30 C
Phnom Penh

ជន​​​ជាតិ​​​ភាគតិច​​​គ្រឹង​​​តវ៉ា​​​​​​មុខ​​​តុលាការ​​​ខេត្ត​​​ទាម​​​ទារ​​​ឲ្យ​​​ដោះ​​​លែង​​​អ្នក​​​ជាប់​​​ចោទ​​​ពី​​​បទ​​​លួច​​​ដុតឈើ

ដោយ ឌឹ ខេមបូឌា ដេលី

បទវិភាគ

អ្នក​ភូមិ​ជន​ជាតិ​ភាគ​តិច​គ្រឹង​ជាច្រើ​ន​នាក់​បាន​តវ៉ា​នៅខាង​ក្រៅ​សាលា​ដំបូង​ខេត្ត​រតន​គិរី​កាល​ពី​ម្សិលមិញ​ ដើម្បីទាម​ទារ​ឲ្យដោះ​លែង​បុរ​ស​ជន​ជាតិ​គ្រឹង​ម្នាក​់​ដែល​កំពុង​ជាប់​ ឃំុ​បណ្តោះ​អាសន្ន​ពីបទ​លួច​ដុតគំនរ​​ឈើ​នៅលើ​ដីដែល​សហគមន៍​​​​នោះ​​​បាន​លក់​កាល​​ពីឆ្នាំ​២០០៧​ ប៉ុន្តែ​ អះ​អាង​ថា ខ្លួន​មិន​ដែល​ទទួល​បាន​លុយ​ទេ​។

លោក ហាំង​ នឿ អាយុ​៥០​ឆ្នាំ​ត្រូវ​បាន​​ចាប់​ខ្លួន​កាល​ពីថ្ងៃ​សុក្រ​ ចំពោះការ​ដឹកនាំ​អ្នក​ភូមិ​មួយក្រុម​ទៅកាន់​កន្លែងមាន​វិវាទ​ដី​ធ្លី​នោះ​ និង​បាន​ជួយ​ដុត​គំនរ​ឈើ​ដែល​គេ​ទុក​សម្រាប់​សាង​សង់​ការិយាល​័យ​របស់​ម្ចាស់​ដី​ថ្មី ​។​​​​គាត់​ត្រូវ​បាន​ចោទ​ប្រកាន់​ពីបទ​បំផ្លាញ​ទ្រព្យ​សម្បត្តិ​ឯកជន​មួយ​ថ្ងៃ​ក្រោយ​មក​ និង​កំពុង​ជាប់​ឃុំ​នៅពន្ធនាគារ​ខេត្ត​​។

លោក​ កាវីដ ពឿង បាន​និយាយ​ថា គាត់​និង​អ្នក​ភូមិ​ជន​ជាតិ​គ្រឹង​៥១​នាក់​ទៀត​បាន​ជួប​ជុំ​គ្នា​នៅ​សាលា​ដំបូង​ខេត្ត​អស់​រយៈ​ពេល​​៦ម៉ោង ​ស្រែក​ទាមទារ​ឲ្យ​ដោះលែង​លោក ហាំង​ នឿ ដែល​ពួកគេ​អះអាង​ថា បាន​​ការ​ពារ​ផល​ប្រយោជ​ន​​៍​​របស់​សហគមន៍​នេះ​ដោយ​ត្រឹម​ត្រូវ​។ គាត់​បាន​និយាយថា “ យើង​តវ៉ា​នៅថ្ងៃ​នេះ​ដើម្បី​ទាម​ទារ​ឲ្យដោះលែង​ លោក នឿ ពីព្រោះគាត់​គ្រាន់​តែ​ការ​ពារ​សិទ្ធិ​របស់​អ្នក​ភូមិ​ប៉ុណ្ណោះ​”។

លោក​ សួស ឡា ប្រធាន​តុលាការ​ខេត្ត​បាន​មាន​ប្រសាសន៍ថា អ្នក​តវ៉ា​មិន​​​​អាច​​​ជួយ​​​បាន​​​ទេ​​​។ លោក​បាន​មាន​ប្រសាសន៍ថា “ ខ្ញុំ​មិន​ចង់​ជ្រៀត​ជ្រែក​ទេ​ពីព្រោះ​នេ​ះគឺជា​រឿង​របស់​តុលាការ​ ប៉ុន្តែ ពួក​គេ​គួររក​មេធាវី​ឲ្យ​ធ្វើ​ការ​ជាមួយ​តុលាការ​ដើម្បី​ដោះស្រាយ​បញ្ហា​នេះ​ជំនួស​ឲ្យការ​តវ៉ា​វិញ​”។

អ្នកភូមិ​និយាយ​ថា ​ពួក​​​គាត់​​​​បាន​លក់​ដី​របស់​ខ្លួន​ទំហំ​៤០០ហិកតា​ទៅឲ្យពាណិជ្ជករ​ឈ្មោះ សឹុង​ វិសិដ្ឋ​ កាល​ពីឆ្នាំ​២០០៧​សម្រាប់​​​​ធ្វើ​ចម្ការ​កៅស៊ូ​ ប៉ុន្តែ មិន​ទាន់​បាន​ទទួល​លុយ​ចំនួន​២០.០០០ដុល្លារ​ដែល​ពួក​គេ​សន្យា​​​​បង់​​​ឲ្យ​នោះ​ទេ​។

លោកប្រធាន​តុលាការ​រូប​នេះ​បា​ន​មាន​​ប្រសាសន៍ថា លោក​មិន​ដឹង​អំពី​ដំណើ​​រ​រឿង​នៃ​ជម្លោះ​នេះ​ទេ​ ពីព្រោះ​អ្នក​ភូមិ​មិន​ដែល​ធ្វើ​ពាក្យ​បណ្តឹង​ឡើយ​។

លោក​បានមាន​ប្រសាសន៍ថា “ ខ្ញុំ​មិន​ដឹង​អំពី​ការ​លក់​ដី​នេះ​ទេ​ ហើយ​​យើង​មិន​អាច​សើុប​អង្កេត​បាន​ទេ​លុះត្រា​តែ​ពួកគាត់​ធ្វើ​ពាក្យ​បណ្តឹង​មក​តុលាការ​សិន​។ តើ​តុលាការ​សើុបអង្កេត​ដោយ​គ្មាន​ពាក្យ​បណ្តឹង​យ៉ាង​ម៉េច​ទៅ​?”។

អ្នក​ភូមិ​​​​ទើប​​​​តែ​ធ្វើ​ពាក្យ​បណ្តឹង​ទៅ​អង្គ​ការ​អាដហុក​កាល​ពីថ្ងៃ​សុក្រ ពីព្រោះ​នេះ​គឺ​ជា​លើក​ទី ១​ហើយ​ ដែល​ពួកគាត់​បាន​ឃើញ​គេព្យាយាម​រាន​ដីនេះ​។ លោក ឆាយ​ ធី អ្នក​សម្រប​សម្រួល​របស់​អង្គការ​អាដ​ហុក​ប្រចាំ​ខេត្ត​រតនគិរី​បានមាន​ប្រសាសន៍ថា អង្គការ​របស់​លោក​នឹង​ធ្វើ​ពាក្យ​បណ្តឹង​ទៅ​តុលាការ​នៅពេល​ឆាប់​ៗ​នេះ​។ លោក វិសិដ្ឋ​ ដែល​ជា​ពាណិជ្ជករ​បាន​អះ​អាង​ថា អ្ន​កភូមិបាន​ទទួល​លុយ​អស់​ហើយ​។ លោក​បាន​និយាយ​ថា “ ខ្ញុំ​បាន​បង់​លុយ​ចំនួន​២០.០០០ដុល្លារ​ទៅ ឲ្យម្ចាស់​ដីរួច​ហើយ បន្ទាប់​ពីខ្ញុំ​បាន​ទិញ​ដី​នោះ​ពីពួកគាត់​កាល​ពីឆ្នាំ​២០០៧​”។

លោក​ វិសិដ្ឋ បានបន្ថែម​ថា ចាប់​តាំង​ពី​ពេល​នោះមក​តុលាការ​បាន​ប្រគល់​ដី​នោះ​ទៅ​ឲ្យអ្នកស្រី​  លី សុខ​នីម ពាណិជ្ជករ​ដែល​បាន​ទទួល​សិទ្ធិកាន់​កាប់​ដីនេះដោយសារ​កម្ចី​​ដែល​គាត់​បាន​​ខ្ចី​ពីអ្នកស្រី​កាល​ពីឆ្នាំ​២០១០​ និង​មិន​អាច​សង​​​​វិញ​​​​​​បាន​​៕​​​​គឹម​​​ហឿន​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស