យោងតាមសំណុំរឿង របស់តុលាការដែលទទួលបាន កាលពីម្សិលមិញបានឲ្យដឹងថា ទីភ្នាក់ងាររដ្ឋាភិបាលកូរេ៉ខាងត្បូង និងវិនិយោគិនកូរ៉េ របស់ក្រុមហ៊ុនកាំកូស៊ីធី (CamkoCity)កំពុងប្តឹងគ្នានៅសាលាដំបូងរាជធានីភ្នំពេញក្នុងការទាមទារកម្មសិទ្ធិ កាន់កាប់គម្រោងអភិវឌ្ឍន៍ភូមិគ្រិះ ដែលទើបសង់បានពាក់កណ្តាល នៅក្នុងខណ្ឌឫស្សីកែវ។
បន្ទាប់ពីការដួលរលំរបស់ធនាគារ Busan Saving Bank ដោយសាររឿងអាស្រូវលួចបន្លំ កាលពីជាងមួយឆ្នាំកន្លងមកនេះ បានប៉ះពាល់ការអនុវត្តគម្រោងអភិវឌ្ឍន៍ធំៗពីរ នៅក្នុងប្រទេសកម្ពុជា ដែលផ្តល់មូលនិធិដោយធនាគារនេះ គឺគម្រោងសាងសង់កាំកូស៊ីធី និងគម្រោងសាងសង់អាកាសយានដ្ឋានអន្តរជាតិសៀមរាប ដែលមានទឹកប្រាក់១ពាន់លានដុល្លារ។ ភាគច្រើននៃគម្រោងកាំកូសុីធីត្រូវបានសង់រួចតែមួយផ្នែកប៉ុណ្ណោះ ប៉ុន្តែមានអតិថិជនខ្លះ បានចូលទៅរស់នៅ ក្នុងប្លុកផ្ទះល្វែងខ្ពស់រួចហើយ។
នៅពេលធនាគារ Busan Saving Bank បានរាយការណ៍អំពីការក្ស័យធន ក្រុមហ៊ុនសាជីវកម្មធានាប្រាក់តម្កល់របស់កូរេ៉ (KDIC) ដែលជាទីភ្នាក់ងាររដ្ឋាភិបាលនេះ បានចេញមុខជួយស្រោចស្រង់គម្រោងនេះ។ ពេលនេះ KDICកំពុងតែព្យាយាមទាមទារយកប្រាក់ ដែលធ្វើវិនិយោគនៅក្នុងប្រទេសកម្ពុជាមកវិញ ដោយចោទប្រកាន់ធនាគារBusanថា បានខ្ចីតាមរយៈវិធីបោកប្រាស់។
កាលពីខែមុន លោកលីសាងហូ (LeeSang-ho) អគ្គនាយកប្រតិបត្តិរបស់ក្រុមហ៊ុនWorld City ដែលជាក្រុមហ៊ុននៅពីក្រោយការអភិវឌ្ឍគម្រោងកាំកូ សុីធី ត្រូវបានកាត់ទោសឲ្យជាប់ពន្ធនាគាររយៈពេលប្រាំឆ្នាំ នៅក្នុងទីក្រុងសេអ៊ូល ពីបទឆបោកប្រាក់កម្ចីពីធនាគារ Busan Saving Bank ។បើទោះជា លោកលី ខំប្តឹងជំទាស់ចំពោះការកាត់ទោសគាត់និងបដិសេធថា ខ្លួនគ្មានកំហុសក្នុងការទទួលបានកម្ចីសម្រាប់គម្រោងអភិវឌ្ឍន៍របស់លោកនៅក្នុងខណ្ឌឫស្សីកែវ ក៏ដោយ ក៏អនាគតរបស់ក្រុមហ៊ុនកាំកូ សុីធី និងអ្នកជាម្ចាស់ជារៀងរហូត នៃគម្រោងនេះ នៅតែមិនច្បាស់លាស់នៅឡើយដែរ។
លោក ប៉ាកគី-យុន (Park Kee-Hyun)ជំនួយការផ្នែកគ្រប់គ្រងរបស់ KDIC បានលើកឡើងក្នុងអីុម៉េលថា ពេលនេះទីភ្នាក់ងាររបស់រដ្ឋាភិបាលនេះ គឺជាភាគហ៊ុនធំបំផុតក្នុងក្រុមហ៊ុន World City និងក្រុមហ៊ុនអាកាសយានដ្ឋានអន្តរជាតិសៀមរាបថ្មី ដែលអគ្គនាយករបស់ខ្លួនកំពុងជាប់ពន្ធនាគាររយៈពេលប្រាំពីរឆ្នាំ។ក្រុមហ៊ុនអាកាសយានដ្ឋានអន្តរជាតិសៀមរាបថ្មី ជាអ្នកអនុវត្តគម្រោងសាងសង់អាកាសយានដ្ឋានអន្តរជាតិ ក្នុងខេត្តសៀមរាបដែលមិនទាន់ចាប់ផ្តើមសាងសង់នៅឡើយ។ លោកផាកបានលើកឡើងថា “ក្រុមហ៊ុនKDIC ពេលនេះកំពុងតែរិះរកវិធីការពារចំពោះការអះអាងរបស់ខ្លួន ដើម្បីបន្តកាន់ កាប់ក្រុមហ៊ុនទាំងនេះ”។
លោក ប៉ាក ថ្លែងថា “ទោះជាយ៉ាងណា អគ្គនាយករូបនេះ មិនសហការជាមួយកិច្ចប្រឹងប្រែងតាមផ្លូវច្បាប់របស់ក្រុមហ៊ុនBusan ក្នុងការស្រោចស្រង់ប្រាក់កម្ចីរបស់ខ្លួន ដែលកំពុងរំខានយ៉ាងខ្លាំងដល់ដំណើរការធ្វើឲ្យគម្រោងនេះអាចចាប់ផ្តើមដំណើរការដូចធម្មតាឡើងវិញ”។
លោក គីមហាយ-ចុង (Kim Hae-jong)អ្នកតំណាងឲ្យក្រុមហ៊ុន KDIC បានដាក់ពាក្យបណ្តឹងទៅសាលាដំបូងរាជធានីភ្នំពេញ ដើម្បីសុំដកលោកលី ចេញពីសមាជិកក្រុមប្រឹក្សានាយករបស់ក្រុមហ៊ុន World City ហើយលើកខ្លួនឯងជាប្រធានជំនួសវិញ។
ទោះជាយ៉ាងណា សាលាដំបូងបានបដិសេធ ចំពោះសំណើរបស់ក្រុមហ៊ុនKDIC ហើយអ្នកតំណាងរបស់លោក លី បានប្តឹងតបវិញ។តំណាងរបស់លោក លី ត្រូវបានសាលាដំបូងរាជធានីភ្នំពេញបង្គាប់ឲ្យជាអ្នកជំនួយលោក លីជាបណ្តោះអាសន្ន កាលពីថ្ងៃទី២៥ ខែមករា។
បទបញ្ជារបស់សាលាដំបូងនេះបង្ហាញថា ការផ្តល់ហិរញ្ញវត្ថុសម្រាប់ក្រុមហ៊ុន កាំកូ ស៊ីធីត្រូវបានរៀបចំឡើងតាមរយៈកម្ចីពីធនាគារ Busan Saving Bank ទៅឲ្យក្រុមហ៊ុនកូរ៉េឈ្មោះ LandMark Worldwide Co (LMW)ដែលមានលោកលី ជានាយកប្រតិបត្តិដែរ។ក្រុមហ៊ុន LMW ពេលនោះបានបញ្ជូនប្រាក់ទៅឲ្យក្រុមហ៊ុន World City ជាក្រុមហ៊ុនចុះឈ្មោះនៅក្នុងប្រទេសកម្ពុជា។
បទបញ្ជារបស់តុលាការក៏ហាមប្រាមម្ចាស់ហ៊ុនពីររូប ដែលតែងតាំងដោយធនាគារBusan Saving Bank លោក ជុនមុយ-ស៊ីកនិងលោកហានគី-ហុង មិនឲ្យផ្ទេរហ៊ុន និងមិនឲ្យបោះឆ្នោតនៅឯកិច្ចប្រជុំម្ចាស់ហ៊ុនរបស់ក្រុមហ៊ុន World City។
បទបញ្ជានេះមានខ្លឹមសារថា ធនាគារ Busan Saving Bank បានបាត់បង់សិទ្ធិគ្រប់គ្រងក្នុងនាមជាម្ចាស់ហ៊ុននៅក្នុងក្រុមហ៊ុន World City នៅពេលដែលអាជ្ញាធរនិយ័តកម្មកូរ៉េ បង្កកប្រតិបត្តិការរបស់ធនាគារនេះកាលពីខែកុម្ភៈឆ្នាំមុន ចំពេលមានរឿងអាស្រូវឆបោកនេះ។
បទបញ្ជារបស់សាលាដំបូងរាជធានីចែងថា “ហេតុផលចំពោះសកម្មភាពមិនសមស្របរបស់ធនាគារ Busan Saving Bank នេះគឺដើម្បីលក់ទ្រព្យសម្បត្តិរបស់ក្រុមហ៊ុនWorld City សម្រាប់គោលបំណងរបស់ខ្លួនផ្ទាល់”។
បទបញ្ជានេះបន្តថា “ដោយសារតែធនាគារ Busan មិនបំពេញកាតព្វកិច្ចរបស់ខ្លួននោះក្រុមហ៊ុន LMW កំពុងប្រឈមនឹងបញ្ហាហិរញ្ញវត្ថុធ្ងន់ធ្ងរ ក្នុងការអនុវត្តគម្រោងរបស់ក្រុមហ៊ុន [កាំកូ] និងកំពុងបំពេញកាតព្វកិច្ចរបស់ខ្លួនដោយជោគជ័យ។ម្យ៉ាងទៀត ក្រុមហ៊ុននេះធ្វើឲ្យលែងមានការជឿទុកចិត្តចំពោះធុរកិច្ចរបស់ខ្លួនហើយ”។
ទីប្រឹក្សាម្នាក់របស់ក្រុមហ៊ុន LMW ដែលសុំមិនបញ្ចេញឈ្មោះដោយសារភាពរសើបនៃបញ្ហានេះ បានអះអាងថា ក្រុមហ៊ុន KDICមិនអើពើចំពោះបទបញ្ជារបស់សាលាដំបូងរាជធានីភ្នំពេញទេនិងកំពុងប្រឹងប្រែងគ្រប់គ្រងក្រុមហ៊ុន World City៕
ប្រែសម្រួលដោយ ចេវ ប៊ុននី