34 C
Phnom Penh

ទំនប់​វារី​អគ្គិសនី​ ដន​ សាហុង​ ធ្វើ​ឲ្យ​មាន​ការ​ព្រួយ​បារម្ភ​កាន់​តែ​ច្រើន​អំពី​ផល​ប៉ះពាល់​ដល់​មច្ឆា

ដោយ ឌឹ ខេមបូឌា ដេលី

បទវិភាគ

កាល​ពី​ម្សិល​មិញ វេទិកា​នៃ​អង្គការ​មិន​មែន​រដ្ឋាភិបាល​ស្តី​ពី​ប្រទេស​កម្ពុ​ជា ​បាន​ឲ្យ​ដឹង​ថា គម្រោង​សាង​សង់​ទំនប់​វារី​អគ្គិសនី​ ដន​ សាហុង​ នៅ​ក្នុង​ភាគ​ខាង​ត្បូង​ប្រទេស​ឡាវ​​មិន​​​គួរ​បន្ត​ទៀត​ឡើយ​ ព្រោះ​វា​នឹង​ធ្វើ​ឲ្យ​ប៉ះ​ពាល់​យ៉ាង​ខ្លាំង​ដល់​មច្ឆា​គ្រប់​ប្រភេទ​ ជីវ​​ចម្រុះ​ និង​ជីវភាព​រស់​នៅ​ប្រចាំ​ថ្ងៃ​របស់​អ្នក​ភូមិ​ដែល​រស់​នៅ​ខ្សែ​ទឹក​ខាង​ក្រោម​ក្នុង​ប្រទេស​កម្ពុជា​និ​ង​ប្រទេស​វៀត​ណាម​ ទោះ​បី​ជា​រដ្ឋា​​ភិបាល​ឡាវ​បាន​អះអាង​ផ្ទុយ​ពី​នេះ​ក៏ដោយ​។

គណៈកម្មការ​​ទន្លេ​មេគង្គ​ កាល​ពី​ថ្ងៃ​អង្គារ​​​និង​ថ្ងៃ​ពុធ​ បាន​ចុះ​ទៅ​ត្រួត​ពិនិត្យ​ជា​លើក​ទី២​នៅ​ក្នុង​តំបន់​ ដែល​ទំនប់​វា​រី​អគ្គិសនី​កម្លាំង​២៥៦មេហ្គាវ៉ាត់​ កំពុង​ត្រូវ​បាន​សាង​សង់​នៅ​​ដៃ​ទន្លេ​ ដន​ សាហុង​ នៃ​ទន្លេ​មេគង្គ​ ដែល​មាន​​ ចម្ងាយ​ត្រឹម​តែ​១,៥​គីឡូ​ម៉ែត្រប៉ុណ្ណោះ​​ពី​ព្រំ​ដែន​ប្រទេស​កម្ពុជា​ ជាមួយ​វេទិកា​នៃ​អង្គការ ​មិន​មែន​រដ្ឋាភិបាល​ ដែល​ជា​លេខា​ធិការ​ដ្ឋាន​​នៃ​អង្គការ​សម្ព័ន្ធ​ទន្លេ​នៅ​ក្នុង​ប្រទេស​កម្ពុជា​ ជា​អង្គការ​ក្នុង​ស្រុក​តែ​មួយ​គត់​ដែល​ត្រូវ​បាន​អញ្ជើញ​ឲ្យ​ចុះ​ទៅ​ត្រួត​ពិនិត្យ​ក្នុង​តំបន់​នោះ​។

នៅ​ក្នុង​សន្និសីទ​កាសែត​មួយ​ក្នុង​រាជ​ធានី​ភ្នំពេញ​ កាល​ពី​ម្សិល​មិញ​ អង្គការ​នេះ​បាន​​​លើ​ក​ឡើង​ថា ប្រទេស​ឡាវ​មិន​បាន​បង្ហាញ​​ពី​វិធាន​​ការ​ដ៏​សម​ហេតុ​ផល​តាម​បែប​វិទ្យា​សាស្ត្រ​​​​ដែល​នឹង​ធានា​ថា មច្ឆា​នៅ​តែ​អាច​បម្លាស់​ទី​រវាង​ខ្សែ​ទឹក​ខាងក្រោម​​និង​ខ្សែ​ខាង​លើ​នៃ​ទន្លេ​មេគង្គ​នៅ​ពេល​ទំនប់​វារី​អគិ​្គសនី​ត្រូវ​បាន​បញ្ចប់​ឡើយ​ ហើយ​អង្គការ​នេះ​ក៏​បាន​អំពាវ​នាវ​ឲ្យ​រដ្ឋាភិបាល​ឡាវ​បញ្ឈប់​ការ​សាង​សង់​នេះ​ផងដែរ​។

លោក តេក​ វណ្ណារ៉ានាយក​ប្រតិ​បត្តិ​វេទិ​កា​​នៃ​អង្គការ​មិន​មែន​រដ្ឋាភិបាល​ ​​មាន​ប្រសា​​​សន៍​ថា “យើង​បាន​ស្នើ​ឲ្យ​រដ្ឋាភិបាល​ឡាវ​បញ្ឈប់​​គម្រោង​វា​រី​អគ្គិសនី​ ដន សាហុង​ ព្រោះ​​​​​​​ពួក​គេ​មិន​បាន​​ធ្វើ​ការ​វាយ​តម្លៃ​ពី​ផល​ប៉ះ​ពាល់​បរិស្ថាន​ឆ្លង​កាត់​ព្រំ​​ដែន​​ស្តី​អំពី​ផល​ប៉ះ​ពាល់​ដល់​ធន​ធាន​មច្ឆា​គ្រប់​ប្រភេទ​ឡើយ​”។

លោក​ វណ្ណារ៉ា​ ​លើក​ឡើង​ថា អំឡុង​ពេល​​​ចុះ​ទៅ​ត្រួត​ពិនិត្យ​នោះ​ អ្នក​បង្កើត​គម្រោង​​​របស់​ក្រុមហ៊ុន​ Mega First Berhad ជា​ក្រុមហ៊ុន​ ម៉ាឡេស៊ី​ ដែលនឹង​​សាងសង់​ទំនប់​វារី​អគ្គិ​សនី​​នេះ​មិន​អាច​ផ្តល់​​ភ័ស្តុ​តាង​វិទ្យា​សាស្ត្រ​ស្តី​អំពី​ថា​ តើ​មច្ឆា​អាច​បម្លាស់​​ទី​ឆ្លង​កាត់​ច្រក​​ទ្វារ​ទឹកដ៏​ចង្អៀត​និង​រាក់​នៅ​ក្នុង​ទន្លេ​ បាន​ដោយ​​​របៀ​ប​ណា​នោះ​ទេ​។​

​លោក​មាន​ប្រសាសន៍​ថា “ពួក​គេ​​មិន​បាន​​​ផ្តល់​ចម្លើយ​​វិទ្យា​សាស្ត្រ​ឡើយ​។​ពួ​ក​គេ​គ្រាន់​តែ​និយាយ​ថា ខ្លួន​នឹង​ព្យាយាម​​ធ្វើ​ឲ្យ​មច្ឆា​​​អាច​បម្លាស់ទី​បាន​ស្រួល​តាម​ច្រក​ទ្វារ​ទឹក​ទាំង​នេះ​ ប៉ុន្តែ​ពួក​គេ​មិន​បាន​សម្រេច​ថា បញ្ហា​​​នេះ​នឹង​ត្រូវ​ធ្វើ​ឲ្យ​ជោគជ័យ​តាម​របៀប​ណា​នោះ​ទេ​ ហើយ​នេះ​គឺ​ជា​ក្តី​ព្រួយ​បារម្ភ​”។

ការ​ចុះ​ទៅ​ត្រួត​ពិនិត្យ​នៅ​តំបន់​នេះ​ត្រូវ​បាន​ធ្វើ​ឡើង​ បន្ទាប់​ពី​អង្គការ​ឃ្លាំ​មើល​បរិស្ថាន​ WWF កាល​ពី​សប្តាហ៍​មុន​បាន​រិះ​គន់​យ៉ាង​ខ្លាំង​ចំពោះ​ការ​វាយ​តម្លៃ​ពី​ផល​ប៉ះ​ពាល់​​បរិស្ថាន​ដែល​​បាន​ធ្វើ​ឡើង​ដោយ​ក្រុម​ហ៊ុន​​ ម៉ាឡេ​ស៊ី​ ​ដែល​រដ្ឋាភិបាល​ឡាវ​​​​ បាន​ចាត់​ទុក​ថា ជាភ្លើង​ខៀវ​មួយ​​​ដែល​អាច​បន្ត​គម្រោង​នេះ​បាន​។ អង្គការ​នេះ​បាន​រិះ​គន់​ដូច្នេះ​ដោយ​​​អះ​​អាង​ថា ការ​សិក្សារ​របស់​ក្រុមហ៊ុន​ម៉ាឡេ​ស៊ី​​ខ្វះ​ភ័ស្តុ​តាង​និង​ខ្វះ​ការ​បញ្ជាក់​បែប​វិទ្យា​សាស្ត្រ​។

លោក​ វីរ៉ាផុន​ វីរ៉ាវង្ស (Viraphone Viravong) អនុ​រដ្ឋ​មន្ត្រី​ក្រសួង​ថាមពល​និង​ធនធាន​រ៉ែ​របស់​ប្រទេស​ឡាវ​ ដែល​មាន​វត្ត​មាន​នៅ​ក្នុង​សន្និសីទ​​កាសែត​ បាន​លើក​ឡើង​ម្តង​ទៀតថា ទំនប់​វារី​អគិ្គសនី​នេះមាន​ផល​ប៉ះពាល់បន្តិច​បន្តួច​ប៉ុណ្ណោះ​។

ដោយ​សង្កត់​ធ្ងន់​ថា មច្ឆា​គ្រប់​ប្រភេទ​បាន​ថយ​ចុះ​រួច​ទៅ​ហើយ​ដោយ​សារ​ការ​នេសាទ​ហួស​ហេតុ​និង​ការ​ឡើង​កម្តៅ​នៃ​ភព​ផែន​ដី​នោះ​ លោក​បាន​មានប្រសាសន៍​ថា​ “ទំនប់​វារី​អគ្គិសនី​ ដន​ សាហុង​ គឺ​​ជា​ទំនប់​ដែល​មាន​ផល​ប៉ះពាល់​តិច​បំផុត​ក្នុង​ចំណោម​គម្រោង​ទំនប់​វារី​អគ្គិសនី​ [ដែល​គ្រោង​នឹង​សាងសង់​ចំនួន​១២​]។ ប្រសិន​បើ​យើងទុក​ឲ្យ​ត្រី​ធ្វើ​បម្លាស់​​ទី​ ប្រសិនបើយើងធ្វើ​ឲ្យ​ល្បប់​ហូរ​ហើយ​យើង​មិន​ផ្លាប់​ប្តូរ​ទឹក​ឬ​ក៏​ចរន្ត​ទឹក​នោះ វា​យ៉ាង​ម៉េច​ទៅ​វិញ​។ ​ ខ្ញុំ​មិន​មែន​ជា​អ្នក​ជំនាញ​ខាង​មច្ឆា​ទេ​ ខ្ញុំ​គឺ​ជា​អ្នក​ជំនាញ​ខាង​វិស្វកម្ម​​ ប៉ុន្តែ​ខ្ញុំ​ប្រើ​ការ​យល់​ដឹង​ជា​ទូ​ទៅ​” ។ លោក​បាន​បន្ថែម​ថា តាម​ពិត​ទៅ​ទំនប់​វារី​អគ្គិសនី​នេះ​នឹង​ធ្វើ​មច្ឆា​មាន​កាន់​តែ​ច្រើនទៅ​វិញ​​ទេ​ក្នុង​ទន្លេ​មេគង្គ​។

​លោក យុក​​ សេង​ឡុង​ អ្នក​គ្រប់​គ្រង​កម្មវិធី​​​សម្ព័ន្ធ​ភាព​ដើម្បី​អភិរក្ស​ធនធាន​ជល​ផល​​បាន​ឲ្យ​ដឹង​កាល​ពី​ម្សិល​មិញ​ថា នឹង​មាន​ការ​តវ៉ា​ចាប់​ពី​ថ្ងៃ​ទី២​៨​ ខែ​មីនា​ ដល់​ ថ្ងៃ​ទី​៣០​ នៅ​ក្នុង​​ខេត្ត​កំពង់​ចាម ​​ស្ទឹង​ត្រែង​ និង​ក្រចេះ​ ដើម្បី​ប្រឆាំង​​​នឹង​ទំនប់​វារី​អគ្គិសនី​នេះ​។ លោក​បាន​មាន​ប្រសាសន៍​ថា “សារ​របស់​​​យើង​គឺ​ដើម្បី​អំពាវនាវ​កុំ​ឲ្យ​មាន​ការ​សាង​សង់​ទំនប់​វារី​អគ្គិសនី​នៅ​ក្នុង​ទន្លេ​មេគង្គ”៕ ស៊ុយ​ឈាង​

(រាយការណ៍​បន្ថែម​ដោយ​ Simon Henderson )

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស