35 C
Phnom Penh

អ្នក​ភូមិ​នៅខេត្ត​កោះ​កុង​នាំ​គ្នា​បិទ​ផ្លូវ​ ដើម្បី​បញ្ឈប់​ក្រុមហ៊ុន​ចិន​ដែលគ្រោង​​សង់​ទំនប់​វារី​អគ្គិសនី​

ដោយ ឌឹ ខេមបូឌា ដេលី

បទវិភាគ

កាល​ពី​ថ្ងៃ​សុក្រ​ អ្នកភូមិប្រហែល​១០០​នាក់​​នៅក្បែរ​ជ្រលង​ អារ៉ែង​ ក្នុង​ខេត្ត​កោះ​កុង​​​បាន​បិទ​ផ្លូវ​ឆ្ពោះ​ទៅ​កាន់​ដី​ធ្លី​មួយ​កន្លែង​ដែល​ក្រុមហ៊ុនចិន​​បាន​ជួល​​ ដើម្បី​ស្តុក​គ្រឿង​សំណង​​់​​និង​គ្រឿង​ចក្រ​សម្រាប់​សាង​សង់​ទំនប់​វារី​អគ្គិសនី​ ស្ទឹង​ឆាយ​ អារ៉ែង​ ដែល​នឹងអាច​ធ្វើ​​​​​ឲ្យ​​អ្នក​ភូមិ​រាប់​រយ​គ្រួសារ​ត្រូវ​បណ្តេញ​ចេញ​ពី​តំបន់​នេះ​។

លោក សុខ​ រស្មី​ អាយុ​២៥​ឆ្នាំ​​ជា​តំណាង​ឲ្យ​​​ជន​ជាតិ​ភាគតិច​ជង​ ដែល​រស់​នៅ​ក្នុង​តំបន​់​ក្បែរ​ជ្រ​លង​ អារ៉ែង​ បាន​និយាយ​កាល​ពី​ថ្ងៃ​សុក្រ​ថា “ យើង​បិទ​ផ្លូវ​ ព្រោះ​យើង​មិន​ចង់​ឲ្យ​ក្រុមហ៊ុន​ដឹក​ជញ្ជូន​សម្ភារៈ​​ទៅកាន់​​ការ​​ដ្ឋាន​សាង​សង់​នោះ​ទេ​ ហើយ​យើង​ចង់​ឲ្យ​​​វិស្វករ​ជន​ជាតិ​ចិន​ពីរ​នាក់​ចាក​ចេញ​ពី​តំបន់​នេះ​”។

លោក​ សុខ​ រស្មី​ បាន​ឲ្យ​ដឹងថា សហ​គមន៍​នៅ​ក្នុង​ស្រុក​ថ្ម​បាំង​ បាន​ត្រៀម​​​​បិទ​ផ្លូវ​បន្ថែម​ទៀត​រួច​ហើយ​ ប្រសិន​បើ​ពួក​គាត់​ឃើញ​មាន​​​គ្រឿង​ចក្រ​ត្រូ​វ​បាន​ដឹក​ជញ្ជូន​ទៅ​កាន់​តំបន់​ទំនប់​វារី​អគ្គិសនី​​ដែលគេ​គ្រោង​នឹង​សាង​សង់​ឡើង​នោះ​។

លោក​ អាឡិច​ ហ្គន​ហ្សាលេហ្ស ដេវីដ​​សុន​ (Alex Gonzalez-Davidson) សហ​ស្ថាបនិក​អង្គការ​មាតា​ធម្មជាតិ​បាន​លើក​ឡើង​ថា នគរ​បាល​និង​មន្ត្រី​កង​រាជ​អាវុធ​ហត្ថ​​ប្រហែល​១០នាក់​ត្រូវ​បាន​បញ្ជូន​ឲ្យ​ទៅ​ឈរ​ជើង​នៅ​តំបន់​នោះ​ចាប់​តាំង​ពី​ល្ងាច​ថ្ងៃ​សុក្រ​មក​ម្លេ៉ះ​ ពោល​គឺ​ ប៉ុន្មាន​ម៉ោង​បន្ទាប់​ពី​ការ​បិទ​ផ្លូវ​ដោយ​​​សន្តិវិធីដែលមាន​​​​រយៈពេល​៨ម៉ោង​ត្រូវ​បាន​បញ្ចប់​។

លោក​ ហ្គន​ហ្សាលេហ្សដេវីដ​​សុន​ បាន​មាន​ប្រសាសន៍កាល​ពី​ល្ងាច​ថ្ងៃ​សុក្រថា “អ្នក​ភូមិ​បាន​គំរាម​ដុត​ប៉ុស្តិ៍​នគរបាល​ ប្រសិន​បើ​បុរស​ជន​ជាតិ​ចិន​ទាំង​​ពីរ​នាក់​នោះ​មិន​ចាក​ចេញ​ពី​តំបន់​នោះទេ​​។ ហេតុ​ដូច្នេះ​ ឥឡូវ​នេះ​យើង​បាន​ឃើញ​រថយន្ត​មួយ​បាំង​កន្លះ​ចំនួន​ពីរ​គ្រឿង​​ដឹក​នគរបាល​និង​កង​រាជ​អាវុធ​ហត្ថ​ទៅ​កាន់​តំបន​់​នោះ”​។

កាល​ពី​ដើម​ខែ​នេះ​ ក្រុម​ហ៊ុន Sinohydro  (Cambodia) United Ltd. បាន​ជួល​ដី​​នៅ​ក្នុង​ឃុំ​ជំនាប់​ ស្រុក​ថ្មបាំ​ង​នេះ​ដើម្បី​ធ្វើ​ឃ្លាំង​មួយ​សម្រាប់​ដាក់​គ្រឿង​ចក្រ​ និងសម្ភារ​​ផ្សេង​ៗ​​​ប្រើ​សម្រាប់​​សាង​សង់​ទំនប់​វារី​អគ្គិសនី​កម្លាំង​១០៨​មេហ្គាវា៉ត់​។​

លោក​ អុិន គង់ចិត្រ​ អ្នក​សម្រប​សម្រួល​របស់​អង្គការ​សិទ្ធិ​មនុស្ស​ក្នុង​ស្រុក​​លីកាដូ​ ប្រចាំ​ខេត្ត​កោះ​កុង​បាន​លើក​ឡើង​ថា​ ទាំង​រដ្ឋាភិបាល​និង​ក្រុមហ៊ុន​ Sinohydro  United Ltd.​ដែល​កាល​ពី​ដើម​ឆ្នាំ​នេះ ទទួល​បាន​សិទ្ធិ​​កាន់​កាប់​ដី​សម្ប​ទាន​ដើម្បី​សាង​សង់​ទំនប់​វារី​អគ្គិសនី​ពី​ក្រុមហ៊ុន​មួយ​ផ្សេង​ទៀត​​ មិន​មាន​បំណង​ធ្វើ​ការ​ពិភាក្សា​ណា​មួយ​ជា​មួយ​អ្នក​ភូមិ​សហគមន៍​ដែល​នឹង​រង​ផល​ប៉ះ​ពាល់​ខ្លាំង​នោះ​ឡើយ​។

លោក អុិន គង់​ចិត្រ ​បាន​មាន​ប្រសាសន៍​ ថា​ “អាជ្ញាធរ​​​បាន​ត្រឹម​តែ​ផ្តល់​ដំណឹង​ដល់​ពលរដ្ឋ​អំពី​ការ​អភិវឌ្ឍទំនប់​វារី​អគ្គិសនី​ ស្ទឹង​ឆាយ អារ៉ែង​ប៉ុណ្ណោះ​ ប៉ុន្តែ​ពួកគេ​​មិន​ដែល​បាន​ពិភាក្សា​ជា​សាធារណៈ ឬ​ក៏​ជាមួយ​សហ​គមន៍​ឡើយ​”។

ទោះ​បី​ជា​ការ​សាង​សង់​ទំនប់​នេះ​មិន​ដឹង​ថា​ត្រូវ​ចាប់​ផ្តើម​នៅ​ពេល​ណា​នោះ​ក៏ដោយ​ ក៏​ការ​ចុះ​ទៅ​ត្រួត​ពិនិត្យ​ក្នុង​ពេល​ថ្មី​នេះ​របស់​វិស្វករ​ជន​ជាតិ​ចិន​និង​ការ​សាង​សង់​ឃ្លាំង​សម្រាប់​ផ្ទុក​សម្ភារ​ផ្សេង​ៗ​ បាន​ធ្វើ​ឲ្យ​អ្នក​ភូមិ ព្រួយ​បារម្ភ​ថា ការ​សាងសង់​ទំនប់​វារី​អគ្គិសនី​ ដែ​ល​នឹង​ធ្វើ​ឲ្យ​ជន់​លិច​ដី​ទំហំ​​២.០០០​​ហិកតា​នឹង​ចាប់​ផ្តើម​ក្នុ​ង​ពេល​ឆាប់ៗ​។

ដី​ដែលនឹង​​ត្រូវ​ជន​់​លិច​រួម​មាន​ព្រៃ​នៅ​ តំបន់​ព្រៃ​ការ​ពារ​ភ្នំ​ក្រវាញ​ ដែល​ត្រូវ​បាន​គេ​ចាត់​ទុក​ថា ជា​តំបន់​ស័ក្តិសិទិ្ធ​សម្រាប់​ជន​ជាតិ​ភាគ​តិច​ជង​ ហើយ​អ្នក​បរិស្ថាន​បាន​សម្តែង​ក្តី​ព្រួយ​បារម្ភ​ចំពោះ​អនាគត​នៃ​ប្រភេទ​​រុក្ខជាតិ​កម្រ​និង​សត្វ​ជិត​ផុត​ពូជ​​ដូច​ជា​ក្រពើ​ភ្នំ​​ជា​ដើម​។

លោក​ កែវ​ នីបូរា៉​ អភិបាល​រង​ស្រុក​ថ្មបាំង​​​ បាន​ឲ្យ​ដឹង​កាល​ពី​ថ្ងៃ​សុក្រ​ថា ក្រុម​ហ៊ុន Sinohydro United Ltd.​ ទទួល​បាន​ការ​អនុ​ញ្ញាត​ពី​ក្រសួង​​ថាមពល​និង​ធន​ធាន​រ៉ែ​​ដើម្បី​កាន់​កាប់​ដី​មាន​ជម្លោះ​។

លោក នី​បូរា៉​ បាន​មាន​ប្រសាសន៍​ថា “ ពួ​ក​គេ​ [វិស្វករ​ជន​ជាតិចិន​] បាន​មក​ទី​នេះ​បី​បួន​ថ្ងៃ​កន្លង​មក​ហើយ​ ដើម្ប​ី​ប្រមូល​​ទិន្នន័យ​និង​រៀប​ចំ​​​កន្លែង​មួយ​ដើម្បី​ផ្ទុក​សម្ភារ​របស់​ពួក​គេ​។​​វិស្វករ​ជន​ជាតិ​ចិន​ទទួល​បាន​ការ​អនុញ្ញាត​ពី​ក្រសួង​​​​ឲ្យ​មក​ស្នាក់​នៅ​ទី​នេះ​ ចាប់​ពី​ថ្ងៃ​ទី​១៤​ខែ​​​កុម្ភៈ​ រហូត​ដល់​ថ្ងៃ​ទី​២៥​ ខែ​មិថុនា​ ដើម្បី​​​ធ្វើ​​​ការ​សិក្សា​បន្ថែម​លើ​គម្រោ​ង​ទំនប់​វារី​អគ្គិសនី​នេះ​”៕​ស៊ុយឈាង​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស