35 C
Phnom Penh

ក្រុមហ៊ុន​ដែល​ផ្តល់​សេវា​រថយន្ត​ក្រុង​សាធារណៈ​ទទួល​បាន​កិច្ច​សន្យា​តាម​រយៈ​ការ​សន្យា​​ផ្ទាល់​មាត់​

ដោយ ឌឹ ខេមបូឌា ដេលី

បទវិភាគ

កាល​ពី​ម្សិល​មិញ ​ក្រុម​ហ៊ុ​ន​គ្រប់​គ្រង​ដោយ​​​ចិន​ដែល​បានចា​ប់​ផ្តើម​ប្រតិបត្តិ​ការ​សេវា​រថយន្ត​ក្រុង​សាធារណៈ​​​ថ្មី​ ទទួល​បាន​ការ​យល់​ព្រម​ផ្តល់​កិច្ច​សន្យា​រយៈពេល​ប្រាំ​ឆ្នាំ​ដោយ​ផ្ទាល់​មាត់​ ហើយ​នៅ​មិន​ទាន់​ចុះ​ហត្ថ​លេខា​លើ​​​កិច្ច​សន្យាជា​ផ្លូវការ​ជាមួយ​សាលា​រាជ​ធានី​​​នៅ​ឡើយ​ទេ​ នេះ​បើ​យោង​តាម​ការ​​ឲ្យ​ដឹង​ពី​នាយក​ប្រតិបត្តិ​របស់​ក្រុម​ហ៊ុន​នេះកាល​ពី​ម្សិល​មិញ​។

លោក​ លឹម​ អេន​ដ្រេ​ នាយក​ប្រតិបត្តិ​របស់​​ក្រុមហ៊ុន ​Global (Cambodia) Trade Development​​ ដែល​ក៏​ជា​ក្រុមហ៊ុន​មួយ​​គ្រប់​គ្រង​លើ​ក្រុុម​ហ៊ុន​​រថយន្ត​តាក់​ស៊ីម៉ែត្រ (Phnom Penh metered taxi service Global Taxi ) ដែរនោះ​ បាន​លើក​ឡើង​ថា ក្រុមហ៊ុន​​របស់​លោក​នឹង​បោះ​ទុន​ចំនួន​១២​លាន​ដុល្លារ​សម្រាប់​​គម្រោង​រយៈពេល​ប្រាំ​ឆ្នាំនេះ​ ដោយ​នៅ​ឆ្នាំ​ដំបូង​ក្រុមហ៊ុន​នឹង​បោះ​ទុន​ចំនួន​បួន​លាន​ដុល្លារ​។

លោក​​មាន​ប្រសាសន៍​ថា “យើង​នៅ​​មិន​ទាន់​ចុះ​ហត្ថលេខា​លើ​កិច្ច​សន្យា​នៅ​ឡើយ​​​​​​​​​​ទេ​។​ យើង​គ្រាន់​តែ​មាន​កិច្ច​ព្រម​ព្រៀង​​​ដោយ​ផ្ទាល់​មាត់​ប៉ុណ្ណោះ ​ប៉ុន្តែ​ខ្ញុំ​មិន​ចាំ​បាច់​រង​់​ចាំ​រហូត​ដល់​មាន​ការ​ចុះ​ហត្ថ​លេ​ខា​លើ​កិច្ច​សន្យា​មុន​ពេល​គម្រោង​នេះ​ដំណើរ​ការ​នោះ​ទេ​ ព្រោះ​ខ្ញុំ​រំពឹង​ថា កិច្ច​សន្យា​នឹង​ត្រូវ​បាន​ចុះ​ហត្ថលេខា​ក្នុង​ពេល​ឆាប់ៗ​”។

