កាលពីម្សិលមិញ សាលាដំបូងខេត្តមណ្ឌលគិរី បានចោទប្រាកាន់ជនជាតិវៀតណាម១៥នាក់ពីបទឆ្លងដែនខុសច្បាប់ចូលមកកាប់ឈើក្នុងព្រៃការពារ រយៈពេលបួនថ្ងៃបន្ទាប់ពីក្រុមនេះត្រូវបានជនជាតិភាគតិចព្នងឃាត់ខ្លួនក្នុងព្រៃសហគមន៍នៅចម្ងាយ២០គីឡូម៉ែត្រពីព្រំដែន។
លោក យ៉ា ណារិន ប្រធានតុលាការបានមានប្រសាសន៍ថា ករណីអ្នកកាប់ឈើខុសច្បាប់ទាំង១៥នាក់នេះកំពុងត្រូវបានស៊ើបអង្កេត ហើយ លោក ឃុត សុភាង ព្រះរាជអាជ្ញាអមសាលាដំបូងខេត្តមានប្រសាសន៍ថា ជនសង្ស័យទាំងនេះ “ត្រូវបានចោទប្រកាន់រួចហើយ” ហើយលោកបានបដិសេធ មិនធ្វើអត្ថាធិប្បាយបន្ថែមទេ។
យោងតាមលោក សុខ រដ្ឋា អ្នកសម្របសម្រួលអង្គការសិទ្ធិមនុស្សអាដហុកប្រចាំខេត្តនេះបានឲ្យដឹងថា គិតមកដល់ល្ងាចម្សិលមិញ ជនសង្ស័យប្រាំនាក់ក្នុងចំណោមជនសង្ស័យទាំងនោះត្រូវបានឃុំខ្លួនបណ្តោះអាសន្ននៅក្នុងពន្ធនាគារខេត្ត ចំណែកជនសង្ស័យ១០នាក់ទៀតកំពុងបន្តធ្វើការសាកសួរនៅតុលាការក្នុងក្រុងសែមនោរម្យ។
លោក សុខ រដ្ឋា បានថ្លែងថា “ជនសង្ស័យ ប្រាំនាក់ក្នុងចំណោមជនសង្ស័យ១៥នាក់កំពុងត្រូវឃុំខ្លួនបណ្ដោះអាសន្ននៅពន្ធនាគារខេត្តនៅថ្ងៃនេះ”។កាលពីថ្ងៃសៅរ៍ អ្នកភូមិជនជាតិភាគតិចព្នងប្រហែល៦០នាក់ក្នុងស្រុកពេជ្រាដា បានព័ទ្ធចាប់អ្នកកាប់ឈើខុសច្បាប់ បន្ទាប់ពីសហគមន៍ជនជាតិដើមភាគតិចបានឃ្លាំមើល និងព្យាយាមរារាំងសកម្មភាពរបស់ពួកគេអស់រយៈពេលប្រហែល២ឆ្នាំ។ បន្ទាប់ពីការឆ្មក់ចាប់នេះ អ្នកភូមិរឹបអូសបានឈើគគីរចំនួន៨ម៉ែត្រគូប រថយន្តបួនគ្រឿង រណារយន្តប្រាំពីរគ្រឿង កំាភ្លើងវែងមួយដើម និងម៉ូតូប្រាំបួនគ្រឿង៕ សារុន