មន្ត្រីនិងអ្នកភូមិបានឲ្យដឹងថា កាលពីថ្ងៃសៅរ៍នគរបាលនិងកងរាជអាវុធហត្ថបានដុតលំនៅដ្ឋានចំនួន៤៨ខ្នងនៅក្នុងស្រុកកែវ សីមា ខេត្តមណ្ឌលគិរី ដោយចោទប្រកាន់ក្រុមគ្រួសារនៅទីនោះថា បានសង់លំនៅ ដ្ឋានខុសច្បាប់ក្នុងតំបន់ការពារ និងទន្ទ្រានដី ព្រៃការពារសម្រាប់ធ្វើស្រែចម្ការ។
លោកអភិបាលស្រុក ស៊ិន វ៉ាន់វុធ បានមានប្រសាសន៍ថា លំនៅដ្ឋាននេះស្ថិតក្នុងតំបន់ មានទំហំ៤៨ហិកតា នៅជុំវិញភូមិអូរច្រា ឃុំស្រែព្រះ និងត្រូវបានដុតខ្ទេច ព្រោះ អ្នកស្រុកមិនអើពើម្តងហើយម្តងទៀតចំពោះការព្រមានឲ្យឈប់រានព្រៃការពារ។
លោក វ៉ាន់ វុធ បានមានប្រសាសន៍ថា “យើងបានដុតផ្ទះទាំងនេះ ពីព្រោះពួកគាត់បានសង់លំនៅដ្ឋានលើដីរដ្ឋ។ អាជ្ញាធរមិនទទួលខុសត្រូវចំពោះការខូចខាតទ្រព្យសម្បត្តិរបស់ម្ចាស់ផ្ទះ ពីព្រោះពួកគាត់សង់លំនៅដ្ឋានលើដីនេះ បន្ទាប់ពីរដ្ឋាភិបាលចេញសារាចរ០១”។
លោកអភិបាលបានមានប្រសាសន៍ថា សារាចរដែលអនុញ្ញាតឲ្យលោកដុតលំនៅ ដ្ឋាននោះ មានទំនាក់ទំនងជាមួយកម្មវិធីប្រគល់កម្មសិទ្ធិដីឆ្នាំ២០១២របស់លោក ហ៊ុន សែន ដែលគ្រោងនឹងបង្កើនការចេញប័ណ្ណកម្មសិទ្ធិដីធ្លី។
លោក វ៉ាន់វុធ អះអាងថា ក្រុម គ្រួសារដែលលំនៅដ្ឋានរបស់ខ្លួនត្រូវបានដុតនោះបានរើមកតំបន់នេះកាលពីពីរឆ្នាំមុន ពីខេត្តកំពង់ចាម ព្រៃវែង ក្រចេះនិងខេត្តតាកែវ។ រដ្ឋាភិបាលបានឲ្យដឹងថា “យើងបានជូនដំណឹងប្រាប់ពួកគេពីរលើកហើយថា ពួកគេត្រូវតែឈប់រានដីនេះ ប៉ុន្តែពួកគេព្រងើយនឹងការព្រមាននេះ”។
តំបន់មានបញ្ហានេះមានព្រំប្រទល់ជាប់នឹងស្រុកស្នួល ខេត្តក្រចេះ ដែលកាលពីខែមុនអាជ្ញាធរមូលដ្ឋានបានដុតផ្ទះចំនួន៥៦ខ្នងដោយចោទប្រហាក់ប្រហែលគ្នាថា ក្រុមគ្រួសាររស់នៅក្នុងលំនៅដ្ឋានទាំងនេះរើទៅក្នុងតំ បន់នេះ និងរានដីការពារជាង៥.០០០ហិកតាដោយខុសច្បាប់។
លោកស្រី សុខ រដ្ឋា អ្នកសម្របសម្រួលរបស់អង្គការអាដហុក ប្រចាំក្នុងខេត្តនេះបានលើកឡើងថា ប្រជាជនគ្រូសារទាំងនេះបានសង់លំនៅដ្ឋាននៅក្នុងឃុំ ស្រែព្រះក្នុងឆ្នាំ ២០០៩ ហើយថា អាជ្ញាធរបានអនុញ្ញាតឲ្យពួកគេបន្តរស់នៅលើដីនេះ។ លោកបានមានប្រសាសន៍ថា “ពួកគេប្រហែលជាគ្មានប័ណ្ណកម្មសិទ្ធិដីទេ ប៉ុន្តែពួកគេបាន និងកំពុងតែស្នាក់នៅលើដីនេះរយៈពេលយ៉ាងតិចប្រាំឆ្នាំ ហើយនេះ មានន័យថា ពួកគេកំពុងរស់នៅ ដោយស្របច្បាប់”។ លោកបានបន្ថែមថា នគរបាលក៏បំផ្លាញផលដំណាំរបស់អ្នកភូមិ អំឡុងការបណ្តេញចេញដ៏សាហាវកាលពីថ្ងៃសោរ៍។
អ្នកភូមិវ័យ៥៧ឆ្នាំម្នាក់ ដែលសុំមិនបញ្ចេញឈ្មោះ ដោយសារខ្លាចមានការសងសឹក បានឲ្យដឹងថា នេះជាលើកទីបីហើយក្នុងមួយខែដែល នគរបាលបានចុះទៅដុតលំនៅដ្ឋានរបស់ប្រជាជន។ អ្នកស្រីមានប្រសាសន៍ ថា “ខ្ញុំមិនហ៊ានវិលត្រឡប់ទៅរស់នៅលើដីនោះទេពេលនេះ ពីព្រោះយើងខ្លាចមានសកម្មភាពដ៏សាហាវរបស់នគរបាល។ ពួកគេអាក្រក់ជាងរបប ប៉ុល ពត ទៅទៀត” ៕ ប៊ុននី