34.8 C
Phnom Penh

សាកល​វិទ្យាល័យ​បញ្ញាជាតិលុបចោល​គម្រោង​រៀបចំ​ទិវា​សិទ្ធិ​នាទី​អន្តរជាតិ​របស់​អង្គការ​សីល​ការ​​

ដោយ ឌឹ ខេមបូឌា ដេលី

បទវិភាគ

សាក​ល​វិទ្យាល័យ​បញ្ញាជាតិក្នុង​រាជ​ធានី​ភ្នំពេញបា​ន​ជូន​ដំណឹង​ដល់​អង្គការ​សីល​ការ​ ជា​អង្គការ​មិនមែន​រដ្ឋាភិបាល​ក្នុង​ស្រុក​ថា អង្គការ​នេះ​មិន​អាច​រៀប​ចំ​កិច្ច​ប្រជុំ​ស្តីពី​សិទ្ធិ​ស្ត្រី​ដែលគ្រោង​ធ្វើ​នៅ​ថ្ងៃ​នេះ​នៅ​ក្នុង​បរិ​វេណ​សាកល​វិទ្យាល័យ​បាន​ទេ ពីព្រោះ​កិច្ច​ប្រជុំនេះប្រហែល​ជា​ ’បម្រើ​ផល​ប្រយោជន៍​នយោបាយ’ ។

អង្គការ​សីលការ​បាន​ជួល​បន្ទប់​ប្រជុំ​នៅ​សាកល​វិទ្យាល័យ​បញ្ញាជាតិ​​​ ​​​ដើម្បី​ប្រារព្ធ​​ទិវាសិទ្ធិនារី​អន្ត​រជាតិ ប៉ុន្តែ​​ត្រូវ​បាន​ជូន​ដំណឹង​​​ ក្នុង​លិខិត​​មួយ​កាលពី​ម្សិល​មិញ​ថា សាកល​វិទ្យាល័យ​នឹង​​មិន​អនុញ្ញាត​​ឲ្យ​រៀប​ចំ​កិច្ច​ប្រជុំ​នោះ​បាន​ទេ ពីព្រោះ​អង្គការ​សីលការ​​​ក៏មាន​គម្រោង​ហែក្បួន​និង​ដាក់​ញត្តិ​អំពី​សិទ្ធិស្ត្រី​ទៅ​ ការិ​យា​ល័យ​រដ្ឋាភិបាល​មួយ​ចំនួន​ទៀត​។

សាកល​វិទ្យាល័យ​បានលើក​ឡើង​នៅ​ក្នុង​លិខិត​​ផ្ញើជូន​លោកស្រី ធីដា ឃិះ នាយិកា​ប្រតិបត្តិ​អង្គការ​សីលការ​ថា “សាកល​វិទ្យា​ល័យ​បញ្ញាជាតិ​សូម​ជម្រាប​ជូន​ដំណឹង​ពី​ការ​ផ្អាក​ការ​ជួល​បន្ទប់​ប្រជុំ​…នៅ​ថ្ងៃទី​៧ ខែ​មីនា​​​”។

លិខិត​​នេះ​មាន​ខ្លឹម​សារ​ថា “សាកល​វិទ្យា​ល័យ​បញ្ញាជាតិមាន​កិត្តិយស​ជម្រាប​ជូន​លោក​ស្រី [ធីដា ឃិះ] អំពី​មូល​ហេតុ​ខាង​លើ​​​…​ពីព្រោះ​លោកស្រី​ [ធីដា​ ឃិះ] មាន​បំណង​​យក​​​​​សាកល​វិទ្យា​ល័យ​​បញ្ញា​ជាតិ ដែល​​ជា​សាកល​វិទ្យាល័យ​ឯករាជ្យ​មិន​ជាប់ពាក់ព័ន្ធ​នឹង​នយោ​​​បាយ​ ទៅ​បម្រើ​ផល​ប្រយោជន៍​នយោ​បាយ​​​”។

លិខិត​នោះ​លើកឡើ​ង​ទៀត​ថា សេចក្តីសម្រេច​នេះ​ធ្វើឡើង​​បន្ទាប់ពី​លោក​​ស្រី ធីដា ឃិះ បាន​ជួប​ប្រជុំ​ជាមួយ​មន្ត្រី​​សាលា​រាជ​ធានី​កាលពី​ថ្ងៃពុធ​សុំ​ការ​អនុ​ញ្ញាត​ហែក្បួន។ សាលារាជ​ធានី​បាន​បដិ​សេធសំណើ​នោះ ប៉ុន្តែ​បាន​បញ្ជូន​សំណើនោះ​ទៅ​ក្រសួង​មហា​​​ផ្ទៃ​ឲ្យធ្វើ​ការ​ពិចារ​ណា​បន្ថែម។

