29 C
Phnom Penh

ជាង១០ខែមកហើយតែការសន្យារបស់អភិបាលរាជធានីនៅតែមិនទាន់មានអ្វីគួរឲ្យកត់សម្គាល់

ដោយ ឌឹ ខេមបូឌា ដេលី

បទវិភាគ

នៅ​ពេល​លោក​ទទួល​តំណែង​ជា​អភិ​បាល​​​រាជ​ធានី​ភ្នំពេញ​​ កាល​ពី​ខែ​ឧសភា​ ឆ្នាំ​២០១៣​ លោក​ ប៉ា សុជាតិ​វង្ស​ បាន​សន្យា​ថា នឹង​​​ធ្វើ​ជា​អភិបាល​ដែល​នឹង​ដោះ​ស្រាយ​​គ្រប់​បញ្ហា​។

អ្នក​កាន់​តំណែង​មុន​លោក​គឺ​​លោក​ កែប​ ជុតិមា​ បាន​​មើ​ល​ការ​ខុស​ត្រូវ​ចំពោះ​ការ​បូម​ខ្សាច់​ចាក់​បំពេញ​បឹង​កក់​ និង​ការ​បណ្តេញ​ចេញ​ទ្រង់​ទ្រាយ​ធំ​លើ​អ្នក​ភូមិ​នៅ​សហ​គមន៍​បឹង​កក់​នេះ​។ ហើយ​បញ្ហា​ដែល​កើត​ឡើង​ស្រ​​ដៀង​​​​​​ៗ​​គ្នា​នេះទៀត​​​គឺ​នៅ​សហ​គមន៍​បុរី​កីឡា​ក្នុង​ខណ្ឌ​៧​មករា​ និង​តំបន់​ផ្សេង​ៗ​ទៀតក្នុង​រាជ​​​ធានី​ភ្នំ​ពេញ​ អំឡុង​​លោក​ កែប​ ជុតិមា ធ្វើ​​​ជា​​​អភិបាល​រាជ​ធានី​ភ្នំពេញ​រយៈ​ពេល​១០​ឆ្នាំ​។

បន្ទាប់​ពី​ដំឡើង​តំណែង​​ពី​តំណែង​អភិ​បាល​រង​​ទៅ​ជា​អភិបាលរាជ​ធានី​ភ្នំពេញ​ លោក​ បា៉ សុជាតិ​វង្ស​ បាន​សន្យា​នៅ​ក្នុង​​ពិធី​តែង​តាំង​តំណែង​កាល​ពី​ឆ្នាំ​មុន​ថា នឹង​ធ្វើ​ជា​អភិបាល​រាជ​ធានី​មួយ​រូបថ្មីដ៏​ល្អ​។

លោក បា៉​ សុជាតិ​វង្ស​ បាន​សន្យា​ នៅ​ពេល​នោះ​ថា“ លោក​​​​នឹង​បន្ត​ដោះ​ស្រាយ​បញ្ហា​ដែល​នៅ​សេស​សល់​មួយ​ចំនួន​ ដូច​ជា​សណ្តាប​​់​ធ្នាប់​សាធារណៈ​ និង​បញ្ហា​ចរាចរណ៍​ បរិស្ថាន​ និង​បញ្ហា​ទី​ក្រុង​ស្អាត​ ហេដ្ឋារចនាសម័្ពន្ធ​ ជា​         ពិ​សេស​ដូច​ជា​ផ្លូវ​ ប្រព័ន្ធ​លូ​ និង​បញ្ហា​ទឹក​ស្អាត​ ព្រម​ទាំង​បញ្ហា​វិវាទ​ដី​ធ្លី​ដែល​នៅ​សេស​សល់​មួយ​ចំនួន​ដូច​ជា​ នៅ​តំបន់​បឹង​កក់​ តំបន់​បុរី​កីឡា​​ ​សហគមន៍​ថ្មគោល​ និងបឹង​ស្តុក​ទឹកនានា​​”។

តែ​ទោះ​ជា​យ៉ាង​ណា​ក៏​ដោយ​ ជាង១០​ខែ​​​​កន្លង​ទៅ​ហើយ បញ្ហា​វិវាទ​ដី​ធ្លី​នៅ​តែ​មិន​ទាន់​​​ថយ​ចុះ​និង​មិន​ទាន់​ដោះ​ស្រាយ​។

កាល​ពី​សប្តាហ៍​មុន ការ​តវ៉ា​មួយ​ត្រូវ​បាន​ធ្វើ​ឡើង​នៅ​ខាង​ក្រៅ​សាលា​រាជ​ធានី​ភ្នំពេញ​ដោយ​តំណាង​អ្នក​ភូមិ​មក​ពី​សហ​គមន៍​បុរី​កីឡា​និង​បឹង​កក់​ដែល​បាន​លើក​ឡើង​ម្តង​ទៀត​អំពី​ការ​អំពាវនាវ​ជាយូរ​មក​ហើយ​របស់​ពួក​គេ​សុំ​ឲ្យ​មាន​ការ​ផ្តល់​យុត្តិ​ធម៌​និង​ការ​ទទួល​ស្គាល់​ចំពោះ​សិទ្ធិ​ដី​ធ្លី​របស់​ពួកគេ​។

តំណាង​សហគមន៍​បាន​លើក​ឡើង​ថា នៅ​មាន​​អ្នក​ភូមិ​ដែល​បដិសេធ​មិន​ព្រម​ចាក​ចេញ​ពី​ផ្ទះ​សំបែង​របស់​ខ្លួន​ជា​ច្រើន​ទៀត​នៅ​​អតីត​​​តំបន់បឹង​កក់​ ដែល​រដ្ឋា​ភិ​បាល​ត្រូវ​តែ​ផ្តល់​ប័ណ្ណកម្មសិទ្ធិ​ដី​ធ្លី​ឲ្យ​ពួក​គាត់​។ រីឯ​នៅ​តំបន់​បុរី​កី​ឡា​វិញ​ ​តង់​រហែក​រយ៉េ​រយៃ៉​​ជា​ច្រើន​នៅ​ខាង​ក្រោយ​អគារ​មួយ​ចំនួន​គឺ​ជា​ទី​ជម្រក​របស់​អ្ន​ក​ភូមិ​ប្រហែល​១០០ គ្រួសារ​ដែល​មិន​ដែល​ទទួល​បានផ្ទះ​ថ្មី​ជំនួស​ផ្ទះ​ចាស់​របស់​ពួក​គាត់​នៅ​ឡើយ​ បន្ទាប់​ពី​យល់​ព្រម​ចាក​ចេញ​ពី​ផ្ទះ​សំបែង​របស់​ខ្លួន ដើម្បី​បើក​ផ្លូវ​សម្រាប់​គម្រោង​​​សាង​សង់​របស់​ក្រុមហ៊ុន​ឯក​ជន​មួយ​។

អ្នក​ភូមិ​មក​ពី​សហគមន៍​ទាំង​ពីរ​បាន​បន្ត​ការ​តវ៉ារ​បស់​ខ្លួន​នៅ​តាម​ផ្លូវ​មួយ​ចំនួន​នៅ​ក្នុង​រាជ​ធានី​ភ្នំពេញ​។

អំឡុង​ពេល​ដែល​លោក​ ប៉ា​ សុជាតិ​វង្ស​ ត្រូវ​បាន​ដំឡើង​តំណែង​ លោក សៀ ភារម្យ​ ប្រធាន​ក្រុម​ការ​ងារ​ពិសេស​សិទ្ធិ​លំនៅ​ដ្ឋាន​​ជា​អង្គការ​ក្រៅ​រដ្ឋាភិបាល​សិទ្ធិដី​ធ្លី​បាន​លើក​ឡើង​ថា លោក​មិន​សូវ​ជា​មាន​ការ​ជឿ​ជាក់​លើ​ការ​សន្យា​របស់​អភិបាល​រាជ​ធានី​ថ្មី​នេះ​ប៉ុន្មាន​ទេ​ ព្រោះ​ការ​សន្យារ​បស់​លោក​គឺ​គ្រាន​​់​តែ​​ធ្វើ​ឡើង​នៅ​មុន​ថ្ងៃ​បោះ​ឆ្នោត​ជាតិ​កាល​ពី​ខែ​កក្កដា​ឆ្នាំ​មុនតែ​ប៉ុណ្ណោះ​។

សព្វ​ថ្ងៃ​លោក​ សៀ ភារម្យ​ នៅ​តែ​មិន​ជឿ​​ជាក់​ថា អភិបាល​រាជ​ធានី​ថ្មី​នេះ​នឹង​មាន​បំណង​​​ដោះ​ស្រាយ​វិវាទ​ដី​ធ្លី​ជាយូរ​មក​ហើយ​នេះ​ឡើយ​ ព្រោះ​មក​ទល់​នឹង​ពេល​នេះ​នៅ​មិន​ទាន់​មាន​វិវាទ​ដីធ្លី​ណាមួយ​ត្រូវ​បាន​ដោះ​ស្រាយ​​​ឡើយ​។

លោក​ សៀ ភារម្យ​ ​មាន​ប្រសាសន៍​កាល​ពី​សប្តាហ៍​មុន​ថា “ យើង​ធ្លាប់​ជួប​ជាមួយ​គាត់ [លោក​ បា៉ សុជាតិ​វង្ស​] បីបួន​លើក​មក​ហើយ​ក្នុង​ចំណោម​អង្គការ​ក្រៅ​រដ្ឋាភ​ិបាល​ដែល​ធ្វើ​ការ​ជាមួយ​សហគមន៍​បឹង​កក់​និង​បុរីកីឡា​ ហើយ​គាត់​បាន​សន្យា​ថា គាត់​នឹង​ប្តេជ្ញា​​​ដោះ​ស្រាយ​បញ្ហា​ជា​ពិសេស​បញ្ហា​ទាំង​ពីរ​នេះ​”។

លោក​បាន​ប្រសាសន៍​បន្ថែម​ថា “ ប៉ុន្តែ​បញ្ហា​ទាំងនេះ​នៅ​តែ​ពន្យារ​ពេល​”។ លោក​បាន​បន្ត​ថា លោក​ ប៉ា​ សុជាតិ​វង្ស​ ទទួល​ថ្ម​បាក់​ពី​អ្នក​កាន់​តំណែង​មុន​លោក គឺ​លោក កែប​ ជុតិមា​ ដែល​វា​លំបាក​នឹង​ដោះ​ស្រាយ​។

លោក​មាន​ប្រសាសន៍​ទៀត​ថា “ លោក ជុតិមា បាន​បន្សល់​ទុក​​នូវ​បញ្ហា​ធំៗ​ជា​ច្រើន​ ហេតុដូច្នេះ​វា​មាន​បញ្ហា​ធំៗ​ជា​ច្រើន​ដែល​ធ្វើ​ឲ្យ​លោក​ ប៉ា​ សុជាតិ​វង្ស​ មិន​អាច​ដោះ​ស្រាយ​​​បាន​ក្នុង​ពេល​ឆាប់ៗ​”។

លោក​ សៀ ភារម្យ​ បាន​លើកឡើង​ថា អ្វី​ដែល​គួរ​ឲ្យ​កត់​សម្គាល់​អំឡុង​អាណត្តិ​​របស់​អភិបាល​រាជ​ធានី​ថ្មីនេះ​គឺ​ ការ​ប្រើ​វិធី​សាស្ត្រ​យ៉ាង​ចាស់​ដៃ​លើ​អ្នក​តវ៉ា​អហិង្សា​។ លោក​បាន​មាន​ប្រសាសន៍​ថា “​ គាត់​មាន​ការ​រឹត​បន្តឹង​​​ខ្លាំង​លើ​ការ​ជួប​ជុំ​ជា​សាធារណៈ​និង​ការ​តវ៉ា​”​។

អំឡុង​អាណត្តិ​របស់​លោក ​​មាន​កង​សន្តិ​សុខ​និង​ក្រុម​ស៊ីវិល​បាន​ប្រើ​អំពើ​ហិង្សា​វាយ​ដំ​លើ​កម្មករ​ សមាជិក​សហជីព​ សកម្មជន​ការ​ពារ​សិទ្ធិ​មនុស្ស​ អ្នក​គាំទ្រ​គណ​បក្ស​ប្រឆាំង​ និង​អ្នក​កាសែត​។ពួក​គេ​បាន​វាយ​ប្រហារ​ទៅ​លើ​អ្នក​ចូល​រួម​អំឡុង​ការ​អុជ​​ទៀន​រំឭក​វិញ្ញាណក្ខន្ធនៅឯវត្ត​ភ្នំ​កាល​ពី​ខែកញ្ញា​ និង​ប្រើ​អំពើ​ហិង្សា​បោស​សម្អាត​​​ព្រះ​សង្ឃ​និង​អ្នក​គាំ​ទ្រ​របស់​​គណ​បក្ស​ប្រឆាំង ​​ដែល​ធ្វើ​ការ​តវ៉ា​ដោយ​សន្តិ​វិធី​នៅ​ទី​លាន​ប្រជា​ធិប​តេយ្យ​កាល​ពី​ខែ​មករា​។

នគរ​បាល​បង្ក្រាប​បាតុកម្ម​ និង​កង​រាជ​អាវុធ​​​ហត្ថ​ប្រដាប់​អាវុធ​ បច្ចុប្បន្ន​ត្រូវ​បាន​គេ​ឃើញ​​មាន​​នៅ​តាម​ផ្លូវ​មួយ​ចំនួន​ក្នុង​រាជ​ធានី​ភ្នំពេញ​ ខណៈ​មនុស្ស​ចំនួនប្រាំ​ពីរ​នាក់​ត្រូវ​កង​សន្តិ​សុខ​បាញ់​សម្លាប់​នៅ​ក្នុង​រា​ជ​ធានី​ភ្នំពេញ​ចាប់​តាំង​ពី​ការ​បោះ​ឆ្នោត​ជាតិ​ដ៏​ចម្រូង​ចម្រាស​​កាល​ពី​ខែ​កក្កដា​មក​។ កាល​ពី​ថៃ្ង​ទី​៣​ខែ​មករា​ អ្នក​តវ៉ា​ដែល​ធ្វើ​កូដកម្ម​ចំនួន​ប្រាំ​នាក់​ត្រូវ​បាន​បាញ​់​សម្លាប់​និង​ជាង​៤០​នាក់​រង​របួស​ នៅ​ពេល​មន្ត្រី​កង​រាជ​អាវុធ​ហត្ថ​រាប់​រយ​នាក់​ត្រូវ​បាន​ដាក់​ពង្រាយ​នៅ​លើ​ផ្លូវ​វេង​ស្រេង​ ដើម្ប​​ី​​បង្ក្រាប​ការ​ធ្វើ​កូដ​កម្ម​របស់​កម្មករ​រោង​ចក្រ​​។

លោក​ ឡុង​ ឌី​ម៉ង់​ អ្នក​នាំ​ពាក្យ​សាលា​រាជ​ធានី​បាន​ឲ្យ​ដឹង​កាល​ពី​ម្សិល​មិញ​ថា សាលា​រាជ​ធានី​បាន​ខិតខំ​អស់​ពី​សមត្ថភាព​ដើម្បី​ដោះ​​​ស្រាយ​បញ្ហា​​នៃ​ការ​បណ្តេញ​ចេញ​ពី​ដី​ធ្លី​នេះ​ក្នុង​រយៈពេល​ជាង​១០​ខែ​មក​នេះ​។

លោក​បាន​មាន​ប្រសាសន៍​ថា “ យើង​បាន​​​​​ចាប់​ផ្តើម​ដោះ​ស្រាយ​បញ្ហា​នៅ​តំបន់​បឹង​កក់​ដោយ​សន្សឹមៗ​ ហើយ​ក្រុម​ការ​ងារ​របស់​យើង​​​បាន​បញ្ចប់​ការ​សិក្សា​លើ​តំបន់​មួយ​ចំនួន​សម្រាប​​់​ពួក​គាត់​និង​វាស់​វែង​ដី​ធ្លី​រួច​ហើយ​។ យើង​បាន​​​ដោះ​ស្រាយ​បញ្ហា​ជូន​អ្នក​ភូមិ​ចំនួន​១៧​គ្រួសារ​​​ ​​កាល​ពី​សប្តាហ៍​មុន ​ហើយ​យើង​បន្ត​ដោះ​ស្រាយ​បញ្ហា​​​​​បន្ត​ទៀត​”។

លោក​មាន​ប្រសាសន៍​ប​ន្ថែម​ថា “ សម្រាប​​​​់​តំបន់​បុរី​កីឡា​វិញ​ យើង​បាន​បញ្ចប់​ការ​ងារ​របស់​យើង​រួច​ហើយ​ ហើយ​យើង​កំពុង​តែ​រង់​​​ចាំ​ពេល​វេលា​សម្រាប់​ផ្តល់​ជម្រក​​បណ្តោះ​​​អាសន្ន​ដល់​ពួក​គាត់​​​​ ហើយ​កំពុង​រង់​ចាំ​មើល​ថា​ តើ​គ្រួសារ​ណា​ខ្លះ​នឹង​​អាច​ទទួល​និង​មិន​អាច​ទទួល​បាន​ជម្រក​បណ្តោះ​អាសន្ន​នេះ​” ។

លោក​ក៏​បាន​លើក​ឡើង​ដែរ​ថា ការ​បង្ក្រាប​​​ចាំ​បាច់​ត្រូវ​តែ​ធ្វើ​ឡើង ​ព្រោះ​មាន​ការ​កើន​ឡើង​នូវ​អ្នក​តវ៉ា​អនាធិប​តេយ្យ​ដែល​​​បង្ហិន​បង្ហោច​ទ្រព្យ​សម្បត្តិ​​​នៅ​តាម​ផ្លូវ​មួយ​ចំនួនក្នុង​រាជ​ធានី​ភ្នំពេញ​។

​លោក​បាន​មាន​ប្រសាសន៍ថា “ ភាព​អនា​ធិ​បតេយ្យ​នេះ​គឺ​កើត​ចេញ​ពី​អ្នក​តវ៉ា​ជ្រុល​និយម​ដែល​បង្កើត​ភាព​អនាធិបតេយ្យ​ និង​​កើត​ចេញ​ពី​ជន​បង្ក​ជម្លោះ​ទី​៣​ ដែល​បណ្តាល​​​ឲ្យ​មាន​មនុស្ស​ស្លាប់​នោះ​”។

លោក​បាន​មាន​ប្រសាសន៍​បន្ថែម​ទៀត​ថា “ ការ​បង្ក្រាប​នានា​​មិន​មែន​ចាប់​ផ្តើម​នៅ​ពេល​គាត់​ឡើង​កាន់​អំណាច​នោះ​ទេ​ វា​គឺ​ដោយសារ​តែ​ចាប់​តាំង​ពី​លោក​ឡើង​កាន់​តំណែង​មក​ ភាព​អនាធិបតេយ្យ​នេះ​បាន​កើត​ឡើង​ដំណាល​គ្នា​”៕ ស៊ុយ​ឈាង​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស