38 C
Phnom Penh

ក្រសួង​កសិកម្ម​បង្កើត​តំបន់មាន​មេរោគ​គ្រុន​​ផ្តាសាយ​បក្ស​ីពីរកន្លែងនៅ​​​ភ្នំពេញ​​​និង​​​​​​ខេត្ត​​​កណ្តាល

ដោយ ឌឹ ខេមបូឌា ដេលី

បទវិភាគ

ក្រុមមន្ត្រី​បាន​និយាយ​កាល​ពីម្សិល​មិញ​ថា ក្រសួង​កសិកម្ម​បាន​បង្កើត​តំបន់​​ដែល​​មាន​មេរោគគ្រុន​ផ្តាសាយ​បក្សី​នៅ​ក្នុង​រាជ​ធានី​ភ្នំពេញ​ និង​នៅខេត្ត​កណ្តាល​ បន្ទាប់​ពីមាន​សត្វ​​​​មាន់​ទារាប់​រយ​ក្បាល​បាន​ងាប់​ដោយ​​​សារ​​​មេរោគ H5N1។

លោក អ៊ុក រ៉ាប៊ុន រដ្ឋ​មន្ត្រី​ក្រសួង​កសិ​កម្ម​បាន​ចុះ​ហត្ថ​លេខា​លើ​សារាចរណែ​នាំ​ពីរ​កាល​ ​ពីចុង​ខែ​មុន​ដោយ​លើក​ឡើង​ថា សត្វ​មាន់​ទា​ដែល​ត្រូវ​បាន​គេ​ដឹក​ចូល​ និង​ចេញ​ចម្ងាយ​៣​គីឡូម៉ែត្រ​ពីកន្លែង​ដែល​​មាន​ផ្ទុះ​​ឡើង​នូវ​ជំងឺ​នេះ ត្រូវ​ធ្វើ​តេស្ត​ដើម្បីទប់​ស្កាត់​​កុំ​ឲ្យ​មេរោគ​​​​នេះ​រីក​រាល​​ដាល​បន្ថែម​ទៀត​។

កាល​ពីឆ្នាំ​២០១៣​ មនុស្ស​សរុប​ចំនួន​២៤​នាក់​បាន​ឆ្លង​ជំងឺ​គ្រុន​ផ្តាសាយ​បក្សី​ពី​សត្វ​មាន់ទា​ឈឺ​ ឬ​ងាប់​ ហើយ​មនុស្ស​​​​ចំនួន​​​១២​នាក់​​​​​បាន​ស្លាប់​។

រហូត​មក​ទល់​ពេល​នេះ​​​ក្នុង​​​​ឆ្នាំនេះ​ មាន​មនុស្ស​​ប្រាំនាក់​ហើយ​ត្រូវ​បាន​បញ្ជាក់​ថា បាន​ឆ្លង​មេរោគនេះ​ ហើយ​ក្មេង​ប្រុស​ម្នាក់​បាន​​ស្លាប់​។ មន្ត្រី​សុខា​ភិបាល​​​​គិត​​​​ថា បងស្រី​​របស់​ក្មេង​​ប្រុស​នោះ​ក៏​បាន​ឆ្លង​ជំងឺ​គ្រុន​ផ្តាសាយ​បក្ស​ីដែរ​ ប៉ុន្តែ នាង​បាន​ស្លាប់​មុន​ពេល​ធ្វើ​តេស្ត​។

លោក សៀង បូរិន ប្រធាន​មន្ទីរ​កសិ​កម្ម​​រាជ​ធានី​ភ្នំពេញ​បាន​មាន​ប្រសាសន៍​ថា សត្វ​មាន់​ ទា និង​ក្ងាន ប្រហែល​២០០​ក្បាល​ដែ​ល​គេ​ប្រើ​សម្រាប់​ស្រាវ​ជ្រាវ​នៅ​វិទ្យា​ស្ថាន​ស្រាវ​​ជ្រាវ​ និង​អភិវឌ្ឍន៍​កសិ​កម្ម​កម្ពុ​ជា​នៅ​ក្នុង​ខណ្ឌ​ដង្កោ​ត្រូវ​បាន​សម្លាប់​​​​និង​​​​ដុត​​ចោល​កាល​ពីថ្ងៃ​ទី​១៩​ខែ​កុម្ភៈ​ដើេម្បី​ទប់​ស្កាត់​កុំឲ្យ​​​ជំងឺ​នេះ​រាល​ដាល​ដល់​សត្វ​មាន់ទាដទៃ​ទៀត​ដែល​រស់​នៅក្នុង​តំបន់​នោះ​។

លោក បូរិន បានមាន​ប្រសាសន៍​កាល​​ពី​ម្សិលមិញថា “ ឥឡូវ​នេះមិនមានការ​ផ្ទុះ​​ឡើង​ នូវជំងឺ​គ្រុន​ផ្តាសាយ​បក្ស​ី​ទៀត​ទេ ពី​ព្រោះ​យើង​បាន​ចាត់​វិធាន​ការ​ភ្លាម​ៗ​”។ លោក​បាន ​បន្ថែមថា សត្វ​មាន់ទា​នៅតែ​​​មិន​ទាន់​​អនុ​ញ្ញាត​ ​ឲ្យ​ដឹកចូល​ ឬដឹក​ចេញ​ពី​កន្លែង​នេះ​ដដែល​ ដោយសារ​តំបន់​មាន​ជំងឺ​គ្រុន​ផ្តា​សាយ​បក្សី​ដែល​ក្រសួង​កសិកម្មបាន​បង្កើត​ឡើង​។

លោក ហ៊ីង ហៀង មេឃុំកំពង់​កុង​ បាន​មាន​​​​ប្រសាសន៍​កាល​ពីម្សិលមិញ​ថា តំបន់​ទី​២​ត្រូវ​​​បាន​បង្កើ​តឡើង​ក្នុង​ស្រុក​កោះ​ធំ​ខេត្ត​កណ្តាល​​​​កន្លែង​ដែល​សត្វ​ទា​ប្រហែល​២០០​ក្បាល​បាន​ងាប់​ចាប់​តាំង​ពី​ថ្ងៃ​ទី​១៥​ខែ​កុម្ភៈ​មក​។

លោក​ ហ៊ីង ហៀង​ បានមាន​ប្រសា​សន៍​ថា “ មាន​សត្វ​ទាប្រហែល​១៨០​ក្បាល​​​ដែល​យើង​បាន​ដុត​ចោល​បន្ទាប់​ពីវា​បាន​ងាប់​នៅ​ផ្ទះ​របស់​កសិករ​ម្នាក់”។លោក​មាន​ប្រសាសន៍​ ថា “ យើង​បារម្ភ​អំពី​ការ​ផ្ទុះ​ឡើង​នូវ​ជំងឺ​នេះ​ ពីព្រោះ​ជំងឺ​ គ្រុន​ផ្តាសាយ​បក្សី​អាចធ្វើឲ្យ​មនុស្ស​ស្លាប់បាន​”​ ប្រសិនបើមេរោគ​នេះ​ឆ្លង​ពី​សត្វ​មាន់​ទាទៅ​មនុស្ស​នោះ។

លោក Lotfi Allal ប្រធានក្រុម​​​ការ​​​ងារ​​​​នៃ​មជ្ឈ​មណ្ឌល​សង្គ្រោះ​បន្ទាន់នៃ​អង្គការ​ស្បៀង​អាហារ​ និង​កសិកម្ម​របស់​អង្គការ​សហ​​​​ប្រជា​ជាតិផ្នែក​ជំងឺ​សត្វ​ឆ្លង​ដែន​ប្រចាំ​រាជ​ធានី​ភ្នំពេញ​​បាន​មាន​ប្រសាសន៍​កាល​ពី​ម្សិល​មិញថា សត្វ​ទា​គឺ​ជា​ភ្នាក់ងារ​ចម្លង​មេ​រោគ​​ដ៏​សំខាន់​។

លោក Lotfo Allal​ បានមាន​ប្រសាសន៍ថា “​សត្វទាគឺជាកង្វល់ដ៏ចម្បង​ ពីព្រោះវា​អាច​ចម្លង​មេរោគ​នៅ​ពេល​ណាមួ​យ​ ហើយ​មិន​មែន​សត្វទា​ទាំង​អស់សុទ្ធ​តែ​ងាប់​នោះ​ទេ​។​ ចំណែក​សត្វ​មាន់​វិញ​ វា​ងាប់​បន្ទាប់ពី “ ​ឆ្លង​​​​មេរោគ​ភ្លាម ដោយ​មិន​ទំនង​​​​ជា​​​អាច​​​ចម្លង​មេរោ​គ​ H5N1 ទៅ​សត្វ​មាន់​ទា​ដទៃ​ទៀត​ ឬ​ទៅ​មនុស្ស​ឡើយ។

លោក​បានមាន​ប្រសាសន៍ថា ចន្លោះពី​​​​ឆ្នាំ​២០០៤​ ​​​ដែល​​​នៅ​ពេល​​​​នោះ មេ​រោគ​នេះ​ផ្ទុះ​ឡើង​​ដំបូង​នៅក្នុង​ប្រទេស​កម្ពុជា​ ដល់​​​​ចុង​ឆ្នាំមុននោះ មានការ​ផ្ទុះ​ឡើង​នូវ​​មេរោគ​ H5N1 សរុប​៤០​ករណី​ ហើយ​​​​លោក​បន្ថែម​ថា ការ​ផ្ទុះ​ឡើង​នោះ​បាន​ប្រកាស​​​​ភ្លាមៗថា មាន​​បក្ស​ី​តែមួយ​ក្បាល​ប៉ុណ្ណោះត្រូវ​បាន​ធ្វើតេស្ត​​រក​ឃើញថា ​មាន​ផ្ទុក​មេរោគ​នេះ​។

លោក Allal បាន​មាន​ប្រសាសន៍ថា “ នៅ ពេល​មេរោគនេះផ្ទុះឡើង វិធានការ​ចាំបាច់​គឺត្រូវ​សម្លាប់​សត្វ​មាន់​ទា​​​និង​​​​ធ្វើ​​​មិន​​​​ឲ្យមាន​ការ​ចម្លងក្នុង​តំបន់​នោះ​ រឹត​បន្តឹង​ការ​​​​​​ដឹក​​​ជញ្ជូន​​​​សត្វមាន់ទា​​​ពី​​​កន្លែង​​​មួយ​​​ទៅ​​​កន្លែង​​​មួយ​​​ ហើយ​មនុស​្ស​ដែល​រស់​នៅក្នុង​តំបន់​នោះ​មិន​ត្រូវ​បាន​អនុញ្ញាត​ឲ្យចិញ្ចឹម​មាន់​​ទា​ឡើង​វិញ​ក្នុង​រយៈ​ពេល​៣០​ថ្ងៃ​”៕​សារុន​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស