យោងតាមសេចក្តីរាយការណ៍មួយដែលត្រូវបានបង្ហោះនៅលើគេហទំព័ររបស់គណបក្សប្រជាជនកម្ពុជាកំពុងកាន់អំណាចបានឲ្យដឹងថា មន្ត្រីយោធាចំនួន១១០នាក់ដែលបានបញ្ចប់វគ្គបណ្តុះបណ្តាលពីរាជបណ្ឌិត្យសភាយោធានៅខេត្តកំពង់ស្ពឺ កាលពីសប្តាហ៍មុនទទួលបានឈ្មោះជានាយទាហាន “តេជោអភិវឌ្ឍន៍” ។
គេហទំព័ររបស់គណបក្សប្រជាជនកម្ពុជាបានចុះផ្សាយថា មន្ត្រីយោធាដែលបានបញ្ចប់វគ្គបណ្តុះបណ្តាលពីសាលានាយទាហានសកម្ម (Ecole des Officer d’ Active) កាលពីថ្ងៃពុធ គឺជាមន្ត្រីយោធាជំនាន់ទី១៤ ដែលបានបញ្ចប់វគ្គបណ្តុះបណ្តាលពីរាជបណ្ឌិត្យសភាយោធាហើយត្រូវបានផ្តល់ឈ្មោះជានាយទាហានតេជោអភិវឌ្ឍន៍នេះនៅក្នុងពិធីមួយដែលត្រូវបានធ្វើឡើងក្រោមអធិបតីភាពរបស់ឧត្តមសេនីយ៍ ប៉ុល សារឿន អគ្គមេបញ្ជាការកងយោធពលខេមរភូមិន្ទ។
សេចក្តីរាយការណ៍នៅលើគេហទំព័ររបស់គណបក្សប្រជាជនកម្ពុជា ដែលមានចំណងជើងថា ‘ នាយទាហានតេជោអភិ វឌ្ឍន៍បញ្ចប់វគ្គបណ្តុះបណ្តាល’ មានខ្លឹមសារដូច្នេះថា “ឧត្តមសេនីយ៍ ប៉ុល សារឿន បានក្រើនរំឭកថា ‘នាយទាហានសកម្មជំនាន់តេជោអភិវឌ្ឍន៍ត្រូវតែមានភាពស្មោះត្រង់បំផុតចំពោះជាតិ គោរពនិងស្រលាញ់ពលរដ្ឋ ហ៊ានពលីជីវិតដើម្បីការពារឯករាជភាពស្ថិរភាពនិងបូរណភាពទឹកដីនៃ [ប្រទេសកម្ពុជា] និងការពាររាល់សមិទ្ធផលសង្គមជាតិទាំងអស់’ ”។ “ពាក្យថាតេជោ” គឺជាគោរមងារដ៏ខ្ពង់ខ្ពស់ដែលមានន័យថា “អំណាច” ហើយត្រូវបានគេប្រើប្រាស់ដើម្បីសំដៅលើលោកនាយករដ្ឋមន្ត្រី ហ៊ុន សែន ដែលមន្ត្រីនិងអ្នកគាំទ្ររបស់លោកតែងតែហៅលោកថា “សម្តេចតេជោ” នោះ។
ស្ត្រីចំនួន១០រូប ក៏បានបញ្ចប់ការសិក្សាក្នុងចំណោមនាយទាហាន “តេជោអភិវឌ្ឍន៍” ទាំង១១០នាក់ ដែលសុទ្ធតែបានបញ្ចប់ថ្នាក់បរិញ្ញាបត្រដែលមានរយៈពេលបួនឆ្នាំនៅសាលានាយទាហានសកម្មផងដែរ។
ឧត្តមសេនីយ៍ឯកកងយោធពលខេមរភូមិន្ទ ផុន សុវ៉ាត ដែលត្រូវបានគេលើកឡើងពីឈ្មោះរបស់លោកនៅក្នុងអត្ថបទបង្ហោះលើគេហទំព័ររបស់គណបក្សប្រជាជនកម្ពុជាថា បានចូលរួមនៅក្នុងពិធីនេះដែរនោះ បានបដិសេធមិនធ្វើអត្ថាធិប្បាយអំពីសារៈសំខាន់នៃគោរមងារ “តេជោ” នេះឡើយ។
ចំណែកឯឧត្តមសេនីយ៍ត្រីកងយោធពលខេមរភូមិន្ទ នេត ណាត ដែលជាអនុប្រធាននៃរាជបណ្ឌិត្យសភាយោធានៅខេត្តកំពង់ស្ពឺបានលើកឡើងថា ការផ្តល់ឈ្មោះជា “តេជោអភិវឌ្ឍន៍” នេះគឺជារឿងសាមញ្ញ។
ឧត្តមសេនីយ៍ត្រី នេត ណាត បានពន្យល់អំពីឈ្មោះ “ តេជោអភិវឌ្ឍន៍” នេះថា “វាគឺជាឈ្មោះរបស់ [នាយទាហានជំនាន់នេះ]។ ជំនាន់នីមួយៗត្រូវបានផ្តល់ឈ្មោះខុសៗគ្នា”។ នៅពេលត្រូវបានសួរ ថាតើឈ្មោះ “តេជោអភិវឌ្ឍន៍” ដែលត្រូវផ្តល់ទៅឲ្យយោធាទើបបញ្ចប់វគ្គបណ្តុះបណ្តាលតំណាងទស្សនថ្មីដែលត្រូវបានបញ្ជ្រាបដល់ពួកគេ ឬយ៉ាងណា ឧត្តមសេនីយ៍ឯក ផុន សុវ៉ាត បានលើកឡើងថា លោកមិនច្បាស់នោះទេ។
ឧត្តមសនីយ៍ ប៉ុល សារឿន ក៏បានលើក ឡើងថា លោកមិនអាចធ្វើអត្ថាធិប្បាយលើឈ្មោះនេះដែរ ។ ឧត្តមសេនីយ៍ ប៉ុល សារឿន មានប្រសាសន៍ដោយបដិសេធមិនធ្វើអត្ថាធិប្បាយបន្ថែមថា “អ្វីដែលអស់លោកឃើញនៅលើគេហទំព័រ អស់លោកអាចផ្សព្វផ្សាយវាបាន”។
កាលពីខែមករា នាយឧត្តមសេនីយ៍ ទៀ បាញ់ រដ្ឋមន្ត្រីក្រសួងការពារជាតិបានប្រើកិច្ចប្រជុំប្រចាំឆ្នាំរបស់កងរាជអាវុធហត្ថលើផ្ទៃប្រទេស ក្នុងរាជធានីភ្នំពេញដើម្បីលើកឡើងម្តងទៀតថា កងកម្លាំងប្រដាប់អាវុធគួរតែរក្សាការតាំងចិត្តរបស់ខ្លួនដើម្បីការពារលោក ហ៊ុន សែន នៅក្នុងជម្លោះកំពុងតែបន្តរវាងរដ្ឋាភិបាលរបស់លោកនិងគណបក្សសង្គ្រោះជាតិ៕ ស៊ុយឈាង