លោក អ៊ុច បូរិទ្ធ រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិបានលើកឡើង ពេលការវិលត្រឡប់មកដល់រាជធានីភ្នំពេញ កាលពីថ្ងៃសៅរ៍ថា ប្រទេសកម្ពុជាបានបន្ទោសថា ការដែលខ្លួនផ្អាកសិទ្ធិសេរីភាពតាមរដ្ឋធម្មនុញ្ញ ក្នុងការប្រមូលផ្តុំគឺដោយសារតែក្រុមប្រឆាំងខាងនយោបាយគ្មានសណ្តាប់ធ្នាប់។
លោកបានថ្លែងបែប នេះ អំឡុងការប្រជុំទ្វេភាគីជាមួយសហភាពអឺរ៉ុបនៅក្នុងទី ក្រុងព្រុចស៊ែលកាល ពីសប្តាហ៍មុន និងបានអះអាងថា ការរឹតបន្តឹងនេះធ្វើឡើង បណ្តោះអាសន្នប៉ុណ្ណោះ។
លោក បូរិទ្ធ បានមានប្រសាសន៍ប្រាប់ក្រុមអ្នកយកព័ត៌មាននៅអាកាសយានដ្ឋានអន្តជាតិភ្នំពេញថា រយៈពេលបួនថ្ងៃនៃការ “ចរចាជាចំហនិងស្ថាបនា” នៅក្នុងទីក្រុងព្រុចស៊ែល ការអាះអាងចុងក្រោយរបស់គណៈកម្មការ រួមសហភាពអឺរ៉ុប ផ្តោតលើគ្រប់ចំណុចតាំងពីការផ្តល់ជំនួយ ពាណិជ្ជកម្ម រហូតដល់សិទ្ធិមនុស្ស។
លោក បូរិទ្ធ បានលើកឡើងអំពីការរឹតបន្តឹងរបស់រដ្ឋាភិបាលចំពោះការប្រមូលផ្តុំដោយសន្តិវិធី ជាការហាមប្រាមដែលអ្នក ជំនាញខាងច្បាប់លើកឡើងថាខុសច្បាប់ថា “យើងបានបញ្ជាក់ច្បាស់ថា វាជាការហាមប្រាមបណ្តោះអាសន្ន មិនមែនជាការលុបបំបាត់ទេ”។
លោកបានប្រាប់អ្នកយកព័ត៌មានថា “ត្រូវតែធ្វើឲ្យសភាពការណ៍មានស្ថិរភាព ដែលអាចប៉ះពាល់ដល់សុវត្ថិភាពសង្គមនិងជីវភាពរបស់ប្រជាពលរដ្ឋ។ នេះជាគោលបំណងសំខាន់របស់រដ្ឋាភិបាល”។
ក្រសួងមហាផ្ទៃបានធ្វើការហាមប្រាមមិនឲ្យមានការប្រមូលផ្ដុំគ្នាកាលពីថ្ងៃទី៤ ខែមករា ជាថ្ងៃដែលនគរបាលនិងកងកម្លាំងរបស់រដ្ឋាភិបាលដែលស្លៀកពាក់សីុវិល ដែលមានខែល និងដំបងឆក់បានបង្ក្រាបសកម្មភាពតវ៉ានៅក្នុងទីលានប្រជាធិបតេយ្យក្នុងរាជធានីភ្នំពេញ ដែលរដ្ឋាភិបាលបានចាត់ទុកថា ជាកន្លែងជួបជុំមួយសម្រាប់ការតវ៉ា។
លោក បូរិទ្ធ បានមានប្រសាសន៍ថា រដ្ឋាភិបាលដែលបានបំបែកការតវ៉ាដោយសន្ដិវិធីមួយចំនួនចាប់តាំងពីបម្រាមមិនឲ្យមានការប្រមូលផ្ដុំគ្នា ចូលជាធរមាននោះ គ្រាន់តែមានគោលបំណងនោះប៉ុណ្ណោះ។ លោកបានមានប្រសាសន៍ថា “ខ្ញុំបាននិយាយយ៉ាងច្បាស់ជាមួយសហភាពអឺរ៉ុបថា ការហាមប្រាមនេះមិនមែនជាអ្វីដែលយើងចង់បាននោះទេ ក៏ប៉ុន្តែយើងត្រូវតែធ្វើដើម្បីរក្សាសន្ដិភាព”។
លោកបានបន្ថែមថា “ខ្ញុំក៏បានប្រាប់សហភាពអឺរ៉ុបផងដែរថា រដ្ឋាភិបាលកម្ពុជាប្ដេជ្ញាការពារនិងជំរុញផ្នែកសិទ្ធិមនុស្សនិងប្រជាធិបតេយ្យ។ ក៏ប៉ុន្តែយើងជំទាស់ដាច់ខាតចំពោះសកម្មភាពដែលប្រើតម្លៃសិទ្ធិមនុស្សនិងប្រជាធិបតេយ្យ ដើម្បីផលប្រយោជន៍នយោបាយរបស់មនុស្សមួយក្រុមតូច”។ លោកបានសំដៅដល់គណបក្សសង្គ្រោះជាតិ ដែលអះអាងថា ខ្លួនឈ្នះការបោះឆ្នោតជ្រើសរើសតំណាងរាស្ត្រកាលពីខែកក្កដា និងមានការលួចបន្លំសន្លឹកឆ្នោតដ៏ច្រើនធ្វើឡើងដោយគណបក្សប្រជាជនកម្ពុជាដែលកាន់អំណាច។
លោក បូរិទ្ធ បានលើកឡើងថា សហភាពអឺរ៉ុបបានលើកឡើងបញ្ហាការនាំចេញស្ករសរបស់កម្ពុជាទៅសហភាពអឺរ៉ុប ដែលបញ្ចូលការមិនយកពន្ធពាណិជ្ជកម្មចំពោះគម្រោងពាណិជ្ជកម្មមួយដើម្បីអភិវឌ្ឍន៍ EBA ។
ប្រជាកសិករកម្ពុជារាប់ពាន់នាក់បានចោទក្រុមហ៊ុនផលិតស្ករស ដែលគាំទ្រដោយពាណិជ្ជករស្និទ្ធនឹងគណបក្សប្រជាជនកម្ពុជាថា បានលួចដីរបស់ខ្លួន រួមជាមួយនឹងអង្គការសិទ្ធិមនុស្ស និងសមាជិកសភាពអឺរ៉ុបខ្លះ ចង់បានផលប្រយោជន៍ពាណិជ្ជកម្មស្ករសកម្ពុជា ដែលត្រូវបានផ្អាក។
លោក បូរិទ្ធ បានឲ្យដឹងថា “ពួកគេ [ សហភាពអឺរ៉ុប] បានលើកឡើងបញ្ហានេះ ប៉ុន្តែពួកគេបានលើកឡើងដើម្បីសរសើរឆន្ទៈរបស់រដ្ឋាភិបាលក្នុងការដោះស្រាយបញ្ហាដីធ្លីរាប់ទាំងដីចម្ការអំពៅផងដែរ។
រដ្ឋាភិបាលបានដាក់វិធានការបង្កកការផ្ដល់ដីសម្បទានថ្មីសម្រាប់ក្រុមហ៊ុនចម្ការកៅស៊ូទ្រង់ទ្រាយឧស្សាហកម្មក្មុងឆ្នាំ២០១២ ហើយក្នុងរយៈពេលប៉ុន្មានខែនេះ បានចាប់ផ្ដើមពិភាក្សាជាមួយសហភាពអឺរ៉ុបក្នុងរាជធានីភ្នំពេញដើម្បីរកវិធានការជួយក្រុមគ្រួសារដែលបាត់បង់ដីដោយសារតែក្រុមហ៊ុនផលិតចម្ការអំពៅនេះ។
លោក បូរិទ្ធ បានឲ្យដឹងថា គណៈប្រតិភូរបស់សហភាពអឺរ៉ុបមួយក្រុមនឹងបំពេញទស្សនកិច្ចនៅក្នុងប្រទេសកម្ពុជានៅថ្ងៃទី២៥ ខែមីនា ដើម្បីពិភាក្សាអំពីបញ្ហាជាច្រើន បន្ទាប់ពីមានកិច្ចប្រជុំធ្វើឡើងនៅទីក្រុងព្រុចសែល។
យោងតាមសេចក្ដីថ្លែងការណ៍មួយពីសហភាពអឺរ៉ុប លោក ហ្គារ៉េល ឌឹ ហ្គាច់ (Karel de Gucht) ស្នងការពាណិជ្ជកម្មស្ថាប័ននេះ នឹងបំពេញទស្សនកិច្ចនៅក្នុងប្រទេសនេះនៅថ្ងៃស្អែកជាមួយលោក ស៊ុន ចាន់ថុល រដ្ឋមន្ត្រីក្រសួងពាណិជ្ជកម្ម។
លោក ឌឹ ហ្គាច់ បាននិងកំពុងតែធ្វើញត្តិដើម្បីស៊ើបអង្កេតសម្បទានដីរបស់កម្ពុជាទាក់ទងនឹងការរំលោភសិទ្ធិមនុស្សយ៉ាងច្រើនលើប្រជាកសិករក្រីក្រ ប៉ុន្តែលោកបានបញ្ជាក់ថា លក្ខខណ្ឌសម្រាប់ការស៊ើបអង្កេតទៅលើការរំលោភសិទ្ធិមនុស្សមូលដ្ឋាន មិនទាន់ត្រូវបានដោះស្រាយនៅឡើយទេ។
ទោះជាយ៉ាងណា ក្រុមហ៊ុនកូកាកូឡា បច្ចុប្បន្ននេះកំពុងតែធ្វើការស៊ើបអង្កេតរបស់ខ្លួនលើការរំលោភសិទ្ធិមនុស្សដោយក្រុមហ៊ុនចម្ការអំពៅ ដែលធ្វើអាជីវកម្មនៅក្នុងប្រទេសកម្ពុជា។
លោក បូរិទ្ធ បានវាយតម្លៃអំពីការចរចាបន្ថែមទៀតក្នុងទីក្រុងព្រុចសែល ច្រើនជាងអ្វីដែលមន្ត្រីសហភាពអឺរ៉ុបបានចូលរួមក្នុងជំនួបនេះបានលើកឡើងកាលពីថ្ងៃ ផងដែរ។
មន្ត្រីអានាមិករូបនេះបានលើកឡើងថា សហភាពអឺរ៉ុបបានជំរុញឲ្យកម្ពុជាដោះលែងសកម្មជនសិទ្ធិមនុស្សចំនួន២១រូបដែលគេជឿជាទូទៅថា ត្រូវបានចាប់ខ្លួនដោយគ្មានកំហុស អំឡុងការបង្ក្រាប ដែលប៉ះពាល់ដល់ជីវិតរបស់កម្មកររោងចក្រកាត់ដេរ ដែលធ្វើការតវ៉ាកាលពីក្នុងខែមករា។
ក្រុមមន្ត្រីបានលើកឡើងថា សហភាពអឺរ៉ុបក៏បានចាប់អារម្មណ៍ទៅលើគណៈប្រតិភូរដ្ឋាភិបាលកម្ពុជា ដែលត្រូវការកែទម្រង់ប្រព័ន្ធតុលាការ និងគណៈកម្មាធិការជាតិរៀបចំការបោះឆ្នោតរបស់ខ្លួន និងព្រមានអំពីផលវិបាកខាងនយោបាយសម្រាប់គណបក្សប្រជាជនកម្ពុជា នៅក្នុងការបោះឆ្នោតជ្រើសតាំងតំណាងរាស្ត្របន្ទាប់ប្រសិនបើពួកគេមិនព្រមអំពាវនាវឲ្យមានការកែទម្រង់នោះទេ។
គណបក្សប្រជាជនកម្ពុជា ដែលគ្រប់គ្រងអំណាចយូរមកហើយបានឈ្នះការបោះឆ្នោតជ្រើសតាំងតំណាងរាស្ត្រកាលពី ឆ្នាំមុនដោយទទួលបាន៦៨អាសនៈក្នុងរយៈ ពេល២០ឆ្នាំមកនេះ ហើយគណបក្សសង្គ្រោះជាតិទទួលបាន៥៥អាសនៈ៕ ប៊ុននី