អ្នកភូមិជាង២០គ្រួសារដែលធ្វើការនៅលើកចម្ការដូងប្រេងដ៏ចម្រូងចម្រាសមួយរបស់ក្រុមហ៊ុន Hoang Anh Lumphat នៅក្នុងខេត្តរតនគិរី បានដាក់ពាក្យបណ្តឹងទៅអង្គការសិទ្ធិមនុស្សអាដហុកដោយចោទប្រកាន់ម្ចាស់ក្រុមហ៊ុននេះថា មិនបានបើកប្រាក់មួយខែឲ្យពួកគាត់។
លោក ឡោ សុផល បាននិយាយថា លោក និងអ្នកភូមិ២២គ្រួសារទៀត សរុបមានគ្នា៤២នាក់ត្រូវបានក្រុមហ៊ុនសន្យាថា នឹងបើកប្រាក់ឲ្យពួកគាត់នៅរៀងរាល់ចុងខែនៅ ពេលពួកគាត់ចាប់ផ្តើមជម្រះស្មៅនៅក្នុងចម្ការដូងប្រេងនោះកាលពីថ្ងៃទី១៩ខែមករា ប៉ុន្តែមិនបានបើកប្រាក់ឲ្យមួយរៀលឡើយនៅពេលពួកគាត់ឈប់ធ្វើការកាលពីថ្ងៃច័ន្ទ និងបានដាក់ពាក្យបណ្ដឹង។
លោកបាននិយាយថា “យើងបានដាក់ពាក្យបណ្ដឹងទៅអង្គការសិទ្ធិមនុស្សអាដហុក ដើម្បីឲ្យអង្គការនេះផ្ដល់ព័ត៌មានទៅអាជ្ញាធរខេត្ត ដើម្បីឲ្យពួកគេជំរុញក្រុមហ៊ុនឲ្យបើកប្រាក់ឲ្យពួកយើង”។
លោក ឡោ សុផល បាននិយាយថា ពួកគាត់ ត្រូវក្រុមហ៊ុនសន្យាឲ្យតម្លៃ៣០០រៀលក្នុងការជម្រះស្មៅដើមដូងប្រេងមួយដើម ហើយថាគ្រួសាររបស់គាត់ដែលមានសមាជិកបួននាក់ត្រូវទទួលបានប្រាក់ប្រហែល១លានរៀលសម្រាប់ការងាររយៈពេលមួយខែ។
លោក មាន ព្រហ្មនី អ្នកសម្របសម្រួលអង្គការអាដហុកប្រចាំខេត្តនេះ បានមានប្រសាសន៍ថា លោកបានចុះទៅពិនិត្យមើលកន្លែងធ្វើការនោះ ហើយបានរកឃើញថា ពិតជាមានការជម្រះស្មៅនៅជុំវិញដើមដូងប្រេងតាមការណែនាំរបស់ក្រុមហ៊ុនមែន។
លោកបានមានប្រសាសន៍ថា “យើងឃើញថា កម្មករបានធ្វើការងាររបស់ខ្លួនអនុវត្តតាមបទដ្ឋានរបស់ក្រុមហ៊ុន។ ឥឡូវនេះ យើងកំពុងរៀបចំពាក្យបណ្ដឹង ហើយបញ្ជូនទៅមន្ទីរការងារខេត្តស្នើសុំអន្តរាគមន៍ និងជំរុញឲ្យក្រុមហ៊ុនបើកប្រាក់ឲ្យពួកគាត់។
លោក ឌុច ចាន់តូ អនុប្រធានមន្ទីរការងារខេត្តបានមានប្រសាសន៍ថា លោកទទួលបានព័ត៌មានអំពីវិវាទនេះកាលពីម្សិលមិញពីមន្ទីរសង្គមកិច្ចខេត្ត ហើយលោកមានគម្រោងជួបប្រជុំជាមួយក្រុមហ៊ុននៅដើមសប្ដាហ៍ក្រោយ។ លោកបានមានប្រសាសន៍ថា “ខ្ញុំនឹងអញ្ជើញតំណាងក្រុមហ៊ុន និងសុំឲ្យក្រុមហ៊ុនធ្វើការពន្យល់មុនពេលខ្ញុំចុះទៅពិនិត្យដល់កន្លែងធ្វើការ”។
លោក ធឿន លៀក អ្នកគ្រប់គ្រងចម្ការដូងប្រេងបានមានប្រសាសន៍ថា ក្រុមហ៊ុនមិនបើកប្រាក់ឲ្យគ្រួសារទាំងនោះទេពីព្រោះពួកគាត់ជម្រះស្មៅមិនបានល្អ។ ដោយបដិសេធមិននិយាយលម្អិត លោកបានមានប្រសាសន៍ថា “យើងមិនបើកប្រាក់ឲ្យពួកគាត់ទេ ពីព្រោះពួកគាត់មិនបានអនុវត្តតាមបទដ្ឋានត្រឹមត្រូវរបស់ក្រុមហ៊ុន”។
ក្រុមហ៊ុន Hoang Anh Lumphat ត្រូវបានអ្នកភូមិ និងអង្គការសិទ្ធិមនុស្សចោទប្រកាន់ម្ដងហើយម្ដងទៀតថា បានកាប់ឈើខុសច្បាប់ទាំងក្នុង និងក្រៅចម្ការរបស់ខ្លួន ដែលស្ថិតនៅក្នុងដែនជម្រកសត្វព្រៃលំផាត់។
កាលពីខែមុន ការិយាល័យច្បាប់របស់ក្រុមហ៊ុនសាជីវកម្មហិរញ្ញវត្ថុអន្តរជាតិ បានទទួលយកពាក្យបណ្ដឹងពីអ្នកភូមិជាច្រើនគ្រួសារនៅក្នុងខេត្តរតនគិរី ដែលជំទាស់ទៅនឹងការវិនិយោគរាប់លានដុល្លាររបស់ក្រុមហ៊ុនសាជីវកម្មហិរញ្ញវត្ថុអន្តរជាតិនេះនៅក្នុងក្រុមហ៊ុន Hoang Anh Gia Lai (HAGL)ជាក្រុមហ៊ុនចម្ការកៅស៊ូវៀតណាម ដែលគេជឿថា ជាក្រុមហ៊ុនមេរបស់ក្រុមហ៊ុន Hoang Anh Lumphat។
គ្រួសារអ្នកភូមិបានចោទក្រុមហ៊ុនចម្ការកៅស៊ូ HAGL ថា បានប្លន់យកដីរបស់ពួកគាត់។ ក្រុមហ៊ុន HAGL បានបដិសេធថា មិនមានភាគហ៊ុននៅក្នុងក្រុមហ៊ុន Hoang Anh Lumphat ទេ។ ប៉ុន្តែលោក ចាន់តូ អនុប្រធានមន្ទីរការងារខេត្តបានបញ្ជាក់ថា ក្រុមហ៊ុន Hoang Anh Lumphat ជាក្រុមហ៊ុនបុត្រសម័្ពន្ធរបស់ក្រុមហ៊ុន HAGL៕ សារុន