ស្ថាបនិក និង​ជាសាកល​វិទ្យាធិការ​សាកល​​វិទ្យាល័យ​បញ្ញាជាតិ គឺលោកឧត្តម​សេនីយ៍​ទោ រុន​ រ័ត្នវាសនា អតីត​​នាយ​ការិយាល័យ​នគរ​បាល​សេដ្ឋកិច្ច​ក្រសួង​មហាផ្ទៃ។ លោក​មិន​អា​ច​​ទាក់ទងដើម្បី​សុំ​ការ​អត្ថា​ធិប្បាយ​​បាន​ទេ។

លោកស្រី ធីដា ឃិះ បាន​បដិសេធ​ការ​ដែល​ថា កិច្ច​ប្រជុំ​ ឬ​គម្រោង​ហែក្បួន​នោះ​បម្រើ​​ឲ្យ​ផលប្រយោជន៍គណបក្ស​ណាមួយ​នោះ ហើយ​លោក​ស្រី​បានមាន​ប្រសា​សន៍​ថា អង្គការ​សីលការ​គឺ​ជា​អង្គការ​មិន​មែន​រដ្ឋាភិបាល​ឯក​រាជ្យ។

លោក​ស្រី​បាន​មាន​ប្រសាសន៍ថា “តើ​គេ​យល់​ថា នយោបាយ​មាន​ន័យ​យ៉ាង​ម៉េច​ទេ? យើ​ង​​មិន​ពាក់ព័ន្ធនយោបាយ​ដើម្បី​បម្រើ​ឲ្យ​គណបក្ស​នយោបាយ​ណាមួយ​ឡើយ ប៉ុន្តែ​គឺបម្រើ​ផល​ប្រយោជន៍ស្ត្រី ហើយ​​យើង​រួមគ្នាដើម្បី​ដោះ​ស្រាយ​បញ្ហា​របស់​ស្ត្រី”។

កាលពី​ម្សិលមិញ លោកស្រី ធីដា​ ឃិះ បាន​​មាន​ប្រសាសន៍ថា លោកស្រី​ជឿថា សាលា​រាជ​ធានី​បាន​ដាក់​សម្ពាធ​សាកល​វិទ្យាល័យ​នេះ​ឲ្យ​ផ្អាក​ការ​ប្រជុំ​របស់ខ្លួន។

លោកស្រី​បាន​មាន​ប្រសាសន៍ថា ការ​ដែលលោក​នាយក​រដ្ឋ​មន្ត្រី​ ហ៊ុន សែន​ បាន​ដក​បម្រាម​ហាម​មិន​ឲ្យ​មាន​ការ​ជួបជុំ​ជា​សាធា​រណៈ​ដែលក្រសួង​មហា​ផ្ទៃបាន​ដាក់​កាល​ពី​ដើម​ខែមករា​ចេញ​ច្បាស់​ក្រឡែត​នោះ​នៅ​តែមិន​ច្បាស់លាស់​ចំពោះ​​​មន្ត្រី​ថ្នាក់​ក្រោម​​ដដែល។

បើ​ទោះ​ជា ​លោក ហ៊ុន សែន បាន​លើក​ឡើង​នៅក្នុង​សុន្ទរកថា​កាលពី​សប្តាហ៍មុន​ថា រដ្ឋាភិបាល​នឹ​ង​មិន​រារាំង​ការ​ធ្វើ​បាតុកម្ម​ជា​សាធារណៈ​ក៏ដោយ តែ​ការ​អនុវត​្តវិញ​ ក្រុម​ទំាងអស់​ដែលមាន​បំណង​ធ្វើ​បាតុកម្ម​​តាំង​ពីពេល​នោះ​មក​ត្រូវ​បាន​រារាំង​ដោយ​កម្លាំង​សន្តិសុខ ឬ​ត្រូវ​សាលារាជធានី​ច្រាន​ចោល​សំណើ​របស់ពួកគេ​។

លោកស្រី​ ធីដា ឃិះ​ បាន​មាន​ប្រសាសន៍ ថា ឥឡូវ​នេះ​កិច្ច​ប្រជុំ​ដែល​គ្រោ​ង​ធ្វើ​នោះ នឹង​ធ្វើ​នៅ​ការិយាល័យ​​អង្គការ​កម្ម​វិធី​អភិ​វឌ្ឍន៍​ធនធាន​យុវជន​នៅ​ក្នុង​រាជធានី​ភ្នំពេញ​វិញ។គេ​មិន​អាច​ទាក់ទង​មន្ត្រី​សាលារាជ​ធានី​ដើម្បី​សុំការ​អត្ថាធិប្បាយ​បាន​ទេ៕សារុន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស