គណបក្សសង្គ្រោះជាតិបានជួបជាមួយអង្គការសង្គមស៊ីវិល និងអង្គការមិនមែនរដ្ឋាភិបាលកាលពីថ្ងៃសុក្រ ហើយបានស្នើសុំយោបល់នៅមុនការបន្តចរចាអំពីកំណែទម្រង់ការបោះឆ្នោតជាមួយគណបក្សប្រជាជននៅថ្ងៃនេះ។
លោក សម រង្ស៊ី ប្រធានគណបក្សសង្គ្រោះជាតិ បានមានប្រសាសន៍បន្ទាប់ពីកិច្ចប្រជុំថា “ យើងចង់សុំយោបល់ខ្លះៗពីអង្គការសង្គមស៊ីវិល”។ យើងចង់ឲ្យដំណើរការចរចាបើកចំហ និងមានតម្លាភាព ហើយឃ្លាំមើលដោយអ្នកកាសែត និងអង្គការសង្គមស៊ីវិល ដែលពួកគេអាចផ្ដល់យោបល់បានដែរ”។
គណបក្សសង្គ្រោះជាតិ បានចោទប្រកាន់ថា មានការលួចបន្លំសន្លឹកឆ្នោតនៅក្នុងការបោះឆ្នោតកាលពីខែកក្កដា។
មនុស្សប្រហែល៥០នាក់មកពីអង្គការនានា រួមមានអង្គការអាដហុក អង្គការតម្លាភាពអន្តរជាតិ និងគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា (ខុមហ្វ្រែល) បានចូលរួមក្នុងកិច្ចប្រជុំនោះដែរ។
លោក គល់ បញ្ញា នាយកប្រតិបត្តិគណៈកម្មាធិការខុមហ្វ្រែល បានសង្កត់ធ្ងន់អំពីសារៈសំខាន់នៃអត្តសញ្ញាណប័ណ្ណទាក់ទងនឹងកំណែទម្រង់ការបោះឆ្នោត។
លោក គល់ បញ្ញា បានមានប្រសាសន៍ថា “ យើងចង់ឲ្យប្រជាពលរដ្ឋទាំងអស់មានសិទ្ធិបោះឆ្នោត ព្រមទាំងធានាថា ការបោះឆ្នោតប្រព្រឹត្តទៅដោយត្រឹមត្រូវ”។
លោកបានបន្ថែមថា បញ្ហាមួយដែលត្រូវធ្វើនោះគឺប្រព័ន្ធចុះឈ្មោះបោះឆ្នោត ពីព្រោះប្រជាពលរដ្ឋខ្មែរជាច្រើនលំបាកក្នុងការចុះឈ្មោះបោះឆ្នោត។
លោកបានមានប្រសាសន៍ថា លើសពីនេះទៅទៀត មួយផ្នែកនៃថវិកាជាតិដែលលៃទុកសម្រាប់យុទ្ធនាការឃោសនាបោះឆ្នោតនោះ គួរបែងចែកស្មើគ្នារវាងគណបក្ស។
លោក នី ចរិយា មកពីអង្គការសិទ្ធិមនុស្សអាដហុក និងលោក ព្រាប កុល នាយកប្រតិបត្តិអង្គការតម្លាភាពកម្ពុជា ក៏បានលើកឡើងពីបញ្ហាប័ណ្ណបោះឆ្នោតផងដែរ។
លោក ចរិយា បានបន្ថែមថា “ គួរមានវិធីសាស្ត្រត្រួតពិនិត្យទិន្នន័យតាមប្រព័ន្ធអេឡិចត្រូនិក ប្រសិនបើប្រជាពលរដ្ឋបាត់ប័ណ្ណបោះឆ្នោតរបស់ខ្លួន”៕ សារុន