លោក​ អេនដ្រេ​ បាន​បញ្ជាក់​អំពី​ការ​ទទួល​​​ស្គាល់​របស់​សាលា​រាជ​ធានី​ កាល​ពី​ថ្ងៃ​អង្គារ​ថា វា​គ្មាន​ដំណើ​ការ​ដេញ​ថ្លៃ​ជា​ផ្លូវ​ការ​ ដើម្បី​​​ជ្រើស​រើស​ក្រុមហ៊ុន​ទទួល​ផ្តល់សេវា​កម្ម​រថយន្ត​ក្រុង​សាធារណៈ​នេះ​ទេ​ ហើយ​លោក​​​បាន​លើក​ឡើង​ថា ក្រុម​ហ៊ុន​របស់​លោក​ត្រូវ​បាន​ជ្រើស​រើស​ ព្រោះ​​ក្រុមហ៊ុន​របស់​លោក​មាន​សំណើ​ល្អជាង​គេ​។ លោក​បន្ថែម​ទៀត​ថា ក្រុមហ៊ុន​ ​Global (Cambodia) Trade Development​​ មិន​រំពឹង​ថា ទទួល​បាន​ប្រាក់​ចំណេញ​ឡើយ​នៅ​ក្នុង​ប្រតិបត្តិការ​រយៈ​ពេល​​បី​ឆ្នាំ​ដំបូង​។

កាល​ពី​ដើម​ឆ្នាំ​២០១៣​ ដំបូង​ឡើយ ក្រុមហ៊ុន​របស់​លោក​បាន​ដក​សំណើ​​របស់​ខ្លួន​ទៅ​វិញ ​បន្ទាប់​ពី​សាលា​រាជ​ធានី​បាន​ស្នើ​ឲ្យ​ក្រុម​ហ៊ុន​ចូល​ហ៊ុន​ជាមួយ​ក្រុម​ហ៊ុន​មួយ​ផ្សេង​ទៀត​គឺ​ក្រុមហ៊ុន​ City Trans Cambodia ដែល​គ្រប់​គ្រង​ដោយ​កូរ៉េ​ខាង​ត្បូង។

លោក អេនដ្រេ​ បាន​មាន​ប្រសាសន៍​ទៀត​ថា “ខ្ញុំ​មិន​យល់​ទេ​ ហេតុ​អ្វី​បាន​ជា​មាន​ក្រុម​ហ៊ុន​​ចំនួន​ពីរ​ត្រូវ​បាន​ជ្រើស​រើស​។ វា​មិន​មែន​ជា​ជំនួញ​មួយ​ដែល​មនុស្ស​ជា​ច្រើន​ចង់​ធ្វើ​នោះ​ទេ​ ព្រោះ​វា​លំបាក​នឹង​ទទួល​បាន​ប្រាក់​ចំណេញ​ណាស់​ ហើយ​ក្រុម​ហ៊ុន​ទាំង​ពីរ​នឹង​មាន​បញ្ហា​នឹងគ្នា​ ហេតុដូច្នេះ​ខ្ញុំ​អប​អរ​សាទរ​ចំពោះ​ក្រុម​ហ៊ុន​ផ្សេង​ដែល​បាន​ចាក​ចេញ​។ ប៉ុន្តែ​នៅ​ពេល​ក្រុមហ៊ុន​​ City Trans Cambodia មិន​បាន​ទទួល​អាជ្ញាប័ណ្ណ​ណាមួយ​ពី​សាលា​រាជ​ធានី​នោះ ​យើងបានដាក់​សំណើ​របស់​យើង​​​​​​​​​​ម្តង​ទៀត​”។ លោក​បន្ថែម​ថា លោក​មិន​ដឹង​ទេ​ហេតុ​អ្វី​បាន​ជា​ក្រុុម​ហ៊ុន​​  City Trans Cambodia នៅ​មិន​ទាន់​បញ្ចប់​ប្រតិ​បត្តិការ​​សេវា​​រថយន្ត​ក្រុង​សាធារណៈ​។

ក្រុមហ៊ុន​ ​Global (Cambodia) Trade Development​​ បច្ចុប្បន្ន​កំពុង​សម្រេច​ចិត្ត​រវាង​ក្រុម​ហ៊ុន​ចិន​ដែលមិន​បញ្ចេញ​ឈ្មោះ​ចំនួន​បី​ ដើម្បី​ផ្តល់​រថយន្ត​ក្រុង​មក​ឲ្យ​ខ្លួន​សម្រាប់​ផ្តល់​សេវា​រថយន្ត​ក្រុង​សាធារណៈ​ថ្មី​ ប៉ុន្តែ​នៅ​រយៈ​ពេល​​១០​ខែ​ដំបូង​ ក្រុមហ៊ុន​នេះ​នឹង​បន្ត​ប្រើ​ប្រាស់​រថយន្ត​ក្រុង​ដែល​ជួល​គេ​ដដែល​នេះ​សិន​ ដែល​ឥឡូវ​កំពុង​តែ​ត្រូវ​បាន​ប្រើ​ប្រាស់​ដោយ​​​​​​​​​​ទី​ភ្នាក់​ងារ​សហ​ប្រ​តិ​បត្តិ​ការ​អន្តរ​ជាតិ​ជប៉ុន​ (JICA) អំឡុង​​រយៈពេល​សាក​ល្បង​​ចំនួន​​មួយ​ខែ​ ដែល​បាន​បញ្ចប់​កាល​ពី​​ថ្ងៃ​អង្គារ។​

ប៉ុន្តែ​អ្នក​នាំ​ពាក្យ​របស់​ក្រុមហ៊ុន​ City Trans Cambodia បាន​ឲ្យ​ដឹង​កាល​ពី​ម្សិល​មិញ​ថា ក្រុម​ហ៊ុន​ត្រូវ​បាន​សាលា​រាជ​ធានី​បដិសេធ​មិន​ផ្តល់​កិច្ច​សន្យា​នេះ​ទេ​ដោយ​មូល​ហេតុ​​ថា សាលា​រាជធានី​តម្រូវ​ឲ្យ​ក្រុម​ហ៊ុន​ប្រើ​ប្រាស់​រថយន្ត​ថ្មី​ពេល​ដែល​ចាប់​ផ្តើម​ផ្តល​់​សេវា​រថយន្ត​ក្រុង​សាធារណៈ​។

លោក​ ឌីន រ៉ាដេត​ ដែល​ជា​អ្នក​នាំពាក្យ​របស់​ក្រុមហ៊ុន​នេះ​បាន​មាន​ប្រសាសន៍ថា “ថៅ​កែ​របស់​ខ្ញុំ​ [គឺ​លោក ឆ​យ​ ដេ​​យ៉ុង​ (Choi Dae Yong) ដែល​ជា​នាយក​គ្រប់​គ្រង​] ពិត​ជា​មាន​ការ​ខក​ចិត្ត​យ៉ាង​​ខ្លាំង​ជាមួយ​សាលា​រាជ​​ធានី​ព្រោះ​​សាលា​រាជ​ធានី​តម្រូវ​ឲ្យ​យើង​ទិញ​រថយន្ត​ក្រុង​ថ្មី​ មុន​ពេល​ចាប់​ផ្តើម​សេវា​រថយន្ត​ក្រុង​សាធារណៈ​នេះ​ ប៉ុន្តែ​ឥឡូវ​បែ​រ​ជា​ឲ្យ​ក្រុមហ៊ុន​ផ្សេង​ចាប់​ផ្តើម​ប្រតិ​បត្តិ​ការ​ដោយ​ប្រើ​រថយន្ត​ក្រុង​ចាស់​ដដែល​ គឺ​មិន​មែន​រថយន្ត​ក្រុង​ថ្មី​ទៅវិញ​”។

លោក​ រ៉ាដេត ក៏​បាន​ឲ្យ​ដឹង​ដែរ​ថា លោក​ដឹង​ថា ក្រុមហ៊ុន​ Global (Cambodia) Trade Development​​ មាន​បំណង​ប្រើ​ប្រាស់​រយៈ​​​ពេល​​១០​ខែ​បន្ទាប់​ទៀត​នេះ​ជា​រយៈពេល​សាក​ល្បង​ ហើយ​ប្រសិន​បើ​សេ​វារថ​​យន្ត​ក្រុង​សាធារណះនេះ​ទំនង​ជា​មិន​ផ្តល់​ប្រាក់​ចំណេញ​​​​​​​​​​នោះ​ ពួក​គេ​នឹង​ដក​ខ្លួន​ថយ​វិញ​ចេញ​​ពី​គម្រោង​នេះ​​។

លោក​មាន​ប្រសាសន៍​ថា “ ហេតុ​ដូច្នេះ ​ពេល​បច្ចុប្បន្ន​ ថៅ​កែរបស់​ខ្ញុំ​ នៅ​រង់ចាំ​មើល​ក្រុមហ៊ុន​ Global (Cambodia) Trade Develop-ment​​ បោះ​បង់​ចោល​គម្រោង​នេះ​ ហើយ​គាត់​ប្រហែល​​​​​​​​​​​​​​ជា​​ពិចារណា​ម្តង​ទៀត”។

កាល​ពី​ម្សិល​មិញ​ អ្នក​នាំ​ពាក្យ​សាលា​រាជ​​​ធានី​ភ្នំពេញ​បាន​ឲ្យ​ដឹង​ថា ការ​លើក​ឡើង​របស់​លោក​កាល​ពី​ព្រឹក​ថ្ងៃ​អង្គារ​ ដែល​ថា គ្មាន​ដំណើរ​ការ​ដេញ​ថ្លៃ​ជា​ផ្លូវ​ការ​សម្រាប់​ការ​ទទួល​បាន​កិច្ច​សន្យា​ផ្តល់​សេវា​រថយន្ត​ក្រុង​សាធារណៈ​នេះ​ មិន​មែន​មាន​ន័យថា​ ខ្វះ​​​​​​​តម្លាភាពនោះ​ទេ​។

លោក​ ឡុង​ ឌី​ម៉ង​់​ អ្នក​នាំ​ពាក្យ​សាលា​រាជ​ធានី​ភ្នំពេញ​បានមាន​ប្រសាសន៍ថា “[អត្ថបទ​មួយ​កាល​ពី​ម្សិលមិញ​] ​​លើកឡើង​ថា ​យើង​ធ្វើនេះ​គ្មាន​តម្លា​ភាព​នោះ​ទេ​ ប៉ុន្តែ​យើង​​​​​​​​​​ពិត​ជា​ធ្វើ​ឡើង​ប្រកប​ដោយ​តម្លាភាព​ ហេតុ​ដូច្នេះ​នៅ​ព្រឹក​នេះ​យើង​បាន​អញ្ជើញ​ប្រព័ន្ធ​ផ្សព្វ​ផ្សាយ​ក្នុង​ស្រុក​ ដើម្បី​បញ្ជាក់​ប្រាប់​ពួក​ឲ្យ​បាន​ច្បាស់​អំពី​បញ្ហា​នេះ​”។លោក​​​​​​​បាន​បដិសេធ​មិន​រៀបរាប់​អំពី​ការ​បញ្ជាក់​របស់​លោក​ឡើយ​ ហើយ​លោក​បាន​លើក​ឡើង​ថា លោក​រវល់​ខ្លាំង​ណាស់​ លោក​មិន​អាច​ធ្វើ​អត្ថាធិប្បាយ​ចំណុច​ផ្សេងៗ​នៃ​កិច្ច​សន្យា​​​ផ្តល់​​​​​​​​​​សេវា​រថយ​ន្ត​ក្រុង​សាធារណៈ​នេះ​បាន​ទេ​។

លោក​ សុន​ ឆ័យ​ ប្រធាន​ក្រុម​តំណាង​រាស្ត្រ​មក​ពី​គណ​បក្ស​សង្គ្រោះ​ជាតិ​ បាន​ឲ្យ​ដឹងកាល​ពី​ម្សិល​មិញ​ថា វា​ទំនង​ជា​គ្មាន​តម្លា​ភាព​ទេ​នៅ​ក្នុង​ដំណើរ​ការ​ដេញ​ថ្លៃ​ដើម្បី​ទទួល​បាន​កិច្ច​សន្យា​នេះ​​។

លោក​មាន​ប្រសាសន៍​ថា “មាន​ព័ត៌មាន​ជា​ច្រើន​ [ទាក់​ទិន​នឹង​កិច្ច​សន្យា​នេះ​] ដែល​មិន​បញ្ចេញ​មក​ក្រៅ​ ហើយ​ដែល​តាម​ពិត​ទៅ​គួរ​តែ​បើក​ជំហ​ឲ្យ​សាធារណជន​ដឹង​ឮ។ ហេតុ​អ្វី​បាន​ជា​ក្រុម​ហ៊ុន​នៅ​តែ​ចង់​បាន​កិច្ច​សន្យា​នេះ​ នៅ​ពេល​វា​មិន​ផ្តល់​ប្រាក់​ចំណេញ​​​​​​​​​​​​​ណា​មួយ​ លុះ​ត្រា​តែ​មាន​​ការ​ឧបត្ថម្ភ​​ធន​ពី​រដ្ឋាភិបាលនោះ​? មាន​របៀប​វារៈលាក់​បាំង​នៅ​ទី​នេះ​”៕​ ស៊ុយឈាង​

រាយ​ការណ៍​បន្ថែម​ដោយ​ គុច ណារ៉េន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស