យោងតាមសេចក្ដីថ្លែងការណ៍រួមមួយបានឲ្យដឹងថា កម្ពុជា និងសហភាពអឺរ៉ុបបានបញ្ចប់កិច្ចប្រជុំគណៈកម្មាធិការចម្រុះលើកទី៨ របស់ខ្លួននៅក្នុងទីក្រុងព្រុចសែល កាលពីម្សិលមិញ បន្ទាប់ពីការពិភាក្សា “ស្មោះត្រង់ និងស៊ីជម្រៅ” លើប្រធានបទគ្រប់យ៉ាងចាប់ពីពាណិជ្ជកម្ម និងជំនួយរហូតដល់ស្ថានភាពវិវឌ្ឍនយោបាយថ្មីៗនេះនៅកម្ពុជា។
សេចក្ដីថ្លែងការណ៍ខ្លីនេះលើកឡើងពីទំនាក់ទំនងរឹងមាំរវាងភាគីទាំងពីរ ប៉ុន្តែមិនបានបញ្ជាក់លម្អិតថា ភាគីទាំងពីរបានពិភាក្សាគ្នារឿងអ្វីខ្លះនោះទេ។ កិច្ចប្រជុំនេះកើតមានឡើងស្របពេលដែលរដ្ឋាភិបាលរបស់លោកនាយករដ្ឋមន្ត្រី ហ៊ុន សែន កំពុងរងការរិះគន់យ៉ាងខ្លាំងពីអន្តរជាតិចំពោះដំណើរការនៃការបោះឆ្នោតជាតិកាលពីឆ្នាំមុន ការប្រើប្រាស់កម្លាំងហួសហេតុដើម្បីបង្ក្រាបកូដកម្មរបស់កម្មករកាត់ដេរ ដែលទាមទារដំឡើងប្រាក់ខែគោលកាលពីខែមករា និងការដាក់បម្រាមដែលមិនស្របតាមរដ្ឋធម្មនុញ្ញលើបាតុកម្ម។
ដោយគណបក្សប្រឆាំងនៅតែបដិសេធមិនព្រមទទួលយកអាសនៈសភារបស់ខ្លួនដើម្បីជាការតវ៉ា និងការចរចារបស់ខ្លួនជាមួយគណបក្សប្រជាជនកម្ពុជាកំពុងកាន់អំណាចដើម្បីដោះស្រាយស្ថានភាពជាប់គាំងជិតនឹងទទួលបរាជ័យនោះ ប្រទេសកម្ពុជាកំពុងតែប្រឈមនឹងវិបត្តិនយោបាយធ្ងន់ធ្ងរបំផុតក្នុងរយៈពេលប៉ុន្មានទសវត្សរ៍មកនេះ។
យោងតាមសេចក្ដីថ្លែងការណ៍របស់សហភាពអឺរ៉ុបបានឲ្យដឹងថា ភាគីកម្ពុជានិងភាគីសហភាពអឺរ៉ុប “បានផ្លាស់ប្ដូរទស្សនគ្នាលើរបៀបវារៈកំណែទម្រង់របស់កម្ពុជា និងបញ្ហាអាទិភាពនានានៅក្នុងបរិបទក្រោយការបោះឆ្នោត ការសង្កត់ធ្ងន់លើកំណែទម្រង់នៅក្នុងដំណើរការបោះឆ្នោត អភិបាលកិច្ច និងការគោរពសិទ្ធិមនុស្សដែលជាកម្លាំងចលករដ៏សំខាន់សម្រាប់ការអភិវឌ្ឍស្របតាមលទ្ធិប្រជាធិបតេយ្យរបស់កម្ពុជា។ ការគ្រប់គ្រងក៏ត្រូវបានលើកឡើងក្នុងរបៀបវារៈនេះដែរ”។
នៅក្នុងរាជធានីភ្នំពេញ សហភាពអឺរ៉ុបនាពេលបច្ចុប្បន្នកំពុងតែព្យាយាមបញ្ចុះបញ្ចូលរដ្ឋាភិបាលកម្ពុជាឲ្យជួយប្រជាពលរដ្ឋរាប់ពាន់គ្រួសារ ដែលផ្ទះសំបែងនិងដីស្រែចម្ការរបស់ពួកគាត់ត្រូវបានរឹបអូសពីសំណាក់ក្រុមហ៊ុនចម្ការអំពៅនានាដែលនាំចេញស្ករសទៅកាន់អឺរ៉ុប ដោយមិនជាប់កាតព្វកិច្ចពន្ធ។ គ្រួសារដែលរងផលប៉ះពាល់ និងបណ្ដាអង្គការសិទ្ធិមនុស្សក្នុងស្រុកចង់ឲ្យអឺរ៉ុបផ្អាកអត្ថប្រយោជន៍ពាណិជ្ជកម្មទាំងនោះ ដែលស្ថិតក្រោមគម្រោងពាណិជ្ជកម្មទំនិញគ្រប់យ៉ាង លើកលែងតែអាវុធ (EBA) របស់សហភាពអឺរ៉ុប។
យោងតាមសេចក្ដីថ្លែងការណ៍ចេញពីទីក្រុងព្រុចសែល បានឲ្យដឹងថា ភាគីទាំងពីរបានពិភាក្សាគ្នាអំពីគម្រោង EBA ហើយ“ បានព្រមព្រៀងបន្តធ្វើការជាមួយគ្នាឆ្ពោះទៅរកការកែលម្អបរិយាកាសពាណិជ្ជកម្ម និងវិនិយោគទុនរបស់កម្ពុជា”។
សេចក្ដីថ្លែងការណ៍ដដែលនេះបានបញ្ជាក់ថា សហភាពអឺរ៉ុបបានក្លាយជាគោលដៅដ៏សំខាន់សម្រាប់ការនាំចេញរបស់កម្ពុជា ហើយថា ពេលនេះសហភាពអឺរ៉ុបគឺជាម្ចាស់ជំនួយធំបំផុតរបស់ប្រទេសកម្ពុជា ដោយកាលពីឆ្នាំ២០១២បានផ្ដល់ជំនួយចំនួន២១០លានដុល្លារ។
កាលពីថ្ងៃច័ន្ទ ដែលជាថ្ងៃដំបូងនៃកិច្ចប្រជុំគណៈកម្មាធិការចម្រុះនេះមានជនរួមជាតិខ្មែរប្រហែល១០០នាក់មកពីទូទាំងអឺរ៉ុប បានធ្វើការតវ៉ានៅខាងក្រៅការិយាល័យក្រុមប្រឹក្សារបស់សហភាពអឺរ៉ុបក្នុងទីក្រុងព្រុចសែល ដើម្បីទាមទារឲ្យអឺរ៉ុបផ្ដាច់ជំនួយជួយដល់រដ្ឋាភិបាលរបស់លោក ហ៊ុន សែន ហើយបានអំពាវនាវឲ្យលោកនាយករដ្ឋមន្ត្រីលាលែងពីតំណែង។
កិច្ចប្រជុំគណៈកម្មាធិការចម្រុះនេះដឹកនាំដោយលោក អ៊ួច បូរិទ្ធ រដ្ឋលេខាធិការក្រសួងការបរទេសកម្ពុជា និងលោក យូហ្គោ អាស្ទូតូ (Ugo Astuto) រដ្ឋមន្ត្រីក្រសួងការបរទេសសហភាពអឺរ៉ុប (European External Action Secvice) ទទួលបន្ទុកកិច្ចការនៅអាស៊ីបូពា៌ និងអាស៊ីអាគ្នេយ៍៕ សុខុម