បុគ្គលិកសហជីពពីរនាក់បានធ្វើពាក្យបណ្តឹងទៅសាលាដំបូងរាជធានីភ្នំពេញ ដោយអះអាងថា មេដឹកនាំជាន់ខ្ពស់របស់សម្ព័ន្ធសហជីពប្រជាធិបតេយ្យកម្មកររោងចក្រកម្ពុជា ហៅកាត់ស៊ីខាវឌូបានលួចបន្លំប្រាក់ដែលត្រូវបង់សំណងឲ្យកម្មករ បន្ទាប់ពីមានជម្លោះមួយជាមួយម្ចាស់រោងចក្រ។
បទចោទប្រកាន់មេដឹកនាំសហជីពស៊ីខាវឌូបានកើតឡើងតែប៉ុន្មានសប្តាហ៍ប៉ុណ្ណោះ មុនពេលកូដកម្មរបស់កម្មករកាត់ដេរទូទាំងប្រទេសដូចដែលបានគ្រោងទុកដើម្បីសុំឲ្យមានការដំឡើងប្រាក់ឈ្នួលអប្បបរមា១៦០ដុល្លារ ដោយសហជីពស៊ីខាវឌូ និងសហជីពចំនួនប្រាំពីរផ្សេងទៀតមានគម្រោង អំ ពាវនាវឲ្យកម្មករស្នាក់នៅផ្ទះរយៈពេលមួយសប្តាហ៍ ក្រោយពេលបុណ្យចូលឆ្នាំរយៈបីថ្ងៃក្នុងខែមេសា។
បណ្តឹងនេះក៏បានកើតឡើង បន្ទាប់ពីមានការបង្កើនគំនាបពីរដ្ឋាភិបាល និងម្ចាស់រោងចក្រ ដើម្បីទប់ទល់ចលនាពលកម្មនៅក្នុងប្រទេស បន្ទាប់ពីគេគាំទ្រគណបក្សនយោបាយ អំឡុងមហាបាតុកម្មប្រឆាំងលោកនាយករដ្ឋមន្ត្រី ហ៊ុន សែន កាលពីខែធ្នូ។
ពាក្យបណ្តឹងដោយលោក អ៊ុំ វិសាល និងលោក រឿន ចាន់ថន ចុះថ្ងៃទី៣ ខែ មីនា និងចុះហត្ថលេខាដោយកម្មករកាត់ដេរចំនួន២៩នាក់ មានការចោទលោក អាត់ ធន់ ប្រធានសហជីពស៊ីខាវឌូ លោក គង់ អាទិត្យ អគ្គលេខាធិការស៊ីខាវឌូ និងលោក ឯក ភក្តី មន្ត្រីស៊ីខាវឌូ CCAWDU ថាបានលួចប្រាក់៩២.៩២៩ដុល្លារពីកម្មករ បន្ទាប់ពីមានជំលោះការងារមួយកើតឡើង ដែលទីបំផុតត្រូវបានសហជីពនេះជួយដោះស្រាយ។
ជម្លោះនេះបានចាប់ផ្តើម បន្ទាប់ពីមានការបណ្តេញកម្មករចំនួន៦១នាក់ពីរោងចក្រអុីហ្គាមេន (E-Garment) នៅក្នុងរាជធានីភ្នំពេញក្នុងចន្លោះពីឆ្នាំ២០០៧ ដល់២០០៨ ហើយទីបំផុតត្រូវបានដោះស្រាយក្នុងខែមីនាឆ្នាំ ២០១៣ បន្ទាប់ពីរោងចក្រត្រូវបានបញ្ជាឲ្យជួល ឬបង់សំណងឲ្យដល់កម្មករ នេះបើយោងតាមពាក្យបណ្តឹង។
ពាក្យបណ្តឹងមានខ្លឹមសារថា “យោងតាមដំណោះស្រាយឆ្នាំ២០១៣ យើងបានទទួលប្រាក់ចំនួន៣.០០០ដុល្លារ ទៅ៤.០០០ដុល្លារ សម្រាប់កម្មករម្នាក់” ប៉ុន្តែទីបំផុត យើងបានទទួលប្រាក់ពី១.២៥០ដុល្លារដល់២.៧០០ដុល្លារសម្រាប់កម្មករម្នាក់ៗ ពីព្រោះមេដឹកនាំទាំងបីរូបនេះបានអះអាងថា នេះជាចំនួនប្រាក់ ដែលយើងទទួលបាន និងរារាំងមិនឲ្យយើងប្រាប់ភាគីទី៣ ឬដាក់ប្តឹងពួកគេ”។
ពាក្យបណ្តឹងនេះមានសេចក្តីអះអាងថា លោក វិសាល និងលោក ចាន់ថន ត្រូវបានផ្តល់ប្រាក់ខែខ្ពស់ជាងមុន ដើម្បីរក្សាអំពើពុករលួយ ប៉ុន្តែលោកទាំងពីរបានសម្រេចចិត្តយកករណីនេះទៅកាន់តុលាការ។ ពាក្យបណ្តឹងនេះមានខ្លឹមសារថា “យើងសូមស្នើឲ្យព្រះរាជអាជ្ញាផ្តន្ទាទោសជនល្មើស ដោយអនុវត្តតាមច្បាប់”។
លោក អាត់ ធន់ ប្រធានសហជីពស៊ីខាវឌូបានបដិសេធការចោទប្រកាន់លោក និងមន្ត្រីសហជីពជាន់ខ្ពស់ផ្សេងៗទៀត និងបាននិយាយថា ពាក្យបណ្តឹងពីលោក វីសាល និងលោក ចាន់ថន គឺជាការឆ្លើយតបចំពោះការមិនសប្បាយចិត្តរបស់លោកទាំងពីរនឹងតួនាទី ដែលពួកគេត្រូវបានផ្តល់ទៅតាមឋានានុក្រមរបស់សហជីព បន្ទាប់ពីការបោះឆ្នោតមួយកាលពីដើមឆ្នាំនេះ។
លោក អាត់ ធន់ បានមានប្រសាសន៍ដូច្នេះថា “ពួកគេចង់ក្លាយជាប្រធានស៊ីខាវឌូ ទើបពួកគេបង្ខូចឈ្មោះយើង ហើយ…ព្យាយាមបំបែកបំបាក់ស្ថាប័ននេះ។ ពួកគេកំពុងតែជំរុញឲ្យកម្មករបំផ្លាញ ស៊ីខាវឌូ”។
លោក អាត់ ធន់ បានលើកឡើងទៀតថា កម្មករទាំងអស់នៅរោងចក្រ អុីហ្គាមេន ត្រូវបានបង់ប្រាក់ឲ្យគ្រប់ចំនួន ដែលជាប្រាក់សំណង ហើយស៊ីខាវឌូ កំពុងពិចារណាដាក់ពាក្យបណ្តឹងប្តឹងលោក វិសាល និងលោក ចាន់ថន ពីបទបរិហាកេរ្តិ៍។
លោក អាត់ ធន់ ស្ថិតក្នុងចំណោមមេដឹកនាំសហជីពទាំងប្រាំមួយដែលជាគោលដៅនៃ១៥០បណ្តឹងស្របច្បាប់របស់ម្ចាស់រោងចក្រ បន្ទាប់ពីមានកូដកម្មដំណាក់កាលដំបូង ដើម្បីទាមទារប្រាក់ឈ្នួលអប្បបរមា ដែលបានបញ្ចប់កាលពីដើមខែមករាឆ្នាំនេះ ពេលកម្លាំងសន្តិសុខរដ្ឋចាប់ផ្តើមបង្ក្រាបដោយហិង្សាលើសកម្មភាពតវ៉ារបស់កម្មកររោងចក្រកាត់ដេរ ជាហេតុបណ្តាលឲ្យកម្មករប្រាំនាក់ស្លាប់ និងជាច្រើននាក់ទៀតរងរបួស៕ ប៊ុននី