នាយកប្រតិបត្តិក្រុមហ៊ុនរ៉ូយ៉ាល់គ្រុប ដែលជាម្ចាស់របស់ Cellcard ជាក្រុមហ៊ុនប្រតិបត្តិករទូរស័ព្ទឈានមុខគេនៅក្នុងប្រទេសកម្ពុជា បានច្រានចោលយ៉ាងដាច់អហង្ការចំពោះសេចក្ដីរាយការណ៍របស់ប្រព័ន្ធផ្សព្វផ្សាយមួយមានមូលដ្ឋាននៅក្នុងទីក្រុងឡុងដ៍ កាលពីថ្ងៃសុក្រ ដែលបានអះអាងថា ក្រុមហ៊ុនទូរស័ព្ទនេះកំពុងស្វែងរកវិនិយោគិន ហើយចង់លក់អង់តែនទូរគមនាគមន៍របស់ខ្លួន ពីព្រោះក្រុមហ៊ុននេះគ្មានលទ្ធភាពបង្កើនដើមទុនថ្មី។
កាលពីថ្ងៃសុក្រ ទស្សនាវដ្ដី TMT Finance ជាទស្សនាវដ្ដីចុះផ្សាយពាក់ព័ន្ធនឹងទូរគមនាគមន៍និងហិរញ្ញវត្ថុ បានចុះផ្សាយអត្ថបទដ៏វែងមួយលើកឡើងពីប្រភពមិនបញ្ចេញឈ្មោះនានាដែលបានអះអាងថា ភាគីឯកជន “ មួយចំនួន” កំពុងសម្លឹងចង់បានភាគហ៊ុននៅក្នុងក្រុមហ៊ុន Cellcard។
អត្ថបទចុះផ្សាយនេះបានអះអាងថា “ប្រភពនានាបានលើកឡើងថា ម្ចាស់ក្រុមហ៊ុនរ៉ូយ៉ាល់គ្រុបរបស់កម្ពុជា បានព្យាយាមសាជាថ្មីម្ដងទៀតដើម្បីលក់ចេញភាគហ៊ុន ខ្លះរបស់ខ្លួនឲ្យទៅវិនិយោគិនមួយរូប។ ក្រុមហ៊ុនត្រូវការដើមទុន ដើម្បីវិនិយោគលើបណ្ដាញរបស់ខ្លួន ប៉ុន្តែម្ចាស់ឥណទាននា ពេលបច្ចុប្បន្ន រួមទាំងធនាគារចិន ( Bank of China ) ផងនៅពេលនេះអស់ប្រាក់ឲ្យខ្ចីហើយ។ ក្រុមហ៊ុន CamGSM បានរៀបចំកិច្ចព្រមព្រៀងឥណទានរបស់ខ្លួនឡើងវិញ ហើយពេលនេះកំពុងតែខំពុះពារបង់ការប្រាក់លើបំណុលរបស់ខ្លួន”។
CamGSM គឺជាក្រុមហ៊ុនអាណាព្យាបាលរបស់ក្រុមហ៊ុន Cellcard ដែលគ្រប់គ្រងដោយក្រុមហ៊ុនរួមដ៏ធំនៅក្នុងស្រុក គឺក្រុមហ៊ុនរ៉ូយ៉ាល់គ្រុប។ ប្រធានក្រុមហ៊ុនរ៉ូយ៉ាល់គ្រុប គឺលោក គិត ម៉េង ដែលជាមនុស្សជំនិតរបស់លោកនាយករដ្ឋមន្ត្រី ហ៊ុន សែន។
គណៈគ្រប់គ្រងរបស់ក្រុមហ៊ុនរ៉ូយ៉ាល់គ្រុបបានរិះគន់យ៉ាងខ្លាំងចំពោះអត្ថបទចុះផ្សាយនេះ។ លោក អៀន វ៉ាតសុន (Ian Watson) ប្រធានប្រតិបត្តិរបស់ក្រុមហ៊ុន Cellcard បានមានប្រសាសន៍ថា “យើងមិនកំពុងស្វះស្វែងលក់ផ្នែកណាមួយនៃក្រុមហ៊ុននេះទេ។ យើងមិនកំពុងចរចាលក់អ្វីឡើយ។ គ្មានអ្វីកើតឡើងទេនៅទីនេះ”។
លោក ម៉ាក ហាណា (Mark Hanna) នាយកគ្រប់គ្រងហិរញ្ញវត្ថុនៅក្រុមហ៊ុនរ៉ូយ៉ាល់គ្រុប បានចាត់ទុករបាយការណ៍នេះថា គ្មានការពិត។
សេចក្ដីរាយការណ៍ដើមរបស់ទស្សនាវដ្ដី TMT ដែលក្រោយមកត្រូវបានកែសម្រួលឡើងវិញកាលពីថ្ងៃសុក្រ បនា្ទប់ពីមានសំណើពីក្រុមហ៊ុនរ៉ូយ៉ាល់គ្រុប បានបន្តលើកឡើងទៀតថា ពីមុនធនាគារ ANZ ធ្លាប់ត្រូវបានជួលឲ្យជួយស្វែងរកអ្នកទិញ “ភាគហ៊ុនភាគច្រើននៅក្នុងអាជីវកម្មទាំងមូលរបស់ក្រុមហ៊ុន CamGSM” ហើយថា ក្រុមហ៊ុន CamGSM កំពុងតែព្យាយាម “កាត់បន្ថយ” ចំនួនបង្គោលអង់តែន ទូរគមនាគមន៍របស់ខ្លួនតាមរយៈការលក់វាចេញខ្លះ។
ទស្សនាវដ្ដី TMT បានអះអាងថា “ពេលនេះវាបានបញ្ចប់ហើយ ទោះបីជាក្រុមហ៊ុន Orange និងក្រុមហ៊ុន PT Telkom Indonesia កំពុងព្យាយាមស្វះស្វែងចង់បានមុខជំនួញនេះក្ដី។នៅទីបំផុតការចរចាបានជាប់គាំងអំឡុងដំណើរការពិនិត្យផ្ទៀងផ្ទាត់ដោយយោងលើការវាយតម្លៃ ”។
របាយការណ៍នេះបានឲ្យដឹងថា “ប្រភពនានាក៏បានលើកឡើងថា ខណៈពេលក្រុមហ៊ុន CamGSM ផ្ដោតលើការកាត់បន្ថយចំណាយលើអង់តែនរបស់ខ្លួនតាមរយៈការកាត់បន្ថយការពឹងផ្អែករបស់ខ្លួនលើប្រព័ន្ធដើរដោយថាមពលប្រេងម៉ាស៊ូត និងការផ្លាស់ប្ដូរទៅប្រើថាមពលហាយប្រ៊ីត ជាមួយនឹងប្រព័ន្ធតាមដាន Remote Monitoring Systems ក្រុមហ៊ុននេះក៏បានចរចាលក់អង់តែនរបស់ខ្លួន ដែលមានសរុបចំនួន៣.០០០ទីតាំងផងដែរ”។
របាយការណ៍នេះបានបន្តទៀតថា “ក្រុមហ៊ុនមូលប័ត្រឯកជនមួយបានបង្កើតមូលនិធិហេដ្ឋារចនាសម្ព័ន្ធមួយ ដើម្បីបញ្ចប់ការជួញដូរអង់តែនទាំងអស់របស់ក្រុមហ៊ុន CamGSM ដោយការចរចានៅតែបន្ត។ គេគិតថា មានអ្នកទិញមួយចំនួនចង់ទិញយកអង់តែនទាំងនោះ ដោយកាលពីមុនក្រុមហ៊ុន Tower Bersama ធ្លាប់បានពិនិត្យមើលទ្រព្យសកម្មនេះ។ ក្រុមហ៊ុន Tower Bersama បានធ្វើការពិនិត្យផ្ទៀងផ្ទាត់ ប៉ុន្តែបានសម្រេចចិត្តមិនទិញទេ”។
លោក ម៉ាក ហាណា នាយកហិរញ្ញវត្ថុរបស់ក្រុមហ៊ុនរ៉ូយ៉ាល់គ្រុបបានមានប្រសាសន៍ ថា អត្ថបទនេះស្មើនឹងបង្កបញ្ហា។ លោកបានបន្តទៀតថា “ពួកគេគ្រាន់តែប្រឌិតរឿងប៉ុណ្ណោះ។ វាមិនពិតទាល់តែសោះ”។
លោក ម៉ាក ហាណា បានមានប្រសាសន៍ថា តាមពិតក្រុមហ៊ុន Cellcard កំពុងតែដំឡើងអង់តែនបន្ថែមទៀត ហើយមិនកំពុងកាត់បន្ថយការពឹងផ្អែករបស់ខ្លួនលើប្រព័ន្ធដើរដោយថាមពលប្រេងម៉ាស៊ូតឡើយ។ លោកមានប្រសាសន៍ថា ក្រុមហ៊ុន Cellcard មានប្រព័ន្ធថាមពលពន្លឺព្រះអាទិត្យដើម្បីផលិតអគ្គិសនីសម្រាប់អង់តែននៅតាមខេត្តឆ្ងាយៗ។
លោកមានប្រសាសន៍ថា “នេះ [ព័ត៌មាន] អំពីការចំណាយលើអង់តែនរបស់យើង គឺមិនពិតទាល់តែសោះ។ យើងកំពុងតែដំឡើងអង់តែនចំនួន៣០០បន្ថែមទៀតនៅឆ្នាំនេះ ហើយទីតាំងបច្ចុប្បន្នរបស់យើងដែលគ្មានបណ្ដាញអគ្គិសនីចូលទៅដល់សុទ្ធតែដំណើរការដោយប្រើថាមពលពន្លឺព្រះអាទិត្យ និងម៉ាសីុនភ្លើង”។
ប៉ុន្តែលោកពិតជាបានទទួលស្គាល់ថា ក្រុមហ៊ុន CamGSM បានជំពាក់បំណុលធនាគារពិតប្រាកដមែន លោកមានប្រសាសន៍ថា “មានបំណុលមួយចំនួនជំពាក់ធនាគារចិន។ ប៉ុន្តែវាមិនច្រើនទេ”។
ឆ្លើយតបនឹងការអះអាងរបស់ទស្សនាវដ្ដី TMT ដែលលើកឡើងថា ម្ចាស់ឥណទានរបស់ក្រុមហ៊ុន CamGSM អស់ទុននោះ គឺមិនពិតទាល់តែសោះ។
ពាក់ព័ន្ធនឹងការពិភាក្សាជាមួយក្រុមហ៊ុន Tower Bersama ដែលចង់ទិញយកអង់តែនរបស់ក្រុមហ៊ុន CamGSM លោក ម៉ាក ហាណា បានមានប្រសាសន៍ថា ការពិភាក្សាបានធ្វើឡើងកាលពីឆ្នាំ២០១១ ប៉ុន្តែថា ការចរចាបានបញ្ឈប់ទៅវិញ។ លោកថ្លែងថា “យើងមិនដែលឈានដល់ដំណាក់កាលចុះកិច្ចព្រមព្រៀងទេ”។ Cellcard គឺជាក្រុមហ៊ុនប្រតិបត្តិករទូរស័ព្ទធំបំផុតនៅក្នុងប្រទេសកម្ពុជា បើនិយាយពីប្រាក់ចំណូល ប៉ុន្តែបើនិយាយពីចំនួនអ្នកចុះឈ្មោះប្រើប្រាស់សេវាទូរស័ព្ទរបស់វា វាជាក្រុមហ៊ុនធំបំផុតទី៣៕ សុខុម