លោក ខូវ ផល្លាបុត្រ មហាសេដ្ឋីក្រុមហ៊ុនសំណង់ បានសរសេរលិខិតជាសាធារណៈមួយ ដោយបដិសេធថា លោក ស៊ុន ចាន់ថុលរដ្ឋមន្ត្រីក្រសួងពាណិជ្ជកម្មដែលជាបងថ្លៃរបស់លោក មិនបានដាក់សម្ពាធលោកឲ្យសរសេរលិខិតមួយច្បាប់ក្នុងពេលថ្មីៗនេះ ដើម្បីសូមទោសចំពោះការចោទប្រកាន់ដែលលោកបានចោទទៅលើលោក ស៊ុន ចាន់ថុល ថាបានប្រឌិតករណីព្រហ្មទណ្ឌដ៏ធំមួយដើម្បីទទួលបានចំណែកភាគច្រើននៃទ្រព្យសម្បត្តិរបស់គ្រួសារ ខូវ នោះទេ។
នៅក្នុងសំណុំរឿងរបស់តុលាការដ៏អូសបន្លាយមួយ ដែលបានបញ្ចប់កាលពីឆ្នាំ២០១២ លោក ស៊ុន ចាន់ថុល បានចោទប្រកាន់លោកស្រី ខូវ សេងចិន្តា ដែលជាម្តាយចុងរបស់លោក ខូវ ផល្លាបុត្រ ពីបទរៀបផែនការរំលោភនិងធ្វើឃាតប្រពន្ធនិងកូនស្រីរបស់លោក ស៊ុន ចាន់ថុល។
លោក ខូវ ផល្លាបុត្រ បានលើកឡើងនៅពេលនោះថា លោក ស៊ុន ចាន់ថុល បានប្រឌិតករណីព្រហ្មទណ្ឌ ហើយបានប្រើតុលាការជាឈ្នាន់ដើម្បី “កាន់កាប់អចលនទ្រព្យរបស់គ្រួសារត្រកូល ខូវ”។ ទោះបីជាខ្វះភ័ស្តុតាងក៏ដោយ ក៏លោកស្រី សេង ចិន្តា នៅតែត្រូវតុលាការសម្រេចឲ្យជាប់ពិរុទ្ធភាព ហើយកំពុងតែអនុវត្តទោសជាប់ពន្ធនាគាររយៈពេល២០ឆ្នាំ។
លោក ផល្លាបុត្រ បានសរសេរលិខិតកាលពីលើកដំបូងមួយ សូមអភ័យទោសលោក ចាន់ថុល កាលពីខែវិច្ឆិកា។ ដើម្បីឆ្លើយតបទៅនឹងលិខិតនោះ កញ្ញា ហ៊ុយ សុខលាភ ដែលជាកូនស្រីរបស់លោកស្រី សេង ចិន្តា ដែលកំពុងជាប់ពន្ធនាគារ បាននិយាយថា នាងជឿជាក់ថា លោក ផល្លាបុត្រ ពិតជាត្រូវបានគេដាក់សម្ពាធឲ្យសរសេរលិខិតនេះមែន។
នៅក្នុងលិខិតមួយផ្សេងទៀតចុះថ្ងៃទី១៣ ខែមីនា លោក ផល្លាបុត្រ បានបដិសេធការលើកឡើងរបស់កញ្ញា សុខលាភ ដែលបានចុះផ្សាយនៅក្នុងកាសែត ខេមបូឌា ដេលី។ លោក ផល្លាបុត្រ បានសរសេរថា “ខ្ញុំសូមបញ្ជាក់ថា លិខិតចុះថ្ងៃទី២៩ ខែវិច្ឆិកា ឆ្នាំ២០១៣ គឺជាការសម្រេចចិត្តរបស់ខ្ញុំផ្ទាល់ដោយគ្មានការបង្ខំណាមួយពីបងថ្លៃរបស់ខ្ញុំ ស៊ុន ចាន់ថុល ឡើយ” ។ លោកបានបន្ថែមថា លោក និងលោក ចាន់ថុល មិនបានជួបគ្នាចាប់តាំងពីការបើកសវនាការជំនុំជម្រះក្តីមកម៉្លេះ។
លោក ផល្លាបុត្រ ក៏សុំឲ្យឪពុករបស់លោកដែលក៏អះអាងថា លោក ចាន់ថុល បានប្រឌិតរឿងដើម្បីចោទប្រកាន់មកលើប្រពន្ធរបស់គាត់ ទទួលស្គាល់ជាសាធារណៈថា ប្រពន្ធដែលកំពុងតែជាប់ពន្ធនាគាររបស់គាត់ពិតជាបានរៀបផែនការធ្វើឃាតកូនស្រីនិងចៅស្រីរបស់គាត់ពិតមែន។
លោក ផល្លាបុត្រ បានសរសេរថា “ខ្ញុំព្រួយបារម្ភអំពីឪពុក ខូវ ជឺលី។ ប្រហែលជាគាត់ទទួលរងសម្ពាធដែលធ្វើឲ្យគាត់មិនហ៊ានជួបជាមួយកូនៗនិងចៅៗរបស់គាត់ ហើយបញ្ជាក់ពីការពិត”។
នៅក្នុងលិខិតរបស់លោក កាលពីខែវិច្ឆិកានិងលិខិតចុងក្រោយ នៅក្នុងសប្តាហ៍នេះ លោក ផល្លាបុត្រ បានសរសេរថា ចាប់តាំងពីការបើកសវនាការជំនុំជម្រះក្តី កាលពីឆ្នាំ២០១២មក លោកបានដឹងថា លោកស្រី សេង ចិន្តា រួមជាមួយ ឡាយ ហួង ប្រពន្ធចុងរបស់លោក បានរៀបផែនការចូលទៅក្នុងភូមិគ្រឹះរបស់លោក ចាន់ថុល ដើម្បីសម្លាប់ប្រពន្ធនិងកូនរបស់គាត់។ លោក ផល្លាបុត្រ បានសរសេរថា “ខ្ញុំសុំឲ្យឪពុក ខូវ ជឺលី មេត្តានិយាយការពិតទាំងអស់ប្រាប់ដល់សាធារណជន ហើយសូមលោកពុកកុំស្វែងរកនរណាឲ្យជួយដោះលែង សេង ចិន្តា [ប្រពន្ធរបស់លោកពុក] អី”។
តាមការប៉ាន់ប្រមាណថា ទាំងលោក ផល្លាបុត្រ និងលោក ជឺលី សុទ្ធតែស្ថិតក្នុងចំណោមអ្នកមានបំផុតទាំង១០នាក់នៅក្នុងប្រទេសកម្ពុជា នៅក្នុងសារទូលេខពីស្ថានទូតសហរដ្ឋអាមេរិក ដែលចេញផ្សាយដោយវីគីលីក (Wikileaks) កាលពីឆ្នាំ២០១១។
លោក ចាន់ថុល គឺជាសមាជិកព្រឹទ្ធសភាមួយរូបមកពីគណបក្សកាន់អំណាច ដែលត្រូវបានដំឡើងឋានៈទៅជារដ្ឋមន្ត្រីក្រសួងពាណិជ្ជកម្ម ជំនួសលោក ចម ប្រសិទ្ធ ក្រោយកាលបោះឆ្នោតជាតិកាលពីខែកក្កដា៕ស៊ុយឈាង