កាលពីម្សិលមិញ តំណាងរាស្ត្រជាន់ខ្ពស់មួយរូបមកពីគណបក្សគ្រប់គ្រងអំណាចបានច្រានចោលសេចក្តីអះអាងរបស់លោក សម រង្ស៊ី មេដឹកនាំគណបក្សប្រឆាំង ក្នុងកាសែតមួយនៅទីក្រុងបាងកកក្នុងសប្តាហ៍នេះថា លោកនា យករដ្ឋមន្ត្រី ហ៊ុន សែន បានស្នើឲ្យមានច្បាប់អភ័យឯកសិទ្ធិ ដែលអាចការពារអ្នកនយោបាយជាន់ខ្ពស់ រួមទាំងនាយករដ្ឋមន្ត្រីផងដែរ ពីការផ្តន្ទាទោសប្រសិនបើអ្នកនយោបាយទាំងនោះចុះចេញពីមុខតំណែង។
លោក ជាម យៀប តំណាងជាន់ខ្ពស់មកពីគណបក្សប្រជាជនកម្ពុជា និងជាអ្នកនាំពាក្យគណបក្សនេះ បានឲ្យដឹងថា លោកបានដឹងពីសំណើឲ្យមានច្បាប់អភ័យឯកសិទ្ធិ ក៏ប៉ុន្តែ លោកបានអះអាងថា គំនិតនិទណ្ឌភាពស្របច្បាប់គឺជាគំនិតស្នើឡើងដោយលោក សម រង្ស៊ី ទៅលោក ហ៊ុន សែន មិនមែនលោក ហ៊ុន សែនទេ។ លោកបានមានប្រសាសន៍ថា “គឺលោក សម រង្ស៊ី ជាអ្នកស្នើច្បាប់និទណ្ឌភាពនេះ”។
លោកបានមានប្រសាសន៍បន្ថែមទៀតថា “គាត់ [លោក សម រង្ស៊ី] បានស្នើមានច្បាប់នេះពីព្រោះគាត់ចង់បានការផ្លាស់ប្តូរ ហើយគាត់បានអះអាងថា ច្បាប់នេះអាចការពារមេដឹកនាំទាំងបីបាន”។
នៅក្នុងបទសម្ភាសដែលត្រូវបានបោះពុម្ពផ្សាយនៅលើទំព័រកាសែត ឌឹ ណេសិន (The Nation) កាលពីថ្ងៃអង្គារ លោក សម រង្ស៊ី បានលើកឡើងថា អំឡុងពេលចរចាកាលពីខែកញ្ញាឆ្នាំមុន លោក ហ៊ុន សែន បានស្នើឲ្យមានច្បាប់និទណ្ឌភាព ដែលនឹងផ្តល់ការរួចខ្លួនពី ការផ្តន្ទាទោស ដល់នាយករដ្ឋមន្ត្រី ហ៊ុន សែន លោក ជា ស៊ីម ប្រធានព្រឹទ្ធសភា និងលោក ហេង សំរិន ប្រធានរដ្ឋសភា ប្រសិនបើមេដឹកនាំទាំងនេះចុះចេញពីតំណែង។
នៅពេលសួរអំពីជំហររបស់គណបក្សប្រជាជនកម្ពុជាលើសំណើនេះ លោក ជាម យៀប បានលើកឡើងថា ច្បាប់បែបនេះមិនចាំបាច់មានទេ ក៏ប៉ុន្តែ នៅតែទទួលបានការគាំទ្រពីគណបក្សរបស់លោក។
លោក ជាម យៀប បានមានប្រសាសន៍ថា “សម្តេចទាំងបី [លោក ហ៊ុន សែន លោក ជា ស៊ីម និងលោក ហេង សំរិន] មិនត្រូវការច្បាប់នោះដើម្បីការពារខ្លួនទេ ក៏ប៉ុន្តែ ប្រសិនបើច្បាប់ថ្មីបែបនេះត្រូវបានផ្តួចផ្តើមឡើង នោះវាជារឿងល្អសម្រាប់សុវត្ថិភាពរបស់មេដឹកនាំទាំងនេះ”។
នៅពេលទំនាក់ទំនងតាមទូរស័ព្ទកាលពីម្សិលមិញ លោក សម រង្ស៊ី បានលើកឡើងសារជាថ្មីពីសេចក្តីអះអាងរបស់លោកដែលថា គំនិតនេះគឺជាគំនិតរបស់នាយករដ្ឋមន្ត្រី ហ៊ុន សែន។ លោក សម រង្ស៊ី បានលើកឡើងថា លោក ហ៊ុន សែន បាននិយាយអំឡុងពេលចរចាកាលពីខែកញ្ញា ក្រោយពេលបោះឆ្នោតថា “ដោយសារតែយើងជាមនុស្សជំនិតរបស់គាត់” ដែលនេះធ្វើឲ្យមេដឹកនាំគណបក្សសង្គ្រោះជាតិភ្ញាក់អារម្មណ៍។
លោក សម រង្ស៊ី បានមានប្រសាសន៍ទាក់ទងនឹងច្បាប់អភ័យឯកសិទ្ធិនេះថា “លោក ហ៊ុន សែន បាននិយាយថា ប្រសិនបើគណបក្សប្រឆាំងលើកសំណើនេះ ហើយធ្វើសេចក្តីព្រាងច្បាប់មួយសម្រាប់ដាក់ជូនរដ្ឋសភាពិនិត្យនោះ គណបក្សប្រជាជនកម្ពុជា នឹងគាំទ្រច្បាប់នោះ”។
លោក សម រង្ស៊ី បានមានប្រសាសន៍អំពីច្បាប់និទណ្ឌភាពនេះថា “[លោក ហ៊ុន សែន] បាននិយាយថា វាមិនមែនជារឿងសមស្របទេដែលគណបក្សប្រជាជនកម្ពុជាជាគណបក្សកាន់អំណាច ទៅស្នើឲ្យមានច្បាប់អភ័យឯកសិទ្ធិបែបនេះ ក៏ប៉ុន្តែ លោកបាននិយាយទៀតថា ក៏ប៉ុន្តែ ច្បាប់នេះនឹងមានលក្ខណៈសមស្របនៅក្នុងបរិបទនៃកិច្ចព្រមព្រៀងនយោបាយស៊ីជម្រៅ។ ចំណុចនេះត្រូវបានបញ្ជាក់យ៉ាងច្បាស់”។
លោកបានមានប្រសាសន៍បន្ថែមទៀតថា “លោក ហ៊ុន សែន បាននិយាយថា គួរតែមានករណីលើកលែងទោសមានបីសម្រាប់ប្រធានរដ្ឋសភា ប្រធានព្រឹទ្ធសភា និងនាយករដ្ឋមន្ត្រី។ លោកមិនបាននិយាយបញ្ជាក់ឈ្មោះមេដឹកនាំទាំងនេះទេ ប៉ុន្តែ លោកបានលើកឡើងមុខតំណែងរបស់មេដឹកនាំទាំងនេះ ហើយបន្ទាប់មកលោកបានលើកឡើងថាច្បាប់អភ័យឯកសិទ្ធិគួរតែត្រូវបានគេផ្តល់ឲ្យអ្នកដែលបានបំពេញតួនាទីរបស់ខ្លួន”។
លោក សម រង្ស៊ី បានមានប្រសាសន៍បន្តទៀតថា ច្បាប់បែបនេះគួរតែអាចការពារអ្នកនយោបាយ “ ពីការផ្តន្ទាទោសពីបទល្មើស និងកំហុសក្នុងពេលកន្លងមក”។
លោក ជាម យៀប បានលើកឡើងបន្តទៀតថា ប្រសាសន៍បច្ចុប្បន្នរបស់លោក សម រង្ស៊ី ទាក់ទងនឹងកិច្ចពិភាក្សាអំពីច្បាប់និទណ្ឌភាពកាលពីខែកញ្ញាឆ្នាំមុន មានគោលបំណងបង្អាប់បង្អោនលោក ហ៊ុន សែន ដែលលោកបានលើកឡើងថា ជាអ្នកទទួលជ័យជម្នះស្របច្បាប់ក្នុងការបោះឆ្នោត។ លោកបានមានប្រសាសន៍ថា “ អ្វីក៏ដោយដែលលោក រង្ស៊ី បានធ្វើ ឬក៏កំពុងធ្វើគឺចង់បានតែផលប្រយោជន៍នយោបាយ ពីព្រោះគាត់គ្រាន់តែចង់ផ្លាស់ប្តូរមេដឹកនាំ”៕ សុធា