30 C
Phnom Penh

រដ្ឋាភិបាល​​ពិចារណា​លើ​សំណើ​របស់​អូស្ត្រាលី​ដែល​ស្នើ​ឲ្យ​ជួយ​ទទួល​យក​អ្នក​ស្វែង​រកសិទ្ធិ​​ជ្រក​កោន​

ដោយ ឌឹ ខេមបូឌា ដេលី

បទវិភាគ

មន្ត្រី​រដ្ឋាភិបាល​កំពុង​ពិចារណា​អំពី​សំណើ​ដ៏​ចម្រូង​ចម្រាស​​មួយ​ដែល​ស្នើ​ឲ្យ​ប្រទេស​កម្ពុជា​​ជា​ប្រទេស​ដែល​មាន​ប្រវត្តិ​មិន​ល្អ​ទាក់​ទិន​នឹង​ការ​ដោះ​ស្រាយ​ជាមួយ​ជន​ភៀស​ខ្លួន​ជួយ​ទទួល​យក​អ្នក​ស្វែង​រក​សិទ្ធិ​ជ្រក​កោន​មួយ​​ចំនួន​​ពី​ប្រទេស​អូស្ត្រាលី​។​

លោក​ស្រី​ ជូលី​ ប៊ីសប់ (Julie Bishop) រដ្ឋ​មន្ត្រី​​ក្រសួង​ការ​បរទេស​អូស្ត្រាលី​​ បានដាក់​សំណើ​នេះជូន​​លោក​នាយក​រដ្ឋមន្ត្រី​ ហ៊ុន សែន​ អំឡុង​ការ​បំពេញ​ទស្សន​កិច្ច​របស់​លោក​ស្រី​នៅ​ក្នុង​ប្រទេស​កម្ពុជា​ កាល​ពីខែ​មុន​ ហើយ​រដ្ឋា​ភិបាល​​បាន​លើ​ក​ឡើង​ថា ខ្លួន​នឹង​ពិចារ​ណា​​​​អំពី​សំណើនេះ​ឲ្យ​បាន​ហ្មត់​ចត់​ជា​មុន​សិន​។

កាល​ពី​ម្សិល​មិញ​ ឧត្តម​សេនីយ៍​ ខៀវ​ សុភ័គ អ្នក​នាំ​ពាក្យ​ក្រសួង​មហា​​ផ្ទៃ​បាន​ឲ្យ​ដឹង​ថា រដ្ឋាភិបាល​បាន​បង្កើត​គណៈ​កម្ម​ការ​​មួយ​​ ដើម្បីសិក្សា​អំពី​សំណើ​នេះ​បន្ថែម​  ហើយ​លោក​បាន​លើក​ឡើង​ថា សមាជិក​នៃ​គណៈ​កម្មការ​នេះ​បាន​ជួបពិភាក្សា​គ្នា​យ៉ាង​ហោច​ណាស់​ម្តងរួច​មក​ហើយ​។

លោក​ សុភ័គ​ បាន​មាន​ប្រសាសន៍​ថា “រដ្ឋា​​ភិបាល​បាន​បង្កើត​គណៈកម្មការ​មួយ​រួច​ហើយ​ ហើយ​ត្រូវ​បាន​ដឹក​នាំ​ដោយ​លោក ឡុង​ វីសា​​លោ​ [រដ្ឋលេ​ខាធិការ​ក្រសួង​ការ​បរទេស​] ដើម្បី​សិក្សា​អំពី​បញ្ហា​នេះ​”។ ប៉ុន្តែ​ឧត្តម​សេនីយ៍​ សុភ័គ​ បាន​ឲ្យ​ដឹង​ថា លោក​មិន​ដឹង​ថា តើ​គណៈកម្មការ​ថ្មី​នេះ​បាន​វិវឌ្ឍដល់​ណា​ហើយ​នោះ​ឡើយ​។ លោក​ ឡុង​ វី​សាលោ​​ បាន​បដិ​សេធ​មិន​ធ្វើ​អត្ថាធិប្បាយ​ឡើយ​។

លោក អៀង សុ​ផាល្លែត​ ជំនួយ​ការ​ផ្ទាល់​របស់​លោក​នាយក​​រដ្ឋ​មន្ត្រី​ ហ៊ុន​ សែន​ បាន​ឲ្យ​​​ដឹងបន្ទាប់​ពី​បាន​ជួប​ពិភាក្សា​ជាមួយ​លោក​ស្រី​ ជូលី​ ប៊ី​សប់​​ រួច​ថា ប្រទេស​អូស្ត្រាលី​បាន​ស្នើ​ឲ្យ​ប្រទេស​កម្ពុជា​ជួយ​ទទួល​យក​អ្នក​ស្វែង​រក​សិទ្ធិ​ជ្រក​កោន​ស្រប​ច្បាប់​មួយ​ចំនួន​តូច​ដែល​គេ​មិន​បញ្ជាក់​ពី​ចំនួន​ច្បាស់​លាស់​។

រដ្ឋាភិបាល​អូស្ត្រាលី​សឹង​តែ​មិន​​បង្ហើប​ឲ្យ​ដឹង​ដោយ​បដិសេធ​មិន​បញ្ជាក់​ ឬ​ក៏​បដិសេធ​ថា លោក​ស្រី​ ជូលី​ ប៊ី​សប់​​ មិនបាន​ធ្វើ​សំណើ​ដូច្នេះ​នោះ​ឡើយ​​។​

អ្នក​នាំ​ពាក្យ​របស់​ស្ថាន​ទូត​អូស្ត្រាលី​ប្រចាំ​រាជ​ធានីភ្នំពេញ​មិន​បាន​ឆ្លើយ​តប​នឹង​សំណើ​សុំ​ការ​ធ្វើ​អត្ថាធិប្បាយ​ឡើយ​។ ព័ត៌មាន​ទាក់​ទិននឹង​​សំណើនេះ​ទទួល​បាន​ការ​រិះគន់​មួយ​ចំនួន​។

អង្គការ​សិទិ្ធ​មនុស្ស​បាន​លើក​ឡើង​ថា ប្រទេស​កម្ពុជា​មិន​បាន​ត្រៀម​ខ្លួន​ ដើម្បី​ដោះ​ស្រាយ​បញ្ហា​ទាក់​ទិន​អ្នក​ស្វែង​រក​សិទ្ធិ​ជ្រក​កោន​នេះ​ឡើយ​​ ព្រោះ​រដ្ឋាភិបាល​ធ្លាប់​​បាន​រំលោភ​សិទ្ធិ​ជន​ភៀស​ខ្លួន​ដែល​បាន​ធ្វើ​ដំណើរ​​​ពី​ប្រទេស​ចិន​និង​ប្រទេស​វៀត​ណាម​ក្នុង​រយៈពេល​ប៉ុន្មាន​ឆ្នាំ​ថ្មីៗ​នេះ​។

រដ្ឋាភិបាល​អូស្ត្រាលី​ក៏​ទទួល​រងការ​រិះគន់​ទាក់​ទិន​នឹង​សំណើនេះផងដែរ​ ​ពី​សំណាក់​សមាជិក​សភា​មក​ពី​គណ​បក្ស​ប្រឆាំង​នៅ​ក្នុង​ប្រទេស​របស់​ខ្លួន​ដែល​បាន​ចោទ​ប្រកាន់​ថា រដ្ឋាភ​ិបាល​បាន​ធ្វើ​ការ​ស្នើ​នេះដោយ​មិន​បាន​​សិក្សា​​​ពី​ស្ថាន​ភាពសិទ្ធិ​​មនុស្ស​ និង​ការ​លួច​​​​បន្លំ​សន្លឹក​ឆ្នោត​​នៅ​ក្នុង​ប្រទេស​កម្ពុជា​៕ ស៊ុយឈាង​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស