​ហីុកុ (Egami Masha- hiko) អ្នក​នាំ​ពាក្យ​អង្គការ​ JICA បាន​ឲ្យ​ដឹង​កាល​ពី​ម្សិលមិញ​ថា លោក​មិន​បាន​ដឹង​រឿង​រ៉ាវ​ទាក់​ទង​នឹង​ក្រុម​ហ៊ុន Global Trade Develo​p​​-​ment ​ទេ ហើយ​ក្រុម​ហ៊ុន​មិន​មាន​ទំនាក់​ទំនង​ជា​មួយ​​អង្គការ JICA ទាក់​ទង​នឹង​ការ​ផ្ទេរ​ប្រតិ​បត្តិការ​រថយន្តក្រុង​នេះ​ឲ្យ​ទៅ​ផ្នែក​ឯកជន​ទេ។

លោក​បាន​មាន​ប្រសាសន៍​ថា “ ការ​ប្រគល់​ការងារនេះ​ឲ្យ​ក្រុម​ហ៊ុន​ឯកជន​ មិន​មែន​ស្ថិត​ក្នុង​សមត្ថកិច្ច​របស់​អង្គការ JICA ទេ​ ហើយ​យើង​មិន​មាន​ទំនាក់​ទំនង​ជាមួយ​ពួកគេ​ទេ​។ លោក​បាន​លើក​ឡើង​បន្ថែម​ទៀត​ថា អង្គការ​ JICA មិន​ដឹង​​ពី​លក្ខខណ្ឌ​ក្នុង​កិច្ច​សន្យា​នេះ​ទេ​។

លោក ព្រាប កុល នាយកប្រតិបត្តិ​អង្គការ​តម្លាភាព​អន្តរជាតិ​កម្ពុជា​ (Transparency Interna tional Cambodia) បាន​លើក​ឡើង​ថា សា​លា​រាជ​ធានី​ភ្នំពេញ​គួរ​តែ​បើក​ចំហ​​ឲ្យ​បាន​ច្រើន​ជាង​នេះ​ ចំពោះ​ដំណើរការ​លទ្ធកម្ម​សម្រាប់​សេវា​កម្ម​សាធារណៈ​នានា​។

លោក​បាន​មាន​ប្រសាសន៍​ថា “ការ​ផ្តល់​កិច្ច​សន្យា​សេវា​សាធារណៈ​ត្រូវ​ធ្វើ​ឡើង​តាម​រយៈដំណើរការ​សាធារណៈ​។ រដ្ឋាភិបាល​គួរ​តែ​អនុវត្ត​ដំណើរការ​សាធារណៈ​ប្រកប​ដោយ​​តម្លាភាព​ ដើម្បី​ធានា​ថា សាធារណជន​ និង​រដ្ឋា​ភិបាល​ទទួល​បាន​កិច្ច​សន្យា​ល្អ​បំផុត​ដែល​អាច​មាន​”។

ក្រុម​ហ៊ុន​ផ្តល់​សេវា​សាធារណៈ​មួយ​ផ្សេង​ទៀត​គឺ​ក្រុម​ហ៊ុន​ សុីនទ្រី​ ដែល​ជា​ក្រុម​ហ៊ុន​ឯកជន​ទទួល​បន្ទុក​សកម្មភាព​ប្រមូល​កាក​សំណល់​ក្នុង​រាជធានី​ភ្នំពេញ បាន​ចុះ​កិច្ច​សន្យា​រយៈពេល​៥០​ឆ្នាំ​កាលពី​ឆ្នាំ​២០០២​ ដើម្បី​ប្រមូល​សំរាម​នៅ​ក្នុង​ទីក្រុង​នេះ​ ក៏​ប៉ុន្តែ ក្រុម​ហ៊ុន​នេះ​ទទួល​​រង​ការ​​រិះ​គន់​ជា​ហូរ​ហែ​តាំង​ពី​ពេល​នោះ​មក​ ដោយ​សារតែ​មិន​បា​ន​បំពេញ​តាម​កាតព្វកិច្ច​របស់​ខ្លួន​៕ សុធា​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស