អាជ្ញាធរហាក់ដូចជា មិនបានព្រមព្រៀងថា លោកនាយករដ្ឋមន្ត្រី ហ៊ុន សែន បានដកបម្រាមមិនឲ្យធ្វើបាតុកម្មនោះ ឬអត់ទេ។
កាលពីសប្តាហ៍មុន លោក ហ៊ុន សែន បានមានប្រសាសន៍ថា “ខ្ញុំមិនរារាំងការធ្វើបាតុកម្មទេពីព្រោះមនុស្សគ្រប់គ្នាមានសិទ្ធិស្មើគ្នា” ហើយនេះធ្វើឲ្យមន្ត្រីរដ្ឋាភិបាលបកស្រាយភ្លាមៗថា ជាការដកបម្រាមមិនឲ្យមានការជួបជុំគ្នាជាសាធារណៈដែលក្រសួងមហាផ្ទៃបានចេញកាលពីថ្ងៃទី៤ ខែមករា។ ទោះជាយ៉ាងណា តាមការជាក់ស្តែងដូចជាគ្មាននរណាម្នាក់ស្តាប់សោះ។
អតីតប្រជាពលរដ្ឋបីនាក់មកពីសហគមន៍បឹងកក់ត្រូវបានឃាត់ខ្លួនកាលពីម្សិលមិញ នៅខាងក្រៅសាលារាជធានីភ្នំពេញដែលនៅ ទីនោះពួកគេបានចតរ៉ឺម៉កមូ៉តូកង់បីស្រែកតាមឧគ្ឃោសនសព្ទទាមទារឲ្យលោក ប៉ា សុជាតិ វង្ស អភិបាលរាជធានីភ្នំពេញផ្តល់សំណងថែមទៀតចំពោះការបាត់បង់ផ្ទះរបស់ពួកគាត់ដោយសារការបណ្តេញចេញទាំងបង្ខំ។
សន្តិសុខខណ្ឌដូនពេញ ជាក្រុមបង្ក្រាបបាតុកម្មរបស់សាលារាជធានីបានចាប់មនុស្សបីនាក់ដែលមានឈ្មោះ អឹុម ស្រីទូច អាយុ៤០ឆ្នាំ ស៊ា ណារ៉េត អាយុ៥៦ឆ្នាំ សាត ថា អាយុ៤០ឆ្នាំ ទាញចូលទៅក្នុងរថយន្តកំពុងរង់ចាំមួយគ្រឿងដែលបានដឹកពួកគេទៅកាន់ស្នងការដ្ឋាននគរបាលរាជធានី ហើយពួកគេត្រូវបានឃាត់ខ្លួននៅទីនោះអស់រយៈពេលជាច្រើនម៉ោង។
កាលពីថ្ងៃច័ន្ទ កងសន្តិសុខក៏បានប្រើកម្លាំងរុញច្រានអ្នកតវ៉ាជាស្ត្រីផងដែរដើម្បីរឹបអូសយកស្គរមួយដែលពួកគេបានវាយនៅកន្លែងនគរបាលបិទផ្លូវតាមតីរវិថីព្រះសីុសុវត្ថិ ។
សាលារាជធានី ក៏បានច្រានចោលសំណើសុំជួបជុំគ្នានៅទីលានប្រជាធិបតេយ្យពីរលើកផងដែរនៅសប្តាហ៍នេះ គឺសំណើទី១របស់សហជីព និងសមាគមចំនួន១៣ដែលកំពុងរៀបចំធ្វើកូដកម្មទូទាំងប្រទេសទាមទារដំឡើងប្រាក់ខែគោលឲ្យបាន១៦០ដុល្លារ ហើយសំណើទី២គឺសំណើរបស់លោក ម៉ម សូណង់ដូ ម្ចាស់ស្ថានីយវិទ្យុសម្បុកឃ្មុំ។
លោក ម៉ម សូណង់ដូ បានផ្ញើលិខិតមួយទៅសាលារាជធានីកាលពីថ្ងៃច័ន្ទ ស្នើសុំធ្វើបាតុកម្មនៅថ្ងៃទី៣១ ខែមីនា ហើយបានជូនដំណឹងប្រាប់សាលារាជធានីថា មានអ្នកចូលរួមប្រហែល២០០នាក់ដើម្បីគាំទ្រសំណើសុំអាជ្ញាប័ណ្ណទូរទស្សន៍របស់លោក។
លោក ម៉ម សូណង់ដូ បានមានប្រសាសន៍ថា “សម្តីរបស់លោក ហ៊ុន សែន មានន័យថា បម្រាមមិនឲ្យធ្វើបាតុកម្មនេះត្រូវបានដកហើយ ដូច្នេះគួរតែអនុញ្ញាតលើសំណើសុំធ្វើបាតុកម្មរបស់ខ្ញុំ”។ លោក ឡុង ឌីម៉ង់ អ្នកនាំពាក្យសាលារាជធានីមិនយល់ស្របទេ។
លោក ឡុង ឌីម៉ង់ បានមានប្រសាសន៍ថា “យើងនឹងអញ្ជើញលោក ម៉ម សូណង់ដូ មកជួបពិភាក្សានៅពេលឆាប់ៗនេះ ហើយយើងនឹងសម្រុះសម្រួលជាមួយគាត់កុំឲ្យធ្វើបាតុកម្មដើម្បីរក្សាសន្តិសុខឲ្យបានល្អ”។
ច្បាប់ឆ្នាំ២០០៩ស្តីពីការធ្វើបាតុកម្មអហិង្សាចែងថា អ្នករៀបចំធ្វើបាតុកម្មត្រូវតែជូនដំណឹងទៅអាជ្ញាធរអំពីគោលបំណងនៃការធ្វើបាតុកម្មរបស់ខ្លួនឲ្យបានមុនពេលធ្វើបាតុកម្មប្រាំថ្ងៃ ប៉ុន្តែ មិនចាំបាច់ត្រូវការការអនុញ្ញាតពីអាជ្ញាធរទេ។
រដ្ឋាភិបាលបានលើកឡើងម្តងហើយម្តងទៀតអំពីកង្វល់ផ្នែកសន្តិសុខចំពោះការដែលខ្លួនមិនអនុញ្ញាតឲ្យធ្វើបាតុកម្មនៅទីលានប្រជាធិបតេយ្យ ថ្វីបើរាល់ការធ្វើបាតុកម្មនៅទីលានប្រជាធិបតេយ្យចាប់តាំងពីការបោះឆ្នោតខែកក្កដាមកមានលក្ខណៈអហិង្សាក៏ដោយ។
អំពើហិង្សាកើតចេញតែពីសន្តិសុខខណ្ឌ និងមនុស្សស្លៀកពាក់សីុវិលដែលកាន់ដំបងឆក់ និងបំពង់ទីបប៉ុណ្ណោះ នៅពេលពួកគេដេញអ្នកគាំទ្រគណបក្សប្រឆាំងចេញពីទីលានប្រជាធិបតេយ្យកាលពីថ្ងៃទី៤ ខែមករា។
លោក ឡុង ឌីម៉ង់ បានមានប្រសាសន៍ថា ស្ត្រីបីនាក់ដែលត្រូវបានឃាត់កាលពីម្សិលមិញ នៅមុខសាលារាជធានីត្រូវបានឃុំខ្លួនពីព្រោះពួកគេធ្វើឲ្យប៉ះពាល់ដល់សណ្តាប់ធ្នាប់សាធារណៈ។ លោកក៏បានអះអាងដែរថា ពួកគេបានព្យាយាមបិទផ្លូវនៅមុខសាលារាជធានី។ លោកបានមានប្រសាសន៍ថា “ប្រសិនបើពួកគេចង់ធ្វើបាតុកម្ម ពួកគេត្រូវសុំការអនុញ្ញាតពីសាលារាជធានី”។
លោក ឡុង ឌីម៉ង់ ក៏បានអះអាងកាលពីម្សិលមិញដែរថា ការផ្អាកមិនឲ្យមានការជួបជុំគ្នានេះមិនមែនជាបម្រាមមិនឲ្យធ្វើបាតុកម្មទេ។ លោកបានឲ្យដឹងថា “តាមពិតមិនមានបម្រាមមិនឲ្យធ្វើបាតុកម្មទេ” ។ លោកពន្យល់ប្រាប់ថា ក្រសួងមហាផ្ទៃគ្រាន់តែចេញសេចក្តី ណែនាំឲ្យផ្អាកធ្វើបាតុកម្មតែប៉ុណ្ណោះ។
អ្នកតវ៉ាម្នាក់ក្នុងចំណោមអ្នកតវ៉ាបីនាក់ដែលត្រូវបានឃាត់ខ្លួនកាលពីម្សិលមិញគឺអ្នកស្រី ស្រី ទូច ប៉ុន្តែត្រូវបានដោះលែងវិញហើយកាលពីរសៀលម្សិលមិញ ហើយអ្នកស្រីនិយាយថា អ្នកស្រីយល់ច្រឡំចំពោះពាក្យសម្តីមិនច្បាស់លាស់របស់រដ្ឋាភិបាល។
អ្នកស្រីបាននិយាយថា “នាយករដ្ឋមន្ត្រី ហ៊ុន សែន បញ្ជាឲ្យដកបម្រាមធ្វើបាតុកម្មហើយ ប៉ុន្តែ អាជ្ញាធរនៅតែរក្សាបម្រាមនេះដដែល”។ “ពួកគេមិនបានស្តាប់នាយករដ្ឋមន្ត្រីទេ ហើយបទបញ្ជារបស់គាត់គ្មានន័យឡើយ។ ឬប្រហែល ជាលោក ហ៊ុន សែន គ្រាន់តែធ្វើពុតប៉ុណ្ណោះ ដើម្បីបង្ហាញពិភពលោកថា រដ្ឋាភិបាលគោរពសិទ្ធិមនុស្ស”។
ឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃបានមានប្រសាសន៍ថា សម្តីរបស់លោក ហ៊ុន សែន ពិតជាដកបម្រាមរបស់ក្រសួងនេះមិនឲ្យធ្វើបាតុកម្មមែន ប៉ុន្តែ ក្រសួងនៅតែបដិសេធសំណើរបស់សហជីពដែលបានដាក់ជូនកាលពីថ្ងៃទី២៦ខែមករា សុំរៀបចំធ្វើវេទិកាសាធារណៈនៅទីលានប្រជាធិបតេយ្យនៅថ្ងៃសៅរ៍ដដែល។ លោក ខៀវ សុភ័គ បានមានប្រសាសន៍ថា “សហជីពមិនអាចបង្កភាពចលាចលបានទេ ហើយច្បាប់ស្តីពីការធ្វើបាតុកម្មអហិង្សានៅមានសុពលភាពនៅឡើយ”។
ច្បាស់ស្តីពីការធ្វើបាតុកម្មអហិង្សាចែងថា បាតុកម្មមិនត្រូវធ្វើឲ្យប៉ះពាល់ដល់សិទ្ធិ សេរីភាព និងកិត្តិយសរបស់អ្នកដទៃ ទំនៀមទម្លាប់ល្អរបស់ជាតិ សណ្តាប់ធ្នាប់សាធារណៈ និងសន្តិសុខជាតិឡើយ”។
លោក ខៀវ សុភ័គ បានអះអាងថា វេទិកាសាធារណៈរបស់សហជីពដែលគេបានអញ្ជើញ មន្ត្រីគណបក្សប្រជាជនកម្ពុជា និងមន្ត្រីគណបក្សសង្គ្រោះជាតិឲ្យថ្លែងទៅកាន់កម្មករប្រហែល៣០.០០០នាក់នេះប្រហែលជាធ្វើឲ្យប៉ះពាល់ដល់ការចរចាអំពីការកែទម្រង់ការបោះឆ្នោតរវាងគណបក្សទាំងពីរ។ លោកបានមានប្រសាសន៍ថា “យើងរំពឹងថា វេទិកាសាធារណៈនេះពាក់ព័ន្ធនឹងនយោបាយ។ ដូច្នេះដើម្បីធ្វើឲ្យមានបរិយាកាសល្អសម្រាប់ក្រុមការងារនៃគណបក្សទាំងពីរ វេទិកាសាធារណៈនេះគួរតែធ្វើនៅការិយាល័យផ្ទាល់ខ្លួនវិញ”៕គឹមហឿន
(រាយការណ៍បន្ថែមដោយ Colin Meyn)