30 C
Phnom Penh

ក្រុម​ហ៊ុន​សម្លៀក​បំពាក់​ធំៗ​ព្រួយ​បារម្ភអំពី​សេចក្ដីព្រាង​ច្បាប់​ថ្មីស្ដីអំពី​សហជីព​កម្មករ​

ដោយ ឌឹ ខេមបូឌា ដេលី

បទវិភាគ

កាលពីថ្ងៃ​សុក្រ ក្រុម​ហ៊ុន​​សម្លៀក​បំពាក់​អន្តរជាតិ​ចំនួន​៣០​បាន​សរសេរ​លិខិត​មួយ​ច្បាប់​ផ្ញើ​ជូន​ឧបនាយក​រដ្ឋមន្ត្រី គាត ឈន់ ដើម្បី​សម្ដែង​ការ​ព្រួយ​បារម្ភ​របស់​ខ្លួន​ចំពោះ​សេចក្ដីព្រាង​ច្បាប់​ស្ដីពី​សហជីព​ ដែល​អាច​នឹង​អនុញ្ញាត​ឲ្យ​ផ្អាក​ភ្លាម​ៗ​ ឬ​រម្សាយ​សហ​ជីព​ចោល​។

លិខិត​ដែល​ចុះ​ហត្ថលេខា​ដោយ​ក្រុម​ហ៊ុន​​​សម្លៀក​បំពាក់​ធំៗ​​​ ដូច​ជា H&M ក្រុម​ហ៊ុន Gap​ក្រុម​ហ៊ុន Adidas និង​ក្រុម​​ហ៊ុន Nike  ព្រម​ទាំង​សហជីព IndustriALL Global Union សហជីព Uni Global Union និង​សម្ព័ន្ធ​សហជីព​កម្មករអន្តរ ជាតិ​ (International Trade Union Confederation) នេះ​ធ្វើ​ឡើង​បន្ទាប់ពី​ការ​ពិភាក្សា​រវាង​ក្រុម​ហ៊ុន​បញ្ជា​ទិញ​សម្លៀក​បំពាក់​ទាំង​នេះ និង​មន្ត្រី​រដ្ឋាភិបាល​ជាន់​ខ្ពស់​នៅ​ក្នុងរាជ​ធានី​ភ្នំពេញ​កាលពីថ្ងៃ​ទី​១៩ ខែ​កុម្ភៈ ដើម្បី​ដោះ​ស្រាយ​​បញ្ហា​អស្ថិរភាព​នៅ​ក្នុង​វិស័យ​កាត់​ដេរ​​ បន្ទាប់ពី​​មាន​ការ​បង្ក្រាបដ៏​បង្ហូរឈាម​​លើ​កូដកម្ម​កាលពីខែ​មករា។

នៅ​ក្នុង​លិខិត​របស់​ពួកគេ​កាលពីថ្ងៃសុក្រ ក្រុម​ហ៊ុន​សម្លៀក​បំពាក់​ទាំង​នេះ​បាន​លើក​ឡើង​ពី​សេចក្ដី​រាយការណ៍នានា​ដែល​​ថា សហ​​​ជីព​ត្រូវ​បាន​រារាំង​​មិន​ឲ្យ​ចុះបញ្ជី​នៅ​​ក្រសួង​ការ​ងារ​ ហើយ​ថា រដ្ឋាភិបាល​នឹង​មិន​ទទួ​ល​ស្គាល់​សហជីព​ថ្មី​ណាមួយឡើយ​រហូត​ទាល់​តែ​ខ្លួន​អនុម័ត​ច្បាប់​ថ្មី​ស្ដីពី​សហជីព​ ដែល​ដាក់​​ការ​រឹត​បន្តឹង​ថ្មីៗ​លើ​សហជីព​។

លិខិត​នេះ​បញ្ជាក់​ថា “ អនុម័ត​ច្បាប់​ស្ដី​អំពី​សហជីព​​កម្មករ​ [ត្រូវ​តែ​] ស្រប​ទៅនឹង​អនុសញ្ញា​ ៨៧ និង​៩៨​​ របស់​អង្គការ​ពល​កម្ម​អន្តរ​ជាតិ​ ILO ដើម្បី​បង្កើត​ទំនាក់​ទំនងខាង​​ឧស្សា​ហកម្ម​ឲ្យមាន​ប្រសិទ្ធភាព​”។ លិខិត​េនះ​បាន​បន្ត​ថា ក្រុម​ហ៊ុនទាំង​នេះ​សង្ឃឹម​ថា ការ​ធ្វើ​សេចក្ដីព្រាង​ច្បាប់​នេះ​ក៏ជា “ ដំណើរ​ការ​គ្រប់​ជ្រុង​ជ្រោយ” ផង​ដែរ​។

នៅ​ដើម​សប្ដាហ៍​នេះ លោក អុិត សំហេង​ រដ្ឋមន្ត្រីក្រសួង​ការ​ងារ​បានធានា​ថា ​ច្បាប់​នេះ​​​នឹង​អនុវត្ត​តាម​​អនុសញ្ញា ៨៧ របស់​អង្គការ​ ILO ដែល​​ពាក់​ព័ន្ធ​ដោយ​ផ្ទាល់​ទៅ​នឹង​សេរីភាព​នៃ​ការ​​បង្កើត​អង្គការ​សមា​គម និង​ការ​ការ​ពារ​សិទ្ធិ​​រៀប​ចំ​ និង​ដែល​កម្ពុជា​បាន​ផ្ដល់​សច្ចានុម័ត​នៅ​ក្នុង​ឆ្នាំ​១៩៩៩​។

ទោះ​ជាយ៉ាង​ណា លោក​រដ្ឋមន្ត្រីបាន​​​​ធ្វើ​​ឲ្យ​មាន​មន្ទិល​ ដោយ​សារ​តែ​ការ​បន្ថែមឃ្លា​មួយ​​ថា “ នៅ​ក្នុង​បរិបទ​កម្ពុជា​”  នៅ​ពេល​សំដៅ​ដល់​អនុសញ្ញា​នេះ​។ លោក​ក៏​មិន​បាន​លើក​ឡើង​​ពី​អនុសញ្ញា​៨៩​របស់​អង្គការ​ ILO ដែល​ជាប់​ពាក់​ព័ន្ធ​នឹង​សិទ្ធិ​រៀប​ចំ​ និង​ការ​តវា៉​​ជា​សមូហភាព​។

ក្រុម​ហ៊ុនទាំង​នេះ​​លើក​ឡើង​ថា “នៅ​​​ក្នុង​បរិបទ​នេះ​យើង​មាន​ការ​ព្រួ​យ​បារម្ភ​យ៉ាង​​ខ្លាំង​​​ចំពោះ​សេចក្ដី​រាយការណ៍​ថ្មី​​ដែល​ថា ការ​​ចុះ​ឈ្មោះ​​បង្កើត​សហជីព​ថ្មី​ ដែល​ត្រូវ​បាន​ផ្សាយ​​​​កាលពី​ឆ្នាំ​២០១៤​ ហើយ​នឹង​គ្មាន​ការ​ចុះ​បញ្ជី​​​​ថ្មីៗ​​​នោះទេ​មុនពេល​​អនុវត្ត​ច្បាប់​ថ្មី​នេះ​”។

ក្រុម​ហ៊ុនទាំង​េនះលើកឡើង​ទៀត​ថា “យើង​យល់​ថា វិធានការ​នេះ​មិន​ស្រប​តាម​ដំណើរ​ការ​ដែល​យើង​បាន​យល់​ដឹង​​ពី​កិច្ច​ប្រជុំ​នោះទេ ហើយ​វា​ហាក់ដូច​ជា​យើង​មិន​ជំរុញ​ដំណើរ​ការ​េនះ​ឲ្យ​ដំណើរ​ការ​ទៅ​មុខ​នៅ​ក្នុង​លក្ខណៈស្ថាបនា​នោះទេ​”។

ក្រុម​ហ៊ុន​ទាំង​នេះ​ក៏​បាន​អំពាវ​នាវ​ឲ្យ​រាប់​បញ្ចូល​ការ​ពិភាក្សា​អំពីការ​ដំឡើង​ប្រាក់​ខែ​គោល​​១០០​ដុល្លារ​នាពេល​បច្ចុប្បន្នផង​ដែរ ហើយ​ថា ពួកគេ​មាន​ការ​ព្រួយ​បារម្ភ​ថា ពាក្យ​បណ្ដឹង​ដែល​ម្ចាស់​រោងចក្រ​ដាក់​ប្ដឹង​សហជីព​កម្មករ​ចំពោះ​ការ​ធ្វើ​ឲ្យ​ខូច​ខាត​ទ្រព្យ​សម្បត្តិ​សាធារណៈ​កាលពីខែមករា ប្រហែលជាធ្វើ​ឲ្យ​មាន​ភាព​តាន​តឹង​ខ្លាំង​ឡើង​ទៅវិញ​ទេ។

លិខិត​អម​ដែល​ផ្ញើ​ជូន​លោក​ អុិត សំហេង លោក​នាយក​រដ្ឋមន្ត្រី ហ៊ុន សែន និង​លោក ស៊ុន ចាន់ថុល ​រដ្ឋមន្ត្រី​ក្រសួង​ពាណិជ្ជកម្ម​ គឺ​ជា​សេចក្ដីថ្លែងការណ៍​ផ្ដល់​ដោយ​តំណាង​មក​ពី​សហជីព​អន្តរជាតិ​ចំនួន​បី​។

លោក សារ៉ាន់ បួរ៉ូវ (Sharan Burrow) អគ្គ​លេខាធិការ​របស់​ ITUC បានមាន​ប្រសាសន៍​ថា “សេរីភាពនៃ ការ​​បង្កើត​អង្កការ​សមាគម​នៅ​ក្នុង​ប្រទេស​កម្ពុជា​​នៅពេល​នេះ​កំពុង​ជួប​ការ​គាប​សង្កត់​យ៉ាង​ខ្លាំង​”​។

លោក​បាន​បន្ត​ទៀត​ថា “យើង​ទាំង​អស់​គ្នា​ចង់​មើល​ឃើញ​ឧស្សាហកម្មកាត់​ដេរ​​មាន​និរន្តរភាព​ ហើយ​រដ្ឋាភិបាល​ និង​នយោជក​ចាំបាច់​ត្រូវ​តែ​គោរព​សេរីភាព​នៃ​ការ​បង្កើត​អង្គការ​សមាគម​។ សហជីព​នានា​នៅ​ក្នុង​ប្រទេស​កម្ពុជា និង​នៅ​ជុំវិញ​ពិភព​លោក​ នឹង​ធ្វើ​យុទ្ធនាការ​ដើម្បីធ្វើ​​ឲ្យ​ប្រាកដ​ថា កម្មករ​កម្ពុជា​អាច​ប្រើ​ប្រាស​់​សិទ្ធិជាមូល​ដ្ឋាន​របស់​ខ្លួន​បាន​”។

លោក ផៃ ស៊ីផាន អ្នក​នាំពាក្យ​ទីស្ដីការ​គណៈ​រដ្ឋមន្ត្រី បាន​មាន​ប្រសាសន៍​ថា ច្បាប់​ស្ដីពី​សហជីព​នឹង​បម្រើ​ផល​ប្រយោជន៍របស់​​កម្មករ​ និង​និយោជក ហើយ​បាន​ចាត់​ទុក​សហ​ជីព​នានា​ថា ជា​ក្រុម​គ្រោះ ថ្នាក់​។

លោក​ ផៃ ស៊ីផាន មាន​ប្រសាសន៍​បន្ថែម​​ទៀត​ថា “ខ្ញុំ​រំពឹង​ថា ច្បាប់​នេះ​នឹង​បម្រើ​ផល​ប្រយោជន៍របស់​កម្មករ ព្រម​ទាំង​ផល​ប្រយោ​ជន៍​​របស់​និយោជក​ផង​ដែរ។ យើង​ចង់​មើល​ឃើញ​កម្មករ​ក្លាយ​ជា​បុគ្គល​ដ៏សំខាន់​របស់​និយោជក។ ប្រសិន​បើ​អ្នក​​​សម្លឹង​មើល​ទៅ​​សហ​ជីព​​រហូត​មក​ទល់​ពេល​នេះ​​ពួកគេ​ទំនេរ​អាច​ធ្វើ​អ្វីដែលពួកគេ​ចង់​ ទោះបីជា​ពួកគេ​រំលោភបំពាន​ច្បាប់​ក៏ដោយ​ ក៏ពួកគេ​នៅ​តែ​​មិន​អីដដែល។ ប្រសិន​បើ​ [ក្រុម​ហ៊ុន​សម្លៀក​បំបាក់​ទាំង​នេះ​] ព្រួយ​បារម្ភ​ យើង​ក៏គោរព​តាម​នោះដែរ​”៕ សុខុម​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស