លោក ដេវីដ ហូលីដេ (David Holliday) គឺជាវិចិត្រមួយរូបដែលប្រើប្រាស់ជំនាញថតរូបធ្វើជាចំណុចចាប់ផ្តើមដើម្បីបង្កើតនៅទស្សនវិស័យផ្ទាល់ខ្លួនស្តីពីទេសភាពក្នុងទីក្រុង ដែលស្ថិតនៅជុំវិញខ្លួនលោក។
ស្នាដៃរូបថតក្រាហ្វិកចុងក្រោយរបស់លោកដែលត្រូវបានតំាងពិព័រណ៍នៅវិចិត្រ សាល Insider Gallery នៅសណ្ឋាគារអាំងទែកង់ទីណង់តាល់ គឺត្រូវបានព្រីនចេញនៅលើផ្ទាំងសំពត់គំនូរ ដោយរូបភាពទាំងអស់នោះឆ្លងកាត់ការផលិតកែច្នៃជាច្រើនដំណាក់កាលចាប់តាំងពីលោកបានសម្លឹងមើលផ្ទាំងទស្សនីយភាពទាំងនេះតាមកញ្ចក់ឡែនម៉ាសីុនថតរបស់លោក។
លោកបានមានប្រសាសន៍ថា “ វាប្រៀបបានទៅនឹងផ្ទាំងគំនូរអបដោយពន្លឺ មើលទៅវាលែងដូចជារូបថតទៀតហើយ”។ រូបភាពដែលមានឈ្មោះថា “ Structures” ទាំងនេះបង្ហាញពីអគារនានានៅក្នុងរាជធានីភ្នំពេញ ក្រុងកំពត និងក្រុងសៀមរាប ព្រមទាំងបង្ហាញពីផ្ទាំងទស្សនីយភាពប្រាសាទអង្គរវត្តផងដែរ។
នៅពេលលោក ដេវីដ ហូលីដេ រកឃើញប្រធានបទមួយដែលលោកចូលចិត្ត លោកនឹងថតរូបរាប់រយសន្លឹកពាក់ព័ន្ធនឹងប្រធានបទនោះ ហើយជ្រើសរើសរូបថតដែលល្អបំផុតប្រហែល៣០សន្លឹក ហើយបន្ទាប់មកដាក់វាតំាងនៅលើក្តារខៀនពណ៌ស រួចចាប់ផ្តើមបង្កើតរូបភាពចុងក្រោយ។
លោកបានមានប្រសាសន៍ថា “ខ្ញុំបញ្ចូលគំនូរព្រាង និងខ្មៅដៃផាត់ពណ៌ជាមួយគ្នា។ ខ្ញុំបង្កើតការផ្គុំបញ្ចូលគ្នាដើម្បីធ្វើឲ្យវាកាន់តែស្រស់ស្អាតជាមួយនឹងខ្មៅដៃផាត់ពណ៌និងក្រដាសរហែក”។
ស្នាដៃរបស់លោកដែលមានឈ្មោះថា “White Building” មានរូបភាពកាំជណ្តើរពណ៌ត្នោត ពណ៌ខៀវ និងឥដ្ឋពណ៌ក្រហមដែលបង្ហាញពីភាពមមាញឹកនៅកន្លែងនោះ។ ស្នាដៃមួយទៀតដែលមានឈ្មោះថា “ Temple Green” ក៏មានរូបភាពជាច្រើនដែលបង្ហាញពីប្រាង្គប្រាសាទនានានៅក្នុងឧស្យានបុរាណអង្គររំលេចចេញជាពណ៌ប្រផេះ ពណ៌បៃតង និងពណ៌មាសឆ្អិនឆ្អៅ។
ប៉ុន្តែ ស្នាដៃមួយទៀតដែលមានឈ្មោះថា “ Church Arch” មានរូបភាពតែមួយគត់ដែលបង្ហាញពីព្រះវិហារគ្រិស្តនៅលើភ្នំបូកគោ រំលេចចេញជាពណ៌ខៀវស្រាល និងពណ៌ត្នោត។
ដោយចាប់កំណើតនៅក្នុងគ្រួសារវិចិត្រករក្នុងប្រទេសអង់គ្លេស លោក ដេរីដ ហូលីដេ បានរស់នៅក្នុងប្រទេសអូស្ត្រាលីអស់រយៈពេល១៥ឆ្នាំ ហើយនៅទីនោះលោកបានចូលរួមពាក់ព័ន្ធជាមួយសហគមន៍វិចិត្រករ ដោយលោកបានរួមគ្នាបង្កើតវិចិត្រសាលមួយឡើង ហើយធ្វើការជាប្រចាំជាមួយអង្គការ Sculptors Scociety នៅក្នុងទីក្រុងស៊ីដនី។
លោក ដេវីដ ហូលីដេ បានរស់នៅក្នុងប្រទេសកម្ពុជាអស់រយៈពេលបួនឆ្នាំមកហើយ។ ការតាំងពិព័រណ៍របស់លោកនៅ Insider Gallery នឹងបន្តរហូតដល់ថ្ងៃទី១១ ខែមេសា៕ សុខុម