ក្រុមមន្ត្រីគណបក្សប្រជាជនកម្ពុជាបាននិយាយកាលពីម្សិលមិញថា វេទិកាសាធារណៈដែលលោក ហ៊ុន សែន បានប្រកាសកាលពីដើមខែនេះ កំពុងតែដំណើេរការនៅទូទាំងប្រទេស ហើយលោកបានមានប្រសាសន៍ថា វេទិកានេះនឹងជួយប្រមូលព័ត៌មានសម្រាប់ផែនការដែលលោកបានសន្យាធ្វើដើម្បីកែទម្រង់នយោបាយឲ្យបានច្រើន។
ផែនការសម្រាប់ការកែទម្រង់នេះត្រូវបានប្រកាសដោយលោក ហ៊ុន សែន អំឡុងកិច្ចប្រជុំបិទទ្វារជាមួយក្រុមមន្ត្រីជាន់ខ្ពស់មកពីក្រសួងនីមួយៗកាលពីថ្ងៃទី២៩ខែមករាដែលនៅក្នុងនោះលោកនាយករដ្ឋមន្ត្រីបានថ្លែងសុន្ទរកថាជាហូរហែរយៈពេលប្រាំមួយម៉ោង មួយថ្ងៃបន្ទាប់ពីរដ្ឋសភាត្រូវបានកោះប្រជុំកាលពីខែកញ្ញា។
លោក ហ៊ុន សែន បានថ្លែងប្រាប់ក្រុមមន្ត្រីឲ្យដុសលាងខ្លួន និងព្យាបាលជំងឺរបស់យើងបន្ទាប់ពីគណបក្សនេះបាត់បង់សំឡេងគាំទ្រយ៉ាងច្រើននៅក្នុងការបោះឆ្នោតកាលពីខែកក្កដា។
លោក ជាម យៀប សមាជិកសភាជាន់ខ្ពស់គណបក្សប្រជាជនកម្ពុជាដែលតំណាងឲ្យគណបក្សកាន់អំណាចនៅក្នុងការចរចា មិនបានសម្រេចជាមួយគណបក្សសង្គ្រោះជាតិអំពីការែកទម្រង់ការបោះឆ្នោតបានមាន ប្រសាសន៍ថា គណបក្សកាន់អំណាចចាប់ផ្តើមបញ្ជូនរដ្ឋមន្ត្រីឲ្យចុះទៅតាមខេត្តនីមួយៗកាលពីដើមខែកុម្ភៈ។
លោកបានមានប្រសាសន៍ថា “នេះគឺជាការកែទម្រង់មួយក្នុងចំណោមការកែទម្រង់សីុជម្រៅរបស់រដ្ឋាភិបាល។ យើងនឹងយកយោបល់របស់ប្រជាជនមកពិចារណា”។
លោក ជាម យៀប បានមានប្រសាសន៍ថា លោក ស ខេង រដ្ឋមន្ត្រីក្រសួងមហាផ្ទៃបានរៀបចំវេទិកាមួយនៅក្នុងខេត្តបាត់ដំបង លោកឧបនាយករដ្ឋមន្ត្រី សុខ អាន បានរៀបចំវេទិកាមួយក្នុងខេត្តតាកែវ លោក ទៀ បាញ់ រដ្ឋមន្ត្រីក្រសួងការពារជាតិបានរៀបចំវេទិកា មួយក្នុងខេត្តសៀមរាប និងលោកឧបនាយករដ្ឋមន្ត្រី ប៊ិន ឈិន បានរៀបចំវេទិកាមួយនៅក្នុងខេត្តកណ្តាល។
លោក សក់ សេដ្ឋា រដ្ឋលេខាធិការក្រសួងមហាផ្ទៃទទួលបន្ទុកវិមជ្ឈការបានពន្យល់ប្រាប់ថា រដ្ឋមន្ត្រីទាំងនេះបានរៀបចំវេទិកាជាមួយមន្ត្រីខេត្ត ស្រុក និងឃុំ។ លោកបានមានប្រសាសន៍ថា “ខ្ញុំគិតថា ការបង្កើតវេទិកាទាំងនេះគឺប្រសើរជាងមិនបង្កើត។ មន្ត្រីរបស់យើងនឹងយល់ពីស្ថានភាពរបស់ប្រជាជន”។
លោក ជាម យៀប បានមានប្រាសាសន៍ថា មានប្រធានបទសំខាន់ៗដូចគ្នាមួយចំនួននៅក្នុងវេទិកាទាំងនោះ។ “ ពួកគេបានប្រាប់យើងពីបញ្ហាក្នុងការផ្តល់សេវាសាធារណៈ អំពើពុករលួយ និងការបាត់បង់ព្រៃឈើ”។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានចាត់ទុកវេទិកានេះជាការល្អ ប៉ុន្តែ លោកបានក្រើនរំឭករដ្ឋាភិបាលកំុឲ្យធ្វើមិនដឹងមិនឮចំពោះដំបូន្មាន ដែលខ្លួនទទួលបាន។ លោកបានមានប្រសាសន៍ថា “ កុំគ្រាន់តែធ្វើឲ្យល្អមើល ដើម្បីទាក់ទាញចំណាប់អារម្មណ៍ពីអន្តរជាតិ ខណៈដែលប្រទេសស្ថិតនៅក្នុងស្ថានភាពមិនល្អ”៕គឹមហឿន